Jesusip inuunera ajoqersuineralu

Jesusip tupinnartuliaa siulleq

JESUSIP ajoqersugartaani ilagalugit Jordanip Qoorua qimaqqammerpaa. Ulloq ataaseq imaluunniit marluk qaangiussimapput Andreasip, Peterip, Johannesip immaqalu Jakobip, Filipip aammalu Natanaelip siullerpaallutik Jesusimut ajoqersuganngornerannit.

Maannalu tamarmik Galilæap eqqaanut, nunavimminnut, angerlamut ingerlaarput. Ornitaat tassaavoq Kana, Natanaelip nunaqarfia, Nazaretip, Jesusip peroriartorfigisimasaata, ungasinngitsuani qaqqani ittoq. Kanami katittorsiortunut qaaqqusaasimapput.

Jesusip anaanaa aamma katittorsiortunut najuuppoq. Maria, katerngaat ilaqutaasa ilaannik qanittumik ikinngutiginnittoq, qaaqqusarpassuarnik isumaginnilluannguatsiavippoq. Taamaattumillu erniinnaq malugaa arlaannik amigaateqartoq, Jesusilu oqarfigaa: „Viinniutaarupput.“

Viinnimik amigaateqartoqarnera Jesusimut qanoq iliuuseqarfigeqqorpalullugu Mariap oqarnera Jesusip akuersorpasinngilaa. „Sussagamma?“ Jesusip aperaa. (NW) Kunngiugami Guutip toqqagaa, taamaattumik qanoq-iliuuseqarnissani ilaquttaminut ikinngutiminulluunniit aalajangersaqqunngilai. Taamaattumik Maria silatusaarpoq suliassaq tamanna ernermi assaanut tunniukkamiuk, kiffallu oqarfigalugit: „Sumik oqarfigippasi naalakkisiuk.“

Arfinilinnik qattarsuaqarpoq literit 40-t sinnerlugit imaqarsinnaasunik. Jesusip kiffat oqarfigai: „Qattat imermik immersigik.“ Kiffallu ulikkaavillugit immerpaat. Taava Jesus oqarpoq: „Qalusillusi nerliiassalerisumut aatsigitsi.“

Nerliiassiortup, nuannattunik siuttuusup, viinnip pitsaalluinnassusia tupaallaatigaa sianiginagulu tupinnartuliornikkut pilersimasoq. Angullu katerlaap qaaqquaa oqarfigalugulu: „Inuit tamarmik viinni pitsaaneq siulliullugu sassaalliutigisarpaat, imernermillu naammatsikkaangata pikkunaanneq pisarpaat, illit viinni pitsaaneq manna tikillugu toqqorpat.“

Tamannalu tassa Jesusip tupinnartulioqqaarnera, ajoqersugaasalu tamanna takugamikku uppernerata nakussatsissutigaat. Kingorna Jesus anaanani, qatanngutini ajoqersukkanilu ilagalugit illoqarfimmut, Galilæap tasersuata eqqaaniittumut, Kapernaumimut aallarpoq. Johannes 2:1-12.

◆ Qanga Kanami katittorsiortoqarpa?

◆ Suna pissutigalugu Jesusip anaanami siunnersuuteqarnera ajoraa?

◆ Jesus sumik tupinnartuliorpa, allallu tamanna qanoq sunnerneqaatigaat? (wD 1/11 85)