Jesusip inuunera ajoqersuineralu
Aqqutissamik iluarsaasussap inunngornera
ELISABET erniinnaq meerartaassaaq. Qaammatini pingasuni kingullerni Maria Elisabetimiippoq. Maannali piffissanngorsimavoq Mariap aallarnissaanut Nazaretimut ungaseqisumut angerlarluni. Maria ukiup affaata missaa qaangiuppat meerartaartussaavoq.
Mariap aallarnerata kinguninnguagut Elisabet meerartaarpoq. Erninerup anigorluarneqarnera Elisabetilu meerartaannguatalu peqqilluarnerat kikkunnit tamanit nuannaarutigineqaqaaq! Meerannguani saniliminut eqqarliminullu takutimmagu tamarmik arnaa tipaatsoqatigaat.
Israelimi Guutip inatsissa malillugu nukappiaraq inunngornermi kingornagut ullut arfineq pingajussaanni kipineqartussaavoq. Tamanna peqqutigalugu ikinngutit qanigisallu takkupput. Angutaa Zakarias atsiuteqqugaluarpaat. Elisabetili allamik isumaqarpoq. „Naaggali,“ oqarpoq. „Johannesimik ateqassaaq.“ Eqqaamajuk ateq taanna inngilip Gabrielip meeqqap aterissagaa oqaatigisimammagu.
Ikinngutaalli nangartuipput: „Taama atilimmik eqqarleqanngilatit.“ Angutaata ernini qanoq ateqartikkusunneraa ussersorfigalugu aperaat. Zakariasip allattarfinnguaq qaaqquaa tamarmillu tupaallaatigeqisaannik allalluni: „Johannes ateraa.“
Taamaalisorlu tupinnarluinnartumik Zakarias oqaloqqittalerpoq. Eqqaamajunnarsivat Elisabetip meerartaarumaarnissaanik inngilip oqaatigisaa upperiumannginnamiuk Zakarias oqajuitsunngortoq. Maanna Zakarias oqalulermat eqqaanni nunallit tupigusulerput imminnullu oqarfigalutik: „Naalungiaq taanna qanormi taava iliumaarpa?“
Maanna Zakarias anersaamik iluartumik ilumioqangaalerpoq erninilu pillugu ima siulittuilluni: ’Qutsinnerussaartup pruffiitianik taaneqasaaq aqqutissaalu iluarsassallugu. Inuillu ilisarsisissavai annaassummik ajortaasa isumakkeerneqarnerisigut.’
Taamaannerani Maria — suli katissimannginnguatsiartoq — Nazaretimut apuuppoq. Maria qanoq pineqassava naartulersimanera paasineqalerpat? Lukas 1:56-80; 3 Môrsase 12:2, 3. (wD 1/5 85)
◆ Johannes Jesusimit qanoq utoqqaanerutigaa?
◆ Johannes arfineq-pingasunik ulloqartillugu qanoq pisoqarpa?
◆ Johannesip qanoq iliorumaarnera pillugu suna siulittuutigineqarpa?