Guutip qilak nunalu pinngortippai

Jehova Guuti Pinngor­titsisorivarput. Suut tamaasa, takusin­naasagut takusin­naanngisagullu, pinngortippai. Takusin­naasatsinnik pinngor­titsinngik­kallarami inngilerparpas­suarnik pinngor­titsivoq. Inngilit suunersut nalunngiliuk? Pinngor­titaapput anersaajusut Jehovamut assingusorujussuit. Takusin­naanngilagut, soorlu Guuti aamma takusin­naanngikkipput. Jehovap inngili pinngortitani siulleq ikiortigivaa. Jehovap ullorissat, planetit allarpassuillu pinngor­timmagit inngilip taassuma ikiorpaa. Planetit ilagaat nunarsuaq, angerlarsimaf­figisarput alianaatsoq.

Taava Jehovap nunarsuaq uumasunut inunnullu najugaqar­tussanngorlugu piareersarpaa, seqernup qaamanera nunarsuarmut qinngorsin­naalersillugu qaqqallu, imarsuit kuussuillu pinngor­tillugit.

Taava qanoq pisoqarpa? Jehova oqarpoq: ‘Ivikkat, naasut orpiillu pinngor­tissavakka.’ Taava naatitat naasullu assigiin­ngitsorpassuit naajoralerput. Jehovap aamma uumasut assigiin­ngitsorpassuit pinngortippai – timmisinnaasut, imaani uumasut nunamilu paarmortut. Uumasut mikisut pinngortippai, soorlu ukallit, aamma angisuut, soorlu nagguaatsut. Illit uumasoq sorleq nuannarinerpaaviuk?

Taava Jehovap inngili siulleq oqarfigaa: “Inunnik pinngor­titsisa.” Inuit uumasunit allaanerusumik pinngortippai. Inuit nassaarsiorsin­naapput. Oqalussin­naapput, illarsin­naapput Guutimullu qinusin­naallutik. Nunarsuaq uumasullu isumagissavaat. Inuk pinngor­tinneqartoq siulleq kinaanersoq nalunngiliuk? Takoriartigu.