Nukappiaqqat uummaqqittut

ILLIT toqugaluaruit anaanat qanormitaava misigissagaluarpa uummarteqqinneqaruit? Pilluartorujussuussagaluarpoq, ilaa! Inulli toqusimasoq uummaqqissinnaava? Taama pisoqarsimava?

Uani angut, arnaq nukappiararlu takukkit. Angut tassa pruffiiti Elias. Arnaq uillarneruvoq illoqarfimmit Zareptameersoq, nukappiararlu tassa ernera. Ullut ilaanni nukappiaraq napparsimalerpoq. Ajorsiartuinnarami kiisa toquvoq. Eliasip arnaq oqarfigaa: ’Nukappiaraq uannukaanniaruk.’

Eliasip meeraq toqungasoq inimut qullermut majuuppaa siniffimmullu ilillugu. Taava qinuvoq: ’Jehova, nukappiaraq uummartiguk.’ Nukappiararlu anersaartulerpoq! Taava Eliasip inimut allermut ateqatigaa arnamullu oqarluni: ’Takuuk, ernerit uumavoq!’ Tamannaana pillugu arnaq pilluartorujussuusoq.

Jehovap pruffiitiisa pingaartut ilaat ateqarpoq Elisa. Taanna Eliasimut ikiortaavoq. Kingornagulli Jehovap Elisa tupinnartuliortittarpaa. Ullut ilaanni Elisa illoqarfimmut Sjunemimukarpoq, tassanilu arnamit kingorna ernertaartumit inussiarnisaarfigineqarluarpoq.

Alligami ullaat ilaanni nukappiaqqap ataatani narsaammi sulisoq ikioriartorpaa. Tassanngaannaq nukappiaraq nillerpoq: ’Niaqorloqaanga!’ Angerlaanneqarami nukappiaraq toquvoq. Anaanaalu aliasoqaaq! Tuaviinnarlu Elisa aatippaa.

Elisa tikiukkami inimut nukappiaqqap toqungasup innangaffianut iserpoq. Jehovamut qinuvoq, timillu toqungasup qaanut nallarluni. Erniinnaq nukappiaqqap timaa uunnappoq, arfineq-marloriarlunilu tangajorpoq. Anaanaa pilluangaalerpoq iserami paasillugulu nukappiaraatini uummarsimasoq!

Inupparujussuit toqusimapput. Tamanna pillugu eqqarlii ilaqutaat ikinngutaallu aliasuttaqaat. Uagut toqusunik makititsisinnaassuseqanngilagut. Jehovali taamaaliorsinnaavoq. Kingusinnerusukkut ilinniassavarput Jehovap qanoq ililluni inuit millionilippassuit uummartikkumaarai.