Inuuissiornerit toqumik kinguneqarsimasut
INUUISSIORNERIT ullumikkut inuit amerlanersaannit ileqqutut ippinnaateqanngitsutut isigineqarput. Biibilimili ileqqulersuut tamanna iluarinanngitsumik saqqummiunneqarpoq. Siullermik, Guutip kiffaasa aalajaatsut inuuissiortarsimanerannut takussutissaqartitsinngilaq.
Inuuissiornerit Biibilip eqqartugai marluinnaat tassaapput naalakkat Guutimut akeraasut inuuissiorneri. Inuuissiornerni taakkunani tamani pillaalluni toqutsineqarpoq, taamaalilluni qaaqqusat kunngip iluarinngisaasa ilaannik toqutsinermik nuannaapiluutiginnitsillugit. Pisumi siullermi Faraop, Egyptenip kunngiata, iffiortumi naalagaat toqutaatippaa. (1 Moses 40:2, 3, 20, 22) Egyptenimi naalagaq taanna nerersuarnermi taamaaliorpoq atorfilittani taanna kamaakkamiuk. Pisup aappaani Herodesip, Galilæami naalakkap ileqqorluttup, Johannes Kuisisoq niaquersippaa niviarsiaq nerersuarnermi qitittoq nuannaartinniarlugu. Pisut maajunnarsimat! — Matîuse 14:6-11.
Inuuissiornerit Biibilimi eqqartorneqartut taakku immikkut ittuuppat? Taamaavinngilaq. Oqaluttuarisaanermik allattartoq juutiusoq Josefus naapertussagaanni pisimasut taakku qaqutigoortuusimanngillat. Inuuissiortoqarnerani aliikkusersuutitut pillakkanik toqutsisarsimanermik assersuutinik taanna saqqummiussaqarpoq.
Assersuutigalugu, Jerusalemip ukiumi 70-imi u.n.k. aserorneqarnerani juutit 1.000.000-it nungutitaaffigisaata 97.000-illu tigusatut aniguiffigisaata kingorna pisimasoq taaneqarsinnaavoq. Romamut aqqutaani Romamiut sakkutuut naalagaata Titusip juutit tigusat Cæsareami illoqarfimmut ungasinngitsumiittumut umiarsualiveqarfiusumukaqatigisimavai.
Josefus allappoq: „Titus Cæsaremiinnermini qatanngummi Domitianip inuuia nalliuttorsiutigitissuaarsimavaa, tassanilu aliikkusersuutitut tigusat 2500-t sinnerlugit uumasunut paatillugit ikuallatsillugillu toqutaatissimallugit. Tamatuma kingorna Berytusimut [Beirut] Romamiut Fønikiami nunasiaataanniittumukarpoq, tassanilu ataatani inuuissiortillugu tigusat suli amerlanerusut isiginnaartitsissutigalugit toqutaatissimallugit.“ — The Jewish War, VII, 37.
Tupinnanngilaq The Imperial Bible-Dictionary-mi ima allassimasoqarmat: „Juutit taamani inuusut inuuissiornerit guutipilussiornermut ilaasutut isigisarpaat, ileqqullu inuuissiornermi atuuttut eqqarsaatigigaanni isiginninneq tamanna taamani inuusunit paasilluarneqarsinnaavoq.“
Ukiuni hundredelinni siullerni kristumiut aalajaatsut ileqqumut taama iluarinanngitsigisumik Biibilimi eqqartorneqartumut Romamiunillu taama peqqarniitsuliortigaluni nalliussineqartartumut peqataanissartik ornigisimanavianngilaat. Ullumikkut kristumiut ilumoorusuttut nalunngilaat inuuissiornerit Biibilip eqqartugai ilinniutissanut nammineq pillutik allanneqarsimasunut ilaasut. (Rûmamiut 15:4) Inuuissiorneq ajorput nalliuttorsiutiginninneq taama ittoq inummik ataatsimik ingasattumik pingaartorsiutiginniffiusarmat. Pingaarnerusumillu, Jehovap kiffaasa silatusaarlutik Biibilip inuuissiornernik iluarinanngitsumik eqqartuinera sumiginnanngilaat. (wD 15/7 94)
[Qupp. 24-mi assiliartaq]
Cæsareami arena