Naalagaaffimmik oqaluussissutiginninnermit nutaarsiassat

Nalunngeqatiginnissutsini Biibilimik ajoqersorneqartoq malikkaa

ISRAELIP kunngia David Jehovamut ikioqqulluni ima qinusimavoq: „Saqivungami assuarnaallunga, aniguisinnga saammaallungalu.“ (Tussiaat 26:11) Guutip David iluarinninnerminik ersersitsivigaa assuarnaassutsi attattuaannarmagu. Aamma Jehovap Jesus pilluaqqusimavaa Ataatami qilammiusup piumasaa malimmagu. Columbiami inuusuttuaraq nalunngeqatiginnissutsiminik Biibilimik ajoqersorneqartumik maleruaasoq Guutillu piumasaanik iliornissaminik aalajangiusimannittoq Jehovap pilluaqqusimavaa. Angut inuusuttuaraq taanna ima oqaluttuarpoq:

„Katuullit atuarfianni atuartuutillunga Jehovap nalunaajaasuinit Biibilimik atuaqqissaaqateqatigineqartalerpunga. Atuarfimmili naalagiaqataagaangama ilerasuttalerpunga. Taamaattumik atuarfimmi nakkutilliisumukarpunga (palasiusumut), kiisalu atuarfimmi siunnersortimut sissuertumullu naalagiaqataasarunnaarnissannik akuerisaajumallunga. Akuerisaavunga, ilaasali naalagiarnissannut pinngitsaaliniartarpaannga. Jehovap nalunaajaasuatut kuisereerninni tatineqarnera annerulerpoq. Atuarfimmit anisitaassagaluaruma ataatama angerlarsimaffitsinnit anisitaanissannik sioorasaarpaanga. Siunertaraami universitetimi ilinniagaqassasunga qaffariartuaassasungalu.

Atuarfimmi nakkutilliisup mianersoqqujuartarpaatigut katuulisut pisussaaffitsinnik sumiginnaanaveersaarnissatsinnik. Ukiumut siullermeerluni naalagiartoqarnialermat naanissaa tikillugu toqqoqqavunga. Taava ilinniartitsisoq (palasi) atuagassiaaqqamik Skolen og Jehovas Vidner-imik tunivara oqaluttuullugulu Jehovap nalunaajaasuatut naalagiarnernut ilaasinnaananga. Oqarfigaanga: ’Atuarfimmik allamik nuuffissannik misissuilereerniarit.’ Soorlu oqaatigereeriga atuarfimmit anisitaaguma aamma ataatakkunnit anisitaasussaavunga. Jehovamulli qinuvunga atuaqatinnullu peqqissaartumik nalunaajaasarnera ingerlatiinnarlugu.

Atuanngiffeqarfissanngorpoq. Atuanngiffeqareeratta aamma naalagiarnissamut piffissanngoqqippoq. Atuarfimmi nakkutilliisoq palasillu allat oqaluffeeqqap saavani qeqarput, anngiiaatissatsinnik tusarnaarnissaminnut piareersimallutik. Annilaartorujussuuvunga. Iserpunga ingillungalu, ilerasoqaangali. Erinarsorlutik aallartimmata eqqarsarpunga ’Tamaaniuna susunga? Jehova Guutigaara. Qunutuujusariaqanngilanga killuutigalugulu. Sumiginnarsinnaanngilara. Taassumami sumiginnanngisaannassavaanga.’ Guuti qinnuigaara sapiissuseqalerseqqullunga. Taava oqaluffeeqqamit anivunga anngiiartussallu tunuleriiaarsimasut ilannguffigalugit. Atuarfimmi nakkutilliisumut anngukkama oqarpunga: ’Ilinniartitsisoq, anngiiariartorlunga agginngilanga.’ Oqarpoq: ’Taamatut eqqarsarlunga.’ Oqaluttuuppara tamatuma kingunerisinnaasai nalunngilluinnarlugit, naalaginarnermulli ilaanissannut nalunngeqatiginnissutsima akuerinngikkaanga. Biibilimit ilinniakkama akerlianit iliorsinnaanngilanga.

Isigaanga, qungujullunilu oqarluni: ’Kakkageqaakkit. Nalunaajaasut tamassi nersortarialiuvusi. Guuti salliutipparsi qanorluunniillu kinguneqassagaluarpat inatsisaanut naalannannissassinnut piumassuseqarlusi. Taamatut ingerlaannarit. Eqqortumik iliorputit. Katuullit tamarmik ilittulli eqqunaraluaqaat ilungersuussillutik Guutimullu asannillutik. Maannamiit upperisarsiornikkut iliuutsitsinnut tamanut ilaannginnissannik akuerisaavutit.’ Nuannaartorujussuuvunga! Nalunngeqatiginnissutsima Biibilimik ajoqersorneqartup maleruarnissaanik aalajangiusimanninnera Jehovap pilluaqquaa.

Aqaguani atuarfimmi nakkutilliisoq atuartunut oqarpoq: ’Upperisarsiortut allat uatsinnit siuarsimanerupput. Sooq taakkunatut uagut inngilagut, Guutimut asanningaarluta ilungersuussilluta tamanillu pingaarnerpaatillugu kiffartorfiginissaanik kissaateqarluta? Tamanna pingaarnerpaatittariaqaraluarparput.’

Atuarfimmi nakkutilliisoq piffissap ingerlanerani Romamut nuutsitaavoq, nakkutilliisullu nutaap naalagiartannginnera oqaaseqarfiginngilaa. Aamma ataataga angerlarsimaffitsinnit nuuppoq, taamaalillungalu soraarummeereerninni anguniagara angusinnaalerpara — piffissara tamaat oqaluussisartunngorpunga.“

Angut inuusuttoq taanna nalunngeqatiginnissutsiminik Biibilimik ajoqersorneqarsimasumik maleruaasoq Jehovap pilluaqquaa. Taamatuttaaq piumasaminik iliorniartut tamaasa pilluaqqussavai. — Ussatit 3:5, 6. (wD 1/5 94)