Burundimi malersuisoqartuarpoq

1989-ip aallartilaarnerani nunami Afrikap qiterpiaaniittumi Burundimi naalakkersuisut Jehovap Nalunaajaasuinik tassanngaannaq malersuisitsilerput. Soorlu Napasuliaq Alapernaarsuiffik-mi 1. oktoberi 1989-imi saqqummersumi nalunaarutigineqartoq oqartussaasut saassussinerit, tigusarinninnerit, unataanerit sukannersuliorfiginninnerillu allat periaaseralugit Nalunaajaasut pinngitsaaliniarsarisarpaat uppernertik taamaatiteqqullugu. Taamanerniilli qanoq pisoqarsimava?

Burundimit nalunaarutigineqarsimavoq nunap immikkoortortaanik nakkutilliisup Kinyinyami Gitegamilu tikeraarnerani ilagiinnut ilaasortat ataatsimiinneranni oqartussaasunit tigusariniarneqarsimasut. Nunap immikkoortortaanik nakkutilliisoq ilageeqatigiinnullu nakkutilliisoq qimaasinnaasimapput, tigusarineqartulli ilagaat ilinniarfimmi atuartut marluk kiisalu niviarsiaraq atualeqqaat atuarfianni atuartoq. Tamarmik unatarneqarput. Aqaguani tigusat tamarmik nunap immikkoortortaata naalagaanut sassartinneqaramik nassuiaatigaat suna pissutigalugu naalakkersuinikkut partiimut ilaasortaasinnaanatik. Unatarneqaqqipput. Pisimasumut tamatumunnga assingusunik allanittaaq pisoqartarnerarneqarpoq.

Kristumiu utoqqaanertaasoq akisussaaffilik ima allappoq: „Jehovamut Nalunaajaasoqanngilaq tillinniartuunerarneqarluni, inuartuunerarneqarluni mumisitsisuunerarneqarluniluunniit tigusarineqarsimasumik. Oqartussaasut Nalunaajaasunik pillaanissaminnut pissutissaveqaraluarunik, eqqartuussivinni tamanut ammasuni taamaaliorlit, nunamut innuttaasunik eqqissisimasunik naalliutsitsinatik, pigisaannik arsaarinninnatik, uumasutullu nujuartatut malersuinatik. Qatanngutit nunap timaani najugaqartut ilarpassui illutik qimattariaqarsimavaat qimaatitatullu inuusariaqalersimallutik. Qatanngut arnaq, uia parnaarussaaqqasoq, oqartussat ilarpassuinik saaffiginnittarsimavoq uimi iperarneqartinniarsaralugu. Tamanit itigartinneqartarpoq oqarfigineqartarluni: ’Nunatta isumannaatsuujunnaarnissaa anguniarlugu nunanit allanit aningaasanik tigusisartillusi uiit iperarsinnaanavianngilarput.’ Salluliuutiginninnerup ingasassusia!“

Aammattaarli nuannersumik nutaarsiassaqarpoq Burundimeersumik. Nalunaajaasut tassani najugaqartut qununatillu ersinngillat. Tusagassamik nuannersumik oqaluussissutiginninneq mianersortumik annertusisinneqartuarpoq, qatanngutillu nalunngilaat Jehovamik isumalluarfiginnilluarunik aalajaattuarsinnaassallutik. Nunami tassani pisimasunik kamaatiginninnerminnik ersersitsiumasunik Burundimut allagaqartorpassuaqareersimavoq, silarsuarmilu paasineqalerpat Burundimi Jehovap Nalunaajaasuinik naakkittaatsumik malersuineq ingerlaannartoq qularnanngitsumik suli amerlanerusunik allagaqarumasoqalissaaq. (wD 1/1 90)

[Qupp. 25-mi ungalusaq]

Burundip præsidentia uunga allaffigineqarsinnaavoq:

His Excellency Major Pierre Buyoya

President of the Republic of Burundi

Bujumbura

REPUBLIC OF BURUNDI