Inuuneq — Guutip tunissutaa
ULLOQ naallugu, nalunaaquttap-akunnerini 24-ni, uummaterput aammik erlinnartumik timitsinni ingerlaartitsiuartarpoq. Sinilertarpugut, puattali sulinerat ingerlaannartarpoq. Nerisarpugut, nerisavullu aqajaqqutsinni isumaminnik uunneqartarput. Tamakku tamarmik ullut tamaasa, annikitsuinnarmik sianiginngisatsinnilluunnit iliuuseqarnitsigut, pisarput. Paasissaanngitsumik tupinnartumillu pisartut, taamaattussaannartut isigeqqajaanartut, tamakku tunissutip inuunermik taasatta ilagaat. Tunissullu tamanna tupinnartuliatut taaneqarsinnaavoq.
Naartuulerneq inunngornerlu eqqarsaatigeriakkit. Timip nammineq pisatarinngisani ajattortaraluarai illissap mannik kingunissisoq immikkut pisarpaa. Timip naartoq alliartulersoq nammineq pisatarinngisamisut ajattornagu inuussutissalersortarpaa isumassorlugulu naalungissatut inunngussalluni piareernissaata tungaanut. Timip nammineq pisatarinngisaminik ajattuisarnera eqqarsaatigalugu illissap immikkoortitsisinnaassusia pingaartoq tamanna atuutinngitsuuppat, inunngortoqarsinnaassanngikaluarpoq.
Aammalu inoorlaamut inuuneq sivikissagaluarpoq naartup sisamanik qaammateqarneraniit illissami ineriartorneqarsimanngikkaluarpat. Taamaalineranimi kullutorsinnaalersarpoq, nukini atorsinnaalersarlugit kingusinnerusukkut anaanamini milussinnaaniassagami. Tamannalu inuunermut pisariaqavissut naalungiarsuup inunngornera sioqquterujussuarlugu aalajangiunneqareersimasut ilaannaraat.
Naartup illiamiitilluni uummataa putoqartarpoq. Putorli inunngornermi nammineerluni matusarpoq. Aammattaaq naartoq illiamiitillugu taqarsuaq puannik avaqqussisoq inunngornermi nammineerluni matusarpoq; inunngornermi aak puakkoortalersarpoq, naalungissap anersaartulerneragut iltilersorneqalerlluni.
Tamakku tamarmik aallaqqaataannaapput. Inuup timaani ingerlaatsit (soorlu anersaartorneq, kaaviiaarnerit, sianiutit qinersillu) torrallataangaarmata inuit ajasoorutigisarpaat — tamakku tamarmik pisarput inuuneq ingerlaannarniassammat. Tupinnanngilaq itsaq allattoq Guuti pillugu oqarsimammat: ”Qutsavigissavakkit pinngortitaagama tupinnangaartumik, suliatit tupinnangaarput tamanna nalunngilluinnarpara.” Tussiaat 139:14.
Ersarippoq oqaatsinik nuannersunik taakkuninnga allattup inuuneq nammineerluni ineriartorsimasoq nalaatsornerinnakkulluunnit pilersimasoq upperinngikkaa. Namminermi pinngorsimagaluarpat, inuunerput qanoq atussanerlugu pisussaaffeqarnatalu akisussaaffeqassanngikkaluarpugut. Timittali sananeqaataatigut ersarippoq pinngortitaasoq, pinngortitaagunilu pinngitsoorani pinngortitsisoqarsimassaaq. Biibilip ima oqaatigaa: ’Illummi tamarmik kimit piareersarneqartarput; tamanilli piareersaasoq tassa Guuti.’ (Eprîarit 3:4) Taamaattumik pingaarpoq ’misigissallugu Jehova Guutiummat, taassuma pinngortikkaatigut, taassumalu pigaatigut.’ (Tussiaat 100:3) Aap, inuuneq nalaatsornerinnaanngilaq; Guutimilli tunissutaavoq. — Tussiaat 36:10.
Taamaammat, inuunermik Tunisisumut sumik pisussaaffeqarpugut? Inuunerput qanoq atussaneripput qanoq piumaffigaatigut? Apeqqutit tamakku assingusullu ilanngutassiami tulliuttumi sammineqassapput. (wD 1/8 92)