FIILIMUUMUT

1 Paulusimit, Kristusi Jiisusi pissutigalugu parnaarussamit, qatanngutitsinnillu Timuutiusimit suleqatitsinnut asasatsinnut Fiilimuumut, 2 qatanngutitsinnut arnamut Appiamut, sakkutooqatitsinnut Arkipussimut ilagiinnullu illit illunni katersuut­tartunut:

3 Qanortoq Ataatatta Guutip aamma Naalakkap Jiisusip Kristusip ajunngisaangaarfigilisi eqqissisillusilu.

4 Qinnutinni eqqaagaangakkit Guutiga qutsavigiuar­tarpara, 5 tassami uppernerit Naalakkamillu Jiisusimik illernar­tunillu tamanik asanninnerit tusartuarakku. 6 Qinnutigaara uppernerput iluaqutigalugu paasissagit Kristusip ajunngitsorpas­suarnik tunisaraatigut. 7 Asanninnerit tusarlugu assut nuannaarlungalu tuppallerpunga. Illimmi, qatanngut, pissutaallutit uppeqatigut nakussatsipput.

8 Taamaattumik Kristusimut apustiliusutut eqqortulioq­qunissannut oqartus­saassuseqaraluarlunga 9 asanninnerit tunngavigalugu eqqortulioq­qullutit kajumis­saarukkit ajunngin­neruvoq, uangami Paulusi utoqqaagama, aap, massakkullu Kristusi Jiisusi pissutigalugu parnaarus­saaqqagama. 10 Oniisimusi, parnaarus­saaqqaninni qitornarisattut isigiligara, inussiar­nisaarfigeq­qullugu kajumis­saarpakkit. 11 Siornatigut ilinnut iluaqutaasimanngilaq, massakkulli ilinnut uannullu iluaqutaavoq. 12 Taanna asangaagara ilinnut uteqqullugu aallartippara.

13 Nutaarsiassat nuannersut pissutigalugit parnaarus­saaqqaninni sinnerlutit kiffartuus­sinnaanias­sammanga maani ilagiin­narusuk­kaluarpara. 14 Pinngitsaalisaasutut misiginak namminerli kajumis­sutsinnik ajunngitsulior­niassagavit akuersiteq­qaarnak iliuuseqarusun­ngilanga. 15 Immaqaana sivikitsumik qimaaqqasoq uteruni qaqugorsuarmut ilagisin­naajumallutit 16 inussiaan­naanngitsutut naleqar­nerungaar­tutulli, tassa qatanngutitut asasatut. Uannut taamatorpiaq ippoq, illilli Oniisimusi inussiatut kristumiutullu qatanngutitut suli asanerulis­sagunarpat. 17 Ikinngutitut isigigumma uannik tikilluaq­qusinissattut asannittumik tikilluaqqugiuk. 18 Arlaannik annaasaqar­tissimappatit akiitsoqarfigalutil­luunniit taarserumaarpakka. 19 Uanga, Paulusi, nammineq assannik allappunga: Akiitsui taarserumaarpakka. Namminermi nalunngilat uannut qujassutis­saqangaarlutit.* 20 Aap, qatanngut, qanortoq Naalakkamut kiffartorninni Kristusip ilinniar­titaatut taamatut nakussatsikkinga.

21 Qularin­nginnakku kajumis­saarneqarnittut iliorumaartutit allaffigaakkit. Aap, nalunngilara allaat peqquneqarnerit sinnerlugu iliorumaartutit. 22 Usi, qinnussisarnisi pissutaallutik iperagaanissara ilissinnullu tikeraar­nissara neriuutigigakku unnuivissannik piareersaatilaaringa.

23 Epafrasi, Kristusi Jiisusi pissutigalugu parnaarus­saaqatiga, inuulluaq­qusivoq. 24 Aamma suleqatikka Makkorsi, Aristarkusi, Demassi Lukkarsilu inuulluaq­qusipput.

25 Qanortoq eqqortumik isiginnit­taaseqarnersi pissutigalugu Naalakkatta Jiisusip Kristusip ajunngisaangaarfigilisi.