Nalliuttorsuaq najuuffigisariaqakkat

’Taamaaliortaritsi eqqaallunga,’ unnummi kingullermi ajoqersukkani najoramigit Jesus taama oqarsimavoq, taamalu oqarnermigut toqunissani eqqaaniarlugu nalliuttorsuaq pilersippaa. (Lúkarse 22:19) Inuunermi pilliutigineratigut inuit pissutsit paratiiserpaluttut atorlugit naassaanngitsumik inuunissaminnik neriugisaqalernissaat Jesusip aqqutissiuuppaa. Taamaattumik toquneranik eqqaaniaaneq pingaaruteqarluinnarpoq.

Matumuuna Jehovap Nalunaajaasuisa qaaqqujumavaatit peqatigalutik unnuk tamanna nalliuttorsiutigiartoqqullugu. Ullormi Jesusip toqunerata, Bibeli naapertorlugu qaammatisiutit naapertussagaanni nisanip ulluisa 14-ianni pisimasup, nalliuteqqiffiani Jesusip pilliutaata pingaaruteqassusia pillugu oqalugiaat tusarnaarniarlugu Jehovap Nalunaajaasui ataatsimiigiassapput. Ukioq manna marsip ulluisa 30-anni seqernup tarrereerneragut tamanna pissaaq. Jehovap Nalunaajaasuisa illoqarfinniittut nalliuttorsiornissap sumiiffissaanik qassinullu pinissaanik paasitissinnaavaatit.