Guutip aqqa nalusimanngilaat
TULUIT-NUNAATA Amerikami nunasiaataani atuakkiat allanneqartut naqiterneqartullu siullersaat tassaasimavoq Bay Psalm Bookimik taaneqartoq. Naqiteqqaagaq Massachussettsimi nunasiat ilaanni Bayimi Stephen Dayemit 1640-mi naqiterneqarsimavoq. Atuagaq tassaavoq Biibilimi Tussiaatit hebriiarisuumit taamanikkut oqaluttaaseq allattaaserlu naapertorlugit tuluttuunngortitaq.
Bay Psalm Bookimi malugisarialik tassa versit ilaanni Guutip aqqata atorneqarsimanera. Taamaattumik taamanikkut, ukiut 350-it matuma siorna, tamatuminnga atuartut tamarmik Pinngortitsisup atersinissaanut periarfissaqarsimapput. Assersuutigalugu, naqitikkami siullermi tassani Tussiaat 83:17, 18-imi ima allassimavoq: „Kanngunarsagaalit qaqugumullu tataatsatsinneqarlit; aap, kanngutsisitaalit suujunnaarsitaallutillu. Inuit nalussanngimmassuk illit JEHOVAmik ateqartutit, nunarsuarmi tamarmi qutsinnerpaasutit.“
Soorunami Guuti qutsinnerpaasoq atermi, Jehovap, ilisimaneqaannarnissaa piumasarinngilaa. Bay Psalm Bookimi Tussiaat 1:1, 2-mi allassimavoq „angut pilluartoq“ guutiitsut siunnersuutaannik maleruaaneq ajortoq, ’kisianni Jehovap inatsisai kajungerisarigai’. Nutseqqitami New England Psalmsimi 1648-meersumi allassimavoq: „Jehovalli inatsisaanut kajungissutsini tamaat sammitippaa.“
Ukiut hundredellit 20-ssaanni makkunani Ny Verden-oversættelsen af De hellige Skrifter-mi ima allassimavoq: „Pilluarpoq guutiitsut siunnersuutaannik maleruaanngitsoq, ajortuliortunillu ingerlaqateqanngitsoq, mitalliisunillu katisimaqateqanngitsoq. Jehovalli inatsisai kajungerai, inatsisaalu ullukkut unnuakkullu nipikitsumik atuartarpai.“
Suli taamaappoq. Inuk pillualerumaguni guutiitsut siunnersuutaannik maleruaanaveersaartariaqarpoq. Ajortuliortut maligassiaat malissanngilai Guutimillu mitallersunik katisimaqateqassanani. Aammalu kanngunartuliornermik, imigassamik atornerluilernermik Guutillu inatsisaanut akerliusunik allanik iliuuseqartitsisinnaasumik siunnersuuteqarlutillu inooriaaseqartut peqatiginaveersaartariaqarpai. Aap, pilluarneq piviusoq Guutimik ilumoortumik, Jehovamik atilimmik, ilisarisimasaqarnermik taassumalu inatsisaanut Biibilimi allassimasunut naalannermik tunngaveqarpoq. (wD 15/9 92)