“Ikinngut” peqqusersusaartoq

Inuusut­tuuninni naapissimasannik “ikinnguteqarputit”. Inersimasutut misigitit­tarpaatit peqatin­ninngaanniillu akuerineqar­nissannik ikiorsimagunarlutit. Eqqissisimajun­naaraangavit naatsorsuutigiuaannarpat “eqqissisis­sagaatit”. Aap, ukiorpassuarni pissutsini assigiin­ngitsuni pinngitsoorsin­naajunnaarsimavat.

Piffissalli ingerlanerani pissusipalaavi paasiar­tulerpatit. Qimakkuman­ngilluin­narpaatitsumiiffiit ilaannut tikilluaq­qusaajun­naarsik­kaluarpatil­luunniit. Imaassinnaavoq inersimarpalun­nerulersit­taraatit, tamannali peqqissutsinnik akeqarpoq. Tamannaan­naanngilarli, allaat aningaasarsiannik tilligarfigiuarpaatit.

Kingullertigut atassuteqarfigeq­qikkusun­ngikkaluarpat, iperarusun­ngilaatilli. Peqqissimis­sutigingaalerpat naapissimagakku.

PUJORTAR­TARTORPASSUIT sikaritsi “ikinngutitut” taamatut misigisaqarfigisarpaat. Ukiut 50-it pujortar­tareerluni arnaq Earlinemmik atilik ima oqaluttuarpoq: “Sikaritsi inunnit tamanit iluaqutiginerpaajunikuuara. Ikinngutin­naariin­nanngilara – ilaatigut ‘ikinngutituarisarpara’.” Earlinelli paasilerpaa sikaritsi “ikinngutaasoq” peqqusersusaartoq ajorluin­nartorlu. Aallaqqaataani allassimasut Earline pillugu oqaluttuaasimasin­naagaluarpoq. Paasileramiulli pujortartarneq timimik Guutip tunissutaanik mingutitsisartoq Guutillu isaani ajortuusoq ileqqupalaaq tamanna taamaatippaa. – Korintimiunut 2. 7:1.

Angut Frankimik atilik aalajangerpoq Guuti nuannaar­tikkusullugu pujortar­tarunnaar­niarluni. Sikaritsili kingulleq pujortareerlugu ulloq ataaseq qaangiummat misigilerpoq illumi ataani paarngulluni sikaritsip kimmiviinik natiup akunnerisigut nakkaasimasunik ujarlerluni. Frank oqarpoq: “Tamanna aalajangius­sininnut pissutaavoq. Misigilerama paarngullunga sorujuit akornanni qamitanik kimmivis­sarsiorlunga kanngutseqaanga. Kingorna pujortaq­qinngilanga.”

Sooruna tupa taama sakkortutigisumik inunnut sunniuteqartartoq? Patsisaasut arlaqartut misissueq­qissaartartut paasisimavaat. (1) Aanngajaarniutit inerteq­qutaasut akui tupami aamma akugineqartut. (2) Nikotini najuunneqartoq 7 sekundiinnaat ingerlaneranni qaratsamut anngussinnaavoq. (3) Inuit nerinerminni imernerminni ataatsimoor­nerminnilu pujortarneq pinngitsoorsin­naanngin­namikku inuunerannut tiguaarpasittarpoq .

Earlinelli Frankillu takutippaat pinngitsuuisin­naajunnaarneq ajoqutaasoq unitsin­neqarsinnaasoq. Illit pujortartaruit, pujortar­tarunnaarusul­lutillu, allaaserisat tulliuttut atuarukkit immaqa inuuneq allarluinnaq aallartis­sinnaassavat.