Jobi assuarnaattuarpoq

INOQARPA tamakkiisumik misilinneqaraluarluni naalannerlu pigisatigut iluaqutissartaqarpasinngikkaluartoq Guutimut aalajaattuarumasumik? Angummut Jobimik atilimmut tunngatillugu tamanna apeqquserneqarpoq — akineqarporlu.

Israelikkut suli Egyptenimiittut Jobi Aaperaap eqqarlia ullumikkut Arabiamik taasakkatsinni inuuvoq. Taamani inngilit qilammi Guutimut sassarput, taakkualu ilagaat Saatani pikitsitsiumatooq. Jehovap kiffaminik ilumoorfiginnittumik Jobimik tatiginninnini qilammi katersuuttunut oqaatigaa. Aap, Jehova oqarpoq Jobitut assuarnaatsigisumik allamik inoqanngitsoq. Saatanilli Jobi Guutimut kiffartornerarpaa Guutimit pilluaqquneqarnini sernissorneqarninilu pissutigiinnarlugit. Saatani oqarpoq Jobip sunik tamanik piiaaffigineqaruni Guuti perloqqussagaa.

Guutip akueraa Saatanip Jobimik pisuussutaanik qitornaanillu piiaaffiginninnissaa kingornalu peqqikkunnaarsitsinissaa. Pisimasuni tamakkunani tamani Saatanip akuunera nalullugu Jobip paasisinnaanngilaa annikilliortitaanini sooq Guutip akuerigaa. Taamaattoq Jobi Guutimik tunussinngisaannarpoq.

Ikinngutaasuusaartut pingasut Jobi ornippaat. Oqalugiaatini tulleriinni, Jobimik allakkani quppernerpassuarni allassimasuni, angutit taakkua kukkullutik Jobi isumaqalersinniarpaat isertorluni ajortuliorsimammat Guutip pillaraa. Allaat oqaatiginiarpaat Guuti kiffaminik nuannaarutiginninnanilu tatiginninngitsoq. Kukkusumik taamaanneraanerat Jobip akueriumanngilaa. Jobi aalajangersimalluinnarluni nalunaarpoq toqussi tikillugu assuarnaattuarniarluni!

Jobili kukkuvoq imminut naapertuilluartuutinniarpallaarami. Angut inuusunnerusoq Elihumik atilik oqaluttunut tamanut tusarnaarsimasoq oqalulerpoq. Elihup Jobi naqqippaa paasinngimmagu Jehovap kisimi oqartussaaneranik illersuinissaq imminut naapertuilluartuutinniarnissamit pingaaruteqarnerungaartoq. Aamma Elihup Jobimut ikinngutaasuusaartut sukannersumik naqqippai.

Taava Jehova Jobimut oqaluppoq eqqarsartaasia naqqillugu. Pinngortitarsuarmi tupinnartorpassuit eqqaallugit inuup Guutip angingaassusianut naleqqiullugu suunngissusia pillugu Jobi eqqarsartippaa. Jobip maniguulluni Guutip naqqiinera akueraa. Jehovap ‘nallittuingaarluni saammaassingaarlunilu’ Jobi peqqissisippaa, pigisarisimasaasa marloriaataannik pigisaqalersillugu pilluaqqullugulu qulinik qitornartaartillugu. (Jaaku 5:11) Jobip ingasattumik misilinneqarnermini Guutimut assuarnaattuarnermigut Saatanip inummik misilinneqartumik Guutimut aalajaattuartoqarsinnaannginneraanerata eqqunngitsuunera uppernarsarpaa.

— Tunngavigineqartut: Jobimik allakkat.