Ujaqqanik milloorneqartoq

ANGUT uani seeqqumiartoq tassa Stefanus. Taanna Jesusimut ajoqersugaavoq ilumoortoq. Atali qanoq-una pisoqartoq! Angutit ujarassuarnik milloorpaat. Sooq Stefanus taama uumigitigaat allaat taamaaliorlutik? Tusariartigu.

Guutip Stefanus nuanningaartumik tupinnartuliortarneranik ikiorsimavaa. Angutit taakkua tamanna iluarinngilaat, taamaattumik inuit sallusuissummik oqaluttuummagit ajorivaat. Guutilli ilisimassummik angisuumik tunivaa, Stefanusillu inuit taakkua ajoqersuutaat ilumuunngitsuusut uppernarsarpaa. Taava suli kamannerulerput. Tiguaat, taannalu pillugu salluliortussanik aggeqqusillutik.

Palasiunerup aperaa: ’Ilumoorpa?’ Stefanus akivoq Biibilimut tunngasumik oqalugiarluarluni. Naggataatigut oqaluttuarpoq qanoq angutit ajortut itsaq Jehovap pruffiitiinik uumissuisimasut. Taavalu oqarpoq: ’Ilissi angutit taakku assigaasi. Guutip kiffaa Jesus toqupparsi, Guutillu inatsisai naalanngilasi.’

Taava upperisarsiornikkut pisortat kamattorujussuanngorput! Kamangaaramik kigutitik saverortippaat. Stefanusilli niaqquni makitippaa oqarlunilu: ’Takuuk! Jesus qilammiittoq isigaara Guutip talerpiata tungaani qeqartoq.’ Angutit siutitik assamminnik matuaat Stefanusilu arpaffigalugu. Tiguaat uniarlugulu illoqarfimmit anillutik.

Tassani annoraatik qallersaatit peerpaat inuusuttumullu Saulusimut paareqqullugit. Saulus takusinnaaviuk? Taava angutit ilaasa Stefanus ujaqqanik milluulerpaat. Soorlu takusinnaagit, seeqqummerpoq Guutilu qinnuigalugu: ’Jehova, ajortuliaannik pillagassanngortinniaqinagit.’ Nalunngilaa ilaat upperisarsiornikkut pisortanit uukapaatitaasimasut. Taavalu Stefanus toquvoq.

Illit ajortumik pineqaraangavit akiniaaniartarpit? Guuti qinnuigisarpiuk pillaqqullugit? Stefanus Jesusilu taamaaliunngillat. Taakkua inuit inussiarnerfigisarpaat, naak inussiarnerfiginngikkaluaraatik. Taakkua maligassiaat malinniartigu.