Ukiuni sisamani sorsunnermi tuppallersarneqartarneq
JUGOSLAVIAASIMASUMI ukiuni sisamani sorsunnermi inuppassuit naalliuutissaqartarsimaqaat, sunillu tamanik amigaateqarluinnartarsimallutik. Taakkununnga ilaapput Jehovap nalunaajaasui, aalajaallutik ’Guutimik tamanik tuppallersaasumik’ pallorfiginnittuartut. — 2 Korintumiut 1:3.
Sarajevomi inuit sorsunneq tamaat illoqarfissuarmi ungusaaqqasumiinnerminni allatiguttaaq naalliuperaartarsimaqaat. Innaallagiaq, imeq, ikummatissat nerisassallu amigaatigisarsimavaat. Pissutsini taama ilungersornartigisuni Sarajevomi Jehovap Nalunaajaasuisa ilagiivi qanoq ilillutik ingerlasinnaasimappaat? Kristumiut nunanit qanittuneersut ajornartoortunut ikiuutissarpassuarnik eqqussiniarlutik inuunertik navianartorsiortittarsimavaat. (Takuuk Vagttårnet 1. novembari 1994-imoortoq, qupperneq 23-27.) Qatanngutivut Sarajevomiittut aamma pigisaminnik aveqatigiittarsimapput, anersaakkut tunissutinik tunioraattarnissartik pingaarnerpaatillugu. Illoqarfiup unguneqarsimanerani kristumiu nakkutilliisoq ima nalunaaruteqarsimavoq:
„Ataatsimiinnerit pingaarteqaavut. Nuliaralu, soorlu allat 30-t taama pisartut, ataatsimiigiarluta utimullu 15 kilometerit pisuttarpavut. Ilaannikkut nalunaarutigineqartarpoq ataatsimiinnitta nalaani imermik pissarsinissaq ajornarunnaassasoq. Qatanngutivut qanoq iliussappat? Angerlarsimaannassappat imaluunniit ataatsimiigiassappat? Qatanngutivut ataatsimiigiarusunnerusarput. Ikioqatigiittuaannarput piminnillu avitseqatigiittarlutik. Ilagiinni qatanngut arnaq ataaseq illoqarfiup avataani orpippassuarnut qanittumi najugaqarpoq; taamaattumik qisussarsinissaq taassumunnga ajornannginneruvoq. Iffiorfimmi sulivoq akissarsianilu qajuusanngorlugit pisarlugit. Ajornanngikkaangat ataatsimiigiaruni nassatassaminik angisoorujussuarmik iffiortarpoq. Ataatsimiinneq naagaangat ataatsimiittut tamaasa iffiaminermik angerlaassassaannik agguartarpai.
Qatanngutit angutit arnallu arlaannaataluunniit qimagaasutut misiginnginnissaa pingaartorujussuvoq. Arlaannattaluunniit naluaa kina tulliulluni ajornartorsiulissanersoq ikiorneqarnissaminillu pisariaqartitsilerluni. Ilaanni aqqusernit sermersimallutik quasartut qatanngut arnaq napparsimasoq ataatsimigiiarniartoq qatanngutinit angutinit inuusuttunit nukittuunit qamutinik kaassuarneqarluni ataatsimiigiartinneqarpoq.
Qatanngutit tamarmik oqaluusseqataasarput, Jehovallu suliniutivut pilluaqqusimavai. Bosniami ajornartorsiornerput takusimavaa, amerliartornermilli pilluaqqusimavaatigut, amerliartornermik sorsunneq sioqqullugu misigisimanngisatsinnik.“
Naak ajornartorsiorneqaraluaqisoq Jehovap nalunaajaasui Jugoslaviaasimasumi sorsuffinni allaniittut aamma amerliartorsimapput. Oqaluussisartut eqimattat avinngarusimasumiittut pillugit Jehovap Nalunaajaasuisa Kroatiami immikkoortortaqarfiat ima nalunaarpoq: „Qatanngutivut Velika Kladušamiittut ajornartorsiorsimaqaat. Illoqarfik arlaleriarluni saassunneqarsimavoq, qatanngutittalu kalluunnaveersaartuunertik Kroatiamiunut, Serbiamiunut musliimillu sakkutuuinut assigiinngitsunut nassuiartariaqartarsimavaat. Parnaarunneqartarlutillu, unatarneqartarlutillu, perlimoortarlutillu, navianartorsiortarlutillu allarpassuarnik misigisaqartarsimapput. Tamarmilli aalajaattuaannarsimapput suliaminnillu Jehovap pilluaqqusinera immikkut pisinnaatitaaffiusoq misigisimallugu.“
Taamatut misilinneqartaraluarlutik Velika Kladušami ungasinngisaanilu Bihaćimi Jehovap nalunaajaasui amerliartortuarsinnarput, tusarliussaq tuppallernartoq Guutimeersoq inoqatiminnut nakimaallutik oqaluussissutigiuaramikku. Illoqarfinni marlunni taakkunani oqaluussisartut 26-upput, katillugit 39-nik angerlarsimaffimmi Biibilimik atuaqqissaaqateqartarlutik.