Erlinnartunik ujaasigit

UKIOQ 1848 USA-mi Suttersimi Californiamiittumi pilattuiffiup eqqaani guultimik nassaartoqarpoq. Tamanna guultisiorusunnersuarmut aallarniutaavoq. 1849-mi inuit tuusintilikkuutaat tamaannakaapput sukkasuumik pisuunngornissartik neriuutigalugu. Ukiup ataasiinnaap ingerlanerani illoqarfik umiarsualiveqarfiusoq, San Francisco, illoqarfeerannguusimagaluartoq illorpassuaqarfinngorpoq 25.000-inik inoqalerluni. Pisuunngoriataarnissamik ilimasunneq kajungersutut sunniussimavoq.

Israelitoqqami kunngip Salomonip nalusimanngilaa erlinnartunik toqqorsimasunik ujaasisut qanoq piumassuseqartigisartut. Tamanna eqqarsaatigalugu ima allassimavoq: „Silassorissuseq qaaqquinnariannguaruk siuneqarnerlu aggeqqullugu nipituumik torlulaffigalugu. Ujarniaruk sølvisiortoq assigalugu, erlinnartunik nassaarniartutut ilungersorlutit. Taava paasilissavat Guutimik mianerinninneq sunaasoq ilisarilerlugulu Guuti.“ — Ussatit 2:3-5.

Guulti siilvilu annertuumik iluaqutissarsiffigineqarsinnaapput, paasinninnerli siuneqarnerlu suli annerusumik iluataasarput. Eqqortumik aalajangiiniarnermi, ajornartorsiutinik aaqqiiniarnermi, aappariinnermik pitsaasumik angusiniarnermi pilluarnermillu nassaarniarnermi iluaqutaasarput. (Ussatit 2:11, 12) Taamatuttaaq ilisimasaqarneq ilisimassuserlu ilumoortut Pinngortitsisumik ilisarisimannilerniarnermi, taassuma siunertaanik paasisaqarniarnermi kiisalu taassumunnga naalanniarnermi iluarisaanillu iliorniarnermi iluaqutaasarput. Tamakku guultimik pisiarineqarsinnaanngillat.

Biibilimi allassimasut ilumoorput: „Ilisimassusermik sernissorteqarneq pisuussutinillu sernissorteqarneq assigiiginnarput, ilisimassutsip pitsaaqutigiinnarpaa ilisimassuteqartoq inuutittaramiuk.“ (Nalunaajaasup oqaasii 7:12) Inuppassuit pisuunngoriataarnissartik takorloortarpaat, silatusaarnerunerpaavorli Biibili quppissallugu tassanilu siuneqassusermik, paasisaqarnermik, ilisimasaqarnermik ilisimassusermillu erlinnartuutaasunik piviusunik assaalluni ujaarlissalluni. (wD 1/8 93)