TESSALUUNIKAMIUNUT ALLAKKAT SIULLIIT

1 Paulusimit, Silvaanusimit* Timuutiusimillu Tessaluunikami ilagiinnut Guutimik Ataatamik Naalakkamillu Jiisusimik Kristusimik ataasioqateqartunut:

Ajunngisaangaarnermik eqqissinermillu kissaappassi.

2 Tamassi qinnutitsinni eqqaagaangassi tamatigut Guuti qutsavigisarparput. 3 Aap, upperlusi sulinersi, asannillusi tamaviaarnersi Jiisusimullu Kristusimut neriunnersi pissutigalugu pinertusaarnersi Guutitsinnut Ataatatsinnut eqqaajuarpagut. 4 Qatanngutit Guutimit asasaasusi, nalunngilarput Guutip toqqaraasi 5 oqaasiinnaat atornagit aammali anersaaq illernartoq sunniuteqangaartoq atorlugu nutaarsiassat nuannersut qulanngil­luinnarluta ilissinnut oqaluus­sissutigigatsigit. Namminermi nalunngilarsi ilissi pillusi qanoq iliortugut. 6 Aamma annikil­liungaaraluarlusi anersaamit illernartumit pisumik nuannaarlusi oqaaseq upperilerassiuk uagutsinnik Naalakkamillu ilaarsisun­ngorpusi. 7 Taamaalillusi Makedoniami Akaarjamilu uppertunut tamanut maligas­siuisun­ngorpusi.

8 Tassami Jehovap* oqaasia Makedoniamiunut Akaarjamiunullu tusarliupparsi. Aap, Guutimut uppernersi tamani ilisimaneqalermat oqaaseqar­tariaqan­ngilagut. 9 Taakkunanimi najugaqartut oqaluttuariuarpaat ilissinnut attaveqaleq­qaarnerput guutiliallu tunullugit Guutimut saannersi. Taamaaliorpusi Guutimut uumassuseqartumut ilumoor­tumullu inussiaataalerumallusi 10 Guutillu ernera qilammeersoq, tassa Jiisusi toqusunit makititaa pillarneqar­nissamit aniguisitsiserput, utaqqiumallugu.

2 Qatanngutit, nammineq nalunngil­luinnarparsi ilissinnut tikeraarnerput kinguneqarluarsimasoq. 2 Nalunngilarsimi Filippimi naallioq­qaaraluarluta ajortumillu pineqaraluarluta Guutitsinnit sapiillisin­neqarluta akerlilersor­neqangaar­nitsinni* nutaarsiassanik nuannersunik Guutimeersunik oqaluttuukkissi. 3 Kajumis­saarutigut kukkusumik, minguttuunermik peqquserlun­nermilluunniit tunngaveqan­ngillat. 4 Tassami nutaarsiassanik nuannersunik oqaluus­sinissamut Guutimit akuerineqaratta inunnit iluarineqarnissaq pinnagu Guutimilli, uummatitsinnik misissuisartumit, iluarineqarumalluta oqaluppugut.

5 Nalunngilarsimi iluareq­qusaanngisaan­narlutalu piumatunermik tunngaveqartumik ilumoor­tuusaan­ngisaan­nartugut. Guutip tamanna uppernarsarsinnaavaa! 6 Aamma Kristusimit apustilin­ngortin­neqaratta* ilissinnut aningaasar­tuutaangaarsin­naagaluarluta inunnit, ilissinnit allanil­luunniit, ataqqiniar­neqarneq ajorpugut. 7 Anaanalli milutsitsisup meeqqaminik asannilluni isumassuisar­neratut saamasumik pisarpassi. 8 Qamannga pisumik misigis­suseqarfigigassi asaqigassilu aalajangerpugut nutaarsiassanik nuannersunik Guutimeersunik tusarliin­narnasi aammali inuunerput ilissi pillusi atorniarlugu.

9 Qatanngutit, qularnan­ngitsumik tamaviaarluta sulinerput eqqaamavarsi. Nutaarsiassat nuannersut Guutimeersut ilissinnut oqaluus­sissutigigatsigit arlassinnut kimulluunniit aningaasar­tuutaajumanata unnuakkut ullukkullu sulisarpugut. 10 Uppertuususi, nalunngilarsi ilumoorfigin­nittumik, naapertuil­luartumik eqqortumillu uagutsinnit pineqar­tarlusi, tamanna Guutip aamma uppernarsarsinnaavaa. 11 Nalunngil­luinnarparsi ataatap qitornaminut pisarneratut tamassi immikkut kajumis­saartuarlusilu tuppallersar­tuarlusilu siunnersor­tuarissi. 12 Taamaalior­tarpugut Guutip, kunngeqarfimminut alutornas­sutsiminullu qaaqqusisissi, iluarisaatut inuujuaq­qullusi.

13 Taamaat­tuminguna Guuti qutsavigiuaripput. Guutimmi oqaasia uagutsinnit tusarassiuk inuit oqaasiattut pinnagu Guutilli oqaasiatut upperaarsi, oqaasialu ilissinni uppertuni sunniuteqartarpoq. 14 Qatanngutit, Guutip Judiiami ilagiivinik Kristusimik Jiisusimik ataasioqateqartunik ilaarsisun­ngorpusi, taakkumi juutinit naalliutsin­neqartar­nerattut nunaqqatissinnit naalliutsin­neqartarassi. 15 Juutit allaat Naalagaq Jiisusi pruffiitillu toquppaat malersorlutalu. Guuti nuannaar­tinnagu inuit tamarmik iluaqutissaat akerlilersorpaat 16 allamiut annaanneqarsin­naaqqullugit oqaluus­siffigineranni akornusersor­niarsaraluta. Taamaalillutik ajortuliatik amerlisit­tuartarpaat. Guutilli kamannerata kiisami eqqungajalerpai.

17 Qatanngutit, ilissinnit (timikkut, uummatik­kuunngitsoq) avissaarsimatsiar­nitsinni takorusoqigassi naapinniarlusi iliuuseqangaaraluarpugut. 18 Ornikkusuk­kaluarassi, uanga Paulusi, ataasiaan­narnanga marloriarlungali misiliigaluarpunga. Saatanilli aqqutaani akornuserpaatigut. 19 Kikkut Naalakkatta Jiisusip najuunnerani neriuutigis­savagut, nuannaarutigis­savagut niaqorutitul­luunniit qiimmat­taatigis­savagut? Ilissi! 20 Aap, ilissi tulluusimaarutigalusilu nuannaarutigaassi.

3 Ilissi pillusi assut tusagaqarusuppugut. Kisimiillutali Athenimiigin­narutta ajunngin­nerussasorigatsigu 2 qatannguterput Timuutiusi, Kristusi pillugu nutaarsiassanik nuannersunik oqaluus­sinermut tunngatillugu Guutip kiffaa,* ilissinnut aallartipparput. Taassuma uppernikkut nakussatsillusilu tuppallersar­tussaavaasi 3 tamakkuninnga annikil­liuuteqar­nissinni sanngiil­leqqunasi.* Namminermi nalunngilarsi tamakkuninnga naalliuuteqar­nissarput pinngitsoor­tissinnaan­ngikkipput. 4 Najoral­larassi oqarfigisarpassi annikil­liortarumaarluta, nalunngisas­situllu taama pisoqarpoq. 5 Taamaattumik ilissi pillusi assut tusagaqarusukkama sulilu aalajaan­nersusi paaserusukkakku Timuutiusi aallartippara. Ernumas­sutigigakkumi Ussiisup arlaatigut ajortulior­nissamut nakkaan­nartissimaneraasi asuliinnarlu tamaviaarluta sulisimanersugut.

6 Maannali Timuutiusi tikeraareerlusi uagutsinnut uteqqam­merluni oqaluttuarpoq aalajaattusi, asannittusi, nuannaarlusi eqqaasaritsigut ilissinnullu kipiler­nitsitut uagutsinnut kipilertusi. Tamanna tusarlugu assut nuannerpoq! 7 Taamaattumik, qatanngutit, erloqinitsinni annikil­liornitsinnilu tamani ilissi pillusi aalajaan­nersilu pillugu tusakkagut tuppallersaatigaagut. 8 Naalakkamut aalajaannersi nakussatsis­sutigaarput. 9 Ilissinnik qujamasuutigin­ninnerput ilissilu pillusi Guutip saavani nuannaangaarnerput pillugu Guutimut qujamasunnerput qanoq takutis­savarput? 10 Takujumallusi uppernikkullu amigaatissinnik tuniumallusi unnuakkut ullukkullu qamannga pisumik qinusarpugut.

11 Qanortoq Guutitta Ataatattalu aamma Naalakkatta Jiisusip ilissinnut tikeraarsin­naatillisigut. 12 Aamma uagut ilissinnik asanningaar­nitsitut qanortoq Naalakkap uppeqatissinnik tamanillu asanninnersi ineriar­tortillugulu sinnilis­suutilliuk. 13 Taamaalillusi Naalakkatta Jiisusip illernar­tortaasalu tamarmik najuunneranni Guutitta Ataatattalu saavani aalajaallusilu minguitsuullusilu illernar­tuussaasi.

4 Kingullertut, qatanngutit: Guutimit iluarisaasutut inuunis­sassinnik uagutsinnit ilitsersor­neqarsimavusi, taamaaliorpusilu. Maanna Naalakkap Jiisusip aqqani qinnuigalusilu kajumis­saarpassi suli annerusumik taamaalioq­qullusi. 2 Naalakkammi Jiisusip aqqani ilitsersuutigut* nalunngilasi.

3 Guutip piumasaraa illernar­tuullusilu atoqatigiinnikkut eqqunngitsuliorneq* itigartis­sagissi. 4 Tamassi immikkut illernartumik ataqqinar­tumillu inuusin­naaqqullusi nalunngit­tariaqarparsi timersi* qanoq aqussin­naanerlugu. 5 Guutimik ilisarisiman­ninngitsut piumatuut aqussin­naanngisaminnik atoqateqarusus­suseqartartut assigeqinasigit. 6 Tamatumunnga tunngatillugu kialuunniit killissaasut naleqquttut qaangis­sanagillu qatanngutini ajoqusis­sanngilaa.* Jehovammi taamaaliortut tamaasa pillassavai, soorlu siusinnerusukkut oqarfigigissi sakkortuumillu mianersoq­qugissi. 7 Guutimmi minguttuumik inuuneqaqqunata illernar­tooqqullutali qaaqquaatigut. 8 Taamaattumik tamatuminnga suusupaginnittup inuk pinnagu kisianni Guuti, anersaaminik illernartumik ilissinnut tunniussisoq, suusupagaa.

9 Asaqatigiin­nissamik Guutimit ilinniar­tinneqareersimagassi qatanngutigiittut asaqatigiinnermut tunngatillugu uagutsinnit allaffigineqar­nissarsi pisariaqar­tinngilarsi. 10 Makedoniamimi tamarmi qatanngutinut tamanut asannit­tuliorpusi. Kimigiiserfigaassili, qatanngutit, suli annerusumik taamaalioq­qullusi. 11 Anguniagarisiuk eqqissillusi inuunissarsi, susassarin­ngisassinnut akuliutin­nginnissarsi assasilu atorlugit sulinissarsi, soorlu taama ilitsersorissi. 12 Kristumiut ilagiivinut ilaanngitsut taamaalillutik takussavaat pissuserillusilu amigaateqarasi inuususi.

13 Qatanngutit, aamma neriuuteqan­ngitsutut aliasoqqunasi sinippaartunut* tunngatillugu nalornis­suteqan­nginnissarsi kissaatigaarput. 14 Jiisusi toqusoq makititaasorlu upperigatsigu qularin­ngilarput ilumoorfigalugu toqusut Guutip Jiisusimik najueqqullugit makitik­kumaarai. 15 Jehovap oqaasia tunngavigalugu ima allaffigaassi: Naalakkap najuunnerani ilagut suli inuusut sinippaartunit siulliullutik qilalias­sanngil­luinnarput. 16 Naalagarmi sakkutuunik naalakkiilluni, inngiliunertut nipeqarluni Guutillu qarlortaataa* tigummillugu, qilammit aqqassaaq. Kristusilu ataasioqatigalugu toqusut siulliullutik makititaassapput. 17 Tamatuma kingorna ilatta suli inuusut taakku ilagalugit nuissatigut Naalagaq qilammut naapigiassavaat. Taamaattumik Naalagaq najortuas­savarput. 18 Oqaatsit taakku atorlugit tuppallersaqatigiit­tuaritsi.

5 Piffissanut piffissarititaasunullu tunngatillugu, qatanngutit, allaffigineqar­nissarsi pisariaqar­tinngilarsi. 2 Namminermi nalunngil­luinnarparsi Jehovap ullua unnuakkut tillinniatut nalliuk­kumaartoq. 3 Ima oqartoqarpat: “Eqqissineq isumannaas­suserlu!” taava arnap naartusup tassanngaannaq nallisitsisar­neratut ilimagin­ngisamik piuneerus­saariataassapput aniguin­ngilluin­nassallutillu. 4 Ilissili, qatanngutit, taartumiin­nginnassi ullup tillinnianik pakasaasar­neratut pakasar­neqarnavian­ngilasi 5 tamassi qaamanerup ullullu qitornarimmasi. Unnuap taarnerullu piginngilaatigut.

6 Taamaattumik allatulli siniinnarnata eqqumasa silatusaarlutalu. 7 Sinittummi unnuakkut sinittarput aalakoortullu* unnuakkut aalakoor­tarlutik. 8 Uagulli ullup pigimmatigut silatusaarluta upperneq asanninnerlu sakissakkut saattuaasatut aniguisitaanis­samillu neriuut niaqoror­tinnaveeq­qutitut atiniartigit. 9 Guutimmi pillarniarluta toqqanngilaatigut, Naalagarpulli Jiisusi Kristusi aqqutigalugu aniguisitaaq­qulluta toqqarpaatigut. 10 Eqqumanerput sininnerpul­luunniit* apeqqutaatinnagu inooqatigeq­qulluni uagut pilluta toquvoq. 11 Taamaattumik qiimmas­saqatigiit­tuarlusilu* ineriar­torteqatigiit­tuaritsi, soorlu maanna taamaaliortusi.

12 Maanna, qatanngutit, qinnuigaassi Naalakkamut kiffartornermi akorngassinni tamaviaarlutik sulisut, siulersuisut siunnersuisullu ataqqeq­qullugit. 13 Sulinerat pillugu soqutigingaarlugillu asangaassavasi. Eqqisseqatigiigitsi. 14 Qatanngutit, kimigiiserfigaassi torersumik inuuseqan­ngitsut mianersoq­qoqqullugit,* isumatsaqqasut* tuppallersaq­qullugit, sanngiitsut tapersersoq­qullugit kikkullu tamaasa naammagit­tarfigeq­qullugit. 15 Kialuunniit ajortumik pineqartup akiniaan­nginnissaa qulakkeersiuk, uppeqatis­sinnulli allanullu tamanut ajunngitsulior­nissarsi anguniagariuarsiuk.

16 Nuannaar­tuaritsi. 17 Qinujuaritsi. 18 Suut tamaasa pillugit Guuti qutsavigisarsiuk. Tamanna Guutip Kristusimik Jiisusimik malinnittunut piumasaraa. 19 Anersaap innera qameqinasiuk. 20 Tusarliussat* Guutimit isumassarsiarititaasut suusupageqinasigit. 21 Sunut tamanut tunngatillugu eqqortoq paasiniar­tarsiuk. Ajunngitsoq aalajangiusimasiuk. 22 Ajortut suulluunniit itigartissigit.

23 Qanortoq Guutimit eqqissisitsisumit illernarsisil­luinnar­neqarisi. Qanortorlu, qatanngutit, Naalakkatta Jiisusip Kristusip najuunnerani anersaarsi,* tarnersi* timersilu sutigut tamatigut peqqissooq­qullugit isornaatsuutin­neqarisi. 24 Ilissinnik qaaqqusisup aalajaatsup qularnan­ngitsumik tamanna isumagissavaa.

25 Qatanngutit, qinnuttuartigut.

26 Qatanngutit tamaasa illernartumik kunillugit inuulluaq­qutikkisigit.

27 Naalakkap aqqani qinnuigaassi qatanngutit tamaasa allakkanik ukuninnga atuffateq­qullugit.

28 Qanortoq Naalakkatta Jiisusip Kristusip ajunngisaangaarnerata najorilisi.