Meeraaqqat kigutaat qanoq illersorneqarsinnaappat?

QANGA kigutitit ineriartulerpat? Immaqa tupigusuutigissavat tusarukku pinngoriartorneq tamanna aallartittoq suli anaanavit naaviniittutit, anaanavilluunniit naartulersimanini suli paasinngikkaa. Taamaattumik anaananngortussap inuussutissanik pisariaqartunik pinissaa pigaaruteqarpoq, kalkit, fosforit, proteinit vitaminillu naammattunik annertussusillit ilanngullugit.

Inoorlaammi? Paasisimasaqarluartut oqarput pingaartumik meeraaqqat miluffittortut carieseqalernissaminnut navianartorsiortut kiguserfiinilu qullerni kigutaat saarliit siulliullutik saassunneqartartut. Qanorli taama pisoqartarpa? Meeqqat ilaat sinilerajuttarput miluffik immummik, juicemik, imermik sukkulimmik sodavandimilluunniit imalik oqummiartillugu. Imerpalasut taakku qappiorsinnaasut kulhydratinik bakteerissat uumassutigisinnaasaannik akoqarput. Bakteerissat seernartunik meeqqat kigutaannik aseruisinnaasunik sanaartortarput, pingaartumik seernartoq unnuaq naallugu kigutiniissimappat. Meeraaqqat ilaat siaruaassimasunik carieseqartut immuttuutitik siusippallaartumik katattarpaat, tamannalu kigutaasa ataavartussat ineriartornerannut sunniuteqarnerlussinnaavoq.

Angajoqqaat qanoq meeqqamik kiguteeranngui kusanartut illersorsinnaavaat? Meeqqat anaanamik milunnissaat tapersersornartinneqarpoq, pingaartumik anaanap immuata bakteeriaqannginnera akiuussutissarpassuaqarneralu pissutigalugit. Miluffik atorneqarpat meeraq 18-inik qaammateqalerpat atorunnaarneqartariaqartoq ilisimasaqarluartut oqarput. Aammattaaq nammineq eqqissisimaarnissaq pinnagu, miluffiup taamaallaat meeqqap nerisinneranut atorneqarnissaa tapersersorneqarpoq. Meeraq miluffilerlugu innartinneqarpat, pitsaanerpaavoq imiinnarmik imaqarpat. Nerereernerit tamaasa annoraamininnguamik qituttumik ipeqanngitsumik meeqqap kigutai salinneqarsinnaapput.

Meeqqat carieseqaliaarnissaat pitsaalineqarsinnaavoq. Kigutinik eqqortumik paarsineq pigaaruteqarpoq — allaat meeqqanut mikisunut. (wE 22/11 2000)