Jesusip inuunera ajoqersuineralu

Jesusip kuisinnera

JOHANNESIP nalunaajaalluni aallartinneranit qaammatit arfinillit missaat qaanngiuttullu Jordanip kuussuata eqqaaniitillugu Jesusip, taamani 30-nik ukioqarluni, tikippaa. Sooq? Tamanna ikinngutigiit pisarnerattut pulaarnerua nalinginnaasoq? Johannesip suliaa qanoq ingerlanersoq Jesusip paaserusuinnarpaa? Naamik, Jesusip Johannes qinnuigaa kueqqulluni.

Johannes akerliliigasuarpoq: „Uanga ilinnut kuisittariaqaraluarpunga, taamaattoq illit ornipparma!“ Johannesip nalunngilaa illuni Jesus Guutip ernerigaa nalinginnaanngitsoq. Anaanami naavani naartuutillunili Maria Jesus naartoralugu pulaarmat „nuannaarluni . . . aalalerpoq“! Qularnanngitsumik Johannesip anaanaata Elisabetip tamanna pillugu kingorna oqaluttuussimassavaa. Aammattaaq oqaluttuussimavaa inngilip nalunaajaatigisimagaa Jesus inunngussasoq, aammalu erniummat unnuaq taanna inngilit savanik paarsisunut saqqummersimasut.

Tassa Jesus Johannesimut takornartaanngilaq. Kisianni Johannesip ilisimavaa kuissutiminik Jesus kuineqassanngitsoq. Kuissutaami inunnut ajortuliatik qimallugit isumataartunuinnaq atortarpoq, Jesusilu ajorteqanngilaq. Kisianni Johannes akerliugaluartoq Jesusip kuisikkusunnini aalajangiussimajuarpaa: „Maanna akueriinnannga, taamaalillugu iluartussaq tamarmi uatsinnut naammassisariaqarmat!“

Sooq Jesus kuisikkami iluamik iliorpa? Pissutigalugu Jesusip kuisinnera ajorti qimallugu isumataarnermut assersuutaanngimmat, assersuutaallunili Ataatami piumasaanik iliornissaanut. Jesus sanasuusimagaluarpoq, maannakkulli piffissanngorsimavoq suliassaq Jehovap nunamukartinnermigut suliareqqusaa naammassissallugu. Eqqarsaatigisimaviuk Johannesip ilimagisimassaneraa Jesus kuiguniuk immikkut ittumik pisoqassasoq?

Johannes kingorna oqaluttuarpoq: „Imermik kuisiartoqqusisima oqarfigimmanga: ’Anersaap aqqarfigisaanik qulangersimaajuagaanillu takunnileruit taannaassaaq, Anersaamik Illernartumik kuisisoq.’“ Tassa Johannesip ilimagisimavaa Guutip anersaava kuisami ilaata qulaani takujumaarlugu. Taamaattumik tupaallappallaarsimagunanngilaq Jesus imermit nuimmat takugamiullu ’anersaaq tuisut Qilammit aqqartoq taassumalu qulaaniittualersoq’.

Kisianni Jesus kuisimmat suli allamik pisoqarpoq. Qilaat qulaanit ammalerput, nipilu tutsiuppoq: „Tassa Ernera asanartoq nuannarisara.“ Kiaana nipaa? Jesusip nammineq? Soorunami naamik! Guutimuna nipaa. Ilumut ersarippoq Jesus Guutip ernerigaa, nammineq Guutiunani, soorlu inuit ilaat taama oqartartut. Mattæus 3:13-17; Lukas 3:21-23; 1:34-36, 44; 2:10-14; Johannes 1:32-34; Eprîarit 10:5-9.

◆ Sooq Jesus Johannesimut takornartaanngila?

◆ Sooq Jesus ajortuliorsimanngikkaluarluni kuisippa?

◆ Johannesip Jesusimik ilisimanninnera eqqarsaatigalugu, Guutip anersaava Jesusip qulaanut pimmat sooq Johannes tupaallappallaarunanngila? (wD 15/9 85)