Naalagaaffimmik oqaluussissutiginninnermit nutaarsiassat

Jehova akeqqaminit pissaaneqarneruvoq

NUTAARSIASSAMIK nuannersumik oqaluussissutiginninneq Diaavulup inngilipiluisalu akornusersorniartuarsimavaat upperisarsiorneq eqqunngitsoq anersaarsiornerlu atorlugit. Satanip siunertapilua Biibilimi 2 Korintumiut 4:4-mi eqqartorneqarpoq: ’Taakkunani uppinngitsut isumaat silap matuma guutiata tappiillisippai, Kristusip tassa Guutip assingata naalannassusianik iivangkiiliup qaamangaarnera taakkununnga qaamaqqunagu.’

Jehova Guutili Satanimit pissaaneqarneruvoq. Guutip piumasaata, tassa ’inuit tamaasa annaqqullugit sallusuissummillu ilisarsileqqullugit’, naammassineqarnissaa Jehovap akeraasa akornusersinnaanngilluinnarpaat. (1 Timûtiuse 2:4) Tamanna erseqqissarneqarpoq Australiami Guutip naalagaaffianik oqaluussissutiginninnermit nutaarsiassanit tulliuttunit.

◻ Ukiuni 20-ni upperisarsiornermik sammisaqarsimanani arnaq Biibilimik atuartaqqilerpoq. Biibilimik soqutiginnileqqinnera tamanna apeqqutissarpassuaqalerneranik kinguneqarpoq, taamaattumik Guutimut qinuvoq akissutisinissaminik ikioqqulluni. Ilumoortoq nassaarerusuppaa, nalunngilaali upperisatoqqaminut uteqqikkaluaruni ajornartorsiutini aaqqinnavianngitsoq. Ujaarlerninili aallartippaa atornikunik atuagaarniarfimmukarluni atuakkanik upperisarsiornermut tunngasunik pissarsiorluni.

Pisiniarfimmik piginnittup eqqaalerpaa atuagaateqarluni upperisarsiornermut tunngasumik, pisiniarfimmiunngitsoq, angerlarsimaffimminili. Atuakkap taaguutaa tassa pâratîsime nuname nâgssáungitsumik inûsínauvutit, Jehovap Nalunaajaasuinit naqiterneqarsimasoq. Arnap atuagaq tiguartisimaaqaluni atuarpaa Biibilimullu tunngatillugu apeqqutissami ilarpassui akissutissarsillugit. Jehovap Nalunaajaasui oqarasuaatit allattorsimaffianni ujariarlugit attaveqarfigai Biibilimillu akuttunngitsumik atuaqqissaaqatigineqartalerluni.

◻ Arnaq inuusuttoq aviisimi ilanngussaqarsimavoq aarnussamik tuniniaalluni. Tuniniakkani neqeroorutigaa tassaanerarlugu ’aarnuaq ukiunit akullerneersoq pissaaneqartorujussuaq’. Tuniniaaneq tamanna Jehovap nalunaajaasuisa ilaata malugaa. Aalajangerpoq oqarasuaatip normuanut ilanngussimasaanut sianerfiginiarlugu, oqaloqatiginiarlugu aarnussap pissaaneqarneragaaneranut tunuliaqutaasoq pillugu. Anersaapiluit sulinerannik Biibilimi allassimasut pillugit oqaloqatigaa. Arnaq inuusuttoq oqaluttuarpoq ullut marlussuit tamatuma siorna Guutimut qinusimalluni anersaapilunnit ajornartorsiortitaanini pillugu ikioqqulluni. Oqarasuaatikkut oqaloqatigeqqinnissaanik nalunaajaasup isumaqatigiissuteqarfigaa.

Sianeqqimmat arnaq inuusuttoq angerlarsimanngilaq. Anaanaatali oqarasuaat tiguaa, taannalu oqarpoq: „Naluara paniga qanoq oqaluttuussimanerit, tupinnaqisumilli pisoqarpoq!“ Oqaluttuarpoq siullermik sianernerata kingorna paniata assiliaatini atuagaatinilu Satanisiorpalaartut tamaasa eqqarsimagai Biibililu atualerlugu.

Kinguninngua arnaq inuusuttoq pulaarneqartalerpoq, ingerlaannarlu Jehovap nalunaajaasui ilagalugit Biibilimik atuaqqissaartalernissaminut akuersivoq. Aamma Jehovap nalunaajaasuisa kristumiutut ataatsimiittarnerinut najuuttalerpoq. Aamma tamatumuunakkut Jehovap anersaapiluit ajugaaffigai Biibilimi sallusuissut pillugu eqqorluartumik ilisimassutip qaamatinneratigut.