„Aniseqinagit!“

„JEHOVAP nalunaajaasui ataaseq marlulluunniit matunnut kasuttussagaluarpata, aniseqinagit!“ aviisi Corriere della Sera siunnersuivoq. Aviisip tikkuarpaa Italiap avannaani Trevisomi pisimasoq, angutip niuertup 1.000.000 lire-t sinnerlugit annaangajammagit (3500 koruunit missigi) Jehovap nalunaajaasuinik marlunnik pulaarneqarami itigartitsinermigut.

Aviisi naapertorlugu oqaluussisartut ima oqarlutik aallarniisimapput: „Ulloq manna ilinnut ajunngitsuuvoq. Marluulluta Jehovap nalunaajaasuuvugut naleqartumillu ilinnut tunniussassaqarpugut.“ Niuertulli inussiarniitsup matu matorujussuarpaa, suliluunniit oqaasissatik naanngikkaat.

Angutip tusarnaarsimasuugunigit, paasisimassagaluarpaa aningaasivini, illoqannginnersami issiaartarfimmi nassaarisimasartik tunniukkiartoraat. Allatut ajornaqimmat oqaluussisartut aningaasivik imaalu politeeqarfimmut qaninnerusumut tunniukkiartortariaqarsimavaat. Aqaguani politiit aningaasivimmik piginnittumut tunniussiartorput.

„Allat tamarmik taamaallaat [Jehovap nalunaajaasui] taakkua marluk iluatsitsivallaanngitsut pinnatik, Il Gazzettino di Treviso allappoq, „qularnanngitsumik . . . aningaasivik naleqartunik imalik allat tigummiinnarsimassagaluarpaat. Jehovalli nalunaajaasui naamik, tamatigorluinnaq unneqqarissuupput.“

Suumuna Jehovap nalunaajaasui „tamatigorluinnaq unneqqarissunngortittaraat“? Jesus Kristusip Guutimik tullermillu asanninnissamik ajoqersuutaanik malinninnertik pissutigaat. (Matîuse 22:37-39) Tamannalu pillugu Jehovap Nalunaajaasui illumiit illumut angalaartarput ’nunassamik nutaamik’ nuanningaartumik Jehova Guutip pilersikkumallugu neriorsuutigisaanik nutaarsiassaq nuannersoq oqaluussissutigalugu. Neriuutissamik tamatuminnga tusarliussaq pigisanit timip piinit naleqarnerujussuuvoq. — 2 Pîtruse 3:13.