Inuuneq qanoq eriagitigaajuk?

INUUSUTTUARAQ nukappiaraq inissiarsuarmi quleriit arfineq-pingajussaannit pissilluni imminorpoq. Atuakkami atuarsimavaa imminorluni pissinneq ’annernaranilu, isumakulunnaranilu siooranartoqanngitsoq, allaat nuannersuulluni’. Atuakkamik, Japanimi saqqummersinneqarsimasumik, tamatuminnga atuakkiortoq oqarsimavoq imminorneq „inuunermi qinigassat ilaannaattut“ saqqummiussimallugu.

Inuit imminortut kisimiunngitsoq ullumikkut inuunermik ataqqinninnginnermik ersersitsisarput. Soorlu aqqusinikkut angallattut soqutigittaatsut inuunermik ataqqinninnginnermik ersersitsisarput. Ilaat allaat imigassartorsimallutik biilertarput, ajutoorsinnaanermullu aarlerinaat allisittarlugu.

Allat nuannaarniutinik ingasaassinermikkut takutittarpaat annikitsuinnarmik inuunertik eriagigitsik. Naak pujortartarneq toqussutaasinnaagaluartoq, allaallu arriitsumik imminornermik taaneqarsimagaluartoq, pujortartartorpassuit taamaatikkusunneq ajorput. Silarsuarmilu kanngunartuliorfioqisumi maani inuit minguissutsimik pingaartitsinissaminnut taarsiullugu tamalikallutik inuupput, ilaatigut allaat toqumik kinguneqartartumik.

Ilaasa allaat nalullugu inuunertik sivikillisartarpaat nerivallaarnermikkut, aalakoornartutorpallaarnermikkut, uninngavallaarnermikkut nuannaarniutinillu ujartuivallaarnermikkut. Atuakkiortoq Japanimiu Shinya Nishimaru ima mianersoqqusisimavoq: „Killeqanngitsumik nerinersuaq timip ingerlasiinik akornusersuisarpoq, aammalu ilorrisimaarniarnersuaq nuannaarniutinillu ujartuinersuaq inuit inuummarissusiannik aseruisarput. Inuit ilaat itsaq inuusutut ima oqarsimasutut isumaqarput: „Nerillutalu erngutiinnarniarta, aqagu toqussagatta!“ — Jesaja 22:13; 1 Korintumiut 15:32.

Ullumikkut inuppassuit inuunerminnik suusupaginnittarput. Taamaattumik ima aperissalluni naleqquppoq: „Inuuneq qanoq pingaartitsigaajuk?“ Sunaluunniit akigalugu inuuneq sernissortariaqarpa? Ullumikkullu inuunitsinnit naleqarnerusoqarpa?