GALAATIAMIUNUT

1 Apustilimit Paulusimit – inunnit pinnani Jiisusimilli Kristusimit aamma Guutimit Ataatamit, Kristusimik toqusunit makititsisumit, toqqarneqarlunilu aallartitaasumit – 2 qatanngutinillu najortigisannit tamanit Galaatiami ilagiinnut:

3 Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi. 4 Guutitta Ataatattalu piumasaanut naapertuuttumik nalitsinni pissutsinit* ajortunit aniguisin­niarluta Kristusi ajortigut pillugit imminut tunniuppoq. 5 Guuti qaqugorsuarmut kipisuitsumillu ataqqinarsisin­neqarli. Amen.

6 Guuti Kristusip ajunngisaangaar­neratigut qaaqqusisoq taama sukkatigisumik tunullugu tusarliussaq alla nutaarsiassatut nuannersutut upperilerassiuk tupigusuppunga. 7 Imaanngilaq allanik nutaarsias­saqartoq nuannersunik. Inoqarporli Kristusi pillugu nutaarsiassat nuannersut allanngor­tinnerisigut ilissinnik paatsiveerutsitserusuttunik. 8 Nutaarsiassalli nuannersut ilissinnut oqaluus­sissutigisatta assigin­ngisaannik nutaarsiassatut nuannersutut oqaluus­sissutiginnittoq – uagutsinnut ilaagaluarluni inngiliugaluaruniluunniit – perloqqusaassaaq. 9 Oqareer­nitsitut oqaqqippunga: Nutaarsiassatut nuannersutut upperilik­kassinnit allaanerusumik oqaluussisoq perloqqusaali.

10 Inunnut Guutimul­luunniit akuereq­qusaarnerpunga? Inunnul­luunniit iluareq­qusaarnerpunga? Inunnut suli iluareq­qusaaraluaruma Kristusip inussiaatigis­sanngik­kaluarpaanga. 11 Qatanngutit, nalussan­ngilarsi nutaarsiassat nuannersut ilissinnut oqaluus­sissutigisakka inunnit aallaaveqan­ngitsut. 12 Inunnimmi pissarsiarinagillu ilinniar­tinneqan­ngilanga, Jiisusimilli Kristusimit uannut saqqummersin­neqarput.

13 Soorunami juutius­sutsimut ilaagallarama qanoq pissuseqartunga tusarparsi. Guutip ilagiivi peqqarniitsumik* malersorlugillu nungutin­niaraluarpakka. 14 Inuiaqatinnilu ukioqatinnit siuaasama ileqqutoqaannik pimoorus­sinerungaatsiarama juutius­sutsimi siumukar­nerungaatsiarpunga. 15 Guutili, anaanama illiaanit avissaar­titsisoq ajunngisaangaarninilu pissutigalugu uannik qaaqqusisoq, aalajangermat 16 Ernini uannut saqqummersin­niarlugu uangalu taanna pillugu nutaarsiassat nuannersut allamiunut oqaluus­sissutigis­sagikka inuk kinaluunniit isumasiun­ngilara. 17 Aamma uannit siulliullutik apustilin­ngortut orninniarlugit Jerusalemmimut majuanngilanga, kisianni Araabiamukarpunga tamatumalu kingorna Damaskusimut uterlunga.

18 Taava ukiut pingasut qaangiummata Keefassi* tikeraar­niarlugu Jerusalemmimut majuarpunga, ullunilu 15-ini najorpara. 19 Apustililli allat takunngilakka, Jaaku Naalakkap qatanngutaa eqqaassan­ngikkaanni. 20 Ilissinnut allakkanni eqqartukkama ilumoornerat Guutip uppernarsarsinnaavaa.

21 Tamatuma kingorna Syriap Kiliikiallu pigisaannut aallarpunga. 22 Judiiamili ilagiit Kristusimik ataasioqateqartut ilisarisiman­ngilaannga. 23 Taamaallaat una tusartarpaat: “Uagutsinnik malersuisimasup upperisaq nungutin­niarsimasani pillugu nutaarsiassat nuannersut maanna oqaluus­sissutigai.” 24 Taamaattumik uanga pissutigalunga Guuti unnersiutigilerpaat.

2 Ukiut 14-it tamatuma kingorna Barnaba Tittusilu ilagalugit Jerusalemmimut majuaqqippunga. 2 Saqqummersitaq pissutigalugu majuarpunga, aamma nutaarsiassat nuannersut allamiunut oqaluus­sissutigisakka pillugit saqqummiivigaakka. Arpannerali arpassimaneraluunniit asuliin­naanngitsoq qulakkeer­niarlugu angutit ataqqineqangaartut kisiisa saqqummiivigaakka. 3 Allaat Tittusi ilagisara grækeriugaluartoq kipineqaq­qullugu* peqquneqanngilaq. 4 Qatanngutaasuusaartulli, Kristusimik Jiisusimik ataasioqateqarnerput pissutigalugu Moorsisip inatsisaanut inussiaataan­nginnitsinnik alapernaarsuiniarlutik ilagiinnut malunnaarsaarlutik ilanngus­simasut, Tittusip kipineqan­nginnera qaqilerpaat. Taamaaliorpullu inussiaatin­ngortil­luinnar­niarluta, 5 ilumoortorli pillugu nutaarsiassat nuannersut aalajangiusimanias­sagassigit taakkununnga sivikitsuin­narmilluunniit* maleruutiin­nanngilagut.

6 Guutili inuit qallikkut qanoq ittuunerat tunngavigalugu isummerneq ajormat pingaaruteqarsorineqartut qanoq inissisimaf­feqarnerat uannut apeqqutaanngilaq. Ataqqineqangaartunit taakkunannga nutaanik paasitin­neqanngilanga. 7 Petrusilli kipineqarsimasunut oqaluus­sisussaaneratut kipineqarsiman­ngitsunut nutaarsiassanik nuannersunik oqaluus­sisussatut toqqarneqarsimanera paasivaat. 8 Tassami kipineqarsimasunut apustiliunissamut pissaanermik Petrusimut tunisisup uangattaaq allamiunut apustiliunissamut pissaanermik tunivaanga. 9 Paasivaallu uanga aamma taamatut ajunngisaangaarfigineqartunga. Jaakup, Keefassip* Johannesillu sukatut isigineqartut Barnaba uangalu suleqatigiin­nissamik – uagut allamiunukar­nissatsinnik namminnerlu kipineqarsimasunukar­nissaminnik – isumaqatigiis­suteqarfigaluta talerpimminnik assammip­paatigut. 10 Oqarfigiin­narpaatigut piitsut eqqaamas­sagigut, sapinngisaralu tamaat taamaalior­niarsarivunga.

11 Keefassili* Antiokiamut tikimmat kukkulluin­nartumik iliortarnera pillugu toqqaan­nartumik* naqqippara. 12 Angutimmi Jaakumit aallartitat takkutin­ngikkal­larmata allamiut nereqatigisarpai, takkummatali kipineqarsimasut qunugalugit allamiut nereqatigisarun­naarlugillu ilagisarun­naarpai. 13 Juutit allat ilumoor­tuusaaqatigilerpaat, allaallu Barnaba ilumoor­tuusaartunut maleruutiinnarpoq. 14 Ilumoortoq pillugu nutaarsiassanik nuannersunik maleruaan­ngitsut takugakkit kikkut tamaasa tusaatillugit Keefassi* oqarfigaara: “Juutiugaluarlutit juutisut inuunak allamiutut inuugavit qanoq-aamma allamiut juutit ileqquinik maleruaaq­qullugit pinngitsaalis­savigit?”

15 Uagut allamiut ajortuliortartut assiginagit inunnguuseralugu juutiusugut 16 nalunngilarput inuk inatsisinik maleruaanini pinnagu taamaallaalli Jiisusimut Kristusimut uppernini pissutigalugu naapertuil­luartuutitaasartoq. Kinaluunniit inatsisinik maleruaanermigut naapertuil­luartuutitaasin­naanngilaq, taamaattumik inatsisinik maleruaaneq pinnagu Kristusimulli upperneq pillugu naapertuil­luartuutitaanias­sagatta Kristusimut Jiisusimut upperpugut. 17 Kristusimit ikiorneqarluta naapertuil­luartuutitaanissatta anguniarnerani ajortulior­tartutut isigineqarsimagutta taava ajortulior­nissamut Kristusimit kajumis­saarneqarsimassaagut? Naamerluinnaq! 18 Ingutsersimasakka qarmaqqik­kaluarukkit inatsisinik unioqqutitsisuunera takutissavara. 19 Inatsisit tunngavigalugit inatsisinut tunngatillugu toquvunga Guuti pillugu inuusin­naaqqullunga. 20 Kristusi ilagalugu qisummut naalliutsitsiviliamut* kikiattuun­neqarpunga. Uanga inuujun­naarlunga Kristusi ataasioqatigalunga uanni inuuvoq. Aap, Guutip erneranut, uannik asannittumut uangalu pillunga imminut pilliutigisumut, uppernera malillugu timimi matumani maanna inuuvunga. 21 Guutip ajunngisaangaarnera ajattun­ngilara, inatsisinimmi maleruaanikkut naapertuil­luartun­ngortoqarsin­naappat Kristusi asulersuaq toqusimas­sagaluarpoq.

3 Galaatiamiunaa silatusaan­ngitsusi! Kikkut ajortumik sunneramisi? Jiisusimmi Kristusip qisummut naalliutsitsiviliamut* kikiattuun­neqarnerata isumaanik paasitin­neqarluarsimagaluarpusi. 2 Ima aperiniarpassi: Inatsisinik maleruaanikkut imaluunniit tusakkassinnik upperin­ninnikkut anersaamik tunineqarpisi? 3 Ilumut taama silatusaan­ngitsigivisi? Anersaaq illernartoq malilereeraluarlugu inuttut eqqarsar­taaseqarlusi anguniagarsi anguniarpisiuk?* 4 Asulersuaq naalliuuterpas­suaqarpisi? Naamik, taamaas­sorinngilara. 5 Anersaamik tunisarlusilu akorngassinni tupinnar­tuliortartoq inatsisinik maleruaanersi imaluunniit tusakkassinnik upperin­ninnersi pissutigalugu iliuuseqar­tarnerpa? 6 Aaperaat eqqarsaatigisiuk: “Jehovamut* upperami naapertuil­luartuutitaavoq.”

7 Nalunngilarsimi upperneq malillugu inuusut Aaperaap qitornarigai. 8 Guutip allamiunik uppertunik naapertuil­luartuutitsisus­saanera Allakkani Illernartuni siulittuutigineqarmat Aaperaat nutaarsiassanik nuannersunik ukuninnga tusarler­neqarpoq: “Illit aqqutigalutit Guutip inuiaqatigiit tamaasa ajunngisaarfigissavai.” 9 Taamaattumik upperneq malillugu inuusut Aaperaamut uppertumut ilanngullugit ajunngisaarfigineqarput.

10 Inatsisinik maleruaasin­naasorisut tamarmik perloqqusaapput, allassimavormi: “Moorsisip inatsisaanik allakkani imusaniittunik tamanik aalajangiusiman­ninngitsut maleruaan­ngitsullu tamarmik perloqqusaapput.” 11 “Naapertuil­luartoq uppernini pissutigalugu inuussammat” erseqqippoq kinaluunniit inatsisit pissutigalugit Guutip saavani naapertuil­luartuutitaasin­naanngitsoq. 12 Moorsisip inatsisai uppernermik tunngaveqan­ngillat, allassimavormi: “Kinaluunniit taakkuninnga maleruaasoq inuussaaq.” 13 Kristusip sinnerluta perloqquneqar­nermigut pisiaralutalu Moorsisip inatsisaasa perloqqus­sutaannit aniguisip­paatigut, allassimavormi: “Qisummik naalliutsitsiviliami* nivingasoq kinaluunniit perloqqusaavoq.” 14 Taama pisoqarpoq Guutip Aaperaamut ajunngisaarnera Kristusi Jiisusi aqqutigalugu inuiaqatigiinnut tamanut anngunniassammat taamaalillutalu uppernitsigut anersaaq neriorsuutigineqartoq piniassagatsigu.

15 Qatanngutit, matumani assersuusiussaanga: Isumaqatigiissut* allaat inuinnarmit atuutilersin­neqaraangat kimilluunniit atuukkun­naarsin­neqarsin­naananilu ilaneqarsinnaaneq ajorpoq. 16 Neriorsuutit Aaperaamut kinguaavinullu oqaatigineqarput. Allassimanngilaq “illit kinguaannut tamanut”, taamami allassimagaluarpat inuppassuit pineqas­sagaluarmata. Allassimavorli “illit kinguaannut”, tassa inummut ataatsimut, Kristusimut. 17 Aamma ima allaffigaassi: Moorsisip inatsisai, neriorsuutip kingorna ukiut 430-t qaangiummata atuutilersut, Guutip isumaqatigiis­sutaanik, tassa neriorsuutaanik, atuukkun­naarsitsin­ngillat. 18 Kingornus­sassammi inatsisinik tunngaveqarunik neriorsuummik tunngaveqarun­naassapput. Guutilli ajunngisaarluni neriorsuinikkut Aaperaamut tunniuppai.

19 Taavami sooq Moorsisip inatsisai tunniun­neqarpat? Kinguaassap neriorsor­neqartup tikiunnissaata tungaanut inatsisinik unioqqutitsinerit erseqqin­niassammata. Akunnermiliuttorlu ikiortigalugu inatsisit inngilinit ingerlateq­qinneqarput. 20 Illuatungiliuttoq kisimi neriorsuigaangat akunnermiliut­toqarneq ajorpoq, Guutilu kisimi neriorsuivoq. 21 Taava imaappa Moorsisip inatsisai Guutip neriorsuutaanut akerliusut? Naamerluinnaq! Inuimmi inatsisinik inuuneqalersitsisin­naasunik tunineqarsimagaluarunik inatsisinik maleruaanikkut naapertuil­luartun­ngorsin­naassagaluarput. 22 Neriorsuulli Jiisusimut Kristusimut uppernermik tunngavilik uppertunut atuutilersin­neqarsin­naaniassammat kikkut tamarmik ajortimit parnaarus­saaqqanerat Allakkanit Illernartunit ersersin­neqarpoq.

23 Uppernerulli tikiuttussap saqqummersin­neqarnissaata utaqqinerani inatsisinit illersor­neqarlutalu parnaarun­neqarpugut. 24 Uppernikkut naapertuil­luartuutitaanias­sagatta Moorsisip inatsisai taamaalillutik uagutsinnik perorsaasun­ngorput* Kristusimut siulersuisut. 25 Maannali upperneq tikiutereermat perorsaasoqarun­naarpugut.*

26 Tamassimi Kristusimut Jiisusimut upperassi Guutip qitornaraasi. 27 Tamassi Kristusimut morsutsitaasusi, Kristusi ativarsi. 28 Tamassi Kristusi Jiisusi ataasioqatigigassiuk juutiunersi grækeriunersiluunniit, inussiaataanersi inussiaataan­nginnersiluunniit, angutaanersi arnaanersiluunniit apeqqutaajun­naarpoq. 29 Kristusillu pigippasi Aaperaap kinguaaris­sallusilu Guutip neriorsuutaa naapertorlugu kingornus­sissaasi.

4 Kingornus­sisussaq sunut tamanut naalagaagaluarluni suli meeraaguni inussiamit allaanerus­sanngilaq, 2 ataataatali ulloq aalajangersagaa nalliutserlugu paarsisunit nakkutil­liisuutitanillu isumagineqassaaq. 3 Taamatuttaaq meeraagal­laratta inuit tunngaviusumik ileqquinut inussiaataavugut. 4 Piffissarititaasorli nalliummat Guutip ernini, arnamit erniusoq Moorsisillu inatsisaanik maleruaasoq, aallartippaa 5 inatsisinik maleruaasut akiliullugit iperagaaq­qullugit, taamaalilluta qitornavis­sianngorsin­naanias­sagatta.

6 Qitornaagassilu Guutip ernermi anersaava uummatitsinnut aallartippaa, taannalu ima suaartartarpoq: “Abba,* Ataata!” 7 Tassa inussiaajun­naarlutit qitornan­ngorputit. Guutillu qitornarigunisit aamma kingornus­sisissavaatit.

8 Guutili ilisiman­ngikkal­larassiuk guutiviun­ngitsunut inussiaataavusi. 9 Maannali Guuti ilisarisimalerassiuk, imaluunniit oqarluaan­narlanga Guutimit ilisarisimaneqalerassi, taava qanoq ilillusi inuit ileqqui atorsin­naanngitsut uterfigisin­naallugillu inussiaataaf­figeqqilerusus­sinnaavisigit? 10 Ingasat­tajaarlusi ullut, qaammatit, piffissat ukiullu nallius­sisarpasi. 11 Ernumas­sutigaara ikiorniarlusi asulersuaq ilungersorsimanerlunga.

12 Qatanngutit, uangattaaq ilissitut issimagaluarama uattut ittunngoq­qullusi kimigiiserfigaassi. Ajortumik pinngilassinga. 13 Nalunngilarsimi timikkut nappaateqarnera pissutigalugu nutaarsiassanik nuannersunik oqaluus­siffiginis­sassinnut periarfis­saqaleq­qaarsimasunga. 14 Napparsimaneralu ilissinnut misilin­neqaataagaluartoq nikaginangalu paqumigin­ngilassinga.* Guutilli inngiliatut imaluunniit Kristusitut Jiisusitut pillunga tikilluaq­quassinga. 15 Naak taamani nuannaarnersi? Qularin­ngilarami ajornan­ngikkaluarpat isisi peeriarlugit uannut tunnius­simassagaluarisi. 16 Ilumoortumik oqaluukkassi akerarilerassinga? 17 Inuit ilaat maleruutilersin­niarlusi ilungersorput, ajunngitsumilli siunertaqan­ngillat. Malitsigilerumallusi uannit avissaar­tinniarpaasi. 18 Soorunami ajunngitsumik siunertallit ilungersorlutik ilissinnik maleruutilersitsiniarnerat ajunngitsuuvoq, uannimmi taamaallaat najorneqaraangassi taama pineqar­tassannginnassi. 19 Qitornan­nguakka, Kristusitut pissuseqaler­nissassi* tungaanut ilissi pillusi arnatut ernisuttutut anniaqqit­tariaqarpunga. 20 Paatsiveqar­tinnginnassi nipiga allanngor­tillugu oqaluus­sinnaanias­sagassi massakkut najorusuk­kaluaqaassi.

21 Ilissi Moorsisip inatsisaanik maleruaarusuttusi, oqarfigisinga: Inatsisini allassimasut paasinngin­nassigit? 22 Assersuutigalugu allassimavoq Aaperaat marlunnik erneqartoq, aappaa kiffamit arnamit inuusuttumit erniuvoq aappaalu arnamit inussiaan­ngitsumit erniulluni. 23 Kiffamit arnamit inuusuttumit erniusoq pissusis­samisoortumik inunngorpoq aappaalu neriorsuut pissutigalugu inunngorluni. 24 Tamakku assersuutitut paasineqarsin­naapput. Arnat taakku isumaqatigiis­sutinut* marlunnut assersuutaapput. Taakkua ilaat Qaqqami Siinaajimi isumaqatigiis­sutigineqartoq inussiaataasussanik ernisarpoq, taannalu Haakaritut ippoq. 25 Haakari Araabiami qaqqamut Siinaajimut assersuutaavoq. Jerusalemmi qitornanilu inussiaataammata arnap taassuma Jerusalemmi maannakkut ittoq assigaa. 26 Jerusalemmili qilammiittoq inussiaataanngilaq, taannalu anaanagaarput.

27 Allassimavormi: “Illit arnaq ernisuitsoq, nuannaarit. Illit arnaq nallisitsineq ajortutit, qiimmat­tarlutit suaartarit. Arnammi ernisuitsup qitornai arnap ueqartup qitornaanit amerlanerupput.” 28 Ilissili qatanngutit, Iisaaq assigalugu neriorsuut pissutigalugu qitornaavusi. 29 Taamani pissusis­samisoortumik erniusup anersaaq pissutigalugu erniusumik malersuisar­neratut maanna pisoqarpoq. 30 Allakkanili Illernartuni qanoq allassimasoqarpa? “Kiffap arnap inuusuttup ernerata arnap inussiaataan­ngitsup ernera kingornus­seqatigis­sanngil­luinnarmagu kiffaq arnaq inuusuttoq erneralu qimaatikkit.” 31 Tassa, qatanngutit, kiffap arnap inuusuttup qitornarin­ngilaatigut, arnalli inussiaataan­ngitsup qitornaraatigut.

5 Taama inussiaan­nginneq nuannaarutiginias­sagatsigu Kristusip inussiaajun­naarsip­paatigut.* Taamaattumik aalajaagitsi, inussiatullu ersuutileq­qinniaqinasi.

2 Uanga, Paulusi, ima allaffigaassi: Kipineqar­tikkussi Kristusi iluaqutiginavian­ngilarsi. 3 Oqaatigeq­qissavaralu kipineqartittut kikkulluunniit Moorsisip inatsisaanik tamanik maleruaanissamik pisussaaf­feqarmata. 4 Inatsisinik maleruaanikkut naapertuil­luartuutitaaniartusi, Kristusimit avissaarsimavusi. Taassuma ajunngisaangaarnera tunupparsi. 5 Uagulli upperneq pissutigalugu naapertuil­luartuutitaanissaq neriorsuutigineqartoq anersaamit siulersor­neqarluta qilanaaralugu utaqqivarput. 6 Kristusimik Jiisusimik ataasioqateqartut kipineqarsimaneq kipineqarsiman­nginnerluunniit apeqqutaatin­ngilaat, asannit­tuliornikkulli upperneq pingaar­tippaat.

7 Arpalluaq­qaaraluarpusi. Ilinniar­titsissutit ilumoortut maleruar­tuarnis­saannut kia akornuseramisi? 8 Akornusiisut ilinniar­titsissutaat ilissinnik Qaaqqusisumit pinngilaq. 9 Seernarsaatimininnguup naqittagaq tamaat pullatsittarpaa. 10 Qularin­ngilara Naalakkamik ataasioqateqartusi allatut eqqarsalis­sanngitsusi. Ilissinnilli paatsiveerutsitsisoq kinaagaluarnersoq pisassamisut eqqartuun­neqassaaq. 11 Uangali, qatanngutit, kipineqarnissaq suli oqaluus­sissutigigaluarukku malersor­navianngik­kaluarpaannga, qisummillu naalliutsitsiviliaq* naakkius­sutaajun­naassagaluarpoq. 12 Neriuppunga ilissinnik qulalersitsiniaasut imminnut angutaas­susiiassasut!*

13 Qatanngutit, inussiaajun­naaqqullusi qaaqqusaavusi. Inussiaajun­naarnerli pileris­susipiluit piviusun­ngortin­niarnis­saannut atornagu asanninnikkut inussiatut kiffartorfigeqatigiin­nissamut atorsiuk. 14 Moorsisimmi inatsisai tamarmik inassummi ataatsimi naammas­sineqarput:* “Inoqatit imminut asanittut asassavat.” 15 Kisianni immissinnut saassut­tuarlusilu kimmaat­tuarniarussi immissinnut nungoratarsin­naavusi.

16 Allaffigaassili: Anersaamit siulersor­tittuarussi pileris­susipiluit piviusun­ngortin­ngilluin­nassavasi. 17 Pileris­susipiluimmi anersaamut akerliupput anersaarlu pileris­susipilunnut akerliulluni. Taakku imminnut akersuummata iliuusererusutasi iliuuserineq ajorpasi. 18 Anersaamillu siulersor­neqarussi inatsisinik maleruaasus­saatitaas­sanngilasi.

19 Pileris­susipiluit qanoq kinguneqartartut ersaril­luinnarpoq, taakkulu tassaapput atoqatigiinnikkut eqqunngitsuliorneq,* minguttuuneq, kanngut­taatsuliorneq,* 20 guutilianik pallorfiginninneq, anersaarsiorneq,* akeqqersimaarneq, assortuunnerit, sinnganeq, kamarujus­suarneq, isumaqatigiin­ngilluin­narnerit,* avissaar­tuunnerit, immikkoor­niarnerit, 21 usorunneq, erngunneq, ingasattumik* festerneq taamaaqataallu. Siusinnerusukkut oqarsimanittut maanna mianersoqquassi: Taama inuusut Guutip kunngeqarfianik kingornus­sisussaan­ngillat.

22 Anersaalli inerititai tassaapput asanninneq, nuannaarneq, eqqissineq, naammagittarneq, inussiar­nisaarneq, ajunngissuseq, upperneq, 23 saamaneq imminullu aqussinnaaneq. Tamakku taamaaqataallu inatsisitigut killilersor­neqanngillat. 24 Kristusillu Jiisusip pigisaasa timertik tamatumalu pileris­susipilui misigis­susipiluilu ilanngullugit qisummut naalliutsitsiviliamut kikiattuuppaat.

25 Anersaamit siulersor­neqarluta inuugatta anersaap siulersuineranut naapertuuttumik torersumik inuujuarta. 26 Namminis­sarsiornatalu unammil­lernatalu usorussan­ngilagut.

6 Qatanngutit, inuk nalusaminik kukkusumik toraagaqalerpat ilissi anersaamit siulersor­tittusi eqqortumik toraagaqaleq­qullugu saamasumik ikiornias­savarsi. Namminerli usserneqaqqunak mianersussaatit. 2 Nammaqatigiit­tuaritsi, taamaalior­nikkummi Kristusip inatsisai maleruas­sagassigit. 3 Kinaluunniimmi pingaaruteqan­ngikkaluarluni pingaaruteqarsorisoq imminut salloqittarpoq. 4 Kialuunniilli iliuutsini allat iliuusiinut sanilliunnagit misissussavai, taamaalioreerunilu iliuutsini nuannaarutigisin­naassavai. 5 Kialuunniimmi nammagassani* nammineq nammassavaa.

6 Kialuunniit Guutip oqaasianik ilinniar­tinneqartup* ilinniar­titsisini ajunngitsunik sunik tamanik avitseqatigiliuk.

7 Tammarniaqinasi: Guuti salloqit­tarneqarsin­naanngilaq. Kialuunniimmi naajartortussat siaruar­tikkani katersorumaarpai. 8 Pileris­susipiluni malillugit siaruar­terisup pileris­susipilummit mikiarneq* katersugariumaarpaa, anersaarli malillugu siaruar­terisup anersaamit inuuneq naassaan­ngitsoq katersugariumaarpaa. 9 Taamaattumik piffissan­ngorpat qasunermik sapilersiman­ngikkutta katersuisus­saagatta ajunngitsuliorneq qatsutis­sanngilarput. 10 Taamaattumik periarfis­saqaral­lartilluta* tamanut, pingaar­tumilli uppernikkut ilaquttatsinnut, ajunngitsuliorniarta.

11 Naqinnerit angisuut nammineq assannik ilissinnut allatakka takusigit.

12 Pinngitsaalillusi ilissinnik kipiserusuttut* Kristusip qisuk naalliutsitaaffia* pissutigalugu malersor­neqarusun­ngiinnarlutik inoqatiminnut iluareq­qusaarput. 13 Allaammi kipineqartittut Moorsisip inatsisaanik namminneq maleruaaneq ajorput, ilissili pillusi oqarataar­nissamut pissutis­saqarnias­sagamik kipineqar­tikkusuppaasi. 14 Qanortoq Naalakkatta Jiisusip Kristusip qisuk naalliutsitaaffia kisiat oqarataarutigisarilara. Guutimut kiffartun­ngitsut Kristusi pissutigalugu toqusutut* isigaakka taakkualu uangattaaq taama isigaannga. 15 Kipineqarneq kipineqan­nginnerluunniit apeqqutaanngilaq, nutaatulli pinngor­titaaneq pingaaruteqarpoq. 16 Qanortoq taama pissuseqar­nissamik malittarisassaq malillugu torersumik inuusut tamarmik, aap, Guutip Israalianut ilaasut, eqqissil­lutillu nallittor­neqarilik.

17 Jiisusip inussiaataatut timikkut uutarlunga nalunaaqutser­neqarsimagama maannamiit kialuunniit ajornar­torsior­tinngik­kilinga.

18 Qatanngutit, qanortoq eqqortumik isiginnit­taaseqarnersi pissutigalugu Naalakkatta Jiisusip Kristusip ajunngisaangaarfigilisi. Amen.