Naalagaaffimmik oqaluussissutiginninnermit nutaarsiassat

Jehova Fijimi ’naajartortitsivoq’

JEHOVAP Naalagaaffimmik oqaluussissutiginnittut ilumoortut qeqertani alianaatsuni Fijini najugaqartut pilluaqqugai erseqqippoq. Maannakkut qeqertani taakkunani 1049-nik Jehovamut Nalunaajaasoqarpoq, siorna amerlassusiannut naleqqiullugu 10 procentimik amerleriarsimallutik. Taakku ikkussuisimallutillu imerterisimapput, Guutilu naajartortitsivoq.a — 1 Korintumiut 3:6, 7.

Vagttårnip peqatigiiffiata qeqertani taakkunani immikkoortortaqarfiata tungaaninngaanniit oqartoqarsimavoq „inuit Bibeli atuaqqissaarumallugu soqutiginninnerat tupaallannartoq“. Ilagiinni ataatsini oqaluussisartut illoqarfinnguamut avinngarusimasumut siornatigut inussiarniitsumik ilassineqarfigisimasaminnut oqaluussiartorput. Tikeraaqqinnerannili illoqarfinnguup pisortaa nalunaarpoq illoqarfimmiut tamaasa angerlarsimaannaqqullugit Jehovap Nalunaajaasui tusarnaarsinnaaqqullugit, kiisalu illoqarfinnguup arnartaasa qatanngutit katersortarfimmi tumannguersaatissanik sassaalliutissagaat. Sapaatit akunneri marluk matuma kingornagut pioneri uterami, inuit 28-t Bibelimik atuaqqissaartarumasut naapippai. Taamanerniilli Nalunaajaasut illoqarfinnguaq taanna sapaatit akunneri allortarlugit ornittarpaat soqutiginnittut ikiorniarlugit. Tikeraarnerni tamani „atuaqqissaaqatigiinnernut peqataasut amerlisimasarput“.

Ungasinngitsukkut ataatsimeersuarmata kuisittut 68-it ilaat ukiut qulaaluat oqaluffimmi meeqqanik sapaammi upperisamik ajoqersuisuusimagaluarpoq. Ilaqutai upperisarsiornermik aallussilluarput. Oqaluussisartut marluk illumit illumut angalaaramik taanna naapissimavaat, „arlaleriarlutillu sivisuumik oqaloqatigeereersimallutik pulaaqqittareersimallutillu kiisami atuaqqissaaqatigiittarneq pilersinneqarpoq“. Qaammatit marluk atuaqqissaareerami oqaluffimmi meeqqanik sapaammi upperisamik ajoqersuisuunini taamaatippaa sallusuissummillu aalajangerfigisaqarluni, ukiorlu ataaseq qaangiuttorlu kuisilluni. Paulusip oqaasii allanngortilaarlugit oqarpoq: „Tusaamavassingami eqqunngitsumik upperisarsiornermik qanoq aallussilluaraluartunga, siuaasama ileqqoreqqusaat ilungersuutigigaluarakkit. Sallusuissulli nassaaraara maannalu ilissi ilagalusi Jehova kiffartuussinnaagakku nuannaarutigalugu.“ — Naleqqiukkit Galâsiamiunut agdlagkat 1:13, 14.

1984-imi aatsaat qeqertani Fijini marlunnik ataatsimeersuarneqaqqaarpoq. Ilagiinni utoqqaanertat ilaat 22-t qeqertat annersaanni najugaqartut oqarput ataatsimeersuarnerit minnersaanni qeqertami allami ingerlanneqartussami saqqummiussassat namminneq akiliinermikkut tapersersorumallugit. Immikkoortortaqarfiup tungaaninngaanniit angalaqatigiissitsineqarpoq, qatanngutillu qeqertat annersaanneersut ilaat 90-it ilaassangatinneqarput. 115-illi timmisartukkut tassunnarput allallu 320-t umiarsuarmut attartukkaminnut ilaallutik tassunnarlutik. Qatanngutit ileqqorinnerat pissutigalugu timmisartumik ingerlatitsisut ilaat oqarpoq: „Qanoq iliornerat tupaallaatigaara, unnersuussutinik maleruaajumatussusiat tupigusuutigalugu. Nalunaarutigigakku teknikkikkut ajoquteqarnera pissutigalugu tamarmik niusariaqartut, tamarmik eqqissillutik aaqqiagiillutillu timmisartumit niupput, annikinnermilluunniit naammagittaalliornatik. Ikeqqikkamillu qungujulapput kusananngitsumillu oqarnatik. Qanortoq timmisartumut ilaasut tamarmik taakkunatut issagaluaramik.“

Umiarsuarmi attartukkami maskiinalerisoq naalagaaneq oqarpoq: „Nuanneqaaq ilissinnik ilaasoqarluni, ilissimi inuusuttoqatigiinnit kristumiuusunit aatsaannguaq qeqertamut allamut ikaartitatsinnit allaalluinnarpusi. . . . Ilissi eqqiarsimallusilu isikkorissagaavusi peqatigiuminarlusilu.“ Ilaasoq alla oqarpoq: „Misigisaqarpunga siornatigut misigisimanngisaannakkannik . . . umiarsuup qaavani nillertumi sinikkama qatanngutit ilissi arnartassi ilaata madrassiutini nuliannut uannullu tunniuppaa siniffigeqqullugu. Upperneq ilissi uppernissitut ittoq ujartuaannarsimagaluarpara.“ Angutip taassuma ataatsimeersuarneq najuuffigaa aammalu takunnikkumalluni ilinniarumallunilu.

Kristumiut ilumoortut taamatorluinnaq ileqqorissaarnissaat naatsorsuutigisariaqarpoq. Jesus oqarsimavoq ’orpik ajunngitsoq nungullugit ajunngitsunik inerititaqartartoq’. (Matîuse 7:17) Nuanneqaaq takullugu qanoq Jehovap kiffani ilumoortut qeqertani Fijiniittut naajartortitsissukkai. Qularutissaanngilaq suli amerlasuut tusagassaq nuannersoq ilassissagaat tusarnaarunikku Jehovallu innuttaasa ileqqorissaarnerat takusarlugu. (wD 1/3 86)

[Quppernerup ataani ilanngussaq]