Naalagaaffiup sulineranit nutaarsiassat
Uisup nikallujuissusiata ilaqutariit kattutsikkai
Qanoq iliussagaluarpit sallusuissut pissutigalugu aapparpit sakkortuumik akerlilersorlutit suna tamaat atorlugu aalajangersimaninnik taamaatitinniartuuppatit? Timûtiusimut agdlagkat áipait 3:12-imi Paulusip oqaasii uku nakussatsissutigissagaluarpigit: ’Kristus Jesusimi [Guutimut-tunniusimallutik] inuujumasut tamarmik [malersorneqassapput]’? Sallusuissut aalajangiusimaannassagaluarpiuk, imaluunniit nakkaannassagaluarpit? Italiami angut taamatut misilinneqarsimavoq. Taannali nakkaannanngilaq, taamaattumillu Jehovap pilluaqquaa.
Angut taanna siornatigut kommunistiusimavoq ilungersortoq tamannalu ilutigalugu katuuliusimalluni upperluarniartoq. Inuit tamarmik naligiittariaqarsorai, isumaqarporlu katuullit kommunistillu isuma tamanna pingaartitarigaat. Suleqataasali ilaata Guutip naalagaaffia pillugu oqaluttuuppaa, paasinasuarpaalu tamanna naligiissutsimik piviusumik pilersitsisinnaasutuaasoq. Kommunistiussutsimut katuuliussutsimullu nuannarinnissimanermisut sallusuissut nuannaaqaluni ilassivaa, 1972-imilu kuisilluni. Nuliami? Taassumannga sakkortuumik akerlilersorneqarpoq. Nulia oqaluttuarpoq:
„1970-imi suliffimmini uima Jehovap Nalunaajaasui attaveqarfigeqqaarpai. Bibeli atuaqqissaalerpaa, paasiartulerparalu pineqartoq tassaasoq upperisaq nutaaq arlalitsigut isumaqatiginngisara. Taamaattumik uanga nammineq ilaquttavullu aallaqqaataaniilli akornusersorniarsaraarput.“
Nangippoq: „Angajoqqaavisa uiga inukkutigisarpaat sunnguillu tamaasa atorlugit unitsinniarsaraat. Uiga Bibelimik ilisimasaqarnerujartortilluni assersuutigalugu paasilerpaa guutipilussiornermi assilissat angerlarsimaffitsinnit peerneqartariaqartut. Uangali mianersoqquara taamaalioraluarpat ajunaarnernik nalaanneqassasugut. Upperisarsiornermi assiliaq aserortermagu timikkut oqaatsikkullu saassuppara atuagassiaataalu ikinngitsut alittorlugit. Nillianera tusarsimallugu sakikka arpaannavik iserput. Taakkuattaaq saassuppaat, taannali imminut illersornianngilaq.
Isumaqatigiinngissuteqaraangatta naggataatigut qimappara, aamma panitta sapaatikkut oqaluffimmi atuarfimmukartarnera akerliuffigilermagu. Uima sioorasaarpaanga uteqqinngikkuma aappaasutut pisussaaffinnik sumiginnaasutut unnerluutiginiarlunga. Sapaatip-akunnera ataaseq qaangiummat aalajangerpunga angerlamut uterniarlunga.
Unitsinniaqqikkaluarniarlugu anersaarsiortoq attaveqarfigaara qinnuigalugulu uiga perloqqoqqullugu. Anersaarsiortup apersulerpaanga, qanorlu pisoqarneranik nassuiaappara. Nassuiaatiga tusareerlugulu allanut oqaqqunanga oqaluttuuppaanga Jehovap Nalunaajaasuinut perloqqussut sunaluunniit atorsinnaanngitsoq.
Taava najukkatsinni palasi siunersiorparput, taassumali eqqartuussissuserisumut innersuuppaatigut. Tupaallaatigeqisannik eqqartuussissuserisup kajumissaarpaanga uiga ilagalugu Jehovap Nalunaajaasuisa ataatsimiinnerannut najuunnissannik. Sakera (ilagigaminga) akerliliivoq oqarluni ilaquttami San Racco, iluartuutitaq illoqarfitsinnut illersortigititaasoq, ilungersortuullutik pallorfigisarigaat. Eqqartuussissuserisorlu oqarpoq iluartuutitaq taanna pallorfigisaasutulli allatut ilumuunngitsigisoq. Aammattaaq oqaluttuarpoq Katuullit Mumisitsiniaqatigiit-nut siulittaasuulluni upperisarsiornikkullu nalliuttorsuarnut peqataanngisaannarluni, Bibelimik atuarnermigut paasisimagamiuk taamaaliornerit tamarmik eqqunngitsuusut. Naggataatigut ima oqarpoq: ’Uiit ilaginiariuk eqqisseqatiginiarullu. Tusarnaarniaruk, Bibelilu atuaqqissaalerniaruk.’
Kajumissaarutit tamakku uima allanngorneranik, pissusilersorneranik nikallujuissusianillu eqqaasippaannga; taamaattumik taanna ilagalugu Jehovap Nalunaajaasuisa ataatsimiinnerinut najuuttalerpunga. Asanninneq ataatsimiinnerni tamakkunani ersersinneqartartoq killinneqaatigisorujussuuara. Taamaattumik Bibelimik atuaqqissaartalerpunga, teokratiimik ilinniarfimmut peqataasalerlunga illumiillu illumut oqaluussisalerlunga. Kiisami, 1977-imi, tunniulluinnarnera takutippara maannalu sallusuissummiinnera pilluaatigeqaara, Jehova qujanarsili ilaqutariit tamarmik Imminut pallorfiginninnermi kattunnerannik kinguneqartumik uiga nikallujuinnissaanik ikiorsimammagu.“ (wD 1/11 88)