Arnat nunarsuarmi tamarmeersut
INUIT siulliit Guutimut pikitsitsimmata Guutip siumut siulittuutigaa namminneq kinguaassamillu tamatuma kingunipilui nassariumaagassaat. Jehovap Eva oqarfigaa: „Uiit pilerissuseqarfigissavat, taannali ilinnut naalagaassaaq.“ (1 Moses 3:16) Naak eqqartuussut tamanna atoraluartoq Biibilimi kaammattuutigineqarpoq arnat ataqqingaarneqartariaqartut, arnallumi millionilippassuit misilittagarereersimavaat ilaqutariittut Biibilimi najoqqutassiat atoraangamikkik pilluarnerusarlutik naammagisimaarnarnerusumillu inuuneqarsinnaallutik.
Inuup pisinnaatitaaneranik nalunaarusiaq nutaaq malillugu nunarsuaq tamakkerlugu arnarpassuit naqisimaneqartarsimapput, atornerlunneqartarsimallutik nikanarsagaasarsimallutillu. Nalunaarusiamut oqaaseqarluni aviisi International Herald Tribune allappoq: „Nunat 193-t pillugit peqqissaartumik nalunaarusiami avaanngunartumik ersersinneqarpoq assigiinngitsumik pineqartarneq atornerlunneqarnerlu arnat ulluinnarni atugarisaraat.“
Assersuutigineqarsinnaasut ilamerngi makkuupput: Afrikap qeqqani arnat inuusuttut nunalerinermi suliassat ilungersunarnerpaat suliarisariaqarpaat. Nukappiaqqat niviarsiaqqaninngaaniit pingasoriaammik atuarfinni ilinniartinneqartarsimapput. Nunami ataatsimi arnat allasiornissaat inerteqqutaasimavoq angutinulli taamaannani. Afrikami nunami allami inatsisit malillugit angutip nuliani allasiorsimasoq toqussinnaavaa pineqaatissiissutiginagulu, taamaanngilarli arnap uini ilumuunngitsuliortoq toqukkaluarpagu.
Nalunaarusiap ilisimatitsissutigaa Amerikap kujalliup ilaani arnat pinerluffigineqarsimasut politiinik ikiorumaneqarpiartanngitsut. Nalunaarusiami aamma erserpoq arnat sulisartut angutinit akissarsiamikkut 30-miit 40-it procentii tikillugit minnerusut naammagisariaqartarsimagaat.
Asiap ilaani arnat amerlanertigut pinngitsaalillugit naartusinnaajunnaarsinneqartarput imaluunnit naartuersinneqartarlutik. Nunami ataatsimi 500.000-nik atortittartoqarpoq amerlasuullu angajoqqaaminnit akigineqarsimapput angajoqqaat namminneq pitsaanerusumik angerlarsimaffissaqarnissaminnut akissaqarumammata. Nunami allami politiit isumagisariaqagartarpassuisa ilagaat „pigisat aningaasalluunniit arnap katernaap katinnermini nassatai pillugit toqutsisarneq“, angutip taassumaluunniit ilaqutaasa nuliaasoq toquttarsimavaat katinnermini aningaasat imaluunnit pigisat nassatai ilimagisaminnut eqquutinnginnerat pissutigalugu.
Jesus Kristus pillugu Biibilimi allassimavoq: „Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa. Akiliullugit iperagaatissavai qunutitaanermit persuaalliorfigineqarnermillu, inuunerat erlinnanngaarmat taassuma isaani.“ (Tussiaat 72:12-14) Taamaattumik neriulluarnissamik pissutissaqarluarpoq. Arnat nunarsuarmi tamarmeersut taamanikkussaq qilanaarisinnaavaat pissutsit iluarsivinneqarnissaat piviusunngornissaa. (wE 15/6 95)