Guutimik ujartuinissamut piffissaavoq
ASSEQ qulaaniittoq tassa Akropolis Athenimiittoq, guuterpassuarnik pallorfiginninnermut qitiusimagaluartoq. Akropolisip ataaniippoq Areopagus, Athenimiut eqqartuussiviinut katersuuffiusimasorisaasoq. Tassani apustili Paulus ukiut 2000-ingajaat matuma siorna sassarsimavoq torrallaallunilu oqalugiarluni. Ilaatigut ima oqarsimavoq:
’[Guutip] inooqatigiissorpassuit tamaasa nunap tamarmi qaani ineqartippai aammit ataatsimit naggueqartillugit, ineqarnissaallu aalajangersakkanik taamaaffissaqartippai killiffissaqartillugillu Guuti ujaqqullugu, misigisinnaassaneraat nanillugulu, naak tamatsinnit ungasinngikkalluaqisoq; taassumanimi inuullutalu aalallutalu ippugut.’ — apustilit suliait 17:26-28.
Ila oqaluttuarisaaneq qanormitaava allaanerutigissagaluarpa Paulusip oqaasii inuit amerlanerusut qisuariarfigisimagaluarpatigik! Sorsunnerpassuit naalliuuterpassuillu pinngitsoorneqarsimasinnaassagaluarput inuit paasillugu nassuerutigisimasuuppassuk tamarmik inummik ataatsimik, kisimi Naalagaasumit Jehovamit pinngortinneqarsimasumik, naggueqaramik peqatigiillutik iliuuseqartariaqarlutik.
Ullumikkut inuiaat inuiaassutsimik, atugarisatigut assigiinngissutsimik allaanerusumillu nagguilinnik uumissuinermik avissaartuutseqqatinneqarput. Paulusilli oqaasii suli atuupput. Tamatta inuup Guutip pinngortissimasaata kinguaaraatigut. Tamanna eqqarsaatigalugu tamatta qatanngutigiiuvugut. Sulilu Guutimik ujartuinissamut piffissaqarpoq, suli nanisassaatimmat.
Paulusip oqaasii suli pingaaruteqarnerulerput ima naggasermagit: ’[Guutip] ullormi aalajangersakkamini inuit najugaat naapertuilluarluni angut taamaaqqusani kiffaralugu eqqartuukkumaaramiuk, taannalu tamanut uppernarsarpaa toqusunit makitikkamiuk.’
Jesusip makititaasimanera oqaluttuarisaanikkut piviusuuvoq, soorlulu Paulusip ersersikkaa inuiaat ullormik eqqartuutiffimmik misigisaqartinneqarnissaannut tamanna qularnaveeqqutaavoq. Qaqugu? Nalunngilarput Paulusip Areopagusimi oqalugiarneraniilli ulloq tamanna ukiunik 2000-inik qaninnerulersimasoq. Aap, Biibilimi siulittuutit eqquussornerisa takutippaat qanittuararsuusoq. Tamanna eqqarsalernanngila? Guutimik ujartuinissaq pingaaruteqartorujussuuvoq, Paulusimi Athenimiunut ima oqarpoq: ’Maanna inuit tamaasa tamaginni ittut [Guutip] allamik isumataaqquai.’ — apustilit suliait 17:30, 31. (wD 1/7 92)