TIMUUTIUSIMUT ALLAKKAT SIULLIIT

1 Paulusimit, Guutip Aniguisitsisitta Kristusillu Jiisusip, neriuutitta, peqqusinerisigut Kristusimit Jiisusimit apustilin­ngortin­neqartumit 2 uppeqatinnut Timuutiusimut* qitornavittut isigisannut:

Ajunngisaangaarnermik, nallittuinermik eqqissinermillu Ataatamit Guutimit Naalakkatsinnillu Kristusimit Jiisusimit pisumik kissaappakkit.

3 Soorlu Makedonialialerlunga Efesossimiigin­naqqullutit kajumis­saarikkit, taamatuttaaq maanna kajumis­saarpakkit inuit aalajangersimasut peqqusif­figeqqullugit allaanerusumik ilinniar­titsinngin­nissamik 4 aamma oqaluttuanik ilumuun­ngitsunik siuaasallu pillugit allattorsimaffinnik pingaar­titsinngin­nissamik. Tamakku iluaqutaanatik apeqqutinik amerlanerulersitsiin­nartarput Guutillu uppernikkut nakussatsin­niarluta tunniussaanut tunnganatik. 5 Tamatta minguitsumik uummateqarluta, ajunngitsumik nalunngeqatigin­nissuteqarluta ilumoor­tumillu uppersuseqarluta asannit­tuliornias­sagatta taama ilitsersuivunga.* 6 Ilaat tamakku tunullugit isumaqan­ngitsumik oqalunnermut saassimapput. 7 Guutip inatsisaanik ilinniar­titserusupput, eqqartuk­katilli aalajangiusimal­luinnak­katillu paasinngilaat.

8 Nalunngilarput Moorsisip inatsisai eqqortumik maleruarlugit ajunngitsuusut 9 paasillugulu inatsisit inuit naapertuil­luartut pinnagit ukuli pillugit tunniun­neqartut: Inatsisaatsut, pikitsitsisut, guutiitsut, ajortuliortartut, ilumoorfigin­ninngitsut,* illernartumik nikaginnittut, ataataminnik, anaanaminnik allanil­luunniit toqutsisut, 10 atoqatigiinnikkut eqqunngitsuliortartut,* arnaqatiminnik anguteqatimin­nilluunniit atoqateqartartut, inunnik aallarus­sisartut, sallutuut, ilumoorullugu neriorsuutigisaminnik unioqqutitsisartut* arlaatigullu ilinniar­titsissummut ineriar­tornartumut* akerliusumik iliuuseqartut. 11 Ilinniar­titsissut taanna nutaarsiassanut nuannersunut alutornar­tunullu naapertuuppoq, Guutillu pilluartup taakku pillugit oqaluus­seqquaanga.

12 Naalakkatta Kristusip Jiisusip nakussatsimmanga qujamasuppunga. Aalajaatsutut isigigaminga suliassippaanga 13 naak Guutimik mitaatil­liisuusimagaluartunga, malersuisuusimagaluartunga soqqusaatsuusimagaluar­tungalu. Ilisimasakinnerali uppersuseqan­nginneralu pissutigalugit iliuuseqarama nallittor­neqarpunga. 14 Naalakkattali immikkut ittumik ajunngisaangaarfigaanga, Kristusillu Jiisusip uppernermik asannin­nermillu tunivaanga. 15 Una tutsuiginarlunilu upperineqarluin­nartariaqarpoq: Kristusi Jiisusi ajortuliortartut annaanniarlugit nunarsuarmukarpoq. Uangalu ajortulior­tartuni ajornerpaavunga. 16 Kristusilli Jiisusip naammagit­tangaarnini ersersin­niarlugu ajornerpaagaluartunga nallittorpaanga imminik upperin­nilertussanut naassaan­ngitsumillu inuuler­tussanut maligas­sanngoq­qullunga.

17 Kunngiujuartoq, atajuartussaq, takussaan­ngitsoq Guutituaasorlu qaqugorsuarmut kipisuitsumillu ataqqinarsisin­neqarlunilu unnersiutigineqarli. Amen.

18 Qitornara Timuutiusi, taama ilitsersuinera* illit pillutit siulittuutinut naapertuuppoq. Siulittuutit taakku kajumis­sissutigalugit ajunngitsumik siunertaqarlutit sorsuttuassaatit, 19 aamma upperneq ajunngitsumillu nalunngeqatigin­nissuteqarneq aalajangiusimas­savatit. Nalunngeqatigin­nissummik suusupaginninneq pissutigalugu ilaat uppernikkut umiusimapput. 20 Hymeniiusi Alexanderilu taakkua ilagaat, perorsaatis­sinneqar­nermikkullu Guutimik mitaatigin­ninnginnissaq ilinniar­niassammassuk Saatanimut pisippakka.*

2 Pingaartumik tamassi kajumis­saassavassi inuit tamalaat pillugit qamannga pisumik qinusarlusilu qujasaq­qullusi. 2 Aamma Guutimut tunniusimal­luinnarluta, pimoorus­silluin­narluta eqqissillutalu inuusin­naaqqulluta kunnginut qaffasis­sumillu inissisimaf­filinnut* tunngatillugu taamaaliussaasi. 3 Tamanna Aniguisitsisitta, Guutip, ajunngitsutut iluarinar­tutullu isigaa. 4 Piumasaraami inuit tamalaat annaanneqarlutillu ilumoortoq pillugu eqqoqqis­saartumik paasisimasaqalissasut. 5 Ataatsimik Guuteqarpoq, ataaserlu, Kristusi Jiisusi, Guutimut inunnullu akunnermiliuppoq. Tassa taanna inuk 6 inuit tamalaat ajortimit utertik­kumallugit matussusiisumik imminut akiliutigisoq. Tamakku piffissan­ngorpat ilisiman­nittunit oqaluus­sissutigineqassapput. 7 Tamanna uppernarsar­neqaqqullugu oqaluus­sisartutut, apustilitut aamma upperneq ilumoortorlu pillugit juutiun­ngitsunik ilinniar­titsisutut toqqarneqarpunga. Ilumoorpunga, sallunngilanga.

8 Taamaattumik kissaatigaara angutit ilumoorfiginnittut kamannatik oqallin­natillu sumiluunniit assatik qullarlugit qinujuassasut. 9 Aamma kissaatigaara arnat nutsat perlakkat,* kuultit, sapanngarissut atisalluunniit akisoorujussuit atornagit atisat naleqquttut,* anneruniajuitsuunermik isumakkullu peqqissuunermik* ersersitsisut, atorlugit kusassar­tassasut. 10 Guutimut tunniusimanerartutut ajunngitsulior­tarnertik kusassaatigissavaat.

11 Arnaq nipangersimalluni* kajumillunilu naalalluni ilinniassaaq. 12 Akuerin­ngilara arnap ilinniar­titsinissaa angummullu oqartus­saassuseqarnissaa. Nipangersimaan­nassaaq.* 13 Adamimi Evamit siulliulluni ilusilersor­neqarpoq. 14 Aamma Adami salloqit­tarneqanngilaq, arnarli salloqit­tarneqarujus­suarami unioqqutitsisun­ngorpoq. 15 Arnalli meeqqiornertik illersuutigissavaat, aatsaalli uppertuarunik, asannit­tuliortuarunik, illernar­tuujuarunik isumakkullu peqqissuujuarunik.*

3 Una ilumoorpoq: Angut nakkutil­liisunngorusuttoq ajunngitsumik anguniagaqarpoq. 2 Taamaattumik nakkutilliisoq isornaatsumik inuussaaq, arnamut ataatsimut uiussaaq, ileqquminik aqutsisin­naassaaq, isumakkut peqqissuussaaq,* peqqissaar­tuussaaq, inoroorsaar­tuussaaq ilinniar­titsinis­samullu piukkun­nartuus­salluni. 3 Imerajut­tuussanngilaq, nakuuser­tuussanngilaq,* uteriitsuus­sanngilaq,* oqallik­kumatuujus­sanngilaq aningaaserituujus­sananilu.* 4 Illuminiittut ajunngitsumik aqussin­naassavai, aamma meerai pimoorus­silluin­nartuul­lutillu kajumillutik naalattassapput. 5 (Illuminiittummi aqussin­naanngik­kunigit qanoq ililluni Guutip ilagiiviniittut isumassorsin­naassagamigit?) 6 Pingaakujunnermik makitaleqqunagu Diaavulutullu eqqartuun­neqaqqunagu uppilerlaajus­sanngilaq. 7 Tamatuma saniatigut nikanarsagaaqqunagu Diaavulullu napiarniutaanit* pisarineqaqqunagu ilagiit avataan­niittunit ajunngitsumik tusaamaneqassaaq.

8 Ilagiinni kiffartortut taamatuttaaq pimoorus­sisuussapput, ilumoor­tuusaar­tuussan­ngillat,* viinnisorpal­laartas­sanngillat, piumatuujus­sanngillat iluanaar­niapilut­tuussanatillu. 9 Minguitsumik nalunngeqatigin­nissuteqarlutik Guutip upperneq pillugu isertugaataa aalajangiusimal­luinnassavaat.

10 Aamma piukkun­narnersut takuniarlugu misilin­neqaqqaassapput. Isornaatsumillu inuugunik ilagiinni kiffartor­tunngorsin­naapput.

11 Taamatuttaaq arnat pimoorus­sisuussapput, nikassaallutik salluliuutigin­nittassan­ngillat, ileqquminnik aqutsisin­naassapput sutigullu tamatigut aalajaallutik.

12 Ilagiinni kiffartortoq arnamut ataatsimut uiussallunilu meeqqaminik illuminiit­tunillu aqutsil­luarsin­naassaaq. 13 Angutimmi kiffartorluartut ajunngitsumik tusaamaneqaler­tarlutillu Kristusimut Jiisusimut uppernertik sapiilluin­narlutik eqqartorsin­naalertarpaat.

14 Neriuutigigaluarlugu qanittukkut ornissallutit taama allaffigaakkit. 15 Kingusinaas­sagaluarumali Guutip illuani, tassa Guutip uumassuseqartup ilagiivini – ilumoortumut sukaallutillu tapersersuisuusuni – qanoq pissuseqas­sallutit maanna paasivat. 16 Aap, Guutimut tunniusimaneq pillugu isertugaq pingaaruteqangaarpoq: ‘Inuttut saqqummerpoq, anersaan­ngorami naapertuil­luartuutitaavoq, inngilinut saqqummerpoq, inuiaqatigiinnut tamanut oqaluus­sissutigineqarpoq, inunnit upperineqarpoq alutornar­tumillu qutsissisitaalluni.’

4 Oqaatsilli isumassarsiarititaasut naapertorlugit* qatanngutit ilaat anersaapiluit tammartitsiniarlutik salloqit­taataannut isumassarsiarititaasunut* ilinniar­titsinerannullu tusarnaarnertik pissutigalugu upperun­naassapput. 2 Ilumoor­tuusaartut, nalunngeqatigin­nissutsimikkut saviminermik uutarneqartutut misigit­taatsun­ngorsimasut, salluliuutaannut tusarnaassapput. 3 Katinneq inerteq­qutigisarlugulu peqqusisarput nerisassat Guutip uppertunit ilumoor­tumillu ilisiman­nilluin­nartunit qujamasulluni nerineqar­tussatut pinngor­tissimasai nerineqas­sanngitsut. 4 Guutimmi pinngortitai tamarmik ajunngitsuupput, qujamasullunilu nerineqartut narrugineqas­sanngillat. 5 Guutimmi oqaasiagut qinunikkullu illernarsisitaapput.

6 Qatanngutit angutit taama ilitsersorukkit tassaassaatit Kristusimut Jiisusimut kiffaal­luartoq uppernermik ilinniar­titsissummillu ajunngitsumik maleruaq­qissaakkannik inuussuteqartoq. 7 Oqaluttuat ilumuun­ngitsut nikassaataasullu, arnat utoqqaat oqaluttuarisar­tagaattut ittut, itigartis­savatit. Guutimulli tunniusimanermik ersersitsinissaq sungiusartaruk. 8 Timikkummi sungiusarneq* iluaqutaalaartarpoq. Guutimulli tunniusimaneq, maanna inuunermi siunissamilu inuunissami ajunngisaarfigineqar­nissamik neriorsuutitaqarami, sutigut tamatigut iluaqutaavoq. 9 Tamanna tutsuiginarlunilu upperineqarluin­nartariaqarpoq. 10 Taamaattumik tamaviaarluta assoroorlutalu sulivugut Guuti uumassuseqartoq, inunnik tamalaanik pingaar­tumillu aalajaatsunik Aniguisitsisoq, neriuffigigatsigu.

11 Tamakku peqqussutigiuarlugillu ilinniar­titsissutigiuakkit. 12 Inuusunnerit pillugu nikassaasoqan­ngikkili. Oqalunnermulli, pissusilersornermut, asanninnermut, uppernermut minguin­nermullu tunngatillugu aalajaatsunut maligas­siuisunngorit. 13 Atuffassineq, kajumis­saarineq* ilinniar­titsinerlu tikiunnissama tungaanut aalluttuakkit. 14 Siulittuut tunngavigalugu utoqqaaner­taqatigiit assamminnik attormatsit tunissutisiat* sumigin­naqinagu. 15 Tamakku eqqarsaatigiuakkit.* Siumukarnerit tamanit takuneqarsin­naaqqullugu aalluttuakkit. 16 Qanoq inooriaaseqar­nerlutit ilinniar­titseriaaseqar­nerlutillu eqqumaf­figiuaruk. Tamakku tamaasa iliuuseriuarukkit imminut annaatis­sallutillu tusarnaartitit annaatis­savatit.

5 Angut utoqqaanerusoq sukannersumik isornar­torsius­sanngilat. Oqaluutis­savalli ataatagisutut, angutit inuusun­nerusut nukagisutut, 2 arnat utoqqaanerusut anaanagisutut, arnat inuusun­nerusut najagisutut, tamatigut minguitsumik.

3 Uillarnerit pisariaqar­titsivissut* isumassus­savatit.* 4 Uillarnermulli qitornaasut ernutaasul­luunniit angajoqqaatik aanakkutillu* akiitsoqarfigisutut isumassor­nerisigut Guutimut tunniusimanertik ilaquttaminni erserseq­qaassavaat, tamannami Guutip iluarimmagu. 5 Uillarnerup pisariaqar­titsivissup inuussutis­saqanngitsullu Guuti tatigalugulu unnuakkut ullukkullu qamannga pisumik qinnuigisarpaa. 6 Uillarnerli pileris­sutsini* malillugit inuusoq uumagaluarluni anersaakkut toqungavoq. 7 Isornaatsumik inooqqullugit taama ilitsersor­tuassavatit.* 8 Angut ilaquttaminik, pingaartumik illuminiittunik, isumassuin­ngitsoq uppernermik tunussisuullunilu uppersuseqan­ngitsumit ajorneruvoq.

9 Uillarneq allattorsimaffimmut ilanngun­neqassaaq 60-it sinnerlugit ukioqaruni, angummut ataatsimut nuliaasimaguni, 10 ajunngitsulior­tartutut tusaamaneqaruni, meeqqanik perorsaal­luarsimaguni, inoroorsaar­tuusimaguni, illernartut isigaannik asattuisarsimaguni, annikil­liortunik ikiuisarsimaguni sutigullu tamatigut ajunngitsulior­niartuar­tarsimaguni.

11 Uillarnerilli inuusun­nerusut atoqateqarusus­susertik Kristusimut kiffartornermut akornutaaleraangat katikkusuler­tarmata allattorsimaffimmut ilanngutis­sanngilatit. 12 Siunertarisimasaminnullu akerliusumik iliuleramik* eqqartuun­neqassapput. 13 Tamatuma saniatigut suliaqan­nginneq, illumiit illumut tarfiinnarneq, sungiut­tarpaat. Aap, alla pineq ajorpaat allanik oqallisiginninneq, susassarin­ngisaminnut akuliunneq eqqartugas­sarinngisaminnillu eqqartuineq. 14 Taamaattumik akerlilersuisut isornar­torsiuinissamut periarfis­seqqunagit kissaatigaara uillarnerit inuusun­nerusut katissasut, meeqqiussasut illuminnillu isumagin­nissasut. 15 Taakkuami ilaat tunussillutik Saatanimik malinnit­tunngoreersimapput. 16 Ilagiit nanertuutis­sinneqaq­qunagit arnap uppertup ilaquttani uillarnerusut ikiussavai. Ilagiit taamaalillutik uillarnerit pisariaqar­titsivissut* ikiorsin­naassavaat.

17 Utoqqaanertat siulersuil­luartut,* pingaartumik oqalunnikkut ilinniar­titsinikkullu tamaviaartut, marloriaammik ataqqineqar­tariaqarput. 18 Allassimaf­fimmimi allassimavoq: “Nersussuaq angutiviaq karrertaajaasoq nerinaveeq­qusissanngilat,” aamma: “Sulisoq pisassamisut akissarsisin­neqartarpoq.” 19 Aatsaat ilisimannittut marluk pingasul­luunniit uppernarsaasimappata angummut utoqqaanerusumut* unnerluussut akuerissavat. 20 Ajortuliortartut allanut mianersoq­qussutaaq­qullugit* takunnittut tamaasa najuutsillugit oqaaqqis­saassavatit. 21 Guutip, Kristusip Jiisusip inngilillu toqqakkat saavanni ilumoorlunga peqquakkit siumut isummereernak kinaassusersiornallu ilitsersuutinik taakkuninnga maleruaaq­qullutit.

22 Angut kinaluunniit assannik attorniapal­lattassanngilat.* Allat ajortulior­nerannut peqataan­ngisaannarit. Minguitsuujuarit.

23 Naarlut­tarnerit napparsimakulasar­nerillu pissutigalugit imiinnarmik imerunnaarlutit* viinnisulaartarit.

24 Inuit ilaasa ajortuliaat tamanit ilisimaneqartut eqqartuun­neqarnermik kinguneqassapput. Allalli ajortuliaat kingusin­nerusukkut ilisimaneqalissapput. 25 Taamatuttaaq ajunngitsuliat ilisimaneqartarput, ilisimaneqan­ngitsullu isertorsimajuas­sanngillat.

6 Guutip aqqa ilinniar­titsissullu nikanarsar­neqanngisaan­naqqullugit inussiaataasut piginnitsitik ataqqiuar­tariaqarpaat. 2 Aamma inussiaataasut piginnitsitik uppertut qatanngutiginerat pissutigalugu ataqqin­ninngitsumik pisassan­ngilaat. Kiffartorluar­nertimmi uppertut asaneqartullu iluaqutigisarmassuk suli kajumin­nerullutik kiffartussapput.

Tamakku pillugit ilinniar­titsiuarlutillu kajumis­saariuarit. 3 Allaanerusumik ilinniar­titsisoq ilitsersuutinullu ineriar­tornartunut,* Naalakkatsinnit Jiisusimit Kristusimit pisunut, ilinniar­titsissummullu Guutimut tunniusimanermut naapertuuttumut isumaqataan­ngitsoq 4 pingaakujut­tuugami makitasuujugamilu paasisaqan­ngilluinnarpoq. Oqaatsit pillugit oqqannernik oqallin­nernillu tiguartisimal­luinnartuuvoq. Tamakkua kingunerisarpaat usorunneq, assortuunneq, nikassaalluni salluliuutiginninneq,* pasilliipilunnerit 5 soqutaan­ngitsullu pillugit isumamikkut mingutsin­neqarsimasut ilumoor­tumillu maleruaajun­naarsimasut akornganni assortuut­tuarneq. Taakkua iluanaar­niaannarlutik Guutimut tunniusimaneq ineriar­tortikkusut­tarpaat. 6 Kisianni soorunami naammagit­tartuugaanni* Guutimut tunniusimaneq iluanaarutaangaartarpoq. 7 Suuteqarnatami inunngoratta toqugutta nassataqarsin­naanngilagut. 8 Taamaattumik nerisas­saqarlutalu* atisassaqarutta* nalerisimaassaagut.

9 Pisuunngorusuttulli ussernartunut, napiarniutinut* pilerigisarpas­suarnullu sianiitsorpal­lattunut ajoqutaasunullu nakkaan­nartarput, tamannalu erloqinermik toqumillu kinguneqartarpoq. 10 Aningaaserituujunermi* ajortunut tamanut sorlaavoq, ilaallu pisuunngorusunnertik pissutigalugu uppernermik tunussisimal­lutillu imminnut amerlasuunik naalliuutis­sissimapput.

11 Illilli, Guutip kiffaa, tamakku qimarratigis­savatit. Anguniar­tuakkilli naapertuil­luarneq, Guutimut tunniusimaneq, upperneq, asanninneq, pinertusaarneq saamanerlu. 12 Upperneq tamaviaarlutit sorsuutigiuaruk. Inuuneq naassaan­ngitsoq, qaaqqusaasutut pissarsiassat inuppassuillu saavanni nassuiarluakkat, tigulluar­titaaruk.

13 Guutip, sunik tamanik uumatitsisup, Kristusillu Jiisusip, Pontiusi Pilaatusimut ilisiman­nittutut nassuiaal­luartup, saavanni peqquakkit 14 Naalakkatta Jiisusip Kristusip saqqummer­nissaata tungaanut inassummik minguitsuullutit isornaatsuul­lutillu maleruaaq­qullutit. 15 Jiisusi Kristusi pilluartoq Pissaaneqar­tutuaasorlu piffissarititaasoq nalliuppat saqqummissaaq. Taanna kunngisut naalakkersuisut Kunngigaat naalakkatullu naalakkersuisut Naalagaraat. 16 Taanna toqujuitsutuaavoq qaamanermi tikikkuminaatsumi najugaqartoq inummillu takuneqarsiman­ngitsoq takuneqarsin­naanngitsorlu. Ataqqisaallunilu pissaaneqar­tuarili. Amen.

17 Nalitsinni pisuujusut ilitsersus­savatit* pingaakujoq­qunagit* pisuussutinillu nungujasunik tatigin­neqqunagit Guutimilli, nuannaarutigisatsinnik tamanik sinnilis­suarmik pilersuisumik, tatigin­neqqullugit. 18 Oqarfigis­savatit ajunngitsulioq­qullugit, aap, ajunngitsuliungaar­taqqullugit, tukkusuujoq­qullugit* avitseqateqar­nissamullu piareersimasaq­qullugit. 19 Taamaaliorunik pisuussutinik isumannan­ngitsunik, toqqammavimmik siunissami sanaartorfigisin­naasaminnik, pissarsis­sallutillu inuunivik tigulluar­titaarsin­naassavaat.

20 Timuutiusi, Guutimit pissarsiat illersortuaruk. Iluaqutaan­ngitsumik oqalunneq illernartumut kanngunarsaataasoq “paasisimasaqas­sutsimillu” taaneqartartoq eqqunngitsoq tunngavigalugu akerliliissutit tunussavatit. 21 Ilaat paasisimasaqas­sutsimik taamaattumik oqarataarutigin­ninnikkut uppernermik tunussisimapput.

Qanortoq Guutip ajunngisaangaarnerata najorilisit.