„Oqaloqatigiissinnaanngilluinnarpugut!“
MICHAEL, eqqartuussissuserisuusoq, oqaloqatiginnilluarsinnaasariaqarpoq. Tamanna suliaanut atavoq. Ukiulli 16-it aappareereerlutik nassuerutigisariaqarsimavaa nuliaminik, Adrianimik, oqaloqatiginnilluarsinnaannginnini. Michael eqqaamasalikkersaarpoq: „Immitsinnut ’kimmaaterujoortuaannartarpugut’. Immitsinnut tusangiasaartuartarlutalu isornartorsiortuartarpugut, isumaqarpungalu tamanna ajorluinnartumik kinguneqassasoq. Isumaliutigisarpara katissimalluni inuuneq tassa taamaattussaannaanersoq, naammagittaalliornernik uumisukujunnernillu ulikkaartoq. Inuunitta sinnera taamaattuassappat uanga inooqataaffigisinnaanngilluinnarpara. Ukiuni 20-ni, 30-ni imaluunniit 40-ni uumisukujuttuarluni sukangakujuttuarlunilu inuunissaq eqqarsaatigissallugu saperpara.“
Michael Adrianilu kisimiunngilluinnartoq taamatut misigisaqarsimapput. Pissutsit taamaattut, akiuunnerit akiuukkunnaarallarnerillu paarlakaajaaffigisaat, aappariippassuarnut piviusuupput. Allaat oqaloqatigiinnerit ulluinnarsiutaanerpaat oqaatsikkut akiuunnersuannguussinnaapput. Oqaatsit aninneqarsimanngitsut „tusaasarpaat“. Oqaatsit ilumoorutinngisatik anittarpaat. Saassusseriarlutik unnerluusseriarlutillu tunuartarput ajuallassimallutik nipaqaratillu. Qimanngillat, aammali tassaanngillat ’uinik ataaseq’. (1 Moses 2:24) Taamaarusaartuaannalersimapput. Tunuarniarunik kisianni avillutik; siumukalerniarunik kisianni assigiinngissutitik toqqaannartumik naapitsillugit. Anniaatit tamatuma kingunerisassai ingalanniarlugit aappariit tunuarsimaalertarput aappartik misigissutsikkut qanillinaveersaalerlugu.
Aappariit taamatut ingerlasut ilisimasalimmit unnersuunneqarnissartik atorfissaqartippaat. (Ussatit 1:5) Unnersuunneqarneq taamaattoq Guutip oqaasiani, Biibilimi, nassaarisinnaavaat. Paulusip Timoteusimut allakkami aappaanni qularnaallisippaa Biibilip unnersuussutai ’ajoqersuutaasut inerteqqutaallutillu iluarsiartuutaasut’. (2 Timûtiuse 3:16) Soorlulu takussagipput aappariittut oqaloqatigiilluarsinnaannginneq iluarsiiffiginiaraanni tamannarpiaq pisariaqarpoq. (wD 1/8 93)