PETRUSIMIT ALLAKKAT AAPPAAT

1 Siimuut Petrusimit, Jiisusip Kristusip inussiaataanit apustilianillu, Guutitta Aniguisitsisittalu Jiisusip Kristusip naapertuil­luarnerat pissutigalugu uagutsitulli erlinnartumik* uppersuseqalersimasunut:

2 Guuti Naalagarpullu Jiisusi pillugit eqqoqqis­saartumik paasisimasaqarnikkut ajunngisaangaarnermik eqqissinermillu suli annerusumik tunineqar­nissassinnik kissaappassi. 3 Guuti, alutornas­sutsiminut ajunngis­sutsiminullu naapertuuttumik uatsinnik qaaqqusisoq, pillugu eqqoqqis­saartumik paasisimasaqaratta pissaanerlu Guutimeersoq pissutigalugu inuunermut Guutimullu tunniusimanermut iluaqutaasunik sunik tamanik tunineqarpugut.* 4 Inuit pileris­susipiloqarnertik pillugu ajorsiar­tornerat qimarratigigatsigu Guutip alutornas­sutsiminut ajunngis­sutsiminullu naapertuuttumik immisut pissuseqaleq­qulluta erlinnartunik angingaar­tunillu neriorsorpaatigut.*

5 Tamannarpiaq pissutigalugu sapinngisarsi tamaat atorlugu uppernissinnut ajunngissuseq ilanngutis­savarsi, ajunngis­sutsissinnut paasisimasaqarneq, 6 paasisimasaqar­nissinnut imminut aqussinnaaneq, imminut aqussin­naanissinnut pinertusaarneq, pinertusaar­nissinnut Guutimut tunniusimaneq, 7 Guutimut tunniusimanissinnut qatanngutigiittut asaqatigiinneq qatanngutigiittullu asaqatigiin­nissinnut inunnik tamanik asanninneq. 8 Taakku ineriar­tortittuarussigit Naalagarput Jiisusi Kristusi pillugu eqqoqqis­saartumik paasisimasaqarnermik atuinermut tunngatillugu unittoornasilu inerititaqar­tuassaasi.

9 Taama pissuseqan­ngitsoq qaamaneq takujuman­nginnamiuk tappiitsuullunilu* ajortuliarisimasani pillugit minguiar­neqarsimanerminik eqqaamasaqanngilaq. 10 Taamaattumik, qatanngutit, qaaqquneqarnersi toqqarneqar­nersilu suli tamaviaar­nerullusi aalajangiusimaniarsigit, tamakkumi iliuuseriuarussigit uppernermik tunussin­ngisaan­nassaasi. 11 Taamaaliorussi Naalakkatta Aniguisitsisittalu Jiisusip Kristusip kunngeqarfianut atajuar­tussamut isernissamik immikkut pisinnaatitaaf­filerneqassaasi angingaartumik.

12 Taamaattumik ilumoortoq ilinniarsimasarsi aalajaaf­figilluin­naraluarissi tamakkuninnga eqqaasit­tuarusuppassi. 13 Tupermili matumaniitillunga* eqqaasitsis­sutinik kajumis­saarnissarsi eqqortuusoraara. 14 Nalunngilarami Naalakkatta Jiisusip Kristusip oqarneratut tupera peerneqangajalersoq. 15 Qimagutereeruma tamakku tamaasa eqqaasar­niassagassigit sapinngisannik eqqaasit­tuassavassi.

16 Naalakkatta Jiisusip Kristusip pissaanera najuunneralu pillugit ilinniar­titsissutigut oqaluttualianik ilumuun­ngitsunik tunngaveqarnatik angingaas­susianik takunnit­tuunitsinnik tunngaveqarput. 17 Kristusimi Guutimit Ataatamit alutornassuseq angingaartoq atorlugu ima oqarfigineqarami alutornarsisin­neqarlunilu ataqqinarsisin­neqarpoq: “Tassa Ernera, asasara, akuerisara.” 18 Aap, qaqqami illernar­tumeeqatigitillugu oqaatsit taakku qilammit tusarpagut.

19 Taamaattumik siulittuutit upperinerulerpagut. Silatusaas­saasilu taartumi, tassa uummatissinni, qullertut qaammaq­qutitut ittut (seqerngup ullaallu ulloriaata* nuinissaasa tungaannut) eqqumaf­figigussigit. 20 Nalunngil­luinnarparsimi Allakkani Illernartuni siulittuutit inuit nassuiaataannik tunngaveqan­ngitsut. 21 Siulittuutimmi inunnit aallaaveqan­ngillat, inuilli anersaamit illernartumit siulersor­tillutik* Guutimit tusarlius­saqartarput.

2 Guutilli innuttaasa akornganni ilumuun­ngitsunik pruffiiteqaler­neratut akorngassinni ilumuun­ngitsunik ilinniar­titsisoqalissaaq. Malunnaarsaarlutik immikkoor­niartunik aseruisunik pilersitsissapput allaallu imminnik pisiarinnittoq piginnittorlu naluneras­sallugu. Tamakkulu pissutigalugit suujunnaarsitaapal­lassapput. 2 Tamatuma saniatigut kanngut­taatsulior­neranni* amerlasuut malissavaat, tamatumalu kingunerisaanik ilumoortup aqqutaa asissor­neqalissaaq. 3 Piumatoqigamik salluliorlutik atornerlun­niarsaris­savaasi. Pillarneqar­nissaalli, qangali aalajanger­neqartoq, kingusinaas­sanngimmat suujunnaarsitaassapput.

4 Guutimmi inngilit ajortuliortut pillanngitsuunngilai, Tartarus­simulli* igippai eqqartuun­neqarnis­saasalu tungaannut taarnersuarmi kalunnernik qilersorsimatillugit.* 5 Aamma itsaq inuit ajortut pillanngitsuunngilai, nunarsuarli guutiitsunik ulikkaartoq ulersuar­tikkamiuk Nooa, naapertuil­luassutsimik oqaluus­sisartoq, allallu arfineq-marluk illersorpai. 6 Illoqarfiillu Soodoma Gomooralu arsakuin­nanngor­tillugit pillaramigit guutiitsut qanoq pineqar­nissaat takutippaa. 7 Aamma Lotsi naapertuil­luartuusoq, inatsisaatsut kanngut­taatsulior­nerannik* aliasuutigin­ningaartoq, aniguisippaa. 8 Angutimmi naapertuil­luartup taassuma inuit ajortut akornganni najugaqarallarami inatsisaatsuliornerit takusani tusakkanilu ullut tamaasa tarningata* naapertuil­luartup naalliuutigisarpai. 9 Tassa Jehovap* nalunngilaa Guutimut tunniusimasut misilin­neqarnermit qanoq aniguisis­sallugit naapertuil­luanngitsullu ullormi eqqartuus­siffimmi qanoq suujunnaarsis­sallugit.* 10 Tamanna pingaartumik allat timaannik mingutsitsiniartunut oqartus­saassutsimillu* nikagin­nittunut atuuppoq.

Sapiiser­tuugamik piumasaan­narminnillu iliortaramik Guutimit ataqqineqartunik asissuinissartik siooragineq ajorpaat, 11 inngililli nukittunerugaluarlutik pissaaneqar­nerugaluarlutillu Jehova ataqqigamikku ilumuun­ngitsumik ilinniar­titsisut asissorlugit unnerluutigineq ajorpaat. 12 Inuilli taakkua uumasutut piumasaan­narminnik iliortartutut sianiitsigigamik aamma pisarineqar­tussatut suujunnaarsitaasus­satullu erniusimasutut ikkamik ilisimasaqarfigin­ngisatik nikassar­tarpaat. Aserorterisaramik suujunnaarsitaassapput. 13 Ajoqusiisaramik ajoqusernermik akissarsisin­neqassapput.

Piisaarluni inuuneq allaallu ullukkut ingasattumik festerneq nuannarisaqaat. Ilissinnik festeqateqar­nerminni tammartitsiniutinik ilinniar­titsisarnertik nuannareqigamikku kanngunar­tuullutillu mingutsitsisarput. 14 Isaat allasiornermik ulikkaarlutillu ajortuliun­ngitsoorsin­naanngillat, sanngiitsunillu ussiisarput. Piumatus­sutsimik sungiusar­neqarsimasunik uummateqarput. Qitornaapput perloqqusat. 15 Aqqut narlusooq qimakkamikku tammartitaapput. Beoorip ernerata Biilearmip, eqqunngitsuliornerup akissarsias­sartaanik nuannarisaqartup,* aqqutaa atuarpaat. 16 Biilearmili eqqunngitsuliornini pillugu oqaaqqis­saarneqarpoq. Siutituup oqalussin­naanngik­kaluartup inuttut oqalulluni pruffiitip sianiitsuliornera unitsippaa.

17 Puilasut imeqanngitsut putsullu anorersuarmit nassataritittut assigaat, taarnerpaamullu pissapput. 18 Tusarnersunik, iluaqutaan­ngitsunilli, oqaaseqartarput. Pileris­susipiluit malillugit iliuuseqar­nissamik kajumis­saarinikkut kanngut­taatsulior­nermikkullu* inooriaatsimit eqqunngitsumit anigueq­qammersut ussertarpaat. 19 Inussiaataajun­naarnissamik neriorsuigaluarlutik inuunerlunnermut* inussiaataapput. Kinaluunniimmi ajugaaf­figisiminut inussiaataasarpoq. 20 Naalagarput Aniguisitsiserpullu Jiisusi Kristusi pillugu eqqoqqis­saartumik paasisimasaqalernikkut inuit iliuusiinit mingunnartunit aniguereerlutik uteqqittut ajugaaf­figineqartullu maanna atugaat aallaqqaammut atugaannit ajornerulissapput. 21 Naapertuil­luarnerup aqqutaa ilisimaq­qissaalereerlugu inassutit illernartut pissarsiatik tunukkamikkit aqqut pillugu ilisimasaqan­nginneq taakkununnga ajunngin­nerusimas­sagaluarpoq. 22 Ussat ilumoortoq taakkununnga eqquuppoq: “Qimmeq meriaaminut uterpoq, puulukilu arnaviaq uffarneqarsimasoq marullummi assakaavoq.”

3 Asasakka, maanna aappassaanik allaffigaassi. Allakkanni siullerni iliornittut nalunngeriik­kassinnik eqqaasin­nissigut kajumis­saarusuppassi eqqarsarluarsin­naassutsissinnik atueqqullusi 2 pruffiitinit illernartunit allakkat* apustilisilu aqqutigalugit Naalakkatta Aniguisitsisittalu inassutaa eqqaamanias­sagassigit. 3 Pingaarnertut nalussan­ngilarsi ulluni kingullerni inuit ajunngitsunik illaruaatigin­nittassasut pileris­susipilutillu malillugit ajortulior­tassasut. 4 Oqartassapput: “Naak taanna najuunniarluni neriorsuisoq? Siuaasagut toqoreerput, suulli tamarmik pinngor­titsinerup aallaqqaataanitulli ipput.”

5 Piaaralutik soqutigin­ngitsuusaarpaat itsarsuarli qilak pinngortoq Guutillu oqaasia pissutigalugu nuna qajannaatsoq imaaniit puttuttoq erngullu qeqqaniilersoq 6 taamanilu inuit ajortut qarsunneqaramik imermit suujunnaarsin­neqartut. 7 Qilalli nunarsuarlu maanna atasut Guutip oqaasia pissutigalugu ullormi eqqartuus­siffissami guutiitsunillu suujunnaarsitsif­fissami innermik suujunnaarsin­neqassapput.

8 Asasakka, unali puiussan­ngilarsi: Jehovamut ulloq ataaseq ukiutut tuusintitut ippoq ukiullu tuusintit ullortut ataatsitut illutik. 9 Ilaasa eqqarsar­tarnerattut Jehovap neriorsuutini eqquutsin­niaasaanngilaa, inuilli tamaasa suujunnaarsitaanatik peqqissiminissamut periarfis­sikkusuk­kamigit naammagit­tarfigaasi. 10 Jehovalli ullussaa tillinniatut tikiutissaaq. Taamanik­kussamut qilak qanngorpalulluni* peerutis­sallunilu qilaap nunarsuullu pinngoqqaatai kissarluin­nartumik aatsinneqassapput, aamma nunarsuaq tassanilu iliuuserineqartut qulaarneqassapput.

11 Tamakku tamarmik taama aatsinneqas­sammata inuttut qanoq ittuunissarsi eqqarsaatigisariaqarparsi. Illernartumik pissuseqarnersi Guutimullu tunniusimanersi takutit­tariaqarlugulu 12 Jehovap ulluata nalliuffissaa utaqqillugulu eqqarsaatigiuar­tariaqarparsi.* Taamanik­kussamut qilak ikuallallugu suujunnaarsin­neqassallunilu qilaap nunarsuullu pinngoqqaatai kissarluin­nartumik aatsinneqassapput! 13 Neriorsuutaali naapertorlugu qilak nutaaq nunarsuarlu nutaaq qilanaaraagut, taakkunanilu kikkut tamarmik eqqortulior­tuassapput.

14 Taamaattumik asasakka, tamakku qilanaarigassigit Guutimit naggataatigut minguitsutut, ajoquteqan­ngitsutut eqqisseqateqar­tutullu isigineqarsin­naaqqullusi tamaviaaritsi. 15 Tamatuma saniatigut Naalakkatta naammagit­tarnera aniguisitaanissamut periarfissatut isigisiuk. Qatanngutittami asasatta Paulusip ilisimas­sutsimut imminut tunniun­neqartumut naapertuuttumik aamma taama allaffigaasi. 16 Aap, tamakku tamaasa allakkamini eqqartorpai. Allaatigisaasali ilaat paasiuminaatsut isumaat ilisimasaqan­ngitsunit* sanngiitsunillu allanngor­tinneqartarput. Aamma Allakkat Illernartut sinnerinut tunngatillugu taamaalior­taramik suujunnaarsitaassapput.

17 Taamaattumik asasakka, taama ilisimatin­neqareerassi inatsisaatsut eqqunngitsumik ilinniar­titsinerannit tammartin­neqaqqunasi toqqammavimmillu qajannaatsumit nakkaqqunasi* mianersoritsi. 18 Ajunngisaangaarnermik suli annerusumik pissarsillusilu Naalagarput Aniguisitsiserpullu Jiisusi Kristusi pillugu paasisimasaqar­neruleritsi. Jiisusi maanna qaqugorsuarmullu ataqqinarsisin­neqarli. Amen.