’Nunamit ungasissumit tusagassaq nuannersoq’
Madagaskarimi inuppassuit tusagassamut nuannersumut tusarumasuupput. Taavani oqaluussisartut 3200-innaapput, inuilli 16.205-it Kristusip toquneranik eqqaaniaalluni nalliuttorsiornermut najuussimapput. Inuit qeqertami tassani najugaqartut tamaasa oqaluussiffiginiarlugit qatanngutivut annertuumik iliuuseqartarput.
Isaonjomi ilagiinni oqaluussisartut 30-usut ilaat 17-it aalajangersimapput illoqarfeeqqamit taassumannga kilometerinik arlalinnik ungasissusilimmiittumut oqaluussiartorniarlutik. Unnuakkut ataatsip qeqqa illoqarfeeqqaminnit tassannga aallarput. Nalunaaquttap-akunnerini marlunni aqqusineeqqatigut sivingasutigut masarsutsigullu pisoreerlutik pingasup qeqqa orpippassuarnut pulapput. Taarsuup ataani ilaat qaarsortat sinarsuisigut appaallarujussuarlutik orlusarniartut ilaat qaarsortat itersartaanni taserannguussimasunut nakkartarput. Qatanngutitta arnat ilaasa paamigeqisaannik qullugiaarsunnik sullinernillu kapisisartunik orpippassuit ulikkaarput. Aqqutaani ilaatigut seeqqutik tikillugit marulluusukkut ingerlasarput. Nalunaaqutaq arfineq-marlup qeqqata missaani kiisami ornitaminnut apuukkamik oqaluussisartut 17-iusut tamarmik annerusumik minnerusumilluunniit ajoqusersimapput.
Arfineq-marlunut tanneq qulingiluanngortoq oqaluussillutik aallartipput. Inunnit amerlanerusunit inussiarnersumik ilassineqarput. Arnarli naaggaartumik nuimasumik ueqartoq ima oqarpoq: „Uanga nammineq upperisaqarpunga; tamanna naammagaara. Bibeli ilisimalluinnarpara.“ Oqaluussisartup arnap Napasuliaq Alapernaarsuiffik-mik takutimmani piumanagu pingaakujulluni ima oqarfigaa: „Allarpassuarnik atuagassaqareerpunga,“ taavali ima aperilluni: „Kinarpiaavit, suminngaanneerpillu? Kia aallartitaraatit?“ Oqaluussisartup sallaatsumik akereerlunilu aggeramik tamaviaarsimanertik oqaluttuarereeraalu, atuagassiaq tiguinnarpaa oqarlunilu: „Pisiarissavara. Imaassinnaavoq Guutimit aallartitaasutit!“
Nalunaaqutaq marlup missaani utimut aallarput. Tamatumuuna qaamariarmat nalunaaquttap-akunneri sisamaanngitsulluunniit atorpaat. Qasusimallutik ajoratilli nuannaaqalutillu angerlamut apuupput. „Uagutsinnut ilagiinnit Isaonjomeersunut 17-iusunut tamanna ulluuvoq puiunaatsoq,“ taama oqaluttuarput.
Aap, ’nunap isuanut allaat’, inuit amerlasuut tusaajumaffigisaannut, Naalagaaffik pillugu tusagassamik nuannersumik eqiasuillutik oqaluussinissaannut Jehovap kiffani anersaaminik iluartumik kaammattortarpai. — apustilit suliait 1:8. (wD 1/11 89)