HEBRÆERINUT

1 Itsaq Guutip pruffiitit aqqutigalugit siuaasagut arlaleriarluni assigiin­ngitsorpas­suartigullu oqaluuttarpai. 2 Maanna ullut makkua naalerneranni Ernini, sunik tamanik kingornus­sisussan­ngortitani piffissarititaasunillu* pinngor­titseqatigisani, aqqutigalugu oqaluut­tarpaatigut. 3 Guutip alutornassusia qanorpiarlu ittuunera Ernerata ersersittarpaa, oqaatsimigullu pissaasutigut suut tamaasa atatippai. Ajortuliagullu pillugit minguiareerluta Ataqqinar­torsuup qutsissumiittup talerpiatungaanut ingippoq. 4 Atermik inngilit atiinit qutsinnerusumik kingornus­sarsigami inngilinit annerungaarpoq.

5 Assersuutigalugu Guuti inngilit ilaannut ima oqarsimanerpa: “Erneraakkit. Ullumi ilinnut ataatan­ngorpunga”? Imaluunniit: “Ataatagis­savaanga, uangalu erneriumaarpara”? 6 Angajul­lilianili nunarsuarmut aallarteq­qikkuniuk oqassaaq: “Guutip inngiliisa tamarmik ataqqin­nillutik sikiffigilissuk.”

7 Aamma inngilit pillugit oqarpoq: “Inngilini pissarsuan­ngortippai* kiffanilu ikualasun­ngortillugit.” 8 Ernerli pillugu oqarpoq: “Guuti qaqugorsuarmut kipisuitsumillu issiavis­saarsuarissavat, kunngeqarfiillu naapertuil­luartumik naalakkersuissaaq. 9 Naapertuil­luarneq nuannaraat* inatsisaannerlu uumigalugu. Taamaattumik Guutip, Guutivit, uuliamik tanippaatit ilannillu nuannaar­nerulersillutit.” 10 Aamma: “Aallaqqaammut, Naalagaq, nunarsuaq tunngavilerpat, qilallu assavit piliaraa. 11 Taakku suujunnaassapput, illilli atajuassaatit. Taakku tamarmik atisatut nungullassapput. 12 Uligussatut, atisatut, imussavatit. Taarser­neqassapput. Illilli taannaajuarputit, ukiutillu naanngisaan­nassapput.”

13 Inngililli ilaannut ima oqarsimanerpa: “Akeqqavit uannit ilinnut tummarfin­ngortin­neqarnissaasa tungaanut talerpimma tungaani issiagallaat”? 14 Inngilit tamarmik anersaajun­nginnerpat illernartumik kiffartortussat, aniguisitaanermik kingornus­sisussanik kiffartuus­sisussatut aallartitat?

2 Taamaattumik sarfaan­neqartutut qimaguk­kiartun­ngisaan­narnias­sagatta tusarsimasagut pisarnermiit eqqumaf­figinerusariaqarpagut. 2 Guutimmi oqaasia inngilit aqqutigalugit oqaatigineqartoq tutsuiginar­tuummat aamma unioqqutitsisut naalanngitsullu tamarmik naapertuil­luartumik pillarneqar­tarmata 3 aniguisitaanermik taama angitigisumik suusupagin­nikkutta taava qanoq ililluta aniguisin­naassagatta? Aniguisitaanissamik tusarliussaq Naalakkatta siulliulluni oqaluus­sissutigaa, tusarnaar­tuisalu tamanna uagutsinnut uppernarsarpaat. 4 Guutillu assigiin­ngitsorpas­suarnik tupinnar­tuliornermigut* piumasaminullu naapertuuttumik anersaamik illernartumik agguaanermigut taakkua oqaasiisa ilumoornerat ersersippaa.

5 Inngilimmi nunarsuassamut eqqartor­takkatsinnut naalakkersuisun­ngortinngilai. 6 Ilisiman­nittorli arlaanni ima oqarpoq: “Inuk suummat eqqaamasarpiuk, inuulluunniit ernera suummat isumassor­tarpiuk? 7 Inngiliniit appasin­nerulaar­tunngortippat. Alutornas­sutsimik ataqqinaammillu niaqoruserpat assavillu piliaannut aqutsisus­sanngor­tillugu. 8 Suut tamaasa isigaasa ataannut inissippatit.” Guutip suut tamaasa taassuma ataanut inissik­kamigit sunilluunniit minitaqanngilaq. Jiisusilli sunut tamanut naalakkersuilernera suli takunngilarput. 9 Maannali Jiisusi toqunini pissutigalugu alutornas­sutsimik ataqqinaammillu niaqoruser­neqartoq paasivarput. Tassa taanna inngilinit appasin­nerulaartumik inissin­neqartoq Guutip ajunngisaangaarnera pissutigalugu kikkut tamaasa pillugit toqusoq.

10 Guutip suut tamaasa pinngor­tillugillu atatippai. Taamaattumik qitornat amerlasuut alutornarsisik­kumallugit aniguisitaanis­saannut Siulersuisuunermik naalliutsitsinikkut naammal­luinnar­tunngor­titsinera naleqquppoq. 11 Illernarsisitsisoq illernarsisin­neqartullu tamarmik ataatsimik naggueqarput. Tamannalu pissutigalugu Jiisusip qatanngutitut taassallugit kannguginngilaa. 12 Ima oqarpoq: “Atit qatanngutinnut oqaluus­sissutigissavara. Ilagiinni erinarsorlunga unnersiutigis­savakkit.” 13 Aamma: “Tatigissavara.” Tamatumalu saniatigut: “Qitornat Jehovap* uannut tunniussai ilagigikka takuuk.”

14 ‘Qitornaasut’ inuttut timeqarmata inuttut timeqalerpoq toqunermigut toqutsinissamut pissaaneqartoq, Diaavulu, suujunnaarsitaaq­qullugu 15 inuunertillu tamaat toqumik ersigisaqarnermut inussiaataasimasut iperagaaq­qullugit. 16 Inngilimmi ikiornagit Aaperaap kinguaavi ikiorpai. 17 Taamaattumik ‘qatanngutini’ sutigut tamatigut assigiler­tariaqarpai Guutimut kiffartornermi palasiunin­ngorumalluni nallittuisoq aalajaatsorlu inuit ajortuliatik pillugit saammaan­neqaatis­saannik pilliuteqarsinnaasoq. 18 Misilin­neqarnermi naallius­simagami misilin­neqartut ikiorsinnaavai.

3 Taamaattumik, qatanngutikka illernartut qilaliar­nissamut qaaqqusaasusi, apustili palasiunerlu upperfigalugu oqaluus­sissutigisarput* – Jiisusi – eqqarsaatigisiuk. 2 Soorlu Moorsisi Guutip illuani kiffartor­nermini sutigut tamatigut aalajaatsoq, taamatuttaaq Jiisusi toqqaasiminut aalajaappoq. 3 Illuliortoq illumit ataqqineqar­nerusarmat Jiisusi Moorsisimit ataqqineqar­nerusariaqarpoq. 4 Soorunami illut tamarmik arlaannit sananeqartarput, tamanilli sanasoq tassaavoq Guuti. 5 Moorsisi kingusin­nerusukkut saqqummersin­neqartussat uppernarsarumallugit* kiffatut Guutip illuani sutigut tamatigut aalajaappoq, 6 Kristusili ernertut Guutip illuanut akisussaasutut aalajaappoq. Naggatissaq tikillugu sapiilluta oqaluttarutta neriuuterpullu tulluusimaarutigisarput aalajangiusimagutsigu tassaajuassaagut Guutip illua.

7 Taamaattumik anersaap illernartup oqarneratut: “Ullumi nipaanut tusarnaarussi 8 taamani uannik kamatsitsiler­nissitut, ullormi inoqajuitsumi uannik misiliinissitut, uummatisi mannger­tissanngilasi. 9 Taamani siuaasassi ukiuni 40-ni iliuutsikka takusimagaluarlugit unammil­lerlungalu misilip­paannga. 10 Taamaattumik taamani inuusut maajugilerlugit oqarpunga: ‘Uummatimikkut tammartuaannarput, aqqutikkalu ilisimalersiman­ngilaat.’ 11 Taamaattumik kamallunga uppernarsaavunga: ‘Qasuersaarfinnut isissan­ngillat.’ ”

12 Qatanngutit, Guutimit uumassuseqartumit ungasil­liartornersi pissutigalugu ajortumik uppersuseqan­ngitsumillu uummateqaleqqunasi mianersoritsi. 13 Ajortimit tammartitsinissamut pissaaneqartumit uummatikkut mannger­titinneqaqqunasi ‘ullumeqaral­lartillugu’ ullut tamaasa qiimmas­saqatigiit­tuaritsi. 14 Aatsaammi aallaqqaammut qulanngin­nitsitut naggatissamut aalajaakkutta Kristusi pissarseqatigis­savarput. 15 Allassimavormi: “Ullumi nipaanut tusarnaarussi taamani uannik kamatsitsiler­nissitut uummatisi mannger­tissanngilasi.”

16 Kikkut Guuti tusarnaaraluarlugu kamatsilerpaat? Tassaan­nginnerpat Moorsisimit siulersor­neqarlutik Egyptenimit anisut tamarmik? 17 Aamma Guutip kikkut ukiuni 40-ni maajugai? Taakkuun­nginnerpat ajortuliortut, inoqajuitsumi toqusut? 18 Aamma kikkut uppernarsaaffigai qasuersaarfimminut isissan­nginnerarlugit? Taakkuun­nginnerpat naalanngitsut? 19 Tassa paasivarput uppersuseqan­nginnertik pissutigalugu isersin­naanngitsut.

4 Taamaattumik qasuersaarfianut isernissamik neriorsuut suli atuuttoq annaajumanagu mianersorta.* 2 Siuaasattami nutaarsiassanik nuannersunik oqaluus­siffigineqar­nerattut oqaluus­siffigineqarpugut. Naalattulli uppernikkut ataasioqatigin­nginnamikkit oqaaseq tusagartik iluaqutigin­ngilaat. 3 Uagulli uppertugut qasuersaarfianut iserpugut. Nunarsuarmi meeqqat ilumiugineqar­talerneranniit* piliani naammas­sisimagaluarlugit oqarpoq: “Taamaattumik kamallunga uppernarsaavunga: ‘Qasuersaarfinnut isissan­ngillat.’ ” 4 Allassimaffiit ilaanni ullut arfineq-aappaat pillugu ima oqarpoq: “Ullut arfineq-aappaanni Guuti piliani tamaasa unitsillugit qasuersaarpoq”, 5 allamilu oqarpoq: “Qasuersaarfinnut isissan­ngillat.”

6 Nutaarsiassanik nuannersunik siulliullutik oqaluus­siffigineqartut naalanngikkamik qasuersaarfimmut isinngillat. Inuilli ilaat suli isersin­naapput. 7 Taamaattumik kingunerujus­suatigut Daavip tussiaasiaani, allakkani ukunani issuarneqareersutut, Guutip oqarnermigut “ullumi” ulloq aalajangersimasoq aalajangersaqqippaa: “Ullumi nipaanut tusarnaarussi uummatisi mannger­tissanngilasi.” 8 Josvammi qasuersaarfimmut siulersorsimasuuppagit Guutip kingusin­nerusukkut ulloq alla eqqartorsimanavian­ngikkaluarpaa. 9 Tassa Guutip innuttai ullortut qasuersaarfittut* ittumik qasuersaarfis­saqarput. 10 Guutip qasuersaarfianut isertoq aamma iliuutsini unitsillugit qasuersaassaaq, soorlu Guuti taamaaliortoq.

11 Taamaattumik taakkunatut naalanngin­nissamut nakkaan­narumanata tamaviaarluta qasuersaarfimmut tassunga iserniarta. 12 Guutimmi oqaasia uumallunilu pissaaneqarlunilu panamit illuttut kiinalimmit sumilluunniit ipinneruvoq. Kapisigaangami allaat tarneq* anersaarlu,* nagguaq paterlu, avissaar­tittarlugillu uummatip eqqarsaatai pissutiginiagaalu nalilersortarpai. 13 Aamma pinngortitaq sunaluunniit Guutip isaanut isertorsin­naanngilaq, iliuutsigulli pillugit eqqartuus­sisissatta isaanut suut tamarmik takussaal­lutillu saqqumipput.

14 Taamaattumik palasiuneq annerusoq qilaliarsimasoq, Jiisusi, Guutip ernera, palasiunerigatsigu tamanut oqaluus­sissutigiuar­tariaqarparput. 15 Sanngiis­sutitsinnimmi paasinnis­sinnaan­ngitsumik palasiuneqarnata uatsitut sutigut tamatigut misilin­neqarsimasumik, ajorteqan­ngitsumilli, palasiuneqarpugut. 16 Taamaattumik ikiorneqar­nissamik pisariaqar­titsinermi nallittor­neqarlutalu ajunngisaangaarfigineqar­niassagatta sapiilluta Guutip ajunngisaangaartartup issiavis­saarsuanut sassarta.

5 Palasiunermi kinaluunniit pilliutissatut tunissutit ajortuliallu pillugit pilliutit toqutassat sassaas­sinnaaq­qullugit inuit iluaqutis­saannik Guutimut kiffartor­tussatut inuit akorngannit toqqarneqartarpoq. 2 Nammineq sanngiis­sutiminik akiugas­saqarami ilisimasakinnertik pissutigalugu kukkusut* misigin­neqatigisinnaavai,* 3 tamannalu pissutigalugu inuiaqatigiit pillugit pilliutissanik sassaas­sisarnermisut nammineq ajortuliani pillugit sassaas­sisarpoq.

4 Inuk imminut palasiunin­ngortis­sinnaanngilaq, Aaronnilli Guutimit toqqarneqar­neratut toqqarneqartarpoq. 5 Taamatuttaaq Kristusi palasiunin­ngornermigut imminut qutsissisinngilaq, Guutimilli ima oqarfigin­nitsiminit qutsissisin­neqarpoq: “Erneraakkit. Ullumi ilinnut ataatan­ngorpunga.” 6 Allassimaf­fimmilu allami oqarpoq: “Melkizeedekkitut qaqugorsuarmut palasiuvutit.”

7 Kristusi nunarsuarmi inuunermini Guutimut toqumit aniguisitsisin­naasumut qullililluni nipituumillu qamannga pisumik qinusarlunilu ikioqqusarpoq, Guutimillu mianerin­nikkami tusarneqarpoq. 8 Ernerugaluarluni naalliun­nermigut naalanneq ilikkarpaa. 9 Naammal­luinnar­tunngor­tinneqareerlunilu* naalatsimi tamarmik naassaan­ngitsumik aniguisitaanis­saannut akisussaasun­ngorpoq 10 Guutimit Melkizeedekkitut palasiunin­ngortin­neqarsimanini pissutigalugu.

11 Kristusi pillugu oqaasis­sarpassuaqaraluarpugut, tusaaniaasaar­tarassili nassuiaanissaq sapernarpoq. 12 Maanna* ilinniar­titsisun­ngoreer­tussaagaluarpusi, taamaattorli Guutip oqaaserisaanik illernartunik ilinniar­titsissutit tunngaviusut pillugit aallaqqaataaniit ilinniar­teqqinneqar­tariaqarpusi. Tamuasarissat pinnagit immuk pisariaqar­teqqilersimavarsi. 13 Immuttor­tuartup naalungiarsuunini pissutigalugu Guutip oqaasia naapertuil­luartoq ilisimanngilaa. 14 Nerisassalli tamuasarissat inersimal­luartunit, eqqarsarsin­naassutsimik* atuinikkut eqqortumik eqqunngitsumillu immikkoor­titsinissamut sungiusarsimasunit, nerineqar­tussaapput.

6 Taamaattumik Kristusi pillugu ilinniar­titsissutigineqartut pingaarnerit ilikkareeratsigit inersimal­luartun­ngornissarput tamaviaarutigalugulu ilinniar­titsissutit uku atorlugit tunngavileeq­qissanngilagut: Iliuutsinik toqungasunik peqqissimis­sutiginninneq, Guutimut upperneq, 2 imermut morsutsitaaneq pillugu ilinniar­titsissut, assammik attuineq, toqusunik makititsineq inaarutaasumillu eqqartuussineq. 3 Guutip akuerippagu inersimal­luartun­ngornissarput tamaviaarutigis­savarput.

4 Kisianni qaammarsar­neqaraluarlutik, qilammiit tunissummik akeqanngitsumik ussiisimagaluarlutik, anersaamik illernartumik pisimagaluarlutik 5 Guutillu oqaasianik pitsaasumik siunissamilu pisussanik ajunngitsunik* ussiisimagaluarlutik 6 tunussisimasut uteqqeq­qullugit peqqissimeq­qullugillu ikiornissaat ajornarluinnarpoq. Guutimmi ernera qisummik naalliutsitsiviliamut* kikiattuuteq­qillugulu kikkut tamaasa isigitillugit kanngunarsarpaat. 7 Narsaat sialummit imerter­neqakulagaangami naggoris­saasiminullu iluaqutaasunik inerititaqaraangami Guutimit ajunngisaarfigineqartarpoq. 8 Orpikkanilli kapinar­tulinnik inerititaqaraangami narrugineqartarpoq, perloqquneqarfissaa qanillisarpoq naggataatigullu ikuallan­neqartarluni.

9 Taama allaffigigaluarlusi ilissinnut tunngatillugu, asasakka, qularin­ngilarput taakkunannga ingerlal­luarnerullusilu aniguisitaassasusi. 10 Guutimmi naapertuil­luartuugami puiornavianngilai illernartunik kiffartuus­sinissigut kiffartuus­siuarnis­sigullu iliuutsisi aterminullu asannit­tuliornersi. 11 Naggatissarli tikillugu neriuutersi qularin­ngilluin­narnias­sagassiuk aallaqqaammulli tamaviaarsimanissitut tamassi tamaviaar­nissarsi kissaatigaarput. 12 Kissaatigin­ngilarput eqiasut­tunngussasusi, uppernikkulli naammagit­tarnikkullu neriorsuutigineqartunik kingornus­sisussat ilaarsigit.

13 Guutimmi Aaperaat neriorsoramiuk imminit annerusumik uppernarsaasus­saqanngimmat imminut uppernarsaasiulluni ima neriorsuivoq: 14 “Ajunngisaarfigalutillu kinguaatit amerlisingaarumaarpakka.” 15 Aaperaap naammagit­tarluni utaqqereerluni neriorsuut taanna pissarsiaraa. 16 Inuimmi imminnit annerusoq uppernarsaasiullugu ilumoorullugu neriorsuisarput, uppernarsaanerallu inatsisitigut qularnaveeq­qutaagami assortuuk­kunnaarsitsisarpoq. 17 Taamatuttaaq Guuti siunertami* allanngor­tinneqarsin­naannginnera neriorsuummik kingornus­sisussanut erseqqis­sarniarlugu aalajangerami uppernarsaalluni neriorsuummik qularnaveeq­qusiivoq.* 18 Taakku marluk* allanngorsin­naanngillat, Guutilu sallusin­naanngilaq. Taamaattumik uagut taassumunnga qimarnguf­fissarsiortugut neriuutip siunitsin­niittup aalajangiusimanissaanut sakkortuumik kajumis­saarneqarpugut. 19 Neriuut taanna tarnimut* kitsatut, isumannaatsutut nikinneq ajortutut, ittoq saagorsuup tunuanut pivoq 20 Jiisusip, Melkizeedekkitut qaqugorsuarmut palasiunin­ngortup, aqqutis­siuukkumalluta siulliulluni iserfigisaanut.

7 Melkizeedekkip, Saalemmip kunngiata Guutillu Qutsinnerpaap palasin­ngortitaata, Aaperaat kunngit ajugaaf­figereerlugit utertoq naapikkamiuk ajunngisaarfigineqar­nissaanik kissaappaa, 2 Aaperaallu suut tamarmik qulinginik tunivaa. Ateq Melkizeedekki isumaqarpoq “naapertuil­luarnerup kunngia”, tamatumalu saniatigut Saalemmip kunngigaa, tassa “eqqissinerup kunngigaa”. 3 Ataataqan­nginnami, anaanaqan­nginnami, kikkunnik siuaasaqarnera allattor­neqarsiman­ngimmat, qanga inunngor­neranik toquneranillu allassimasoqan­ngimmat Guutillu erneratut ikkami qaqugorsuarmut* palasiussaaq.

4 Aaperaap, ilaqutariinni ittuusup, sorsunnermi pissarsiami pitsaanersaasa qulinginik tunimmagu angut taanna pingaartuuvoq. 5 Israalikkut Aaperaamit kingoqqisuugaluartut* Levip erneri palasin­ngortin­neqartut Moorsisip inatsisaani inanneqarput taakkunannga, tassa qatanngutiminnit, isertitat qulinginik katersisar­nissamik. 6 Angutilli taassuma Levikkunnit kingoqqisuun­ngikkaluarluni Aaperaap pissarsiaasa qulinginik pillunilu neriorsor­neqartoq ajunngisaarfigineqar­nissaanik kissaappaa. 7 Naluneqanngilaq minnerusoq annerusumit ajunngisaarfigineqar­nissamik kissaan­neqartartoq. 8 Pisumi siullermi Levikkut toqusussaasut isertitat qulinginik pissarsipput, angutilli allap pissarsiat qulinginik pissarsisup uumanera Allakkani Illernartuni uppernarsar­neqarpoq. 9 Oqartoqarsinnaavoq Levi, isertitat qulinginik pissarsisoq, siuaasani Aaperaat aqqutigalugu pissarsiat qulinginik akiliisoq 10 Melkizeedekki Aaperaamik naapitsimmat Aaperaamut kinguaan­ngortus­saagami.*

11 Palaseqatigiit Levikkuusut (Moorsisip inatsisaasa Israalikkunnut tunniun­neqartut immikkoortuisa ilaat) aqqutigalugit naammal­luinnar­tunngor­toqarsin­naagaluarpat taava sooq palasi alla Aaronnitut innani Melkizeedek­kitulli ittutut eqqartor­neqartoq pisariaqar­tinneqassava? 12 Palaseqatigiit allanngor­tinneqarmata aamma Moorsisip inatsisai allanngor­tinneqar­tariaqarput. 13 Angummi taama eqqartor­neqartoq naggueqatigiinnit allanit, pilliiviup eqqaani kiffartun­ngitsunit, pivoq. 14 Ersarippormi Naalagarput Juudamit kingoqqisuusoq, aamma Moorsisip palasit naggueqatigiinnit taakkunannga pisussat allaatiginngilai.

15 Palasilu alla Melkizeedekkitut ittoq saqqummermat tamanna ersarin­nerulerpoq. 16 Taanna inatsisit aalajangersimasunit kingoqqisuunissamik piumasaqaateqartut tunngaviginagit pissaanerli nungutitaasin­naanngitsumik inuutitsisoq tunngavigalugu palasin­ngorpoq. 17 Taannami pillugu ima uppernarsaateqarpoq: “Melkizeedekkitut qaqugorsuarmut palasiuvutit.”

18 Taamaattumik inassutaasimasoq killeqarlunilu iluaqutaan­nginnami atuukkun­naarsin­neqarpoq. 19 Moorsisimmi inatsisai naammal­luinnar­tunngor­titsinngillat, maannali neriuuterput pitsaanerusoq naammal­luinnar­tunngor­titsivoq, taannalu aqqutigalugu Guuti qanillisin­naavarput. 20 Uppernarsaalluni neriorsuinikkut taama pisoqarpoq. 21 (Inuimmi ilaat uppernarsaaner­taqanngitsumik palasin­ngorsimapput, taannali Guutip ima oqarfigin­nitsimi uppernarsaalluni neriorsuineratigut palasin­ngorpoq: “Jehova uppernarsaavoq, isummanilu allanngor­tissanngilaa:* ‘Qaqugorsuarmut palasiuvutit.’ ”) 22 Jiisusi taamaalilluni isumaqatigiissummut* pitsaanerusumut qularnaveeq­qutaalerpoq.* 23 Tamatuma saniatigut palaserpassuit toqu pissutigalugu palasiujuarsin­naannginnamik kingoraar­taattarput, 24 Jiisusili naassaan­ngitsumik inuugami palasimik kingoraar­teqanngilaq. 25 Taamaattumik qinnukkumallugit inuujuarami aqqutigaluni Guutimut qanillisut tamakkiisumik aniguisis­sinnaavai.

26 Palasiunermi taamaattoq – ilumoorfiginnittoq, pisuussuteqan­ngitsoq, mingutsin­neqarsiman­ngitsoq, ajortilinnit allaanerusoq qilaallu qulaanut qutsissisitaasoq – pisariaqar­tipparput. 27 Ataasiaammik imminut pilliutigigami palasiunerit allat ajortuliatik tamatumalu kingorna inuiaqatigiit ajortuliaat pillugit ullut tamaasa pilliutissanik sassaas­sisariaqartut assiginngilai. 28 Moorsisimmi inatsisai tunngavigalugit palasiunerit sanngiis­sutillit toqqarneqartarput, Moorsisilli inatsisaasa kingorna uppernarsaalluni neriorsuineq tunngavigalugu Erneq, qaqugorsuarmut naammal­luinnar­tunngor­tinneqartoq, toqqarneqarpoq.

8 Allaatigisatta pingaar­nersaat makkuupput: Taama ittumik palasiuneqarpugut, qilammi Ataqqinar­torsuup issiavis­saarsuata talerpiatungaani issiavoq, 2 aamma illernar­nerpaami tupermilu ilumoortumi, inunnit napparneqarnani Jehovamit napparneqartumi, kiffartorpoq. 3 Palasiunerimmi tamarmik tunissutinik pilliutinillu sassaas­sisartussatut toqqarneqar­tarmata Jiisusi aamma arlaannik sassaas­sisariaqarpoq. 4 Moorsisip inatsisai tunngavigalugit angutit tunissutinik sassaas­sisareermata nunarsuarmiit­tuuguni palasiusimas­sanngik­kaluarpoq. 5 Angutit taakkua Guutimut kiffartornerat qilammiittunut assersuutaallunilu qilammiittut tarraraat. Tamanna aamma Moorsisi tupiliulermat Guutip peqqussutaanit ersersin­neqarpoq: “Ilusilersugaq qaqqami takusat malillugu suut tamarmik suliarineqar­nissaat qulakkiissavat.” 6 Jiisusili isumaqatigiissummut* pitsaanerusumut, neriorsuutinik pitsaanerusunik inatsisitigut tunngaveqartumut, akunnermiliut­tuugami maanna pitsaanerusumik kiffartor­tussanngor­tinneqarpoq.

7 Isumaqatigiissut siulleq taanna amigarsiman­ngitsuuppat alla pisariaqas­sanngik­kaluarpoq. 8 Israalikkulli ima assuarai: “ ‘Ullut nalliuk­kumaarput,’ oqarpoq Jehova, ‘inuiaqatigiinnik Israalikkunnik inuiaqatigiinnillu Juudakkunnik nutaamik isumaqatigiis­suteqarfissakka. 9 Isumaqatigiissut taanna taamani siuaasaat tasiorlugit Egyptenimit anisikkakkit isumaqatigiis­sutinnut assingus­sanngilaq. Isumaqatigiissutiga aalajangiusiman­ngimmassuk isumassorun­naarpakka,’ taama Jehova oqarpoq.

10 ‘Ullut taakkua kingorna inuiaqatigiit Israalikkut ima isumaqatigiis­suteqarfigis­savakka,’ oqarpoq Jehova. ‘Inatsisikka isumaannut ilillugillu uummataannut allassavakka. Taakkualu Guutigilis­savaannga, uangalu innuttarilis­savakka.

11 Tamarmik, minnermiit annermut, ilisarisimas­sagaminnga nunaqqatertik qatanngutertillu ima oqarlutik ilinniar­tissaassavaat: “Jehova ilisimajuk!” 12 Eqqunngitsuliaat pillugit isumakkeerfigis­sallugillu ajortuliaat eqqaaqqis­sanngilakka.’ ”

13 “Isumaqatigiissut nutaaq” eqqaagamiuk siulleq pisoqalisippaa. Pisoqalisoq nutaanngilisorlu peerutingajalerpoq.

9 Guutimut kiffartorneq maanilu nunarsuarmi tupeq guutisiorfik pillugit isumaqatigiis­sutaasimasumi* aalajangersagaqarpoq. 2 Tupeq taanna marlunnik initaqarpoq. Saarlermiipput qullilerfik, nerriviusaq iffiallu-qaqortut* illernartut. Ini taanna Illernartumik taaneqartarpoq. 3 Saagorsuulli aappaata tunuaniippoq toqqup initaa ilorleq Illernar­nerpaamik taaneqartartoq. 4 Tassaniipput tipigis­saammik pujoortitsivik kuultiusoq isumaqatigiis­summullu illerfiusaq tamarmi kuultimik qallersimasoq. Tamatumalu iluaniipput immersagaq kuultiusoq mannanik imalik, Aaronnip ajaappiaa sikkernilik isumaqatigiis­sutillu allassimaffii ujaraasut. 5 Illerfiusap qulaaniipput kerubit alutornartut saammaas­sinerup matuanik* alanngersimatitsisut. Maannali tamakkua annikitsualut­tortaasa eqqartor­nissaannut piffissaanngilaq.

6 Tamakku taama inissin­neqareermata palasit Guutimut kiffartorumallutik toqqup initaanut saarlermut isikulasarput. 7 Palasiunerli ukiumut ataasiarluni kisimiilluni toqqup initaanut ilorlermut isertarpoq aak, nammineq Israalikkullu piaarinatik ajortuliatik pillugit sassaan­niakkani, nassarlugu. 8 Anersaap illernartup taamaalilluni ersersippaa toqqup siulliup napanerani illernar­nerpaamut isaariaq suli ammarneqarsiman­ngitsoq. 9 Tupeq taanna nalitsinnut assersuutaavoq, aaqqissuussarlu malillugu tunissutit pilliutillu sassaan­neqartarput. Taakkuli Guutimut kiffartortup nalunngeqatigin­nissutaanik minguil­luinnar­tunngor­titsisin­naanngillat. 10 Taakku nerisassanut, imigassanut ileqqulersuutillu malillugit minguersariaatsinut* assigiin­ngitsunut taamaallaat tunngapput. Nunarsuarmiittunut* tunngatillugu Moorsisip inatsisaani peqqussutaapput pissutsinik aaqqiiffissap tungaanut atuuttut.

11 Kristusili palasiuneruvoq, ajunngitsullu nuannaarutigilereerpagut. Palasiunertut tikiukkami tupermut assannik sanaajun­ngitsumut, tassa nunarsuarmeersuun­ngitsumut, annerusumut naammal­luinnar­nerusumullu iserpoq. 12 Savaasat nersussuillu angutivissat* aavat nassarnagu namminerli aanni nassarlugu illernar­nerpaamut ataasiaammik iserpoq naassaan­ngitsumillu aniguisilluta.* 13 Savaasammi nersussuillu angutivissat aavat nersussuullu norraatsup arsai siaruar­terneqartut minguttuunik illernar­tunngor­titsillutillu timikkut minguitsun­ngortitsisin­naappata 14 Kristusip, anersaamit naassaan­ngitsumit siulersor­neqarluni ajoquteqan­ngitsutut Guutimut imminut pilliutigisup, aavata Guutimut uumassuseqartumut kiffartorsin­naaqqulluta toqungasunillu iliuuseqas­saaqqulluta nalunngeqatigin­nissuterput minguiar­nerungaas­sannginnerpaa?

15 Taamaattumik toqunermigut akiliutini utertitsissut tunngavigalugu qaaqqusaasut isumaqatigiis­sutaasimasumik unioqqutitsisut aniguisitaaq­qullugit neriorsuummillu iluaqutaajuar­tussamik kingornus­seqqullugit isumaqatigiissummi nutaami akunnermiliuttuuvoq. 16 Guutimik isumaqatigiis­suteqarnermi akunnermiliuttoq toqusariaqarpoq 17 isumaqatigiissut toqu tunngavigalugu atuutilersin­neqartarmat. Akunnermiliuttoq inuutillugu atuussin­naanngilaq. 18 Taamaattumik isumaqatigiis­sutaasimasoq aak atorlugu atuutilerpoq. 19 Moorsisimmi inatsisini inassutigineqartut tamaasa Israalikkunnut tamanut nalunaarutigereerlugit nersussuit angutivissat* savaasallu aavat imermik akuai. Savallu meqqui aappillersakkat isopip* kanaartaanut aalajanger­neqartut atorlugit allakkat imusat Israalikkullu tamaasa aammik serpartarpai 20 ima oqarluni: “Tassa aak isumaqatigiissummik atuutilersitsisoq, Guutillu isumaqatigiissummik tamatuminnga maleruaaqquaasi.” 21 Moorsisip aamma tupeq atortullu illernartumik kiffartornermi atorneqartartut tamaasa aammik serpartarpai. 22 Aap, Moorsisip inatsisai naapertorlugit suut tamangajammik aammik minguiar­neqartarput, aammillu kuisisoqan­ngikkaangat ajortuliat isumakkeer­neqarneq ajorput.

23 Taamaattumik qilammiittunut assersuutaasut uumasut aavannik minguiar­neqartariaqarput, qilammiittulli pilliutinit taakkunannga pitsaanerungaartunik minguiar­neqarput. 24 Kristusimi illernar­nerpaamut assannik sanaamut, piviusumut assingusumut, isernani qilammut iserpoq iluaqutis­satsinnillu Guutimut* sassarluni. 25 Palasiunerup ukiut tamaasa aak nammineq aaginngisani nassarlugu illernar­nerpaamut isertar­neratut arlaleriarluni imminut pilliutiginiarluni sassanngilaq. 26 Taamaas­simagaluaruni nunarsuarmi meeqqat ilumiugineqar­talerneranniit* arlaleriarluni naallius­simassagaluarpoq. Ajorti peersin­niarlugu maanna naggatissap nalaani imminut pilliutiginermigut ataasiaammik sassarpoq. 27 Soorlu inuit ataasiaammik toqusartut tamatumalu kingorna eqqartuun­neqassasut, 28 taamatuttaaq Kristusi inuppassuit ajortuliaat nammakkumallugit ataasiaammik imminut pilliutigivoq. Aappassaanillu tikiukkuni ajorti peernagu* utaqqisini qilanaartut aniguisissavai.

10 Moorsisip inatsisai tassaapput ajunngitsut nalliuttussat tarraat, timiunngin­namilli* ukiut tamaasa assigiinnik pilliuteqarumallutik sassartuartunik naammal­luinnar­tunngor­titsisin­naanngillat. 2 Taamaas­simagaluarpat pilliuteqartarneq unitsin­neqarsimas­sannginnerpa? Guutimummi kiffartortut minguiar­neqareerunik ajortuliatik pillugit ilerasuuteqas­saassagaluarmata. 3 Pilliutilli taakku ukiut tamaasa ajortulianik eqqaasitsis­sutaasarput 4 nersussuit angutivissat savaasallu aavat ajortulianik peersisin­naanngimmata.

5 Kristusi inuit akorngannut pigami oqarpoq: “ ‘Pilliutit tunissutillu piumanngilatit, timimilli piareersaapparma. 6 Pilliutit ikuallagassat ilivitsut ajortuliallu pillugit pilliutit akuerin­ngilatit.’ 7 Taava oqarpunga: ‘Guuti, tikiuppunga (allakkani imusani allaatigineqarpunga) illit piumasattut iliorniarlunga.’ ” 8 Ima oqaqqaarluni: “Pilliutit, tunissutit, pilliutit ikuallagassat ilivitsut ajortuliallu pillugit pilliutit piumanagillu akuerin­ngilatit” – tassa Moorsisip inatsisai naapertorlugit pilliutit sassaan­neqartartut – 9 oqarpoq: “Tikiuppunga illit piumasattut iliorniarlunga.” Aaqqissuussaq nutaaq atuutilersin­niarlugu siulleq atuukkun­naarsippaa. 10 Guutip ‘piumasaatut’ Jiisusip Kristusip timaata ataasiaammik pilliutigineqar­neratigut illernarsisin­neqarpugut.

11 Aamma palasit tamarmik illernartumik kiffartorumallutik* assigiinnillu tamakkiisumik ajortaarutsitsisin­naanngitsunik pilliuteqarumallutik ullut tamaasa inissamin­nukartarput. 12 Angulli taanna ajortit pillugit ataasiaammik pilliuteqarlunilu Guutip talerpiatungaanut ingippoq. 13 Taamanimiilli akeqqami isikkaminut tummarfiliun­neqarnissaat utaqqivaa. 14 Ataatsimik pilliuteqarnikkut illernarsisin­neqartut qaqugorsuarmut naammal­luinnar­tunngortippai. 15 Tamatuma saniatigut anersaap illernartup uppernarsaavigaatigut. Ima oqareerluni: 16 “ ‘Ullut taakkua kingorna ima isumaqatigiis­suteqarfigis­savakka,’* oqarpoq Jehova. ‘Inatsisikka uummataannut ilillugillu isumaannut allassavakka.’ ” 17 Oqarpoq: “Ajortuliaat inatsisinillu unioqqutitsinerat eqqaaqqis­sanngilakka.” 18 Isumakkeerfigineqareeramik ajortuliatik pillugit pilliuteqar­tariaarupput.

19 Taamaattumik, qatanngutit, Jiisusip aava pissutigalugu sapiissuseqarluta* Illernar­nerpaamut isersin­naavugut. 20 Saagorsuak­koornermigut nutaamik inuuneqaler­nissamut aqqutis­siuuppaatigut. Saagorsuaq taanna tassaavoq timaa. 21 Guutip illuanut akisussaasumik pissaasumillu palaseqaratta 22 uummatitsinnilu nalunngeqatigin­nissuterput ajortoq serpartar­neqarnikkut minguiar­neqarmat timerpullu imermik minguitsumik uffarneqarmat ilumoorluta upperluin­narlutalu sassarta. 23 Neriorsuisoq tatiginarmat neriuuterput nalorninata aalajaallutalu tamanut oqaluus­sissutigisigu. 24 Aamma asannit­tuliornissamut ajunngitsulior­nissamullu kajumis­saaqatigiik­kumalluta isumassoqatigiitta.* 25 Ataatsimiigias­saarsimasut ilaarnagit qiimmas­saqatigiitta. Ulloq nalliutilermat tamakku tamaasa iliuuserinerus­savagut.

26 Ilumoortoq pillugu eqqoqqis­saartumik paasisimasaqalereerluta piaaraluta ajortulior­tarutta ajortuliagut pillugit allanik pilliuteqar­toqarsin­naajunnaassaaq. 27 Aarlerigis­savarpulli eqqartuun­neqarnissaq kamaanneqar­nissarlu ikualasutut ittoq akerlilersuisunik nungutitsisussaq. 28 Moorsisip inatsisaanik suusupaginnittoq marluk pingasul­luunniit uppernarsaanerisigut misigin­neqatigineqarnani toqutaasarmat 29 taava Guutip erneranik tullaarinnittoq, aammik – isumaqatigiissummik atuutilersitsisumik imminillu illernarsisitsisumik – nalingin­naatitsisoq ajunngisaangaar­nerullu anersaavanik nikagin­ninnikkut narrunarsaasoq annerungaartumik pillarneqas­sannginnerpa? 30 Imami oqartoq ilisarisimavarput: “Akiniut pigaara, uanga pillaajumaarpunga.” Aamma: “Jehovap innuttani eqqartuutissavai.” 31 Guutimit uumassuseqartumit pillarneqarnissaq aarlerinartuuvoq.

32 Qaammarsar­neqarnissi kingorna ullut tamaviaarlusi naalliullusilu akiuunnissinni pinertusaarfisi eqqaamasigit. 33 Ilaannikkut kikkut tamaasa isigitillugit* nikassar­neqartarlusilu annikil­liortitaasarpusi, ilaannikkullu taama misigisaqartut annertoq­qusersor­tarpasi.* 34 Parnaarus­saaqqasut misigin­neqatigisarpasi, nalunngin­nassiullu pitsaanerusumik ataavar­tumillu pigisaqarlusi pigisassinnik ujajaaf­figineqarnersi nuannaarlusi akuerisarparsi.

35 Taamaattumik sapiillusi oqaluus­siuarussi akissarsisin­neqangaassaasi. 36 Guutip piumasaatut ilioreerussi neriorsuutip eqquutitin­neqarnera misiginias­sagassiuk pinertusaar­tariaqarpusi. 37 “Qanittun­nguakkummi” “tikiuttussaq kingusinaarnani tikiutissaaq”. 38 “Kiffarali naapertuil­luartoq uppernini pissutigalugu inuussaaq,” “qunullunili tunuartertoq iluarin­ngilara”. 39 Uagut qunullutik tunuartertut suujunnaarsitaasullu ilaginngilaatigut, uppertulli inuuinnartullu ilagaatigut.

11 Upperneq tassaavoq neriugisap eqquunnissaanik qularuteqan­nginneq, takussaan­ngitsut piviusuunerannut uppernarsaat ersarissoq.* 2 Itsaq inuusut* upperneq pissutigalugu Guutimit iluarineqar­nerminnik uppernarsaavigineqarput.

3 Uppernikkut paasivarput qilammiittut nunarsuarmiittullu* Guutip oqaasianit inissititer­neqartut takussaasullu takussaan­ngitsunit pinngor­tinneqartut.

4 Aabeli upperami Kainip pilliutaanit naleqar­nerusumik Guutimut pilliuteqarpoq. Uppernerlu taanna tunngavigalugu tunissutini Guutimit akuerineqarmata naapertuil­luartuunerminik uppernarsaavigineqarpoq, toqusimagaluarlunilu uppernermigut suli oqaluppoq.

5 Enoki uppermat Guutip naalliun­nartumik toqoqqunagu nuuppaa, tamannalu pissutigalugu nassaarineqanngilaq. Nuutsin­neqarninili sioqqullugu Guutimit iluarineqar­nerminik uppernarsaavigineqarpoq. 6 Guuti piviusuusoq qamanngalu pisumik ujarlersiminik akissarsisitsisartoq uppereq­qaarlugu qanillineqarsin­naammat uppersuseqan­ngitsoq Guutimit iluarisaasin­naanngilaq.

7 Nooa upperami suli takuneqarsin­naanngitsut pillugit Guutimit mianersoq­quneqareerluni Guuti mianeralugu umiarsualiorpoq.* Ilaqutaalu taamaalillutik annaanneqarput. Upperneratigut ersersin­neqarpoq inuit ajortut pillarneqar­tariaqartut, upperamilu naapertuil­luartuutitaavoq.

8 Aaperaat upperami nunamut kingornus­sassaminut aallaqquneqarpoq. Sumukas­sanerluni nalugaluarlugu naalalluni aallarpoq. 9 Upperami nunami neriorsuutigisami takornartatut inuuvoq. Aamma Iisaaq Jaakulu, neriorsuummik kingornus­seqatigisassani, tuperni najugaqatigai 10 illoqarfik piviusunik toqqavilik, Guutimit ilusilersor­neqarlunilu* sananeqartoq, utaqqigamiuk.

11 Saara aamma upperami neriorsuisumillu tatigin­nikkami utoqqalival­laareeraluarluni naartusin­naanngorpoq. 12 Tamanna pissutigalugu angut ataaseq kinguaas­siorsin­naajunnaareeraluartoq ullorissatut amerlatigisunik sissamilu sioqqatut kisinneqarsin­naanngitsutut amerlatigisunik kinguaaqalerpoq.

13 Taakku tamarmik neriorsuutit eqquuttut takunngik­kaluarlugit upperlutik toqupput. Ungasianiilli takuaat, tikilluaqquaat nunamilu takornar­taanertik najugaqaral­larnertillu tamanut nalunaarutigalugu. 14 Taama oqaluttut namminneq najugarisas­saminnik ujaasillutik tamanut ersersit­tarpaat. 15 Qimatartilli eqqarsaatigiuarsimagaluarunikku uternissamut periarfis­saqarsimas­sagaluarput. 16 Maannali pitsaanerusoq, tassa qilammeersoq, anguniarsaraat. Taamaattumik Guutip taakku taakkualu ikioqqullutik imminut saaffigin­nittarnerat* kannguginngilai. Illoqarfimmimmi piareersaas­simavai.

17 Aaperaat upperami misilin­neqarnermini Iisaap pilliutiginissaanut piareersimavoq. Aaperaap neriorsuutinik nuannaarluni pissarsisimasup ernituani pilliutiginiaraluarpaa 18 ima oqarfigineqareeraluarluni: “Kinguaannik taaneqartussat Iisaamit kingoqqisuussapput.”* 19 Nalunngilaa Guutip allaat toqusunit makitis­sinnaagaa, assersuutaasumillu ernera toqumit utertin­neqarpoq.

20 Iisaap aamma upperami Jaaku Esauilu Guutimit siunissami ajunngisaarfigineqar­nissaannik kissaappai.

21 Jaaku upperami toqulerluni Juuserfip erneri marluk Guutimit ajunngisaarfigineqar­nissaannik kissaal­lugillu ajaappissani najummatserfigalugu Guutimut qinuvoq.

22 Juuserfi upperami toqulerluni Israalip qitornaasa Egyptenimiit aninissaannik eqqartuillunilu saanini pillugit* ilitsersuivoq.*

23 Moorsisip angajoqqaavi upperamik ernerminnik qaammatini pingasuni isertuipput. Taamaaliorput ernertik inoorlaaq inequnarluinnartoq takugamikku kunngillu peqqussutaa siooragin­nginnamikku. 24 Moorsisi upperami inersimalereerluni Faaruup paniata erneranik taaneqaq­qunngilaq. 25 Aalajangerpoq ajortip nuannersui qaangiutipal­lattartut nuannaarutiginagit Guutip innuttai ajortumik pineqartut ilaginiarlugit. 26 Akissarsiassani isigiuaramiuk tanitatut* nikanarsagaaneq Egyptenip erlinnar­tuutaanit naleqar­nerutippaa. 27 Upperami kunngip kamannera siooraginagu takussaan­ngitsorli pinertusaarluni isigiuarlugulusooq Egypteni qimappaa. 28 Upperami angajul­liliatik suujunnaarsitsisumit ajoquser­neqaqqunagit* qaangiiffik* nallius­sillugulu matserfiit aammik tanippai.

29 Guutip innuttai upperamik Immakkut Aappalaartukkut nunatut panertigisukkut ikaarput, Egyptenimiulli ikaariaraluaramik immamit iineqarput.

30 Israalikkut upperlutik Jeerikop qarmarsui ulluni arfineq-marlunni kaajallaqat­taareermatigit nakkaapput. 31 Atortittartoq Raahabbi upperami isertortumik alapernaarsuisunik inussiar­nersumik tikilluaq­qusivoq, tamannalu pissutigalugu naalanngitsut toqutaaqatiginngilai.

32 Amerlanerusut allaatigisariaqar­nerpakka? Giidiuut, Baarakki, Samsonni, Jefta, Daavi, Saamuali pruffiitillu allat allaatigis­sagaluarukkit sivisual­laassaqaaq. 33 Upperamik kunngeqarfiit ajugaaffigaat, naapertuil­luarneq atuutilersippaat, neriorsuutit pissarsiaraat, løvit qarni matuaat, 34 inneq sunniutaarutsippaat, panamik toqutaan­ngillat, sanngiik­kaluarlutik pissatsitaapput, sorsuttar­torsuan­ngorput sakkutoorpassuillu saassussisut ajorsar­terujus­suarlugit. 35 Arnat toqusortatik makititaasut ilageqqilerpaat. Allat pitsaanerusumik makititaajumallutik akiliun­neqarlutik utertin­neqarnissartik akuerin­nginnamikku naalliutsitaapput. 36 Allat illaruaatigineqar­nermikkut iperartor­neqarnermikkullu, allaallu kalunnernik qilersugaanikkut parnaarus­saanikkullu, misilin­neqarput. 37 Ujaqqanik milloor­neqarput, usserneqarput, pilattor­neqarput panamillu toqunneqarlutik. Pissakil­liornerminni, annikil­liornerminni ajortumillu pineqar­nerminni savat savaasallu amiinik atisaqarlutik angalaarput. 38 Inuit taamaattunik ilagisaqar­nissamut naleqqutin­ngillat. Inoqajuitsuni qaqqanilu angalaar­tarlutillu qaarusunnut qunnernullu qimarnguf­fissarsiortarput.

39 Taakkua tamarmik uppernertik pillugu iluarineqar­nerminnik uppernarsaavigineqaraluarlutik neriorsuutip eqquunnera misigin­ngilaat. 40 Guuti uagutsinnut pitsaanerusumik siunertaqarmat uagutsinnit siulliullutik naammal­luinnar­tunngor­tinneqan­ngillat.

12 Ilisimannittut taama amerlatigisut nuissatut avatangermatigut uaguttaaq oqimaaqutit tamaasa ajortuliornerlu uagutsinnut nermutiasoq piiarlugillu arpaliunnermi peqataaf­figilik­katsinni pinertusaarluta arpatta. 2 Tamatumanilu uppernitsinnik Siulersuisuuneq Naammas­sisitsisorlu, Jiisusi, isigiuas­savarput. Kanngunarsagaanini suutinnagu nuannaarneq siunerminiittoq pillugu qisummik naalliutsitsiviliami* pinertusaarpoq, Guutillu issiavis­saarsuata talerpiatungaani issiavoq. 3 Qasulerlusilu uniinnaqqunasi ajortuliortartut namminneq ajoqutigisaminnik akerartuineranni pinertusaartoq eqqarsaatigeq­qissaarsiuk.

4 Ajorti taanna toqu tikillugu suli akiorsiman­ngilarsi. 5 Puiorluin­narparsilu ernertut ima oqaaqqis­saarneqarnersi: “Ernera, Jehovap perorsaatis­siinera suusupageqinagu, naqqikkaangatillu uniinnar­taqinak. 6 Jehovammi asasani perorsaatis­sittarpai, aap, ernermisut isigilikkani tamaasa pillartarpai.”*

7 Pinertusaarneq perorsaatis­sinneqarnermi* atugassarititaasut ilagiin­narpaat. Guutip ernermisut pivaasi. Ernerusummi tamarmik ataataminnit perorsaatis­sinneqar­tannginnerpat? 8 Tamassili taama perorsaatis­sinneqarsiman­ngikkussi erniviusimas­sanngilasi, allallu ernerisimas­savaasi. 9 Tamatuma saniatigut ataatatta nunamiusut* perorsaatis­sittarpaatigut, taakkulu ataqqivagut. Inuujumalluta anersaakkut inuunitsinni Ataatarput suli annerusumik kajumilluta naalassan­nginnerparput? 10 Ajunngitsuusorisartimmi naapertorlugu sivikitsumik perorsaatis­sittarpaatigut, Guutilli immisut illernarseq­qulluta iluaqutis­satsinnik perorsaatis­sittarpaatigut. 11 Perorsaatis­sinneqarneq nuannersuunani annernartarpoq.* Tamatumali kingorna ilinniar­tinneqarsimasut eqqissillutik eqqortuliorlutillu inuusarput.

12 Taamaattumik assaat nakkangasut seeqqullu sanngiitsut nakussatsissigit. 13 Tusiattoq pilluttoornani peqqisseq­qullugu siumut ingerlajuaritsi. 14 Inuit tamaasa eqqisseqatiginiar­tuarlugillu illernar­tuuniar­tuaritsi, illernar­tuunngitsummi Naalagaq takussan­ngimmassuk. 15 Kinaluunniit Guutip ajunngisaangaar­neranik annaasaqaqqunagu ikiorsiuk, taamaaliun­ngikkussimi sorlak toqunartulik ajornar­torsior­titsisoq amerlasuunillu mingutsitsisoq naajartulissammat. 16 Esaui nerisassat ataatsit pillugit angajul­liliatut pisinnaatitaaf­fimminik tunniussisoq assigileqqunagu akorngassinni atoqatigiinnikkut eqqunngitsuliuler­toqannginnissaa* illernar­tunilluunniit pingaar­titsiun­naartoqan­nginnissaa isumagis­savarsi. 17 Nalunngilarsimi Esaui kingusin­nerusukkut Guutimit ajunngisaarfigineqar­nissamik kingornus­serusulerami itigartin­neqartoq. Ataatami isumaanik ilungersorluni qullilillunilu allanngor­titsiniaraluarpoq, tamannali iluatsinngilaq.*

18 Ornigutin­ngilasimi qaqqamut malugineqarsin­naasumut innermillu ikuallan­neqarsimasumut, nuissamut taartumut, taarnerin­narsuarmut, anorersuarmut, 19 qarlortaammut* nipimullu oqaluttumut. Israalikkut taanna tusaramikku oqaluun­neqaqqeq­qunatik kimigiiserput. 20 Peqqussut una pissutigalugu ersilerput: “Allaat uumasoq qaqqamik attuisoq ujaqqanik milloor­neqartariaqarpoq.” 21 Takuneqartut annilaar­nangaarmata Moorsisi oqarpoq: “Ersivunga sajullungalu.” 22 Orniguppusili qaqqamut Ziionnimut, Guutip uumassuseqartup illoqarfianut, Jerusalemmimut qilammiittumut, inngilinut tituusintilik­kuutaanut* 23 katersuuttunut, angajulliliat qilammi allatsis­simasut ilagiivinut, Guutimut tamanik Eqqartuus­sisumut, naapertuil­luartunut naammal­luinnar­tunngor­tinneqarsimasunut anersaakkut inuusunut, 24 Jiisusimut isumaqatigiissummi* nutaami akunnermiliuttumut aammullu serpartaatigineqartumut Aabelip aavanit pitsaanerusoq pillugu oqaluttumut.

25 Oqaluttup tusarnaaq­qissaarnissaa* eqqumaf­figissavarsi. Guutimmi mianersoq­qussutaanik nunarsuarmi tusarliisumut tusarnaaruman­ngitsut pillarneqan­ngitsuun­ngimmata qilammeersoq oqaluttoq tunukkutsigu pillarneqar­nerungaassaagut! 26 Taamani Guutip nipaata nunarsuaq sajutsippaa, maannali neriorsuivoq: “Nunarsuaq sajutsiin­narnagu aamma qilak sajutseq­qissavara.” 27 Oqaatsimit “sajutseq­qissavara”- mit erserpoq sajutsin­neqanngitsut ataannaq­qullugit sajutsin­neqartut, piliat, peerneqassasut. 28 Taamaattumik kunngeqarfik sajutsin­neqarsin­naanngitsoq pisussaagatsigu Guuti mianeralugu ataqqillugulu akuerisaasumik kiffartorfigisin­naaqqullugu ajunngisaangaarneq iluaqutigiuartigu. 29 Guuterpummi inneruvoq nungutitsisoq.

13 Qatanngutigiittut asaqatigiit­tuaritsi. 2 Inoroorsaarnissaq* puioqinasiuk, inoroorsaar­nikkummi ilaat ilisimanagu inngilinik pulaartoqarsimapput. 3 Ilissi aamma inuttut timeqarassi parnaarus­saaqqasut* parnaarus­saaqatigisutut ajortumillu pineqartut eqqaamasigit. 4 Guutip atoqatigiinnikkut eqqunngitsuliortartut* allasiortullu eqqartuutis­sammagit aappariinneq tamanit ataqqisaallunilu aappariit siniffiat mingutsin­neqanngikkili. 5 Aningaaserituutut* inuussan­ngilasi, pigisasili naammagisigit. Guutimi oqarpoq: “Qimanngisaan­narlutillu imminiin­ngisaan­nassavakkit.” 6 Taamaattumik isumalluarluta oqarsin­naavugut: “Jehova ikiortigigakku annilaangas­sanngilanga. Inuup qanoq iliorfigisin­naagaminga?”

7 Siulersortisi, Guutip oqaasianik ilissinnut oqaluttut, eqqaamasigit. Pissuserinnikkut angusaat maluginiarlugillu uppernikkut ilaarsigit.

8 Jiisusi Kristusi ippassaq, ullumi qaqugorsuarmullu allanngunngilaq.

9 Ilinniar­titsissutinit assigiin­ngitsunit eqqumiitsunillu tammartin­neqarniaqinasi, ajunngin­neruvormi uummat nerisassanit* pinnani ajunngisaangaarnermit nakussatsin­neqaruni. Nerisas­sanimmi ulapputeqarneq iluaqutaanngilaq.

10 Tupermi Guutimut kiffartortut neriffigisin­naanngisaannik pilliiveqarpugut. 11 Uumasummi taakkunannga pilliutigineqartut timaat tammaarfiup silataani ikuallan­neqartarput, aavalli ajortuliat isumakkeerfigineqaq­qullugit palasiunermit Illernar­nerpaamut eqqunneqartarput. 12 Taamatuttaaq Jiisusi inuiaqatigiit aamminik illernarsiseq­qullugit illoqarfiup isaaffiata silataani naalliuppoq. 13 Taamaattumik tammaarfiup silataanut ornitsigu taassumatullu nikanarsagaalluta. 14 Illoqarfippummi ataannar­navianngimmat illoqarfik pilersin­neqartussaq qilanaarluta utaqqivarput. 15 Jiisusi aqqutigalugu pilliummik unnersiutigin­nissummik, tassa qanitta* inerititaannik, Guutimut sassaas­siuarta. Taamaalior­tarpugut atia pillugu tamanut oqaluus­sinikkut. 16 Aamma ajunngitsulior­tarnissarsi avitseqateqar­tarnissarsilu puioqinasiuk, Guutimmi pilliutit taamaattut iluaril­luinnarmagit.

17 Siulersortisi ilissi pillusi akisussaatitaasussatut paarsisuummata maniguullusi kajumillusilu naalassigit. Taamaaliorsinnaalik nuannaarlutik anersaarulun­natillu, taamaan­ngippammi ilissi tamanna ajoqutigis­sagassiuk.

18 Unneqqarissumik* nalunngeqatigin­nissuteqarnerput qularin­nginnatsigu sutigullu tamatigut unneqqaris­soorusukkatta qinnuttuartigut. 19 Pingaar­tumilli ilissinnut piaarnerpaamik uternissara pillugu qinusaq­qullusi kajumis­saarpassi.

20 Qanortoq Guutip eqqissisitsisup savanik paarsisumik annermik – Naalakkatsinnik Jiisusimik, aammik isumaqatigiissummik* qaqugorsuarmut atuutilersitsisumik sassaas­sisumik – toqusunit makititsisup 21 piumasamisut ilioqqullusi sutigut tamatigut piginnaatillusilu Jiisusi Kristusi aqqutigalugu iluarisamisut iliornissamut piumassuseqalersillisi. Guuti qaqugorsuarmut kipisuitsumillu ataqqinarsisin­neqarli. Amen.

22 Qatanngutit, naatsumik allaffigigassi qinnuigaassi kajumis­saarutikka tusarnaarluaq­qissaaq­qullugit. 23 Qatanngutitta Timuutiusip iperagaasimaneranik ilisimatik­kusuppassi. Qanittukkut takkutissappat ilagalugu tikeraarumaarpassi.

24 Siulersortisi illernartullu tamaasa inuulluaq­qutikkisigit. Itaaliamiut inuulluaq­qusipput.

25 Guutip ajunngisaangaarnerata tamassi najorilisi.