Naalagaaffimmik oqaluussissutiginninnermit nutaarsiassat
Afrikami meeqqat nutaarsiassamik nuannersumik nalunaajaasut
Jesus makisitaasimatsiaannartoq angut Afrikamiu Jerusalemimut tikeraarpoq. Biibilimi atia eqqartorneqanngilaq. Taamaallaat ilisimaneqarpoq ’angut Etiopiamiuusoq tassaasoq kunngip kiffarsua, Etiopiap kunngiata arnap Kandakip pissaaneqartitaa, aningaasaataanik tamanik paarsisoq.’ Sooq Biibilimi eqqartorneqarpa? Inngilip Filip ivanngiiliumik oqaluutiginnittoq nalunaajaaffigimmagu ’nutaarsiassaq nuannersoq Jesusimik tassunga oqaluutigeqqullugu.’ Etiopiamiu taanna siullersaalluni Afrikami nalunaajaasunngorpoq kristumiut ilagiivinut ilaalerluni. — ap. sul. 8:26-39.
Ullumikkut Jehovap nalunaajaasui Afrikamiittut arlalinnik hundrede tusindiupput. Periarfissat suulluunnit atortarpaat nutaarsiassamik nuannersumik Jesusimik allat avitseqatiginiarlugit. Misigisat takutippaat allaat meeqqat Afrikamiittut tamatumunnga peqataasut.
□ Nairobimi Kenyami niviarsiaqqat Sandy aamma Priya, tamarmik aqqanilinnik ukiullit, eqqaamioriipput. Pinnguaqatigiillutik nuannariissimapput atuakkanillu oqaluttuaatinik paallaasseqatigiittarlutik. Priyap angajoqqaavisa Jehovamut nalunaajaasut atuaqatigisalerpaat. Priyalu maanna assigiinngitsunik atuakkanik qiniinnagassaminik katersaateqalerpoq, taakkulu ilaat ingammik nuannarinerpaasarilerpaa tassa Ajoqersuisorsuaq tusarnaarparput Napasuliaq Alapernaarsuiffik-up Peqatigiiffianit naqiterneqarsimasoq. Ikinngunni Sandy atuakkamik ’Ajoqersuisorsuaq’-mik avitseqatigisalerpaa, niviarsiaqqallu taakku marluullutik akuttunngitsumik atuaqqissaartalerput.
Sandyp anaanaata Unap anglikanerit oqaluffiannut ilaasortaasup panimmi Jehovap Nalunaajaasuisa atuagaataannik atuartarnissaa kissaatiginngilaa. Anaanani akerliugaluartoq atuaqqissaartarnini ingerlatiinnarpaa. Ullut ilaanni Sandyp anaanani qinnuigaa tusarnaaqqullutik suna eqqartorneritsik. Ulloq taanna kapitali niviarsiaqqat atuagassaat qulequtaqarpoq ’Angutit marluk inuuissiortut’. Una tusarnaarpoq assullu killitsilluni. Erniinnaq Priyap anaanaanukarpoq Biibilimut tunngasunik apeqqutissarpassuaqalerluni.
Priyap anaanaata Una nalunaajaasunik atuaqateqartalernissaa isumagaa. Erniinnarlu Una nammineq ilikkarsimasani suleqatiminut Dollymut eqqartortalerpai. Tamatumanilu Priya aqqanilinnik ukiulik suli siumukariartorpoq aalajangerlunilu Jehovap Nalunaajaasuisa ataatsimeersuarneranni Jehovamut tunniulluinnarluni kuisinniarluni. Ulloq taanna ataatsimeersuarnermi Priyap nuannaarneranut allisaataasimassaqaaq Una Dollylu aamma kuisimmata!
□ Afrikami nunat ilaanni Jehovap Nalunaajaasuisa sulinerat oqartussaasunit nalunaarsorneqanngilaq. Nunat taamaattut ilaanni nalunaajaasut upperisarsiornerisa akaarineqartarnerat naliginnaasuuvoq. Nunami taamaattoqarfiusumi atuarfimmi nukappiaraq arfineq-marlunnik ukiulik nukaalu arfinilinnik ukiulik — nalunaajaasut meeraat — atuarfimminni upperisarsiornikkut qinuleraangata peqataasannginnissaminnut akuerineqarsimapput.
Ullut ilaanni ilinniartitsisup nutaap piumasaraa nukappiaqqat meeqqat allat ilagalugit qinoqataanissaat. Angajulliup naaggaarsimavaa ilinniartitsisuminillu unatarneqarsimalluni. Nukaa, Shadrak, arfinilinnik ukiulik atuarfiup naalagaata allaffianukarpoq. Ilinniartitsisup nutaap atuarfiullu naalagaata apersorpaat sooq allat ilagalugit peqataarusunnginnersoq. Aperaat angoqqaaminik unatarneqartarami annilaanganersoq. Araaberisut pikkorilluinnarluni akivai: „Naagga, Guuti pallorfigisara ularussinerup Guutiginngilaa eqqissinerulli. Angerlarsimaffinni Jehovamut nalunaajaasooriarlunga atuarfimmi allamik upperisarsiorsinnaanngilanga!“ Tamatumalu kinguneraa ilaasannginnissaat.
Kuisereerlunilu angut Etiopiamiu apustilit suliait-ni eqqartorneqarpoq ’ingerlavimini tipaatsulluni ingerlavigaa’. (ap. sul. 8:39) Ullumikkuttaaq nunarsuup ilaanut Afrikamut Naalagaaffimmik oqaluussissutiginnittut tipaatsullutik ’nutaarsiassaq nuannersoq Jesusimik oqaluutigisarpaat’. — ap. sul. 8:35. (wE 1/5 95)