Guutip David qineraa

SUSOQARTOQ takusinnaaviuk? Nukappiaqqap-una savaaraq nannumit allarsuarmit annaakkaa. Allarsuaq aggersimavoq savaararlu uniarlugu neriniarlugu. Nukappiararli takkussimavoq malersorlugillu savaaraq allarsuup qarnanit annaallugu. Allarsuarlu imminut saammat nukappiaqqap tigusimavaa toqullugulu! Aamma ilaanni nukappiaqqap taassuma savat ilaat liivermit annaassimavaa. Sapiik, ilaa? Kinaasoq nalunngiliuk?

Tassaavoq David. Illoqarfimmi Betlehemimi najugaqarpoq. Aatagaa Obed, Rutip Boasillu ernerat. Taakku eqqaamavigit? Davidillu ataatagaa Isaj. David ataatami savaataanik paarsisuuvoq. David inunngorpoq Saulip kunngitut Jehovamit qinigaaneranit ukiut qulit qaangiuttut.

Taava Jehovap Samuel oqarfigaa: ’Uuliamik tarnummik immikkut ittumik tigusigit aallarillu Isajikkunnut Betlehemimiittunut. Ernerisa ilaat kunngissatut qinerpara.’ Isajip angajulliliaa Eliab takuleramiuk, Samuel imminut oqarfigaaq: ’Taannaassagunarpoq Jehovap taneqqusaa.’ Jehovalli oqarfigaa: ’Angissusia pinnissusialu isiginiassanngilatit. Taanna kunngissatut qininngilara.’

Taava Isajip Abinadab qaaqquaa Samuelimullu sassartillugu. Samuelili oqarpoq: ’Naagga, aamma taanna Jehovap qininngilaa.’ Taava Isajip ernini Sjamma sassartippaa. ’Naagga, aamma taanna Jehovap qininngilaa,’ Samuel oqarpoq. Isaj ernermi ilaannik arfineq-marlunnik Samuelimut sassartitsivoq, arlaannaalluunniilli Jehovap qininngilaa. ’Ernitit tassa tamarmik?’ Samuel aperaaq.

’Nukarleq kiserngoruppoq,’ Isaj oqarpoq. ’Aneerporli savanik paarsilluni.’ David isertinneqarmat, Samuelip takusinnaavaa kusanartoq. ’Tassa taanna,’ Jehova oqarpoq. ’Taniguk.’ Samuelilu taamaaliorpoq. Kingorna David Israelimi kunnginngorumaarpoq.