KOLOSSIMIUNUT

1 Paulusimit, Guutip piumasaagut Kristusimit Jiisusimit apustilin­ngortin­neqartumit, qatanngutitsinnillu Timuutiusimit 2 Kolossimi qatanngutinut illernartunut aalajaatsunut Kristusimik ataasioqateqartunut:

Ajunngisaangaarnermik eqqissinermillu Guutimit Ataatatsinnit pisumik kissaappassi.

3 Qinnukkaangassi tamatigut Guuti Naalakkatta Jiisusip Kristusip Ataataa qutsavigisarparput, 4 tusaratsigumi Kristusi Jiisusi upperfigalugulu illernartut tamaasa asagisi 5 qilammi neriuummik pissarsias­saqarnersi pissutigalugu. Ilumoortoq pillugu nutaarsiassanik nuannersunik tusarler­neqarassi neriuut taanna tusarparsi. 6 Soorlu nutaarsiassat nuannersut nunarsuarmi tamarmi inerititaqarlutillu siaruariartortut, taamatuttaaq Guutip ajunngisaangaarnera ilumoortoq taamani tusarlugulu paasilluarassiulli ilissinni inerititaqarlutillu ineriartorput. 7 Tamanna inussiaqatitsinnit asasatsinnit Epafrasimit, uagut sinnerluta aalajaalluni Kristusimut kiffartortumit, ilikkarparsi. 8 Aamma Epafrasip oqaluttuup­paatigut anersaap illernartup ikiuineratigut* asannit­tuliortartusi.

9 Taamaattumik asanninnersi uppernersilu tusaratsiguli anersaakkut ilisimas­suseqangaarnermik Guutillu piumasaa pillugu eqqoqqis­saartumik paasisimasaqarnermik ulikkaar­nissarsi qinnutigiuarparput, 10 taamaalillusi sutigut tamatigut ajunngitsuliorlusi inerititaqar­nissinni Guutilu pillugu eqqoqqis­saartumik paasisimasaqar­nerujar­tornissinni Jehovap* kiffaanut naleqquttumik iluaril­luinnagaanillu inuunias­sagassi. 11 Qanortoq sutigut tamatigut naammagit­tarlusi nuannaarlusilu pinertusaarsin­naanias­sagassi pissaanersuanut alutornartumut naapertuuttumik nakussatsin­neqarisi. 12 Illernartut qaamanermiittut kingornus­sassaannik pissarsinissamut Ataataq ilissinnik piukkun­narsaasoq qutsavigisarsiuk.

13 Taassuma taartup pissaaneranit aniguisip­paatigut Ernermilu asasami kunngeqarfianut nuutsilluta. 14 Ernerata akiliulluta utertim­matigut aniguisin­neqarlutalu ajortuliatsinnik isumakkeerfigineqarpugut. 15 Taanna Guutimut takussaan­ngitsumut assingusoq pinngortitat tamarmik siullersaraat.* 16 Taassumami ikiuineratigut allat tamarmik – qilammiittut nunarsuarmiittullu, takussaasut takussaan­ngitsullu, naalakkat, naalakkersuisut oqartus­saasullu – pinngor­tinneqarput. Allat suut tamarmik taanna ikiortigalugu iluarisaanik pinngor­tinneqarput. 17 Suut tamaasa sioqqullugit pinngor­tinneqarpoq, taassumalu ikiuineratigut allat tamarmik pinngor­tinneqarput. 18 Aamma timimut, tassa ilagiinnut, niaquuvoq. Aallaqqaataavoq, suni tamani siullioq­qullugu toqusunit makititaasut siullersaraat.* 19 Guutip kissaatigaa pissusini tamarmik taassumaniissasut 20 qisummilu naalliutsitsiviliami* aavanik kuisinikkut allat nunarsuarmiittut qilammiittullu tamarmik taassumuuna eqqisseqatigineqarlutillu saammaan­neqassasut.

21 Taamani ajortuliornissaq eqqarsaatigiuarassiuk Guutimut takornar­taallusilu akeraavusi. 22 Illernar­tutulli, minguitsutut isornaateqan­ngitsutullu saaminut sassaan­neqarnias­sagassi Guutip ernini timiminik pilliuteqarluni toqusoq aqqutigalugu saammaappaasi. 23 Saammaan­neqarumallusili soorunami uppertuar­tariaqarpusi, toqqavim­miittuar­tariaqarpusi, aalajaat­tuartariaqarpusi neriuullu pillugu nutaarsiassanit nuannersunit tusakkassinnit inunnullu tamanut oqaluus­sissutigineqartunit avissaariar­tornasi. Uanga, Paulusi, nutaarsiassanik nuannersunik taakkuninnga oqaluus­sisussan­ngortin­neqarpunga.

24 Ilissi pillusi naalliunninni nuannaarpunga, Kristusillu timaata, tassa ilagiit, iluaqutissaanik suli timikkut naalliut­tariaqarpunga. 25 Iluaqutis­sassinnik Guutimit nakkutil­liisunngor­tinneqarnera malillugu ilagiit kiffartuuppakka Guutip oqaasiata sapinngisannik oqaluus­sissutigineratigut, 26 taamaaliorpungalu Guutip isertugaataa, siusinnerusukkut kinguaariinnut isertor­neqarsimasoq, pillugu oqaluus­sinikkut. Maanna Guutip isertugaataa saqqummersin­neqarpoq illernartuinut, 27 allamiunut erlinnaqisumik tamatuminnga paasitik­kusutaanut. Unalu isertugaavoq: Kristusip ataasioqatigaasi, taamaat­tumillu alutornarsisitaaqatiginissaa neriuutigaarsi. 28 Kristusi pillugu oqaluus­sivugut, taassuminngalu ataasioqateqartut inersimal­luartun­ngoqqullugit Guutimullu sassaan­neqarsin­naaqqullugit ilisimas­suseqangaarluta kikkunnik tamanik oqaaqqis­saarisarlutalu ilinniar­titsisarpugut. 29 Tamanna angujumallugu taassuma pissaanera uanni sunniuteqangaartoq ikiortigalugu tamaviaarlunga sulivunga.

2 Kissaatigaarami paasissagissi ikiorniarlusi aamma Laodikiiamiittut uannillu naapitsisiman­ngitsut tamaasa ikiorniarlugit qanoq tamaviaar­tigisunga. 2 Taamaaliorpunga tuppallersar­neqarnias­sammata, asanninnermi ataqatigiissumik katiter­neqarnias­sammata ilisimasanillu qularin­ninngil­luinnarnerup kingunerisaanik pisuussuterpas­suaqarnias­sammata. Tamatumani Guutip isertugaataa, tassa Kristusi, pillugu eqqoqqis­saartumik paasisimasaqaler­nissaat siunertaavoq. 3 Taassumani ilisimas­sutsimik paasisimasaqar­nermillu pisuussutit tamarmik isertoq­qissaar­neqarsimapput. 4 Taama allappunga kialuunniit tunngavilersuutinik uppernarpaluttunik tammartin­nginnias­sammasi. 5 Timikkut najunngik­kaluarlusi eqqarsaatikkut* najorpassi, aamma aaqqissuul­luagaasumik periuseqarnersi Kristusimullu upperluarnersi nuannaarutigaara.

6 Naalagaq Kristusi Jiisusi upperfigigassiuk ataasioqatigiuarlugulu 7 sorlaqarfigalugulu ineriar­torfigisiuk, aamma uppernikkut aalajaagitsi, soorlu taama ilinniar­tinneqartusi. Tamatigullu Guutimut qujasaritsi.

8 Isumaliutersuutinit tammartitsiniutinillu tigusarineqaqqunasi* mianersoritsi, taakkumi Kristusip ilinniar­titsissutaanik tunngaveqarnatik inuit ileqqutoqaannik, tunngaviusumik isiginnit­taasiannik, tunngaveqarmata. 9 Guutimmi pissusii tamarmik Kristusimiipput. 10 Taanna, naalakkersuisunut oqartus­saasunullu tamanut niaquusoq, ikiortigalugu pisariaqartitasi tamaasa pigaasi. 11 Taassuma attaveqarfigineratigut timillu pileris­susipiluisa peernerisigut assaat atornagit kipineqarpusi. Kipineqarneq tamanna Kristusimut tunngavoq. 12 Taassumatummi morsutsin­neqarnikkut ilisaaqatigaarsi, taassumunngalu attaveqarnikkut Guutillu tupinnar­tuliaanik, Kristusimik toqusunit makititsineranik, upperin­ninnikkut makititaaqatigaarsi.

13 Unioqqutitsinisi pissutigalugit toqungagaluartusi timikkullu kipineqarsiman­ngikkaluartusi Guutip Kristusimik ataasioqateqaq­qullusi uummartippaasi. Asannilluni unioqqutitsinitsinnik tamanik isumakkeerfigaatigut 14 allakkiallu uagutsinnik unnerluus­sutinik aalajangersagallit nunguterlugit. Qisummik naalliutsitsiviliamut* kikiattuun­nerisigut peerpai. 15 Qisummik naalliutsitsiviliaq* atorlugu naalakkersuisut oqartus­saasullu tamataarutitil­lugillu tigusamisut tamanut saqqummersil­lugillu ajugaasutut ingerlaarnermi siulersorpai.

16 Taamaattumik kinaluunniit sunik nerinersusi imernersusilu, imaluunniit nalliut­torsiornermik, qaamman­niffimmik* ullormil­luunniit qasuersaarfimmik* nallius­sinersi pillugu isornar­torsiuisin­naatitaanngilaq. 17 Tamakkua pisussat tarraraat, Kristusimilli timitaler­neqarput. 18 Maniguut­tuusaarnermik, inngilisiornermik* takusimasaminillu “oqarataarutigin­ninnermik”* nuannarisaqartumit akissarsias­sassinnik arsaarneqar­niaqinasi. Inuup taamaattup ajortilittut eqqarsar­taaseqarnini pissutigalugu tunngavis­saqanngitsumik pingaakujullunilu 19 niaquusoq aalajangiusimaneq ajorpaa. Niaquusoq aqqutigalugu timi tamarmi pilersor­neqarlunilu naggussat taakkualu noqarutaat atorlugit ataqatigiissumik katiter­neqarpoq Guutimillu ineriar­tortinneqarluni.

20 Inuit tunngaviusumik ileqquinut tunngatillugu Kristusi toqoqatigisimagussiuk taava sooq suli inuttut ajortutut inuuisi peqqussutinik ukuninnga maleruaanikkut: 21 “Tigoqinagu, usseqinagu, attoqinagu”? 22 Tamakkumi tamarmik atorneqareerunik peeruttus­saallutillu peqqussutaal­lutillu ilinniar­titsissutaapput inunneersut. 23 Taamatut ilisimas­suseqarpasilluni imminut naalliutsinnikkut guutisiorneq maniguut­tuusaarnerlu pileris­susipilunnik akiuinermi iluaqutaan­ngillat.

3 Kristusi Guutip talerpiatungaani issiavoq, taamaattumik makititaaqatigisimagussiuk qilammiittut pissarsiariniar­tuassavasi. 2 Nunarsuarmiittut pinnagit qilammiittut eqqarsaatigiuarsigit. 3 Toquvusimi, inuunersilu Kristusimut Guutimik ataasioqateqartumut isumagisas­sanngor­tinneqarpoq. 4 Kristusi, inuunerput, saqqummersin­neqarpat aamma ilissi ilagalugu alutornas­sutsimi saqqummersin­neqassaasi.

5 Taamaattumik toqutissavasi nunarsuarmi avatissi iliuusereq­qajaasartagaat uku: Atoqatigiinnikkut eqqunngitsuliorneq,* minguttuuneq, aqussin­naanngisamik atoqateqarusus­suseqarneq, pilerigisat ajoqutaasut piumatus­suseqarnerlu, tassa guutipilus­siorneq. 6 Inuit taamaaliortartut Guutip pillassavai.* 7 Aamma ilissi taama inuugal­larassi taama pissuseqarsimagaluarpusi. 8 Maannali uku tamaasa piissavasi: Kamarujus­suarneq, kamanneq, ajussuseq, ajuallan­nartumik oqalunneq atoqatigiinnerlu pillugu quiasaarneq. 9 Immissinnut salluliorfigis­sanngilasi. Kinaassusitoqaq* tamatumalu pissusii piissavasi 10 kinaassuserlu nutaaq, eqqoqqis­saartumik paasisimasaqarnikkut Pinngor­titsisumut assingulerluni nutaanngor­titaajuartoq, atillugu. 11 Grækeriuneq juutiunerluunniit, kipineqarsimaneq kipineqarsiman­nginnerluunniit, takornartaaneq, skytiuneq,* inussiaaneq inussiaan­nginnerluunniit kinaassutsimi nutaami immikkoor­tinneqan­ngillat. Kristusili tamaniippoq tamattalu ataasioqatigaluta.

12 Guutimit toqqarneqarassi illernar­tuullusilu asaneqarpusi, taamaat­tumillu atissavasi qamannga pisumik misigin­neqataaneq, ajunngissuseq,* maniguunneq, saamaneq naammagit­tarnerlu. 13 Naammagit­taallior­nissamut pissutis­saqaraluarus­siluunniit kamageqatigiit­tuarlusilu ilumoorlusi isumakkeerfigeqatigiit­tuaritsi. Soorlu Jehovap ilumoorluni isumakkeerfigigaasi, taamatuttaaq iliussaasi. 14 Tamakkualu tamaasa saniatigut asanninneq ataasioqatigiil­luinnalersitsisarmat atissavarsi.

15 Aamma timinngoq­qullusi ataaseq eqqisseq­qullusilu qaaqqusaagassi Kristusip eqqissinera uummatissinni aqutsisuutis­savarsi. Qujamasun­nersilu ersersit­tarsiuk. 16 Ilisimas­suseqaleq­qullusi uummatersi Kristusip oqaasianik ulikkaarsiuk. Qujamasullusi tussiaqatigiillusi Guutilu unnersiutigalugu erinarsoqatigiillusi ilinniar­teqatigiit­tuarlusilu qiimmas­saqatigiit­tuaritsi.* Uummammit pisumik Jehova erinarsorfigisarsiuk. 17 Tamatigut Naalakkatta Jiisusip aqqani oqalullusilu iliuuseqar­tassaasi taassumuunalu Guuti Ataataq qutsavigisarlugu.

18 Nuliaasusi, Naalakkamik malinnittunut piumasaqaataasutut uisi kajumillusi naalassavasi. 19 Uiususi, nuliasi kamaannagit* asajuarsigit. 20 Ilissi meeraasusi, Naalakkap iluarisaatut angajoqqaasi sutigut tamatigut naalassigit. 21 Ataataasusi, meeqqasi nikalloq­qunagit uumitsatsis­sanngilasi.* 22 Inussiaataasusi, inuit naalakkasi sutigut tamatigut naalassigit. Inunnit iluarineqar­niaannartutut aatsaat takuneqarsin­naagaangassi naalannagit uummammit pisumik Jehovamillu mianerin­nillusi naalassavasi. 23 Qanorluunniit iliorussi inuit pinnagit Jehovali pillugu tarneq* tamakkerlugu sulissaasi, 24 nalunngin­nassiummi kingornus­sassasi akissarsiatut Jehovamit pissallugit. Naalagaq Kristusi inussiatut kiffartuussiuk. 25 Guuti kinaassusersior­tuunngimmat eqqunngitsuliortut tamarmik eqqunngitsuliatik pillugit eqqartuun­neqassapput.

4 Ilissi naalagaasusi, nalunngin­nassiuk aamma ilissi qilammi Naalagaqarlusi inussiaatisi eqqortumik naapertuil­luartumillu pisassavasi.

2 Qinujuarlusilu eqqumajuarlusilu qujamasut­tuaritsi. 3 Aamma qinnutigisas­savarsi Guutip Kristusi pillugu isertugaatiminik, parnaarus­saassutigisannik, oqaluus­seqqulluta oqaatsip matuanik ammaatis­sagaatigut. 4 Aap, qinnutigisas­savarsi pisussaanittut paasiuminar­tigisumik oqaluus­sissasunga.

5 Ilagiit avataan­niittut ilagigaangassigit ilisimas­suseqar­tassaasi, piffissarsilu pitsaanerpaamik atussavarsi.* 6 Kinaluunniit qanoq akissallugu nalunngin­niassagassiuk tamatigut tusaruminartumik,* taratsikkamik, oqaluttassaasi.

7 Tykikorsip, qatanngutima asasama, kiffaqatima aalajaatsup Naalakkamullu inussiaqatima, qanoq pineqarsimaninnik tamanik oqaluttuutis­savaasi. 8 Qanoq innerput tusarnias­sagassiuk tuppaller­niassagassilu ilissinnut aallartippara. 9 Oniisimusi nunaqqatersi, qatanngutiga aalajaatsoq asasara, ilagalugu tikeraas­savaasi. Maani pisunik tamanik oqaluttuutis­savaasi.

10 Inuulluaq­qusipput Aristarkusi, parnaarus­saaqatiga, Makkorsi, Barnabap illua (tassa taanna pillugu ilisimatippassi tikissappat tikilluaq­qoqqullugu) 11 aamma Jiisusi Justusimik taaneqartartoq. Taakku kipineqarsimasuni Guutip kunngeqarfia pillugu kisiisa suleqatigaakka uannut tuppallersaataangaartut.* 12 Epafrasi, nunaqqatersi Kristusip Jiisusip inussiaataa, inuulluaq­qusivoq. Inersimal­luartun­ngornias­sagassi Guutillu piumasaa qularnasi upperinias­sagassiuk ilissi pillusi qamannga pisumik qinusarpoq. 13 Ilissi pillusi aamma Laodikiiamiittut Hiraapolisimiittullu pillugit tamaviaarpoq.

14 Lukkarsi, nakorsaq asasaq, Demassilu inuulluaq­qusipput. 15 Laodikiiami qatanngutit, Nymfa ilagiillu angerlarsimaffiani katersuuttartut inuulluaq­qutikkisigit. 16 Allakkanik ukuninnga atuffan­neqareerussi Laodikiiami ilagiit atuffan­neqarnissaat Laodikiiamiunullu allakkannik atuffan­neqarnissarsi qulakkiis­savarsi. 17 Aamma Arkipussi oqarfigis­savarsi: “Naalakkap suliassiissutaa naammas­siumallugu tamaviaassaatit.”

18 Taama uanga Paulusi nammineq assannik allallunga inuulluaq­qusivunga. Kalunnernik qilersugaaqqanera eqqaamasiuk. Guutip ajunngisaangaarnerata najorilisi.