FILIPPIMIUNUT

1 Paulusimit Timuutiusimillu, Kristusip Jiisusip inussiaataannit, Filippimi illernartunut tamanut Kristusimik Jiisusimik ataasioqateqartunut aamma nakkutil­liisunut ilagiinnilu kiffartortunut:

2 Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi.

3 Eqqaagaangassi Guuti qutsavigiuar­tarpara. 4 Tamassi qamannga pisumik qinnukkaangassi nuannaar­tarpunga 5 ullormit siullermiit maannamut nutaarsiassat nuannersut pillugit tapersersuigassi.* 6 Qularin­ngilaralu ilissinni suliamik ajunngitsumik aallarniisup Kristusip Jiisusip ulluata nalliun­nissaata tungaanut suliaq naammas­sissagaa. 7 Taama isummer­nissannut pissutis­saqarluarpunga. Tassami asaqigassi, ilissi uattut Guutimit ajunngisaangaarfigineqartusi aamma parnaarus­saaqqaninnut nutaarsias­sanillu nuannersunik inatsisitigut illersuinermut aalajangersaanermullu tunngatillugu tapersersuisusi.

8 Guutip uppernarsarsinnaavaa Kristusitut Jiisusitut tamassi qamannga pisumik misigis­suseqarfigalusi kipilerfigigissi. 9 Qinnutigiuarparalu asanninnersi, eqqoqqis­saartumik paasisimasaqarnersi naliliisin­naassuseqarluar­nersilu ineriar­tortuassasut 10 suut pingaar­nerpaanersut qulakkeer­niassagassiuk. Taamaaliorussi Kristusip ulluata tungaanut minguitsuullusilu allat uppernikkut naakkiutitis­sanngilasi, 11 aamma Guutip ataqqinaatissaanik unnersiutigineqaatis­saanillu Jiisusimit Kristusimit ikiorneqarlusi naapertuil­luarnerup inerititaanik ulikkaassaasi.

12 Qatanngutit, kissaatigaara paasissagissi pissutsit atukkakka nutaarsiassat nuannersut siammar­nerannik kinguneqartut, 13 kaasarimimmi paarsisut allallu tamarmik ilisimalerpaat Kristusi pillugu parnaarus­saaqqasunga. 14 Parnaarus­saaqqanera pissutigalugu qatanngutit Naalakkamut kiffartortut amerlanersaat nakussatsil­lutillu qunusuillutik Guutip oqaasiata oqaluus­sissutiginissaanut sapiinnerulerput.

15 Ilaat usorukkamik unammil­lerusuk­kamillu Kristusi pillugu oqaluussipput, allalli ajunngitsumik pissutiginiagaqarlutik oqaluussipput. 16 Kingullertut eqqaaneqartut nutaarsiassanik nuannersunik illersuisussatut toqqarneqarsimasunga nalunngin­namikku asanninneq kajumis­sissutigalugu Kristusi pillugu oqaluussipput. 17 Siullertulli eqqaaneqartut parnaarus­saaqqaninni erloqiniassagama avissaar­tuutsitsiumallutik, minguitsumik pissutiginiagaqarnatik, oqaluussipput. 18 Qanoq kinguneqartumik? Ajunngitsumik ajortumil­luunniit pissutiginiagaqarneq apeqqutaatinnagu Kristusi oqaluus­sissutigineqarpoq, tamannalu uanga nuannaarutigaara. Aap, nuannaarutigiuassavara, 19 nalunngin­nakkumi qamannga pisumik qinnussisarnersi Jiisusillu Kristusip anersaavata tapersersuinera aniguisitaaninnik kinguneqassasut. 20 Sunaluunniit pillugu kanngusuuteqan­nginnissara qularinagulu neriuutigaara. Sapiillungali oqaluussigama Kristusi pisarnertut, inuuinnarnera toquneraluunniit apeqqutaatinnagit, timiga iluaqutigalugu qutsissisin­neqassaaq.

21 Inuugumami Kristusi pillugu inuussaanga toqugumalu pitsaanerusumik angusaqas­sallunga. 22 Inuttulli timeqarlunga inuuinnassaguma Kristusi pillugu iliuuseqar­nerusin­naassaanga. Sorlerli toqqarusun­nerlugu oqaatiginian­ngilara. 23 Illuttut noqinneqartutut ippunga, tassami Kristusi ilagilerumallugu iperagaanissaq, pitsaanerungaartoq, orniginar­tikkakku. 24 Ilissili pillusi inuttut timeqarlunga inuuinnar­nissara iluaqutiginerus­savarsi. 25 Tamanna qularin­nginnakku nalunngilara siumukar­nissarsi uppernikkullu nuannaar­nissarsi pillugit tamassi najorlusi inuuinnas­sallunga. 26 Najoqqilerussi Kristusimik Jiisusimik malinnittutut qiimmat­tarnersi uanga pissutaallunga annertusiar­tussaaq.

27 Kristusi pillugu nutaarsiassanut nuannersunut naleqquttumik pissuseqassaasi,* taamaalillunga tikeraarussi tikeraan­ngikkaluarus­siluunniit tusarnias­sagakku anersaami ataatsimi aalajaallusi, ataatsimik tarneqarlusi,* nutaarsiassanik nuannersunik upperin­ninnersi pillugu tamaviaaqatigiittusi 28 akerlilersor­tissinnillu annilaangalersin­neqanngil­luinnartusi. Taakkua suujunnaarsitaanis­saannut ilissilu aniguisitaanis­sassinnut tamakku uppernarsaataapput. Tamannalu Guutimeersuuvoq. 29 Kristusimummi uppernerup saniatigut aamma taanna pillugu naalliun­nissarsi immikkut pisinnaatitaaf­figaarsi. 30 Takuarsi qanoq erloqitigisunga, maannalu ilissi nammineq taama misigisaqarpusi, tusakkas­situllu uanga suli taakkuninnga erloqis­suteqarpunga.

2 Kristumiutut qiimmas­saatissaqarussi, asannittumik tuppallersaatis­saqarussi, isumassuigussi* aamma qamannga pisumik misigis­suseqarlusilu misigin­neqataagussi 2 taava assigiimmik eqqarsar­taaseqarlusilu asanninnikkut, ataasioqatigiil­luinnarnikkut isumakkullu ataasioqatigiinnikkut nuannaarnera naammatsissiuk. 3 Isumaqataan­nginniaan­narlusi namminis­sarsiorlusiluunniit iliuuseqar­tarnasi maniguullusi allat immissinnit pingaar­nerusutut isigisassavasi. 4 Nammineq iluaqutissasi kisiisa eqqarsaatiginagit aammali allat iluaqutissaat eqqarsaatigisigit.

5 Kristusitut Jiisusitut isiginnit­taaseqar­tuaritsi. 6 Taassuma Guutitut ikkaluarluni Guuti naligilerumallugu iliuuseqar­niarnissaq eqqarsaatigin­ngilaaluunniit. 7 Aap, suut tamaasa qimallugit* inussiatut ilerpoq inunngorlunilu.* 8 Tamatumalu saniatigut inunngorami* maniguulluni allaat toqussi, aap, qisummik naalliutsitsiviliami* toqussi, tikillugu naalappoq. 9 Tamannarpiarlu pissutigalugu Guutip qaffasin­nerusumik inissisimaf­feqalersillugu qutsissisippaa ajunngisaarfigalugulu aternit allanit tamanit qutsinnerusumik atserlugu. 10 Taamaattumik kikkut tamarmik – qilammiittut, nunarsuarmiittut nunallu iluaniittut* – Jiisusip aqqani seeqqum­mertassapput. 11 Qanorluunniillu oqaasillit Jiisusi Kristusi Guutimut Ataatamut ataqqinaataasumik Naalagaasoq kikkut tamaasa tusaatillugit nalunaarutigissavaat.

12 Taamaattumik, asasakka, najorassi naalattuarpusi, maannalu najunngik­kaluarissi suli naalanneruvusi. Taamatuttaaq tamassi immikkut aniguisitaanissarsi mianerin­nillusi ataqqin­ningaarlusilu* sulissutigiuarsiuk. 13 Guutimmi iluarisamisut ilioqqullusi nakussatsit­tarlusilu piumassuseqalersit­tarlusilu pissatsit­tarpaasi. 14 Qanorluunniit ilioraluarussi naammagit­taalliorasilu akerliliis­sanngilasi 15 tassaaleq­qullusi isornaateqan­ngitsut pisuussuteqan­ngitsullu, Guutip qitornai minguitsut nalitsinni inuit ajortut eqqortuliorusun­ngitsullu akornganni qaammaq­qutaasut. 16 Oqaaseq inuussutaasoq tigummil­luarsiuk. Taava arpannera tamaviaarlungalu sulinera asuliin­naanngitsut nalunagu Kristusip ulluani nuannaar­nissamut pissutis­saqassaanga. 17 Uppernersili kajumis­sissutigalugu pilliutissinnut illernar­tumillu kiffartor­nissinnut allaat viinnisut pilliutissatut kuineqaraluaruma nuannaas­sallungalu tamassi nuannaaqatigis­savassi. 18 Taamatuttaaq aamma ilissi nuannaas­sallusilu nuannaaqatigis­savassinga.

19 Qanoq innersi tusarlugu qiimmaal­laatiginias­sagakku neriuppunga Timuutiusi qanittukkut ilissinnut aallartis­sinnaas­sallugu, Naalakkallu Jiisusip piumasarippagu aallartik­kumaarpara. 20 Timuutiusitummi isiginnit­taaseritsigisumik, pisariaqar­titassinnik ilumoorluni isumassuerusuttumik, allamik aallartitas­saqanngilanga. 21 Allammi tamarmik Jiisusip Kristusip kissaatai pinnagit namminneq iluaqutissatik kisiisa eqqarsaatigaat. 22 Nalunngilarsili Timuutiusip meeraq ataataminik kiffartoqateqartoq assigalugu nutaarsiassat nuannersut siammarsar­niarlugit tamaviaaqatigigaanga. 23 Taamaattumik neriuppunga qanoq pineqar­nissara paaseriarukku aallartis­sinnaas­sallugu. 24 Qularin­ngilara qanittukkut uangattaaq ilissinnut tikeraar­nissara Naalakkap akuerissagaa.

25 Maannali isumaqarpunga Epafroditusi – qatanngutiga, suleqatiga sakkutooqatigalu pisariaqar­titannik matussusiisussatut kiffartuus­sisussatullu uannut aallartis­simasarsi – ilissinnut aallartit­tariaqarlugu. 26 Tamassimi assut takorusullusilu napparsimanerminik tusagaqarsimanersi nikallungas­sutigaa. 27 Aap, napparsimangaarami toqungajak­kaluarpoq. Guutilli nallittuin­narnagu aamma uanga nallittorpaanga suli annerusumik aliasuuteqaq­qunanga. 28 Taamaattumik takoqqik­kussiuk nuannaaq­qilersin­naanias­sagassi uangalu ernumaval­laarunnaar­niassagama piaarnerpaamik aallartippara. 29 Naalakkap kiffaanik nuannaarlusi tikilluaq­qusisar­nissitut tikilluaq­quniarisiuk, angutillu taassumatut ittut pingaar­tittuarsigit. 30 Kristusimummi kiffartornini* pissutigalugu toqungajappoq. Maani sinnerlusi kiffartuuk­kumallunga inuunini navianar­torsiortippaa.

3 Kingullertut, qatanngutit: Naalakkamik malinnittutut nuannaar­tuaritsi. Allaatigeriikkama allaatigeq­qinnissaat qatsunneq ajorpara, tamannami illersuutigis­sagassiuk.

2 Mianersorfigisigit qimmisut ittut, mianersorfigisigit ajoqusiisut, mianersorfigisigit timimik aqqunar­titerisut. 3 Uagununa kipineqar­tuusugut, uagut Guutip anersaavanit siulersor­neqarluta Guutimut kiffartor­tuusugut qallikkullu ittut tatiginagit* Kristusip Jiisusip iliuusiinik tulluusimaarutigin­nittuusugut. 4 Qallikkut ittunut tunngatillugu imminut tatiginissamut pissutis­saqarpunga.

Aap, qallikkut ittunut tunngatillugu imminut tatiginissamut pissutis­saqarsorisumit suli amerlanerusunik pissutis­saqarpunga: 5 Ullut arfineq-pingajuanni kipineqarpunga, Israalimi naggueqatigiit Biiniakkut ilagaannga, hebræeriuvunga hebræerinit erniusoq farisiiarisullu inatsisinik maleruaaq­qissaartoq. 6 Ilagiit ilungersorlunga malersorpakka inatsisinilu eqqortuunerar­neqartunut tunngatillugu isorineqarsin­naananga. 7 Siusinnerusukkulli pingaar­titakka Kristusimik malinnit­tuugama naleqar­tinngilakka.* 8 Naalagara Kristusi Jiisusi pillugu paasisimasaqarneq naleqar­nerungaartoq pissutigalugu suut tamaasa naleqar­tinngilakka. Taanna pillugu suut tamaasa immineerlugillu eqqakkatut* isigaakka Kristusimit iluarineqar­niassagama 9 taassuminngalu ataasioqateqartutut isigineqar­niassagama. Moorsisip inatsisaanik maleruaaneq pissutiginagu Kristusimulli uppernera pissutigalugu naapertuil­luartuuvunga. Naapertuil­luartuutitaaneq tamanna Guutimeersuullunilu uppernermik tunngaveqarpoq. 10 Kristusip ilisarisimalernissaa pissaanerullu taassuminnga makititsisup paasinissaa Kristusitullu naalliun­nissara, tassungalu atatillugu taassumatut toqunissamut piareersimanissara, anguniagaraara. 11 Neriuutigaaralu ajornan­ngippat siulliullutik toqusunit makititaasut ilagissagaannga.

12 Soorunami tamanna suli angunagulu naammal­luinnar­tunngor­tinneqan­ngilanga, akissarsiassalli tigunissaa tamaviaarutigaara Kristusip Jiisusip tamanna pillugu toqqarmanga. 13 Qatanngutit, isumaqan­ngilanga tamanna tigoreerlugu, unali qularnanngilaq: Tununniittut puiorlugit siuninniittut tiguniarsaraakka. 14 Guutimit Kristusi Jiisusi aqqutigalugu qilaliaq­quneqartut akissarsiassaat pissarsiariumallugu tamaviaarlunga arpappunga. 15 Taamaattumik akorngatsinni inersimal­luartuusugut taama isiginnit­taaseqarta. Arlaatigullu allaanerusumik isiginnit­taaseqarussi Guutip eqqortumik isiginnit­taaseqaleq­qullusi ikiussavaasi. 16 Qanorli siumukar­tigisimanerput apeqqutaatinnagu toraakkatsinnut tassunga torersumik ingerlajuarta.

17 Qatanngutit, ataasioqatigiillusi uannik ilaarsisun­ngorlusilu ilissinnut maligas­siuinitsinnut naapertuuttumik inuusut maluginiarsigit. 18 Kristusimmi qisummik naalliutsitaaffianik* akerlilersuillutik inuusut amerlapput. Eqqaaqat­taartarsimagaluarpakka, maannali qiallunga eqqaavakka. 19 Taakku naggataatigut suujunnaarsitaassapput. Nassatik guutigaat, kanngusuutigisas­saraluatik tulluusimaarutigaat nunallu pii kisiisa eqqarsaatigalugit. 20 Uagulli qilammi innuttaas­suseqarpugut. Tassannga, Naalakkatsinnit Jiisusimit Kristusimit, aniguisitaanissarput qilanaarluta utaqqivarput. 21 Taassuma pissaanersuani, sunik tamanik naalakkersuinermut atorsin­naasani, atorlugu sanngiitsumik timeqarun­naarsilluta immisut alutornartumik timeqalersis­savaatigut.

4 Taamaattumik, qatanngutikka asasakka kipilerfigisakkalu, tassaasusi nuannaarnera niaqorutigalu: Naalakkamut taama aalajaat­tuaritsi, ilissi asasakka.

2 Euudia Syntykilu Naalakkamik malinnittutut assigiimmik eqqarsar­taaseqaq­qullugit kimigiiserfigaakka. 3 Aap, aamma illit suleqatiga* ilumoortoq, qinnuigaakkit arnat taakku ikiortuaq­qullugit. Taakkumi Cleementi suleqatikkalu allat ilagalugit nutaarsiassat nuannersut pillugit tamaviaaqatigisimavakka. Taakkualu tamarmik aqqi inuunerup mappersagaani allassimapput.

4 Naalagaq nuannaarutigiuarsiuk. Oqaqqippunga: Nuannaaritsi! 5 Uteriitsuun­nginnersi* tamanit ilisimaneqalerli. Naalagaq qanippoq. 6 Suulluunniit ernumas­sutigeqinasigit, pissutsinili qanorluunniit ittuni qinunikkut kimigiiser­nikkullu Guutimut ikioqqusarlusilu qujasassaasi. 7 Taava Guutip eqqissinerata inuit paasisin­naasaannit annerungaartup Kristusi Jiisusi aqqutigalugu uummatersi isumarsilu* paarissavai.

8 Kingullertut, qatanngutit: Eqqarsaatigiuarsigit* ilumoortut, pimoorussassat, naapertuil­luartut, minguitsut, asanartut, ajunngitsumik eqqartor­neqartartut, assuarnaatsut nersortariallillu. 9 Uannit ilikkakkasi, upperilikkasi, tusakkasi takusasilu iliuuserisarussigit Guutip eqqissisitsisup najussavaasi.

10 Isumassoq­qilerassinga nuannaangaarlungalu Naalagaq qutsavigaara. Isumassoraluarlunga siusinnerusukkut taamaalior­nissamut periarfis­saqarsiman­ngilasi. 11 Taama allakkama amigaateqarnera pinngilara, qanorluunniimmi atugaqaraluaraangama nalerisimaar­nissara ilikkarsimagakku. 12 Suuteqarpiarnani inuuneq peqangaarlunilu inuuneq qanoq innersut nalunngilara. Inuit ikittuinnaat ilisimasaat una ilikkarpara: Pissutsini qanorluunniit ittuni – qaarsilaarneq, kaanneq, peqangaarneq suuteqan­nginnerluunniit apeqqutaatinnagit – nalerisimaar­nissara. 13 Guutip pissatsit­tarmanga suulluunniit nukissaqarfigaakka.

14 Annikil­liorninnili ikiorassinga ajunngitsuliorpusi. 15 Ilissimi Filippimiuususi, nalunngilarsi nutaarsiassanik nuannersunik paasinnereersusi Makedoniamiit aallarama ilagiinni kisiartaallusi ikiorlungalu uannit ikiorneqar­nissarsi akuerigassiuk. 16 Tassami Tessaluunikamiinninni ataasiaan­narnasi marloriarlusili pisariaqar­titannik nassippassinga. 17 Imaanngilaq tuneqqusaartunga, kissaatigiin­narparali nammineq iluanaarutis­sassinnik ajunngitsuliussasusi. 18 Pisariaqar­titakkali sipporlugit peqarpunga. Nassiussasi Epafroditusimit pigakkit naammat­torsuarnik peqalerpunga. Tunissutersi pilliutitut tipigissutut Guutip akuerisaatut iluarinar­titaatullu ippoq. 19 Guutima alutornartunik pisuussuterpas­suaqartup Kristusi Jiisusi aqqutigalugu akillusi pisariaqar­titassinnik tamanik pilersorumaarpaasi. 20 Guuterput Ataatarpullu qaqugorsuarmut kipisuitsumillu ataqqinarsisin­neqarli. Amen.

21 Illernartut Kristusimik Jiisusimik ataasioqateqartut tamaasa inuulluaq­qutikkisigit. Qatanngutit najortigisama inuulluaq­qutippaasi. 22 Illernartut tamarmik, pingaartumik kaasarip illussaarsuaniittut, inuulluaq­qutippaasi.

23 Qanortoq eqqortumik isiginnit­taaseqarnersi pissutigalugu Naalakkap Jiisusip Kristusip ajunngisaangaarfigilisi.