JAAKUMIT ALLAKKAT

1 Jaakumit, Guutip Naalakkattalu Jiisusip Kristusip inussiaataannit, naggueqatigiinnut aqqaneq-marlunnut siammarsimasunut:

Asasakka qatanngutit!

2 Qatanngutikka, assigiin­ngitsutigut misilin­neqartarnisi nuannaarutigisassavasi 3 nalunngin­nassiuk uppernikkut misilin­neqarnersi pinertusaalersitsisartoq. 4 Pinertusaar­tuarnikkulli imminut ilinniar­tilluarussi inorsarfeqarnasi sutigut tamatigut pissuseris­suullusilu peqqissuussaasi.

5 Taamaattumik arlarsi ilisimas­sutsimigut inorsartoq Guutimut, isornar­torsiuinani* tamanut tukkorluni tunissuteqar­tartumut, qinujuaruni ilisimas­sutsimik tunineqassaaq. 6 Upperlunili qulanngil­luinnarlunilu qinujuassaaq, qulartummi assigaa malik anorimit tamanut tamaanga nassataritittoq. 7 Aap, inuup taamaattup Jehovamit* sumilluunniit tunineqar­nissani naatsorsuutigis­sanngilaa. 8 Inuk taamaattoq aalajangersin­naananilu allanngorar­tuartuuvoq.

9 Qatanngutilli pissakil­liortup qutsissisitaanini nuannaarutigiliuk,* 10 pisuullu maniguutilersimanini nuannaarutigiliuk, pisoormi narsaammi naasutut peeruttussaavoq. 11 Soorlu naasoq seqerngup nuisup kissangaar­neranit toqulior­tinneqarluni sikkerneeruk­kaangami kusanaal­lisartoq, taamatuttaaq pisooq aningaasarsiorluarut­torluni toquliortutut illuni peerutissaaq.

12 Pilluarpoq misilin­neqarnermini pinertusaar­tuartoq. Jehovamimmi, asannitsigiuak­kaminik akissarsisitsinissamik neriorsuisumit, akuerisaaguni inuusussatut niaqoruser­neqassaaq. 13 Misilin­neqarnermi oqartoqar­tassanngilaq: “Guutimit misilin­neqarpunga.” Guutimi ajortunik misilin­neqarsin­naanngilaq, namminerlu kimilluunniit ajortunik misiliineq ajorpoq. 14 Kinaluunniilli pileris­sutsiminit kajungilersin­neqarnikkut usserneqar­nikkullu* misilin­neqartarpoq. 15 Pilerissuseq ilumioqaleraangami* ajortuliornermik ernisarpoq ajortuliornerlu toqumik kinguneqar­tarluni.

16 Qatanngutikka asasakka, tammarniaqinasi. 17 Tunissutit ajunngitsut naammal­luinnartullu tamarmik pavannga qilammi qaammaqqutit Ataataannit, tarratut allanngorar­tartutut inngitsumit,* pisarput. 18 Pinngor­titamini inerittooq­qulluta siulliit ilumoortoq atorlugu piumasamisut inuulersip­paatigut.

19 Qatanngutikka asasakka, una nalussan­ngilarsi: Kinaluunniit tusaaniapal­lattassaaq, oqalunniapal­lattassanngilaq kamajasuujus­sananilu, 20 inuummi kamannera Guutip isaani eqqortuliornermik kinguneqarneq ajorpoq. 21 Taamaattumik minguttuut ajussutsillu* suulluunniit peerlugit Guutip oqaasia aniguisitsisinnaasoq ilissinnut naasussatut ikkunneqartoq saamallusi akueris­savarsi.

22 Guutilli oqaasia tusaagin­narnagu maleruas­savarsi, taamaaliun­ngikkussi eqqunngitsumik tunngavilersuillusi imminut salloqit­tassaassi. 23 Kialuunniit oqaaseq tusaraluarlugu iliuuseqan­ngitsup assigaa kiinnaminik tarrarsuutikkut qimerluuisoq. 24 Imminut qimerlooraluarluni ingerlagami inuttut qanoq ittuunini ingerlaannaq puiorpaa. 25 Inatsisinilli inussiaajun­naarsitsisartunik misissueq­qissaartoq maleruaajuartorlu tusartuuvoq puiutunani maleruaasoq. Taamaalior­nermigullu pilluarpoq.

26 Guutisior­tuusorisoq* oqqaminik aqutsisin­naanngitsoq imminut salloqittarpoq, Guutisiorneralu asuliinnaavoq. 27 Guutisioriaasermi* Guutitta Ataatattalu minguitsutut mingutsin­neqarsiman­ngitsutullu isigisaa tassaavoq: Iliarsunnik uillarnernillu annikil­liortunik isumassuineq inuillu ajortut inooriaasiannit mingutsin­neqannginneq.

2 Qatanngutikka, Naalagarput Jiisusi Kristusi alutornartoq upperigaluarlugu nakerisarsiorpisi? 2 Angut kuultinik assammiulik atisaris­saartoq angullu piitsoq atisarluttorlu ataatsimiin­nissinnut iseraangata 3 atisaris­saartumut iluareq­qusaarlusi oqartarpisi: “Maanga pitsaasumut inginniarit”, piitsorlu oqarfigisarlugu: “Nikorfaan­nassaatit”, imaluunniit: “Tummarfimma eqqaanut inginniarit”? 4 Taamaappat nakerisarsiun­nginnerpisi, eqqartuus­sisunngorsiman­nginnerpisi ajortumik aalajangiisartut?

5 Qatanngutikka asasakka, tusaasinga. Inuit piitsuusorisaat Guutip uppernikkut pisuujusussatut Kunngeqarfimmillu, asannitsiminut neriorsuutigisaminik, kingornus­sisussatut toqqarsiman­nginnerpai? 6 Piitsulli nikanarsarpasi. Pisuunit naqisimaneqan­nginnerpisi, uniakalaar­neqarlusilu eqqartuus­sivinnut sassartin­neqartan­nginnerpisi? 7 Pisuut ateqaatigisarsi ataqqinaataasoq mitaatigisan­nginnerpaat? 8 Kunngip inatsisaa* allassimaffimmi eqqaaneqartoq: “Inoqatit imminut asanittut asassavat”, maleruarussiuk ajunngil­luinnartumik iliussaasi. 9 Nakerisarsior­tuarussili ajortuliussaasi, inatsillu taanna naapertorlugu unioqqutitsisutut eqqartuun­neqassaasi.*

10 Moorsisip inatsisaanut tamanut naalattup piumasaqaat ataaseq unioqqutikkuniuk tamaasa unioqqutissavai. 11 Imami oqartoq: “Allasius­sanngilatit”, aamma oqarpoq: “Inummik toqutsis­sanngilatit”. Allasiun­ngikkaluarlutit inummik toqutsiguit inatsisinik unioqqutitsisun­ngussaatit. 12 Inatsisit inussiaajun­naarsitsisut tunngavigalugit eqqartuun­neqartussatut tamatigut oqaluttarlusilu pissusilersor­taritsi. 13 Nallittuinermi ajortoq nallittor­neqarnani eqqartuun­neqassaaq. Nallittuinerup eqqartuussineq ajugaaf­figissavaa.

14 Qatanngutikka, iliuuseqarnani uppernerarneq sumut iluaqutaagami? Upperneq taamaattoq annassutaasin­naanngilaq. 15 Qatanngutit angutit arnalluunniit atisassaaleqisut* ullormullu naammattumik nerisas­saqanngitsut 16 timikkut pisariaqar­titaannik tuninagit arlassi oqarfigippagit: “Ajunngikkisi, aamma kissasserlusilu nerilluarisi”, sumut iluaqutaassagami? 17 Taamatuttaaq iliuuseqarnani upperneq toqungavoq.

18 Imali oqartoqassaaq: “Illit upperputit, uanga iliuuseqarpunga. Iliuuseqarnak uppernerit uannut takutikkukku uanga iliuutsikkut uppernera takutissavara.” 19 Ilaa ataasiinnarmik Guuteqartoq upperaat? Ajunngil­luinnartumik iliorputit. Allaalli anersaapiluit upperlutillu qunupput. 20 Illilli ilisimasakitsutit, nalugakku iliuuseqarnani upperneq iluaqutaan­ngitsoq? 21 Ataatarput Aaperaat ernerminik Iisaamik pilliivimmut sassaas­sereernermi kingorna iliuutsini pissutigalugit naapertuil­luartuutitaan­nginnerpa? 22 Tassa iliuutsimigut uppernini takutippaa, iliuuseqar­neratigullu uppernera naammal­luinnar­tunngor­tinneqarpoq. 23 Taamaalilluni allassimaffik una eqquuppoq: “Aaperaat Jehovamut upperami naapertuil­luartuutitaavoq,” Jehovallu ikinngutaanik taaneqarpoq.

24 Tassa inuup uppernini kisiat pissutiginagu iliuutsinili pissutigalugit naapertuil­luartuutitaasarpoq. 25 Taamatuttaaq atortittartoq Raahabbi inoroorsaarluni isertortumik alapernaarsuisut tikilluaq­qoreerlugit aqqutikkullu allakkut qimaanis­saannik ikioreerlugit iliuutsini pissutigalugit naapertuil­luartuutitaan­nginnerpa? 26 Aap, soorlu timi anersaar­tunngitsoq* toqungasoq, taamatuttaaq iliuuseqarnani upperneq toqungavoq.

3 Qatanngutikka, nalunngin­natsigu sukanner­nerusumik eqqartuun­neqassalluta amerlanersasi ilinniar­titsisun­ngussan­ngillat. 2 Tamattami kukkoqat­taartarpugut.* Oqalunnikkut kukkuneq ajortoq naammal­luinnar­tuullunilu timiminik tamarmiusumik aqutsisinnaavoq. 3 Hesti naalatsin­niarlugu kimmialeraangatsigu timaa tamakkerlugu aquttarparput. 4 Aamma umiarsuit qiviariassagisi: Angigaluaqisut anorersuarnillu ingerlatitaasaraluartut aquttup aquuteerannguaq atorlugu sumulluunniit aquttarpai.

5 Taamatuttaaq timimi oqaq mikisun­nguugaluarluni oqarataartaqaaq. Aamma innimineq orpippas­suarnik ikuallatsitsisinnaavoq. 6 Oqaq aamma innertut ippoq. Oqaq timimik tamarmiusumik mingutsitsisarami inooriaatsimillu* ikuallatsitsisarami Gehennamiillu* ikumatin­neqartarami naapertuil­luannginnermik ulikkaarpoq. 7 Uumasut, timmissat, paarmortut imarmiullu nujuartat tamarmik inunnit nujuitsun­ngortin­neqarsin­naallutillu nujuitsun­ngortin­neqartarput. 8 Kialuunniilli oqaq nujuitsun­ngortis­sinnaanngilaa. Oqaq aqunneqarsin­naananilu ajortuullunilu toqunartumik ulikkaarpoq. 9 Taanna atorlugu Jehova, Ataataq, unnersiutigisarparput. Oqarli aamma atorlugu inuit “Guutimut assingusun­ngorlugit” pinngor­tinneqartut perloqqusarpagut. 10 Qanermik ataatsimik unnersiutigin­nittarlutalu perloqqusisarpugut.

Qatanngutikka, taamaat­tussaan­ngikkaluarpoq. 11 Puilasoq ataaseq imermik* tarajor­nitsumillu ataatsikkut aniatitsisin­naagami? 12 Qatanngutikka, orpik fiiginequt oliivenimik viinnequl­luunniit fiiginimik inerititaqarsin­naagami? Taamatuttaaq puilasoq tarajornitsoq imermik tarajor­ninngitsumik aniatitsisin­naanngilaq.

13 Kina arlarsi silatuujullunilu paasisimasaqas­suseqarpa? Ilisimas­sutsimit pisumik saamalluni iliuuseqar­tarnini pissuserinnikkut uppernarsarliuk. 14 Qamanngali pisumik narrutsallusi sinngagussi akeqqersimaarus­siluunniit* oqarataarnasilu ilumoortumut akerliusumik sallulius­sanngilasi. 15 Ilisimassuseq tamanna pavannga aallaaveqarnani inuttut, uumasutut anersaapiluttullu eqqarsar­tarnermit aallaaveqarpoq. 16 Sinngasoqarlunilu akeqqersimaar­toqaleraangat* paatsiveerut­toqartarlunilu ajortumik sumilluunniit pisoqartarpoq.

17 Ilisimas­suserli pavannga pisoq pingaarnertut minguitsuuvoq tamatumalu saniatigut eqqisseqatigiis­sitsisuulluni, uteriitsuunani,* naalakkumasarluni, nallittuingaar­tuulluni, ajunngitsorpas­suarnik inerititaqar­tuulluni, kinaassusersior­tuunani ilumoor­tuusaarnanilu. 18 Aamma naapertuil­luarnerup inerititaa pissutsini eqqissisimaf­fiusuni eqqisseqatigiis­sitsisut pillugit* siaruar­terneqartarpoq.

4 Suna pissutigalugu immissinnut sorsuullusilu saassuppisi? Pileris­susipilunnit ilussinni* akiuuttunit aallaaveqan­nginnerpat? 2 Pileris­suseqar­tarpusi pissarsis­sanasili. Inunnik toqutsiuarlusilu* pileris­susipiloqar­tuarpusi angusaqas­sanasili. Saassus­siuarlusilu sorsuttuarpusi. Qinuneq ajorassi pissarsineq ajorpusi. 3 Qinugaangassili eqqunngitsumik pissutiginiagaqar­tarassi, tassa pileris­susipilusi piviusun­ngortik­kusuttarassigit, pissarsineq ajorpusi.

4 Allasior­tuususi,* nalugassiuk inuit ajortut iliuusiinik nuannarinninneq* Guutimut akeranngor­titsisartoq? Taamaattumik kinaluunniit tamakkuninnga nuannarin­nikkusuttoq Guutimut akeranngortarpoq. 5 Imaluunniit pissutis­saqanngitsumik allassimaffimmi ima allassimasoqarsoraasiuk: “Usoroqqajaasaratta pilerisut­tuarpugut”? 6 Guutilli ajunngisaangaarnera anneruvoq. Imami allassimavoq: “Guutip makitasuut iluarinngilai, maniguuttulli ajunngisaangaarfigisarpai.”

7 Taamaattumik Guuti kajumillusi naalassavarsi. Diaavululi akiorsiuk, taava ilissinnit qimaassaaq. 8 Guuti qanillisiuk, taava ilissinnut qanillissaaq. Ajortiliususi, assasi ipiiarsigit. Aalajangersin­naanngitsusi, uummatisi minguiarsigit. 9 Nikallungallusilu aliasullusilu qiagitsi. Illarnersi aliasun­ninngorli, nuannaar­nersilu isumatsan­ninngorli. 10 Jehovap isaani maniguugitsi, taava qutsissisis­savaasi.

11 Qatanngutit, immissinnut akiorun­naarniaritsi. Kinaluunniit qatanngumminik akiuisoq isornar­torsiuisorluunniit inatsisinik akiuillunilu isornar­torsiuivoq. Inatsisinik isornar­torsiuiguit inatsisinik maleruaasuunak isornar­torsiuisuussaatit. 12 Ataasiinnarmik Inatsisilior­toqarlunilu Eqqartuus­sisoqarpoq, tassa taanna aniguisitsisin­naallunilu suujunnaarsitsisinnaasoq. Illilli kinaagavit inoqatit isornar­torsiussaviuk?*

13 Ilasi oqartarput: “Ullumi aqaguluunniit illoqarfim­mukassaagut ukiiartorluta, niueriar­torluta aningaasarsioriar­torlutalu.” 14 Inuunersi aqagu qanoq issanersoq naluarsi. Inuunersimi putsutut ersersimatsiaan­nariarluni peeruttutut ippoq. 15 Imali oqassaasi: “Jehovap piumasarippagu inuussaagut ima imalu iliorsin­naalluta.” 16 Pingaakujullusili oqarataarnersi tulluusimaarutigaarsi. Oqarataarnerit taamaattut tamarmik ajortuupput. 17 Taamaattumik kinaluunniit suna eqqortuusoq nalunngik­kaluarlugu eqqortuliun­ngitsoq ajortuliorpoq.

5 Pisuujususi, tusaasinga: Naallius­sagassi qiallusilu kappialagitsi. 2 Pisuussutisi asiupput, atisasilu uumasuaqqanit* nungullar­neqarput. 3 Kuultiutisi sølviutisilu mannger­tornerlutik asiupput, mannger­tornernerisalu kukkusimanersi uppernarsas­sallugulu nungutis­savaasi. Katersukkasi ulluni kingullerni innertut issapput. 4 Tusarias­sagissi! Narsaatissinni katersuisut akissarsisis­simanngisasi suaartarlutik ikioqqupput, katersuisullu ikioqqunerat sakkutoorpas­suarnut naalakkap Jehovap tusarpaa. 5 Nunarsuarmi piisaarlusi iluatallusilu inuusimavusi. Ullormut toqoraaf­fissamut uummatisi puallarsersimavasi. 6 Naapertuil­luartoq toqumik pillagas­sanngor­tipparsi. Taamaattumik akerlilersorpaasi.

7 Qatanngutit, taamaattumik Naalakkatta najuunnissaata tungaanut naammagit­taritsi. Naasorissaasup nunap pingaaqisunik inerititaqarnissaa, ukiakkut upernaakkullu siallernissaa, naammagit­tarluni utaqqisarpaa. 8 Aamma ilissi naammagit­tassaasi. Naalakkap najuunnissaa nalliutilermat uummatisi nakussatsissigit.

9 Qatanngutit, pillarneqaqqunasi qatanngutisi pillugit naammagit­taallioqinasi.* Takuuk! Eqqartuussisoq matup silataaniippoq. 10 Qatanngutit, pruffiitit Jehovap aqqani oqaluttut ajortumillu pineqar­tarnerminni naammagittartut ilaarsigit. 11 Aap, pilluarput* pinertusaartut. Juubi pinertusaartoq tusarlugulu Jehovamit ajunngitsuliorfigineqartoq nalunngin­nassiuk Jehova qamannga pisumik misigis­suseqarlunilu* nallittuisuusoq nalunngilarsi.

12 Qatanngutikka, aamma pingaaruteqarpoq qilak, nuna allaluunniit uppernarsaasiullugu neriorsuis­saarnissarsi. Pillagassatut eqqartuun­neqaqqunasi iliuuseqar­niarlusi oqarussi iliuuseqassaasi, iliuuseqar­niarnasilu oqarussi iliuuseqas­sanngilasi.

13 Arlarsi erloqiva? Qinujuarli. Arlarsi nuannaarpa? Tussiarli. 14 Arlarsi napparsimava? Ilagiinni utoqqaanertanik aggeqqusili. Taakkua qinnullugulu Jehovap aqqani uuliamik tanissavaat. 15 Upperluni qinunerup napparsimasoq* peqqissisissavaa, Jehovallu makitissavaa. Aamma ajortuliorsimaguni isumakkeerfigineqassaaq.

16 Taamaattumik peqqissiumallusi ajortuliasi isertuarnasi nassuerutigalugillu immissinnut qinnuttaritsi. Naapertuil­luartup qamannga pisumik qinnutaa sunniuteqangaartarpoq.* 17 Elia uatsitulli misigis­suseqarpoq, siallin­nginnissaali pillugu ilumoorluni qinummat ukiuni pingasuni qaammatinilu arfinilinni siallinngilaq. 18 Taava qinoqqimmat qilammit siallilerlunilu nuna inerititaqalerpoq.

19 Qatanngutikka, ilumoortumit avissaartoq utertin­neqarpat 20 nalussan­ngilarsi ajortumik inuuseqarun­naarnissamut ajortuliarpas­suarnillu isumakkeerfigineqar­nissamut ikiuisoq ajortuliortup inuuneranik annaassisuusoq.