’Qilammit nalunaaqut’

INUIT qangarsuarli silassaq siumut siulittuutiginiartarsimavaat. Nalitsinni qaammataasat, kiassiutit nillisiutillu qarasaasiamit aqunneqartut, Dopplerradari ilisimatuussutsikkullu iluaqutit allat silasiornermut atorneqalersimapput. Atortorissaarutit tamakku atorlugit paasisat ussatinut qulaaniittunut amerlasuutigut naapertuuttarput.

Jesus Kristus upperisarsiornikkut akerlilersortaasa ’qilammit nalunaaqummik takutitseqqusimavaat’, tupinnartulioqqullugu Messiasiunini uppernarsarlugu. Jesusip oqarfigisimavai: ’Unnukkaangat oqararaasi: „Aqagu silagississavoq, qilak aappilleqimmat.“ Qaasaraangallu oqararaasi: „Ullumi silarlussavoq qilak aappilleqimmat nuisserlunilu.“ Qilaap isikkuanit qanoq pisoqassasoq ilisimasaraarsi, ullulli makkua nalunaaqutaat paasissutigisinnaanagit. [Kinguaariit, NV] uku ajortut uersartut nalunaaqummik takujumapput, nalunaaqummilli allamik tunineqassanngillat, kisianni pruffiiti Jonas nalunaaqutigissavaat.’ — Matîuse 16:1-4.

Jesusip akeraasa silassaq siumut ilisimareersinnaasimavaat, anersaamulli tunngasut paasisinnaanagit. Assersuutigalugu ’Jonas nalunaaqutigissagaat’ qanoq paasisariaqarpa? Ulluni pingasuni aalisagarujussuup naavaneereerluni Guutip pruffiitia Jonas Ninevemi, Assyriap illoqarfiisa pingaarnersaanni, oqaluussisimavoq, taamaalillunilu illoqarfimmut tassunga nalunaaqutaalerluni. Jesusip nalaani kinguaariit ’Jonasip nalunaaqutaa’ pisimavaat Kristus ulluni pingasuni ilivermiimmat makititaallunilu. Jesusip ajoqersugaasa pisimasoq tamanna, Jesusip kinguaariinnut nalunaaqutaalissutigisaa, oqaluussissutigisimavaat. — Matîuse 12:39-41.

Allami Jesusip ajoqersugaasa aperisimavaat taassuma Naalagaaffiup pissaanerani „najuunnissaanut“ suna „nalunaaqutaassasoq“. Akissutimini saqqummiuppaa nalunaaqut pisunik assigiinngitsunik katitigaasoq, soorlu sorsunnernik aatsaat taama ingasatsigisunik, nunap sajunnersuinik, kaannersuarnik Guutillu naalagaaffia qilammi pilersinneqarsimasoq pillugu nunarsuaq tamakkerlugu oqaluussinermik. — Matîuse 24:3-14.

Kristusip qilammi kunngitut takussaanani najuunnissaanut nalunaaqutissaq tamanna ilisaraajuk? Nalunaaqummut tamatumunnga atasut assigiinngitsut ullumikkut kinguaariit nalaanni eqquussorput. (Matîuse 24:34) Siunissarmi? Biibilimi siulittuutigineqarpoq pissutsit aaqqissuussaanerata matuma naggatissaa qanillisoq. Tamannaannaanngilarli, aamma siulittuutigineqarpoq ullussaq nutaaq Guutip neriorsuutigisaa qanittukkut qaalissasoq, inuiannut tamanut nuannersumik siunissaqartitsisoq. — 2 Pîtruse 3:13. (wD 15/7 93)