PETRUSIMIT ALLAKKAT SIULLIIT

1 Petrusimit, Jiisusimit Kristusimit apustilin­ngortin­neqartumit, Pontusimi, Galaatiami, Kapaduukiami, Aasiami Bityniamilu najugaqaral­lartutut siammarsimasunut. 2 Naalannissarsi Jiisusillu Kristusip aavanik serpartar­neqarnissarsi siunertaralugu Guutip Ataatap siumut ilisiman­ninneranut naapertuuttumik anersaamit illernarsisin­neqarlusi toqqarneqarpusi.

Guutimit ajunngisaangaarnermik eqqissinermillu suli annerusumik tunineqar­nissassinnik kissaappassi.

3 Unnersiutigineqarli Guuti, Naalakkatta Jiisusip Kristusip Ataataa, Jiisusimik Kristusimik toqusunit makititsinermigut nallittuinersuarminut naapertuuttumik uagutsinnik ernioqqis­sisitsinermigut ataavartumik neriuuteqalersitsisoq 4 aamma mikiarsin­naanngitsumik,* mingutsin­neqarsiman­ngitsumik toqulior­tussaan­ngitsumillu kingornus­sassiisoq. Pissarsiassarsi tamanna qilammiippoq. 5 Upperassi Guutip pissaaneranit paarineqarpusi. Tamanna aniguisitaanermik, naggatissami saqqummersin­neqartussamik, kinguneqassaaq. 6 Piffissami sivikitsumi assigiin­ngitsutigut misilin­neqarnissinni isumatsaq­qasariaqaraluarlusi tamanna nuannaangaalis­sutigaarsi. 7 Uppernikkut taama misilin­neqartarpusi Jiisusi Kristusi saqqummersitaappat unnersiutigineqarlusilu alutornarsisin­neqarlusilu ataqqinarsisin­neqarnias­sagassi. Upperluarneq kuultimit, innermit misilin­neqaraluarluni* nunguttartumit, naleqar­nerungaarpoq. 8 Kristusi takusiman­ngisaan­naraluarlugu asavarsi. Maanna takusin­naanngik­kaluarlugu upperalugulu oqaaser­talerneqarsin­naanngitsumik nuannaangaarlusilu qiimmat­tarpusi. 9 Upperassilu nuannaar­nissinni aniguisitaassaasi.

10 Pruffiitit ajunngisaangaarfigineqar­nissarsi pillugu siulittuisut taama aniguisitaanissaq pillugu paasiniaaq­qissaarlutillu misissueq­qissaarput. 11 Kristusip naalliun­nissaanik tamatumalu kingorna alutornarsisitaanissaanik Guutip anersaavanit siumut paasitin­neqaramik Kristusimut tunngasut qanoq qaqugulu pissanersut misissoq­qissaar­tuarpaat. 12 Pruffiitit paasitin­neqarput imminnut pillutik kiffartornatik ilissili pillusi kiffartorlutik. Anersaaq illernartoq qilammeersoq ikiortigalugu nutaarsiassanik nuannersunik ilissinnut oqaluus­sissutiginnittut nalunaarutaat pruffiitinit allanneqarput. Inngilillu taakkunin­ngarpiaq paasinnik­kusungaarput.

13 Taamaattumik isummasi tamaviaar­nissamut piareersarsigit. Silatusaar­tuaritsi. Jiisusi Kristusi saqqummersitaappat ajunngisaangaarfigineqar­nissarsi ilimagiuarsiuk. 14 Qitornaagassi naalattut ilisimasaqan­ngikkal­larassi pileris­sutsissinnit ilusilersor­neqartis­saaritsi. 15 Qaaqqusisis­situlli Guutitut illernartutut sutigut tamatigut illernar­tuugitsi, 16 allassimavormi: “Illernar­tuugama illernar­tuussaasi.”

17 Ataataq, kinaassusersiornani iliuuserineqartut naapertorlugit eqqartuus­sisartoq, qinnuigisarussiuk nunarsuarmi najugaqaral­larnissinni mianerin­nillusi inuussaasi. 18 Nalunngilarsimi sølvit kuultil­luunniit nunguttartut atornagit inooriaatsimit isumaqan­ngitsumit siuaasassinnit ingerlateq­qinneqartumit* iperagaasusi.* 19 Kristusilli, savaaqqatut ajoquteqan­ngitsutut minguitsutullu ittup, aavanit erlinnartumit aniguisin­neqarpusi. 20 Taanna meeqqat suli ilumiugineqalin­ngitsut* ilisimaneqarpoq, naggatissalli naalerneranni ilissi pillusi saqqummersin­neqarpoq. 21 Taanna aqqutigalugu Guuti, toqusunit makititsisaa alutornarsisitsisaalu, upperfigaarsi. Taamaattumik Guuti tatigalugulu neriuffigaarsi.

22 Ilumoortumut naalannissigut imminut minguiarassi ilumoor­tuusaarnasilu qatanngutigiittut asaqatigiilersimagassi ilumoorlusi qamannga pisumik asaqatigiigitsi. 23 Naajartor­tussarmi* mikiarsinnaasoq atornagu mikiarsin­naanngitsorli* atorlugu, tassa Guutip uumassuseqartup atajuartullu oqaasia aqqutigalugu, ernioqqis­sitaavusi. 24 Allassimavormi: “Inuit tamarmik ivikkatut ipput, alutornas­susiallu tamarmi narsaammi naasutut ippoq. Ivikkat toquliortarput sikkersullu nakkaasarlutik, 25 Jehovalli* oqaasii atajuassapput.” ‘Oqaatsillu’ taakku tassaapput nutaarsiassat nuannersut ilissinnut oqaluus­sissutigineqartut.

2 Taamaattumik ajussutsit, peqquserlunnerit, ilumoor­tuusaarnerit, usorunnerit ingutsinerillu suulluunniit peersigit. 2 Ineriar­toqqullusi aniguisitaaq­qullusilu inoorlaap immuttorusungaar­tarneratut oqaatsip immuata minguitsup* kajungerisalernissaa ilinniarsiuk. 3 Naalakkammi ajunngitsuunera ussereerparsi.*

4 Ujarak uumasoq inuit narrugisaat Guutilli erlinnartutut toqqagaa ornikkussiuk 5 tassaalissaasi ujaqqat uumasut Guutip anersaakkut ittumik illulior­nermini atugai, palaseqatigiit illernartut Jiisusi Kristusi aqqutigalugu pilliutinik anersaakkut ittunik Guutip iluarinar­titaanik sassaas­sisartut. 6 Allakkanimi Illernartuni allassimavoq: “Takuuk! Ujarak toqqagaq, tunngavimmi ujaraasoq teqeqqumiittoq erlinnartoq, Ziionnimut ilivara, tamatumunngalu uppertoq pakatsin­ngisaan­nassaaq.”*

7 Upperassi ilissinnut erlinnartuuvoq. Uppinngitsunulli “ujarak sanasut narrugisaat tassaalersimavoq teqeqqumi ujarak pingaarneq”,* 8 “ujarak naakkiuffissaq qaarsorlu mamiatsaffissaq”. Oqaaseq naalanngin­namikku naakkiupput. Inunnut taamaattunut taama pisoqassaaq. 9 Ilissili tassaavusi “inuiaat toqqakkat, palaseqatigiit kunngik­kormiut, inuiaqatigiit illernartut, inuiaat immikkut pigineqartut Guutillu pissusii* nuanningaartut pillugit nunani tamani oqaluus­sisussat”. Taassuma taartumiittusi qaamanerminut alutornartumut qaaqquaasi. 10 Guutimimmi innuttarineqarsiman­ngikkaluarlusi maanna innuttarineqarpusi. Nallittor­neqarsiman­ngikkaluarlusi maanna nallittor­neqarpusi.

11 Asasakka takornar­taasusi najugaqaral­lartuususilu, kimigiiserfigaassi pileris­susipiluit ilissinnut sorsuttut akiortuaq­qullugit. 12 Inuit akornganni pissuseris­saartuaritsi eqqunngitsulior­tuunerarlusi unnerluussisut ajunngitsuliasi takusin­naanias­sammatigit tamannalu pissutigalugu Guuti ullormi misissuif­fissami unnersiutiginias­sammassuk.

13 Oqartus­saassuseqarfinnut inunnit pilersin­neqartunut tamanut Naalagaq pillugu kajumillusi naalagitsi. Tamanna atuuppoq kunngimut ilissinnit annerusumut 14 taassumaluunniit sinniisuinut eqqunngitsuliortunik pillaajar­tortunut ajunngitsulior­tunillu nersualaarin­nikkiar­tortunut. 15 Guutimmi piumasaraa ajunngitsulior­nissigut inuit sianiitsut isumaatsumik oqaluttut oqaasis­saarutitissagisi. 16 Inussiaataan­ngitsutut inuussaasi, inussiaataan­nginnersili eqqunngitsulior­nissamut utoqqatsis­sutissatut atornagu Guutimut inussiaataasutut atussavarsi. 17 Inuit tamalaat ataqqisigit, qatanngutisi* tamaasa asasigit, Guuti mianerisiuk kunngilu ataqqillugu.

18 Kiffat naalakkatik, ajunngitsut uteriitsuun­ngitsullu kisiisa pinnagit kisianni aamma ingasaas­siniartartut, ataqqillugit kajumillutik naalassavaat. 19 Guutimmi iluarisarpaa nalunngeqatiginnissut pissutigalugu erloqinermini* pinertusaartoq naapertuil­luanngitsumillu pineqartoq. 20 Ajortulior­nersimi pissutigalugu unatarneqarussi pinertusaarussilu sumut iluaqutaassagami? Ajunngitsulior­nersili pissutigalugu naalliun­nissinni pinertusaarnersi Guutip iluarissavaa.

21 Kristusimmi ilissi pillusi naalliun­nermigut tumiminik atuaaqqis­saaqqullusi maligas­simmasi naapertuil­luanngitsumik naalliutsitaaq­qullusi qaaqqusaavusi. 22 Kristusi ajortuliornanilu salluliorneq ajorpoq. 23 Asissor­neqaraangami akilluni asissuineq ajorpoq. Naalliuk­kaangami sioorasaarineq ajorpoq, naapertuil­luartumilli Eqqartuus­sisartumut neriuppoq. 24 Kristusip ajortimit aniguisitaaq­qulluta naapertuil­luartumillu inooqqulluta qisummik naalliutsitsiviliami* ajortuliagut timimini nammappai. Aamma “ikiinit peqqissisin­neqarpugut”. 25 Savatummi tammarsimagaluarpusi, maannali tarnissinnik* paarsisuullunilu nakkutil­liisumut uterpusi.

3 Taamatuttaaq ilissi nuliaasusi, uisi kajumillusi naalassavasi. Oqaaseqan­ngikkaluarlusimi pissuserin­nissigut uisi Guutip oqaasianut naalanngitsut uppertun­ngorsin­naapput 2 minguitsumik ataqqin­ningaar­tumillu pissuseqar­nissinnik takunnit­tuunertik pissutigalugu. 3 Qallikkut ittut – nutsat perlakkat,* pinnersaatit kuultiusut atisallu kusanartut – kusassaatigis­sanngilasi. 4 Qamuunali kinaassusersi – eqqissisimajuarnersi saamajuar­nersilu, Guutip isaani naleqangaartut – tassa isiginnit­taasersi nuannersoq kusassaatigis­savarsi. 5 Itsarmi arnat illernartut Guutimut neriuttut uiminnut kajumillutik naalannermikkut taama kusassartarput. 6 Assersuutigalugu Saarap Aaperaat naalappaa naalakkamillu taallugu. Ajunngitsulior­tuarussi qunulin­ngisaan­narussilu Saaramut qitornan­ngorsin­naavusi.

7 Taamatuttaaq ilissi uiususi, nuliasi paasinnit­tuullusi* inooqatigiuassavasi. Ilissinnit sanngiin­nerusut immersak­katullu qajannartutut ittut ilissitulli ajunngisaangaarfigineqarlutik inuunermik kingornus­sisussaammata ataqqin­nittumik pisarsigit. Taamaaliun­ngikkussi qinnutisi Guutimit tusarneqas­sanngillat.

8 Kingullertut, tamassi isumakkut ataasioqatigiigitsi,* paaseqatigiit­taritsi,* qatanngutigiittut asaqatigiigitsi, qamannga pisumik misigin­neqatigiit­taritsi maniguullusilu. 9 Ajortumik iliortoq ajortumik asissuisorlu asissuinermik akissan­ngilarsi. Ajunngitsumilli akissavarsi, ajunngitsumimmi kingornus­siniassagassi taamaalioq­qullusi qaaqquneqarpusi.

10 Allassimavormi: “Inuunermik nuannaarutigin­nikkusuttup pilluarusuttullu ajortumik sallumillu oqalunngin­nissani eqqumaf­figissavaa. 11 Ajortoq tunullugu ajunngitsuliorli. Eqqissineq ujarlugulu anguniassavaa. 12 Jehovammi naapertuil­luartut isigalugillu qamannga pisumik qinnutaat tusarnaartarpai, Jehovalli ajortuliortartut tunuttarpai.”

13 Ajunngitsulior­nissarsi pimooruk­kussiuk kia ajoqusis­sagamisi? 14 Allaalli naapertuil­luarneq pillugu naalliukkussi pilluassaasi. Qunugisaat* qunugis­sanngilasi, aamma aarleris­sanngilasi. 15 Kristusili Naalakkatut qamannga pisumik ataqqisiuk. Kikkulluunniit tunngavilersueq­qusisut neriuutissinnik nassuiaan­nissaannut piareersimajuaritsi, saamallusili ataqqin­ningaarlusilu nassuiaassaasi.

16 Ajunngitsumik nalunngeqatigin­nissuteqar­tuaritsi. Taava ilissinnik assortuisut qanorluunniit oqaaseqaraluarunik Kristusimik malinnittutut pissuserinnersi pissutigalugu kanngutsissapput. 17 Guutimmi naalliun­nissarsi akuerippagu ajunngitsuliorneq pillugu naalliunneq ajunngin­neruvoq ajortuliorneq pillugu naalliunnermit. 18 Kristusimi naapertuil­luartoq ilissi naapertuil­luanngitsusi Guutimut piseqqullusi ajortuliornerit pillugit ataasiaammik toquvoq. Inuttut timeqarluni toqutaavoq anersaatulli uummartitaalluni. 19 Anersaajullunilu oqaluus­siffigiartorpai anersaat parnaarus­saaqqasut 20 Nooap nalaani Guutip naammagit­tarluni utaqqinerani,* umiarsuup* sananeqarnerani, naalanngitsut. Umiarsuarmi tassani inuit amerlan­ngitsut, tassa inuit* arfineq-pingasut, isumannaatsumik immakkut aniguisin­neqarput.

21 Imermut morsutsitaanerup, tamatumunnga assingusup, Jiisusip Kristusip toqusunit makititaaneratigut maanna aamma ilissi aniguisippaasi. Tamatumani timip minguiar­neqarneratigut aniguisin­neqarnasi nalunngeqatigin­nissummilli ajunngitsumik tunineqar­nissamik Guutimut qinunikkut aniguisin­neqarpusi. 22 Kristusi qilaliarami Guutip talerpiatungaaniilerpoq. Aamma inngilit, oqartussaasut pissaanerillu taassumunnga naalattus­sanngor­tinneqarput.

4 Kristusi inuttut naalliummat aamma ilissi taassumatut isiginnit­taaseqassaasi.* Inuk timikkut naallius­simasoq ajortulius­saartarami 2 inuttut timeqar­nermini pileris­susipiluit malillugit inuujun­naarluni Guutip piumasaa malillugu inuusarpoq. 3 Taamani uppinngitsut piumasaattut piffissaq kanngut­taatsuliornermut,* aqussin­naanngisamik pileris­suseqarnermut, imigassar­torpallaarnermut, ingasattumik* festernermut, erngunnermut inatsisaatsumillu guutilianik pallorfigin­ninnermut atugarsi naammappoq. 4 Nuannisapilut­tarneranni inuunerloqatigis­saarassigit tupigusupput, taamaat­tumillu nikassar­tarpaasi. 5 Inuilli taakku inuusunik toqusimasunillu eqqartuus­sinissamut piareersimasumut akisussaatin­neqassapput. 6 Taamaattumik toqungasut* qallikkut ittut tunngavigalugit inunnit isornar­torsior­neqaraluarlutik Guutip isaani anersaakkut inuusin­naaqqullugit nutaarsiassanik nuannersunik oqaluus­siffigineqarput.

7 Suulli tamarmik naggatissaat qanillivoq. Taamaattumik isumakkut peqqissuullusilu qinusar­nissarsi eqqumaf­figiuarsiuk. 8 Pingaarnertut, asanninnerup ajortuliarpassuit matoortarmagit qamannga pisumik asaqatigiigitsi. 9 Naammagit­taalliornasi inoroorsaarfigeqatigiit­taritsi. 10 Tamassi tunissutisiassinnut* naapertuuttumik Guutip ajunngisaangaar­neranut assigiin­ngitsutigut takutin­neqartartumut nakkutil­liisuutitatut ajunngitsutut kiffartuuteqatigiigitsi. 11 Ilinniar­titsisoq Guutimit tusarlius­sassaqartutut oqalulli. Kiffartuussisoq nukimmik Guutip tunniut­tagaanik isumalluuteqartutut kiffartorli. Taamaalilluni Jiisusi Kristusi aqqutigalugu Guuti ataqqinarsisin­neqassaaq. Guuti qaqugorsuarmut kipisuitsumillu ataqqineqarlunilu pissaaneqarpoq. Amen.

12 Asasakka, misilin­neqarnisi innertut ittut eqqumiiginagillu tupigusuutigis­sanngilasi. 13 Kristusitulli naalliunnersi nuannaarutigis­savarsi. Taava aamma alutornas­susiata saqqummersitaanerani nuannaarlusilu qiimmat­tassaasi. 14 Kristusip atia pillugu nikassar­neqarussi pilluassaasi. Tamannami alutornassutsip anersaavanit, aap, Guutip anersaavanit, najorneqar­nissinnut takussutissaavoq.

15 Inummilli toqutsisutut, tillinniatut, eqqunngitsulior­tartutut susassarin­ngisanil­luunniit ulapputeqar­tartutut naallius­sanngilasi. 16 Kristumiutulli naalliuttoq kanngusus­sanngilaq. Kristumiutulli inuunermigut Guutimik ataqqinarsisitsiuassaaq. 17 Maannami eqqartuus­siffissan­ngorpoq, Guutillu illua eqqartuun­neqaqqaassaaq. Uagut eqqartuun­neqaqqaarutta nutaarsiassanut nuannersunut Guutimeersunut naalanngitsut qanormitaava naggateqassappat? 18 “Naapertuil­luartoq annaqqassappat guutiitsoq ajortulior­tartorlu qanoq pineqassappat?” 19 Taamaattumik Guutip piumasaatut iliornertik pillugu naalliuttut ajunngitsulior­tuarlutillu Pinngor­titsisoq tatiginartoq neriuffigiuarlissuk.

5 Taamaattumik utoqqaaner­taaqataasutut, Kristusip naalliun­neranik takunnittutut alutornas­sutsimillu saqqummersin­neqartussamik pissarseqataasussatut utoqqaanertasi ima kajumis­saarpakka: 2 Guutip savaatai akisussaaf­figisasi paarisigit. Pinngitsaalisaasutut pinnasi Guutilli saavani kajumillusi nakkutil­liisutut kiffartoritsi.* Iluanaar­niapilunneq pinnagu piumassuseqarnerli pillugu kiffartoritsi. 3 Guutip pigisai naalagaaniarfiginagit savanut maligas­siuisun­ngoritsi. 4 Savanillu paarsisuuneq saqqummersin­neqarpat alutornartumik asiusus­saanngitsumillu niaqoruser­neqassaasi.

5 Taamatuttaaq ilissi angutit inuusun­nerususi, angutit utoqqaanerusut* kajumillusi naalassigit. Guutilli makitasuut iluarin­ngimmagit maniguuttullu ajunngisaangaarfigisarmagit tamassi maniguuttumik immissinnut pisaritsi.*

6 Taamaattumik Guutip piffissan­ngorpat qutsissisin­niassammasi assaata pissaasup ataani maniguugitsi. 7 Isumassormasi isumakuluutisi tamaasa taassumunnga miloriussigit. 8 Silatusaarlusi eqqumagitsi! Akerarsi Diaavulu løvitut qatimaalluni iisassarsiorlunilu angalasarpoq. 9 Nalunngin­nassiuk nunani tamalaani qatanngutisi* tamarmik ilissitulli naalliuuteqartartut aalajaallusi upperluarlusilu akiorsiuk. 10 Sivikitsumilli naallioreerussi Guutip ajunngisaangaartartup Kristusi ataasioqatigalugu naassaan­ngitsumik alutornarsisitaaq­qullusi qaaqqusisup ilinniar­tinneqarnersi naammas­sissavaa. Aalajaal­lisillusilu nakussatsillusilu patajaal­lisissavaasi. 11 Qaqugorsuarmut pissaaneqarpoq. Amen.

12 Silvaanusi,* qatanngutitut aalajaatsutut isigisara, ikiortigalugu qiimmas­sarniarlusi Guutillu ajunngisaangaarnerata ilumoor­neranik uppernarsaavigiumallusi naatsumik taama allaffigaassi. Aalajaallusi ajunngisaangaar­neraniigitsi. 13 Qatanngut arnaq* Babylon­nimiittoq ilissitulli toqqagaq erneralu Makkorsi inuulluaq­qusipput. 14 Asannittumik kunillusi ilasseqatigiigitsi.

Tamassi Kristusimik ataasioqateqartusi, eqqissinermik kissaappassi.