„Iteritsi, silarsuarmiut!“
QULEQUTAQ tupaallannartoq tamanna Awake!-ip normuani siullermi, 22. augusti 1946-mi saqqummersumi, atuarneqarsinnaasimavoq. Atuagassiap tamatuma assinga qallunaatooq Vågn op! 1947-mi julimi saqqummertalerpoq. Taamanikkut normut tamarmik oqaatsini qulini 500.000-it ataallugit naqiterneqartarput, ullumikkulli oqaatsini 67-ini 13 millioninngorlugit naqiterneqartarlutik. Atuagassialli tamatuma suna siunertaraa? Ulluinnarni qanoq ililluni iluaqutaasinnaava?
Awake!-p atuagassiaq Consolation (1937) taassumalu kingoraarsimasaa The Golden Age (1919) kingoraarpai. 1925-miit atuagassiap qalunaatuua/norgemiusuua Den gyldne Tidsalder-imik taaguutilik saqqummertalerpoq, 1930-milu tamakkiisumik qallunaatooq Ny Verden saqqummertalerluni.
The Golden Age-p normuani siullermi, 1. oktoberi 1919-mi saqqummersumi, ima allassimasoqarpoq: „Naalagaaffiit naalakkersuinikkut, aningaasatigut inuttullu atugarisatigut annikilliorput. Ulluinnarni ajornartorsiutit annertusiartuinnarput, inunnillu aaqqinneqarsinnaasorinanngillat.“ Aamma soqutiginartumik ima allassimasoqarpoq: „Sumi tamaani inuuniarneq akitsoraluttuinnarpoq inuppassuillu ilumut annikilliorlutillu perlimoorput.“ Ullumikkuttaq uagut tamakkorpiaat ajornartorsiutiginnginnerpavut?
Iteritsi!-mik saqqummersitsisartut silarsuarmi ajornartorsiutinik qaammarsaasarput aaqqiissutissatuarlu piviusoq ataavartorlu — inuiannik naapertuilluartumik naalakkersuineq Guutip naalagaaffianit Jesus Kristusimit aqunneqartoq — tikkuartarlugu. Allakkat Hebriiarisuut-ni aamma Kristumiut Allagaataat Griikerisuut-ni piffissaq ’qilaat nutaat nunallu nutaap’, tassa maani nunarsuarmi inuiaat nutaat taakkununngalu naalakkersuisut nutaat, atuutilerfissaat siulittuutigineqarsimavoq. (Jesaja 65:17; 2 Pîtruse 3:13; sarĸúmersitat 21:1-4) Iteritsi!-p ulluni makkunani pisut qaammarsaatigisarpai, Guutillu qanoq ililluni inuit naalliuutaannik piiaajumaarnera tikkuartarlugu. Ulluinnarni paatsiveerusimaarneq ulapaarnerlu qanoq ililluni anigorneqarsinnaasut atuartartuni ilitsersuuttarpai.
Iteritsi! isumatsassimasunut imaluunniit aaqqissuussamit Satanerpaluttumit inuuffigisatsinnit atornerlunneqartunut tuppallersaatissamik ilaatigut saqqummiussisarpoq. Normuani siullermi allassimasut isumaqatigisinnaavavut: „Atuagassiaq tamanna . . . inunnut unneqqarissunut eqqortuliorusuttunullu naggueqatigiinnit, upperisarsiortunit inuiaqatigiinnillu tamaneersunut naleqangaartunik paasissutissiisarpoq.“
Atuagassiamut tamatumunnga tunngasunik suli amerlanerusunik paasisaqarusukkuit imaluunniit illit nammineq angerlarsimaffinni akeqanngitsumik Biibilimik atuaqqissaaqatiginerusukkuit uunga allassinnaavutit: Napasuliaq Alapernaarsuiffik, Box 248, 3900 Nuuk. (gD 8/7 92)