Qatanngutiminit uumigisaasoq

NUKAPPIARAQ aliasuppalungaarami! Tassa Josef. Qatanngutaasa aatsaannguummat tunisimavaat angutinut Egypteniliartunut. Tassani Josef inussianngortinneqassaaq. Suna pillugu qatanngutissai taamatut ajortuliorpat? Josef sinngagigamikku.

Angutaata Jakobip Josef asasorujussuuaa. Immikkut ajunngisaarfigaa annoraartaartillugu qallersaammik takisuumik kusanartumillu. Jakobip Josef qanoq atsigisumik asagaa takuleramikku, angajui quliusut sinngalerput Josefilu uumigilerlugu. Allattaarli pissutigalugu uumigaat.

Josef sinnattukkanik marlunnik sinnattorsimavoq. Josefip sinnattugaani tamani qatanngutaasa sikiffigisarpaat. Sinnattukkaminik oqaluttuummatik angajuisa Josef suli uumiginerulerpaat.

Ullut ilaanni Josefip angajui angummik savaataanik paarsitillugit, Jakobip Josef oqarfigaa takusaqqullugit qanoq innersut. Qatanngutaasa Josef aggersoq takuleramikku, ilaat oqarput: ’Toqoqisigu!’ Rubenili angajulliliaq oqarpoq: ’Naagga, taamaalioqinasi!’ Josefili tiguaat puilasuliamullu paqqernikumut nakkartillugu. Taava ingipput qanoq iliorfigissallugu aalajangerniarlutik.

Taamaalinerani Ismaelikkut saneqqupput. Judap qatanngutissani oqarfigai: ’Ismaelikkunnut tunisigu.’ Taava tunivaat. Josef tunivaat siilvinik 20-nik akilersillugu. Misigittaangaaramik!

Qatanngutigiit ataatartik qanoq oqaluttuutissanerpaat? Savaasaq toquppaat Josefillu annoraava qallersaat kusanartoq savaasap aavanut misuttarlugu. Taava ataataminnut Jakobimut angerlaappaat oqarlutillu: ’Una nassaaraarput, atagu takoriassagit, Josefip annoraarinerpaa.’

Taamaapporlu. ’Uumasup nujuartap Josef toqussimassavaa,’ suaarpoq. Josefillu qatanngutaasa kissaatigaat ataatartik taamatorluinnaq isumaqassasoq. Jakob aliasoqaaq. Ullorpassuit qiasarpoq. Josefili toqunngilaq. Ingerlanneqarfiani qanoq pisoqartoq takoriartigu.