KORINTIMIUNUT ALLAKKAT AAPPAAT

1 Paulusimit, Guutip piumasaagut Kristusimit Jiisusimit apustilin­ngortin­neqartumit, qatanngutitsinnillu Timuutiusimit Korintimi Guutip ilagiivinut Akaarjamilu tamarmi illernartunut tamanut:

2 Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi.

3 Unnersiutigineqarli Guuti Naalakkatta Jiisusip Kristusip Ataataa, Ataataq qamannga pisumik nallittuisoq Guutilu sutigut tamatigut tuppallersaasoq. 4 Uagutsinnik tuppallersaasar­nermisut allat qanorluunniit misilin­neqartut* tuppallersarsin­naanias­sagatsigit misilin­neqarnitsinni* tamani uagutsinnik tuppallersaasarpoq.* 5 Kristusimik malinnit­tuugatta naalliuuterpas­suaqartarpugut Kristusilu aqqutigalugu tuppallersar­neqangaar­tarluta. 6 Tuppallersar­neqaqqullusi annaanneqaq­qullusilu misilin­neqartarpugut.* Tuppallersar­neqarnerpullu ilissi tuppallersar­neqaatigis­savarsi, tamannalu uagutsitut naalliuuteqarnermi pinertusaar­nissamut iluaqutigisarparsi. 7 Uagutsitut naalliuuteqar­nissinni tuppallersar­neqarumaartusi upperil­luinnarparput.

8 Qatanngutit, Aasiami* annikil­liortitaanerput pillugu ilisimatik­kusuppassi. Tatineqarnerput artornangaarmat toqunissarput qulariun­naaraluarparput. 9 Allaat misigivugut toqumut eqqartuun­neqarluta. Taama pisoqarpoq imminut tatiginata Guuti toqusunik makititsisartoq tatiginias­sagatsigu. 10 Navianar­torsiungaarnermit annaappaatigut annaakkumaarlutalu, neriuutigaarpullu annaattuas­sagaatigut. 11 Aamma qamannga pisumik qinnulluta ikiorsin­naavatsigut. Amerlasuunimmi qinnunneqarutta Guutip ikiussavaatigut, tamannalu pillugu amerlasuut Guutimut qujassapput.

12 Uku uagut tulluusimaarutigaagut: Inuit akornganni, pingaar­tumillu ilissi akorngassinni, illernartumik ilumoor­nermillu Guutimit pisumik inuunerput pissutigalugu minguitsumik nalunngeqatigin­nissuteqarnerput. Inuit ilisimassusiat naapertorlugu inuunata Guutip ajunngisaangaarnera naapertorlugu inuuvugut. 13 Atuariaan­naallugillu* paaseriaan­naasasi kisiisa ilissinnut allaatigaagut, neriuppungalu taakku paasilluassagisi. 14 Ilassimi paasisimavaat tulluusimaarutigisin­naalluta, soorlu uagut Naalakkatta Jiisusip ulluani tulluusimaarutigisin­naagissi.

15 Tamanna qularin­nginnakku nuannaaq­qinnias­sagassi* tikeraaq­qaarniaraluarpassi. 16 Makedoniamukarninni Makedoniamiillu uterninni Judiiamut qaniornias­sagassinga tikeraar­niaraluarpassi. 17 Pilersaarutikka pimooruk­kaluarpakka. Namminis­sarsiorlungami angeqqaariarlunga naaggaarneq ajorpunga. 18 Guutip tatiginar­neratut oqaatsigut tatiginarput. Angeriarluta naaggaar­navianngilagut. 19 Uanga, Silvaanusi* Timuutiusilu aqqutigaluta Guutip ernera, Jiisusi Kristusi, ilissinni oqaluus­sissutigineqartoq angeriarluni naaggaanngilaq, angerneralu allanngun­ngisaan­nassaaq. 20 Guutimmi neriorsuutai qanoq amerlatigisut apeqqutaatinnagu Jiisusikkut eqquutitin­neqarput.* Taamaattumik Guutimut qinunermi taassumuuna “amen”-eertarpugut taamaalillutalu Guuti ataqqinarsisit­tarlugu. 21 Uagulli ilissilu Kristusimit pigineqar­nitsinnik qularnaveeq­qusiisoq uagutsinnillu tanitsisoq tassaavoq Guuti. 22 Aamma naqissutiminik naqissuserpaatigut. Naqissut taanna tassaavoq uummatitsinni anersaaq illernartoq pisussanut qularnaveeq­qutaasoq.*

23 Aliasun­neruleqqunasi suli Korintimukan­ngilanga, tamannalu Guuti ilisiman­nittoralugu uppernarsarpara. 24 Uppernissinnut naalagaan­ngilagut, nuannaar­nissarsili suleqataaf­figaarput, uppernersimi pissutigalugu aalajaappusi.

2 Aalajangerpungami tikeraaq­qikkussi aliasutsin­niarnasi. 2 Tamassimi aliasutsikkussi kikkut qiimmas­sarsinnaas­sagaminnga? Aliasutsitama kisimik. 3 Taama allaffigaassi tikikkuma nuannaarutigisas­saraluakka pissutigalugit aliasutsin­neqaqqunanga. Qularin­ngilarami nuannaalis­sutigisara tamassi nuannaalis­sutigis­sagissi. 4 Taamani allaffigigassi annikil­liornermik uummatikkullu anniarnermik qullilingaar­tarpunga, imaanngitsoq aliasutsik­kusukkassi, kisianni qanoq asatigalusi paasitik­kusukkassi.

5 Aliasutsitsisoqarsimappat uanga aliasutsin­neqanngilanga, ingasaas­sinianngik­kaluarlungali oqarsin­naavunga tamassi arlaatigut aliasutsin­neqartusi. 6 Amerlanersassi angummik taassuminnga naqqiinerat naammappoq. 7 Aliasorujus­suarnermik sapilersutut misigileqqunagu maanna ilumoorlusi isumakkeerfigalugulu tuppallersas­savarsi. 8 Taamaattumik asannin­nissinnik uppernarsaavigeq­qullugu kajumis­saarpassi. 9 Aamma taamani allaffigaassi sutigut tamatigut naalassanersusi paaserusukkakku. 10 Sunaluunniit pillugu isumakkeerfigisarsi uangattaaq isumakkeerfigaara. Aap, sunaluunniit pillugu isumakkeerfigisas­saqarsimaguma taamaaliorpunga ilissi pillusi, tamannalu pillugu Kristusi ilisiman­nittuuvoq. 11 Saatanimit terlinganeer­neqassan­ngikkutta* tamanna pingaaruteqarpoq. Pilersaarutaami* ilisimavagut.

12 Kristusi pillugu nutaarsiassat nuannersut oqaluus­sissutiginiarlugit Troassimut tikikkama Naalakkamullu kiffartornermi matumik mappiun­neqarama 13 Tittusi qatanngutiga naninnginnakku ernumajuarpunga. Taamaattumik ilinniartitat tassaniittut inuulluaq­qoriarlugit Makedoniamut aallarpunga.

14 Guutili qujanarsili ajugaasutut ingerlaarnermi Kristusimik ataasioqateqar­tilluta siulersor­tuarmatigut namminerlu pilluni paasisimasaqarneq tipigis­saatitut uagut aqqutigaluta sumi tamani siammar­tertarmagu. 15 Kristusi oqaluus­sissutigigaangatsigu Guutimut tipigis­saatitut ittarpugut. Tipigissaallu taanna annaanneqar­tussanut suujunnaarsin­neqartus­sanullu annguttarpoq. 16 Kingullertut eqqaaneqartunut toqusunnippoq toqumik kinguneqar­tussaasoq, siullertulli eqqaaneqartunut inuunersunnippoq inuunermik kinguneqar­tussaasoq. Kikkut taama kiffartor­nissamut piukkunnarpat? 17 Uagut, tassami inuppassuit pisarnerattut Guutip oqaasia niuerniutiginagu* Guutimit aallartitaasutut ilumuuilluta oqaluttaratta. Aap, Guuti ilisiman­nittoralugu Kristusi ataasioqatigaarput.

3 Immitsinnut ilisariteq­qittariaqarpugut? Imaluunniit inuit ilaasa pisarnerattut ilissinnut ilissin­niilluunniit allakkat ilisarititsissutit pisariaqar­tippagut? 2 Tassaavusi uagutsinnit allakkat uummatitsinni allanneqarsimasut inunnillu tamanit ilisimaneqarlutillu atuarneqartut. 3 Ersarippormi tassaasusi Kristusimit allakkat uagutsinnit kiffaasunit allanneqartut. Pilikkimik allanneqarnasi Guutip uumassuseqartup anersaavanik allanneqarpusi, allaffis­sianullu ujaqqanut allanneqarnasi uummatinut allanneqarpusi.

4 Kristusi pissutigalugu Guutimit tamanna pillugu qularun­naarsin­neqarpugut. 5 Taama suliaqar­nissamut imminut piukkun­narsarsiman­ngilagut, Guutimuna piukkun­narsisik­kaatigut. 6 Isumaqatigiissut* nutaaq pillugu kiffartor­nissamut piukkun­narsisip­paatigut. Inatsisit allanneqarsimasut pinnagit anersaarli pillugu kiffartorpugut. Inatsisimmi allassimasut toqumik pillagas­sanngor­titsisarput, anersaarli inuuneqalersitsisarpoq.

7 Inatsisit toqumik kinguneqartartut ujaqqanullu kigartorlugit allanneqarsimasut alutornartumik tunniun­neqarmata Moorsisip kiinaa qaamaneqalerpoq. Alutornas­suserlu tamanna peerneqar­tussaasoq pissutigalugu Israalip qitornaasa taassuma kiinaa isigisin­naajunnaarmassuk 8 taava sooq anersaaq suli alutornar­nerusumik tunniun­neqassanngila? 9 Inatsisit toqumik kinguneqartartut alutornarpata taava kiffartorneq naapertuil­luarnermik kinguneqartartoq alutornar­nerungaassaaq! 10 Aap, alutornar­tuusimasoq alutornar­nerusumit alutornas­suseerutitin­neqarpoq. 11 Peerneqartussaq alutornartumik atuutilersin­neqarpat ataannartussaq suli alutornar­nerusimassaaq!

12 Taama ittumik neriugisaqaratta sapiilluta oqalussin­naallutalu 13 Moorsisi, Israalip qitornai peerneqartussap qanoq kinguneqar­tussaaneranik takunneq­qunagit kiinnaminut assiaqusiisoq, ilaartariaqan­ngilarput. 14 Taakkuli isummamikkut paasinnis­sinnaan­ngillat. Ullormi manna tikillugu isumaqatigiis­sutitoqaq* atuarneqaraangat assiaqut taanna peerneqarneq ajorpoq, Kristusimi taamaallaat ikiortigalugu peerneqarsin­naammat. 15 Aap, ulloq manna tikillugu Moorsisimit allakkat atuarneqaraangata uummataat assiaquteqartarput. 16 Jehovamulli* saattup assiaqutaa peerneqartarpoq. 17 Jehova Anersaajuvoq, Jehovallu anersaavanik peqartut inussiaataan­ngillat. 18 Tamattalu kiinnatsinnut assiaquteqan­ngitsugut Jehovap alutornassusia tarrarsuutitut ersersit­tarparput. Taamaalior­nitsinni assigilerlugu allanngor­titaavugut alutornas­susialu suli annerusumik ersersis­sinnaalerlugu. Jehovap, Anersaap,* taamaaliorsin­naatippaatigut.

4 Taamaattumik nallittor­neqarluta taama kiffartor­nissamik suliassin­neqarsimagatta tunniutiin­nanngilagut. 2 Kanngunartulli isertorlunilu iliuuserineqartut itigartippagut. Peqquserlunneq ajorlutalu Guutip oqaasia allanngortinneq ajorparput. Ilumoortorli ilisimaneqalersit­tarparput, taamaalillutalu Guutip isaani tamanut maligas­saalluarpugut inuillu nalunngeqatigin­nissutaannik killiiniar­tarluta. 3 Nutaarsiassat nuannersut oqaluus­sissutigisagut assiaqummik isertor­neqarsimappata taava suujunnaarsitaasussanut taamaallaat isertorsimapput. 4 Kristusi, Guutimut assingusoq, pillugu nutaarsiassat nuannersut qaamanerannit uppersuseqan­ngitsut qinngor­neqanngin­niassammata nalitsinni guutiusup isumaat tappiil­lisippai. 5 Immitsinnimmi oqaluus­sissutiginata Jiisusi Kristusi Naalagaasoq Jiisusilu pillugu ilissinnut inussiaataanerput oqaluus­sissutigaagut. 6 Guutimi oqarpoq: “Taartumit qaamaneq qinngorli.” Guutillu uummatigut imminik paasisimasaqarnermik qaammarsar­niarlugit Kristusip kiinaanik qinngorpai.

7 Pissaanerli nalingin­naanngitsoq uagutsin­neernani Guutimeersuusoq ersarin­niassammat erlinnartuut taanna immersakkani marraasuniittoq pigaarput. 8 Assut sutigut tamatigut tatineqar­tarpugut, imaanngilarli soriarsin­naanngitsugut. Qanoq iliussanerluta nalorniler­tarpugut, imaanngilarli periarfis­saqanngil­luinnartugut.* 9 Malersor­neqartarpugut, immineer­neqarnatali. Uppisin­neqartarpugut, suujunnaarsitaanatali. 10 Jiisusitut inuusugut takuneqarsin­naaniassammat naalliutsitaaneratut toqussutaasin­naasumik pineqar­tarnerput naammagalugu atortarparput. 11 Jiisusip inuunera timitsinni toqusus­saasumi takuneqarsin­naaniassammat Jiisusi pillugu toqu ajapersimajuarparput. 12 Tassa toqu uagutsinni sulivoq inuunerli ilissinni sulilluni.

13 Uppernerup anersaava ima allaatigineqartoq pigigatsigu: “Upperama oqaluppunga”, uaguttaaq upperpugut taamaat­tumillu oqalulluta. 14 Nalunngilarpummi Jiisusimik makititsisup Jiisusi ilaginias­sagatsigu toqusunit makitis­sagaatigut ilissinnullu ilagitilluta sassartis­sagaatigut. 15 Inuit suli amerlanerusut Guutimit ajunngisaangaarfigineqar­niassammata tamakku tamarmik ilissi pillusi pipput. Tamanna pissutigalugu inuit suli amerlanerusut Guuti qutsavigissavaat taamaalil­lutillu ataqqinarsisis­sallugu.

16 Taamaattumik tunniutiin­nanngilagut. Timerput nungullariar­toraluartoq inuttut qamuuna pissuserput ullut tamaasa nutaanngorsartarpoq. 17 Annikil­liorneq* sivikillunilu annikik­kaluartoq suli annertunerujar­tuinnartumik naassaan­ngitsumillu akissarsisin­neqarnermik kinguneqassaaq. 18 Takuneqarsinnaasut pinnagit takuneqarsin­naanngitsut isigiuarpagut. Takuneqarsin­naasummi atuukkal­laannarput takuneqarsin­naanngitsulli naassaan­ngitsumik atuutis­sallutik.

5 Nalunngilarpummi nunarsuarmi illorput, tupeq una, ingutser­neqassappat* Guutip illumik, assannik sanaajun­ngitsumik, atajuar­tussamik qilammi tunissagaatigut. 2 Illorput* qilammeersoq assut aterusuk­katsigu nunarsuarmi najukkatsinni maani anersaarulut­tarpugut. 3 Atinissaanummi piffissan­ngorpat tamaqan­nginnerput qaangiutissaaq. 4 Aap, tupermi matumaniitilluta tupeq peerusun­nginnatsigu nikallungalluta anersaarulut­tarpugut, aappaatigulli timi toqusussaasoq inuunermit nungutin­neqarniassammat aappaa aterusupparput. 5 Tamatumun­ngarpiaq Guutip, anersaamik pisussanut qularnaveeq­qutitut* tunniussisup, piareersarpaatigut.

6 Taamaattumik timimi angerlarsimaf­feqarnitsinni Naalakkamit ungasinnerput nalunngik­kaluarlugu isumalluar­tuarpugut. 7 Takusagummi malinnagit upperisarput malillugu inuuvugut. 8 Isumalluarlutalu timerput qimallugu Naalakkami angerlarsimaf­feqaler­nissarput orniginar­tinneruarput. 9 Taamaattumik taassumani angerlarsimaf­feqarnerput taassuman­ngaluunniit ungasinnerput apeqqutaatinnagu taassumannga iluarisaanissarput anguniagaraarput. 10 Tamattami Kristusip eqqartuus­sivianut sassartin­neqartus­saavugut inuttullu timeqar­nitsinni iliuuserisimasagut, ajunngitsut ajortul­luunniit, naapertorlugit akissarsisin­neqassalluta.

11 Taamaattumik Naalakkamik mianerinninneq qanoq isumaqartoq nalunngin­natsigu inuit qularun­naarsin­niartuarpagut, Guutimilli ilisimaneqarluarpugut. Neriuppungali nalunngeqatigin­nissutersi iluaqutigalugu inuttut qanoq ittuunersugut paasisimagissi. 12 Immitsinnut ilisariteq­qinngilagut, uummammiittulli pinnagit qallikkut ittunik tulluusimaarutiginnittut akisinnaanias­sagassigit uagutsinnik tulluusimaarutigin­neqqullusi taama allalluta kajumis­saarpassi. 13 Silanngajaarlutami iliuuseqarsimagutta taava Guuti pillugu taamaaliorpugut, isumakkut peqqissuulluta iliuuseqarsimagutta taava ilissi pillusi taamaaliorpugut. 14 Kristusimmi asanninnera kajumis­sissutigaarput, unami paasigatsigu: Inuk ataaseq kikkut tamaasa pillugit toquvoq, kikkummi tamarmik toqoreersimammata. 15 Kikkut tamaasa pillugit toquvoq inuusut imminnik pillutik inuujun­naaqqullugit imminnilli toqqutiginnittoq toqusunillu makititaasoq pillugu inooqqullugit.

16 Maannamiit takusagut naapertorlugit inuit isummerfigineq ajorpagut. Allaat takusagut naapertorlugit Kristusi isummerfigisimagutsigu maanna taama isummerfigiun­naarparput. 17 Taamaattumik Kristusimik ataasioqateqartoq pinngor­titaavoq nutaaq. Nutaanngitsut peerupput nutaallu pinngorlutik. 18 Suulli tamarmik Guutimit, Kristusi aqqutigalugu uagutsinnik saammaas­sisumit saammaas­sinerlu pillugu oqaluus­sinermik uagutsinnik suliassiisumit, pipput. 19 Aap, Guutip Kristusi aqqutigalugu inuit saammaappai unioqqutitsinerinillu pisuutinnagit, aamma saammaan­neqarnermik tusarliussaq pillugu oqaluus­sinermik suliassip­paatigut.

20 Taamaattumik Kristusi sinnerlugu aallartitaavugut, Guuti aqqutigaluta kajumis­saarisutut ippoq. Kristusip sinniisuatut ima kimigiiserpugut: “Guutimut saammaan­nartigitsi.” 21 Guutip ajortuliun­ngisaan­narsimasoq ajortuliagut pillugit pilliutitut tunniuppaa taanna aqqutigalugu Guutimit naapertuil­luartuutitaasin­naalernias­sagatta.

6 Guutimut suleqataasutut kajumis­saarusuppassi Guutip ajunngisaangaarnera akuereriarlugu siunertaa paatsooqqunagu. 2 Imami oqarpoq: “Piffissami akuerisaaf­figisin­naasassinni tusaavassi ullormilu aniguisitsiffimmi ikiorlusi.” Maanna piffissaq immikkut ittoq akuerisaaf­figineqarsinnaasoq nalliuppoq! Ulloq manna tassaavoq aniguisitsiffik!

3 Kiffartornerput isornar­torsior­neqaqqunagu kimulluunniit sutigut tamatigut naakkius­sutaanngilagut. 4 Sutigulli tamatigut Guutip kiffaasut ilisaritit­tarpugut pinertusaangaarnikkut, annikil­liornikkut, pissakil­liornikkut, ajornar­torsiuteqarnikkut, 5 unatagaanikkut, parnaarus­saanikkut saassun­neqarnikkullu. Tamaviaarluta sulisarpugut, unnuakkut sinissaarut­tarpugut ilaannikkullu nerisas­saaleqisarluta. 6 Ilisarnaatigaagut minguitsumik inuuneqarneq, paasisimasaqarneq, naammagittarneq, inussiar­nisaarneq, illernartumik anersaaqarneq, ilumoor­tuusaan­ngitsumik asanninneq, 7 ilumoortumik oqalunneq, Guutip pissaanera, naapertuil­luassutsip sakkuinik talerperlikkut* saamerlikkullu* tigumiaqarneq, 8 ataqqineqarneq nikagineqarnerlu, isornar­torsior­neqarneq nersualaar­neqarnerlu. Sallutuutut isigineqaraluarluta ilumoortumik oqaluttarpugut, 9 ilisarisimaneqan­ngitsutut isigineqaraluarluta akuerisaavugut, toqusutut* isigineqaraluarluta uumavugut, pillakkatut* isigineqaraluarluta toqunneqan­ngilagut, 10 aliasuttutut isigineqaraluarluta nuannaar­tuarpugut, piitsutut isigineqaraluarluta amerlasuunik pisuunngor­titsivugut suuteqan­ngitsutullu isigineqaraluarluta sunik tamanik pigisaqarluta.

11 Korintimiut, toqqaan­nartumik oqaluullusilu* uummaterput tamaat ilissi pillusi ammarparput. 12 Killeqan­ngitsumik asavassi,* ilissili killilimmik asavatsigut. 13 Taamaattumik qitornarisutut oqaluuppassi: Akilluta uummatersi tamaat ammarsiuk.*

14 Uppertuun­ngitsut ersoqatigis­sanngilasi,* ersoqatigiin­nissassinnummi tulluan­ngilasi. Naapertuil­luarneq inatsisinik unioqqutitsisarnermut qanoq attuumas­suteqarami? Imaluunniit qaamasoq taartorlu qanoq assigiis­suteqaramik? 15 Aamma Kristusi Beliaarilu* isumaqatigiis­sinnaagamik? Imaluunniit uppertoq* uppertuun­ngitsorlu qanoq assigiis­suteqaramik? 16 Guutiliat guutisiorfimmi Guutimut pigititami sussagamik? Uagummi tassaavugut guutisiorfik Guutip uumassuseqartup pigisaa, soorlu Guuti oqartoq: “Akornganni najugaqassaanga akorngannilu pisussallunga, Guutigis­savaannga taakkulu innuttaris­savakka.” 17 “ ‘Taamaattumik akorngannit anigitsi qimallugillu,’ oqarpoq Jehova, ‘minguttoorlu attuuajun­naarlugu’ ”, “ ‘taava akueris­savassi.’ ” 18 “ ‘Ilissinnullu ataatan­ngussaanga, ilissilu tassaalissaasi ernikka panikkalu,’ oqarpoq Jehova, Killeqan­ngitsumik Pissaanilik.”

7 Taamaattumik, asasakka, taama neriorsor­neqaratta Guutimik mianerin­ninnitsinni illernar­nerulerumalluta timitsinnik isumatsinnillu* mingutsitsisartut suulluunniit piiarlugit minguiarniarta.

2 Uummatissinni inissaqar­titsigut. Kinaluunniit eqqunngitsumik pinngilarput, ajoqusin­ngilarput iluanaar­niarfiginagulu. 3 Assuariniarlusi taama oqanngilanga. Oqareerpungami inuugutta toqugut­taluunniit uummatitsin­niittusi. 4 Toqqaan­nartumik oqaluffigaassi. Assut tulluusimaarutigaassi. Tuppallersar­neqangaarpunga, misilin­neqarnitsinni tamani nuannaangaarpunga.

5 Makedoniamut tikikkatta eqqissial­lanngilagut. Sutigut tamatigut misilin­neqartuarpugut – avataanit akerlilersor­neqarpugut qamanngalu pisumik ernumalluta. 6 Guutilli, nikallungasunik tuppallersaasartup, Tittusip najuunneratigut tuppallersarpaatigut. 7 Najuunnera tuppallersaatigiin­narnagu aamma ilissinnit qiimmas­sarneqarsimanera tuppallersaatigaarput. Oqaluttuarpoq kipilerfigigissinga, aliasungaartusi qamanngalu pisumik isumakuluutigigissinga. Tamannalu nuannaar­nerulis­sutigaara.

8 Allaffiginissigut aliasutsilernersi peqqissimis­sutigin­ngilara. Aallaqqaammut peqqissimis­sutigaara, (allakkakkami sivikitsuin­naagaluartumik aliasuutigilerassigit), 9 maanna nuannaarpunga, imaanngitsoq aliasulerassi kisianni peqqissiminermik kinguneqartumik aliasulerassi. Guutimmi iluarisaatut aliasuppusi – tassa uagut pissutaalluta ajoqusin­ngilasi. 10 Guutimmi iluarisaatut aliasunneq aniguisitaanermik kinguneqartumik peqqissimisitsisarpoq, tamannalu iluaqutaajuaannarpoq. Inuilli amerlanerit pisarnerattut aliasunneq toqumik kinguneqartarpoq. 11 Guutip iluarisaatut aliasulerassi eqqortulior­niarlusi iliuuseqangaalerpusi. Aap, imminut minguiarpusi, aap, aalassatsin­neqarpusi, aap, Guutimik mianerin­nilerpusi, aap, ilumoorlusi pimoorus­sillusilu eqqunngitsuliorneq aaqqikkusupparsi. Tamatumunnga tunngatillugu sutigut tamatigut minguitsuunersi* takutipparsi. 12 Eqqunngitsuliortoq eqqunngitsuliorfigineqartorlu pissutigalugit allaffigin­ngilassi. Allaffigaassili naalanniarluta iliuuseqangaarnersi Guutip saavani ersarin­niassammat. 13 Tamanna pissutigalugu tuppallersar­neqarpugut.

Tuppallersar­neqarnittali saniatigut Tittusip tamassinnit qiimmas­sarneqarnini pissutigalugu nuannaarnera suli nuannaar­nerulis­sutigaarput. 14 Oqaluttuupparami tulluusimaarutigalusi, oqaatsikkalu pillugit kanngutsisitaan­ngilanga. Ilissinnut oqaaserisatta ilumoor­nerattut nersualaarlusi Tittusimut oqaatigisagut ilumoorput. 15 Aamma tamassi naalannersi, ataqqin­ningaarlusi tikilluaq­qusinersi, eqqaagaangamiuk suli annerusumik qamannga pisumik misigis­suseqarfigiler­tarpaasi. 16 Sutigut tamatigut tatigisin­naagassi nuannaarpunga.*

8 Qatanngutit, Guutip Makedoniami ilagiinnut ajunngisaangaarnera pillugu maanna paasitik­kusuppassi. 2 Misilin­neqangaarnerup erloqinerullu nalaani piitsuungaaraluarlutik nuannaarlutik tunissuteqarput, tamannalu qanoq tukkortiginerannik ersersitsivoq. 3 Aningaasaatitimmi naapertorlugit, aap, uppernarsaavunga, sinnerlugit tunissuteqarput. 4 Nammineq kajumis­sutsiminnik tunissuteqarumallutik, illernartunik ikiuiniarnermi peqataajumallutik, kimigiiser­tuarput. 5 Neriuutigisatsitullu iliuinnarnatik siullertut Naalakkamut Guutillu piumasaanut naapertuuttumik uagutsinnut qamannga pisumik kiffartorput. 6 Taamaattumik Tittusi kajumis­saarparput asannittumik katersuiniarneq ilissinni aallartitani naammas­seqqullugu. 7 Sutigut tamatigut – uppernermik, oqallorinnermik, paasisimasaqarnermik, ilumoornermik uagutsinnillu asaneqarnermik – sinnilis­suarmik peqarassi qanortoq aamma ilissi tukkorlusi asannittumik katersuiniarnermut tunissuteqarisi.

8 Taama allakkama peqqunngilassi, allalli kajumillutik tamaviaarnerat pillugu paasitik­kusullusilu asanninnersi qanoq ilumoor­tigisoq takorusuppara. 9 Nalunngilarsimi Naalagarput Jiisusi Kristusi qanoq ajunngisaangaar­tigisoq, pisuujugaluarluni ilissi pillusi piitsun­ngortoq piitsuunermigut pisuunngoq­qullusi.

10 Tamannalu pillugu ima isumaqarpunga: Katersuiniarneq naammas­sigussiuk nammineq iluaqutigis­savarsi, katersuiniarnermi siorna aallartiin­narnagu takutipparsi kajumis­suseqarlusi. 11 Taamaattumik qanoq aningaasaateqar­tiginersi naapertorlugu katersuiniaq­qaalernissitut kajumis­suseqarlusi suliaq naammas­siniarsiuk. 12 Guutip piumasarigamiuk piginngisat naapertornagit pigisalli naapertorlugit tunissuteqar­toqartassasoq kajumilluni tunissuteqarneq pingaartumik iluaraa. 13 Kissaatigin­ngilara allat oqilisaateriarlugit ilissinnik artorsar­titsinissara. 14 Naligiis­saarinikkulli maanna sinneqar­toorutisi pisariaqar­titaannik matussusiisin­naapput, amigaateqalis­sagussilu sinneqar­toorutiminnik tunisin­naavaasi. Taamaalilluni naligiis­saarisoqassaaq. 15 Soorlu allassimasoq: “Peqangaartup pigisai amerlaval­laalinngillat pissakitsullu pigisai ikippal­laarnatik.”

16 Guuti qutsavigaarput Tittusi uagutsitut ilissi pillusi qamannga pisumik misigis­suseqar­timmagu. 17 Kajumis­saarinitsitut iliorniarpoq, piumangaaramili nammineq kajumis­sutsiminik ilissin­nukarniarpoq. 18 Qatanngulli angut nutaarsiassanik nuannersunik oqaluus­sissutigin­ninnini pillugu ilagiinni tamani nersualaar­neqartoq Tittusimut ilagitillugu aallartipparput. 19 Tamatumalu saniatigut asannillusi katersukkasi, Naalakkamut ataqqinaataasut ikiuerusun­nissinnullu takussutissaasut, tunniuk­kiartulerutsigit angalaqatis­satsitut ilagiinnit toqqagaavoq. 20 Taamaalilluta tunissuterpassuassi tunniun­nerannut tunngatillugu kimilluunniit unnerluutigineqas­sanngilagut. 21 ‘Jehovammi isaaniin­naanngitsoq kisianni aamma inuit isaanni sutigut tamatigut unneqqarin­niartarpugut.’

22 Taamatuttaaq qatannguterput angut assigiin­ngitsorpas­suarnik misilillugu suliassik­kaangatsigu sapinngisamik pitsaanerpaamik naammas­sinninniartartoq aallartipparput. Tatigeqigamisili suli tamaviaarusun­neruvoq. 23 Tittusi pillugu nalornisoqarpat ilissinnut pitsaanerpaaq pillugu ikiortigaara* suleqatigalugulu. Qatanngutillu allat pillugit nalornisoqarpat Kristusimut ataqqinaataasumik ilagiinnit aallartitaapput.* 24 Taamaattumik asannit­tuliorfigisigit, ilagiinnullu takutikkisiuk sooq tulluusimaarutigigissi.

9 Illernartunik ikiuiniarnermut tunngatillugu allaffiginissarsi pisariaqarpal­laanngik­kaluarpoq. 2 Nalunngilarami ikiuerusuttusi, ilissilu Akaarjamiittusi ukiumi ataatsimi piareersimasimanersi Makedoniamiunut tulluusimaarlunga oqaluttuarisarpara, ikiuerusungaar­nersilu taakkua amerlanersaasa kajumis­sissutigaat. 3 Qatanngutilli angutit ilissinnut aallartippakka ilissi pillusi tulluusimaarluta oqaluttuar­tarnerput asuliin­naanngin­niassammat oqarnittullu piareersimanias­sagassi. 4 Makedoniamiummi tikeqatigis­sagaluarpannga piareersiman­ngitsusilu paasigaluarunikku ilissinnik tatigin­ninnerput pillugu kanngutsissaagut, aamma ilissi kanngutsissaasi. 5 Taamaattumik qatanngutit sioqqullunga aallaqqullugit kajumis­saartariaqarsoraakka tukkorlusi tunissutiginiakkasi piareersarsin­naanias­sammatigit. Taamaalillusi pinngitsaalineqarnasi tukkorlusi tunissuteqarsin­naassaasi.

6 Tamatumunngali tunngatillugu naajartor­tussanik ikittunik siaruar­terisoq aamma ikittunik katersuiumaarpoq, naammat­torsuarnillu siaruar­terisoq aamma naammat­torsuarnik katersuiumaarpoq. 7 Kinaluunniit pinaannani* pinngitsaalineqar­naniluunniit kisianni uummammigut aalajangersimanermisut iliussaaq, Guutimmi nuannaarluni tunisisoq asammagu.

8 Tamatuma saniatigut pisariaqartunik amigaateqan­ngisaan­narnias­sagassi sutigullu tamatigut ajunngitsuliorsin­naanias­sagassi Guutip ajunngisaangaarfigisin­naavaasi. 9 (Soorlu allassimasoq: “Tunissuterpas­suaqarpoq.* Piitsunut tunissuteqarpoq. Qaqugorsuarmut naapertuil­luartuuvoq.” 10 Guutip naajartor­tussanik nerisas­sanillu iffianik-qaqortunik* siaruar­terisumut naammat­torsuarmik pilersuisartup siaruar­tigassassinnik pilersus­savaasi siaruar­tigassasilu amerlisingaas­sallugit, naapertuil­luarnersilu pissutigalugu katersugassasi amerlisingaarumaarpai). 11 Sutigut tamatigut tukkortooq­qullusi sutigut tamatigut pisuunngor­tinneqarpusi, tunissutisilu tunniuk­kutsigit inuit Guuti qutsavigissavaat. 12 Ikiuiniarluta tamanut kiffartornerput pissutigalugu illernartut pisariaqar­titaminnik isumagil­luarneqaan­naratik aamma inuppassuit Guuti qutsavigissavaat. 13 Taama ikiuiniar­nissigut inuttut qanoq ittuunersi takutipparsi. Kristusilu pillugu nutaarsiassat nuannersut, tamanut oqaluus­sissutigisasi, kajumillusi naalakkassigit tukkorlusilu illernartunut inunnullu tamanut tunissuteqarassi Guuti unnersiutigissavaat. 14 Qamanngalu pisumik qinnukkaangamisi Guutimit asseqan­ngitsumik ajunngisaangaarfigineqarnersi pissutigalugu ilissinnik asanninnertik eqqaasassavaat.

15 Guuti qutsavigaarput nallernis­saqanngitsumik tunimmatigut.

10 Uanga, Paulusi, akorngas­sinniik­kaangama sanngiitsutut najunngik­kaangassilu sapiitsutut isigineqar­taraluarlunga Kristusitut saamallunga inussiar­nisaarlungalu kajumis­saarpassi. 2 Neriuppunga tikikkuma inuttut isiginnit­taaseqar­nerarluta uagutsinnik eqqartuisartut sukannersumik iliuuseqarfigisariaqas­sanagit. 3 Inuugaluarluta inuttut sorsunneq ajorpugut. 4 Sakkummi sorsunnitsinni atukkagut inunneersuunatik Guutimeersuupput sakkortuut pallittaalisalianik qajannaatsunik nungutitsisinnaasut. 5 Tunngavilersuinerimmi akornutaasullu Guuti pillugu paasisimasaqarnermut akerliusut suulluunniit nungutit­tarpagut, eqqarsaatillu suulluunniit Kristusimut naalattun­ngortin­niarlugit tigusarisarpagut. 6 Naalalluin­narnersilu takutereerussiuk naalanngitsut tamaasa pillarnis­saannut piareersimavugut.

7 Qallikkut ittut naapertorlugit isummer­tarpusi. Kristusimit pigineqar­nerminik qularin­ninngitsup eqqarsaatigeq­qissavaa Kristusimit pigineqar­nermisut uaguttaaq pigineqartugut. 8 Ilissinnik ineriar­tortitsinissamut nungutitsin­nginnis­samullu Naalakkamit piginnaatin­neqarnerput allaat usorsisimaarutigival­laassagaluarukku kanngutsan­navianngilanga. 9 Imaanngilaq allakkakkut qunusaarusukkissi. 10 Oqartarpummi: “Allagai kimittul­lutillu sakkortupput, najuukkaangamili sanngiillunilu pikkunaatsumik oqaluttarpoq.” 11 Taama oqaluttut nalussan­ngilaat najuutin­nginnitsinni allannitsitut najuukkutta iliorumaartugut. 12 Sapiiserlutami imminut piukkuttunut sanilliuk­kusunngilagut. Namminneq ajunngitsuusorisartik naapertorlugu imminut nalilersortarput. Tamannalu paasisimasaqan­nginnerannut takussutissaavoq.

13 Uagutsinnulli suliassiis­sutigineqartut sipporlugit usorsisimaar­nianngilagut. Guutimilli suliassiis­sutigineqartut, ilaatigut ilissinnut oqaluussineq, pillugit usorsisimaarusuppugut. 14 Ilissin­nukaratta Guutimit suliassiis­sutigineqan­ngitsutut iliunngilagut, siullersaallutali Kristusi pillugu nutaarsiassanik nuannersunik oqaluus­siffigaassi. 15 Aap, uagutsinnut suliassiis­sutigineqartut sipporlugit, allat suliaat pillugit, usorsisimaan­ngilagut. Neriuutigaarpulli uppernersi annertusiar­tortillugu uagutsinnut suliassiis­sutigineqartut iliuuserisagut annertusiar­tussasut. Taamaalilluta iliuuseqar­nerusin­naassaagut 16 nunallu ilissinniit ungasin­nerusut nutaarsiassat nuannersut pillugit oqaluus­siffigisin­naassallugit. Taamaalilluta allat oqaluus­siffigisaminni iliuuserisaat pillugit usorsisimaas­sanngilagut. 17 “Usorsisimaartulli Jehova usorsisimaarutigissavaa.” 18 Imminummi piukkuttoq akuerisaanngilaq, Jehovalli piukkussaa akuerisaavoq.

11 Kissaatigigaluarpara sianiil­liulaarninni naammagit­tassasusi, taamaaliorpusilu. 2 Guutip isumassuineratut isumassorpassi. Angummummi ataatsimut, Kristusimut, nuliassan­ngortippassi taassumunngalu atoqateqarsiman­ngisaan­nartutut minguitsutullu tunniuk­kusullusi. 3 Ernumas­sutigaarali pulateriaarsuup peqqusersusaarluni Evamik nakkaan­nartitsineratut isummasi Kristusip piumasaanut akerliusumik arlaatigut ilumoorun­naarsin­neqarlutillu minguitsuujun­naarsin­neqarsimasut. 4 Taama allappunga Jiisusi oqaluus­sissutigisatsinniit allaanerusoq oqaluus­sissutigalugu takkuttoq, ilinniar­tinneqar­nissinnit allaanerusumik isiginnit­taaseqar­nissamut sunniisoq nutaarsias­sanilluunniit nuannersunik upperisassinnit allaanerusunik oqaluussisoq ingerlaannaq akuerisarassiuk. 5 “Apustilis­saarsuas­sinnimmi” arlaannaatigul­luunniit piginnaanikin­nerusutut imminut isiginngilanga. 6 Imaassinnaavoq oqalloris­suunngitsunga, kisianni paasisimasaqarpunga. Paasisimasaqarnerlu sutigut tamatigut ilissinnut erseqqis­sarparput.

7 Imaluunniit Guuti pillugu nutaarsiassanik nuannersunik nuannaarlunga akeqanngitsumik oqaluus­siffigigassi qutsissisin­neqarnias­sagassilu imminut nikanarsarama ajortuliorpunga? 8 Kiffartorfigiumallusi ilagiit allat pilersuinerisa* akuerineratigut suutaarutingajappakka.* 9 Qatanngutit Makedoniameersut takkuttut pisariaqar­titakka tamaasa matussusermatigit najornissinni pisariaqar­titsileraangama ilissinnut nanertuutaaneq ajorpunga. Aap, sutigut tamatigut ilissinnut nanertuutaanangalu nanertuutaanaveersaar­tuassaanga. 10 Kristusimik malinnit­tuutillunga Akaarjami tamarmi tamanna usorsisimaarutigiuassavara. 11 Sooq? Asannginnassi? Guutip nalunngilaa asagissi!

12 Inuit ilaasa uagutsitut apustiliunerarnertik oqarataarutigisarpaat. Taamaattumik oqarataar­nissamut pissutis­saqaqqunagit iliuuserisakka iliuuseriuas­savakka. 13 Angutit taamaattut apustiliupput ilumuun­ngitsut, peqquserluttut Kristusimut apustiliusuusaartartut. 14 Tamannalu tupinnanngilaq, Saatanimi tamatigut qaamasumut inngiliusuusaartarpoq. 15 Taamaattumik Saatanip kiffaasa naapertuil­luarnermut kiffaasuusaar­tarnerat aamma tupaallaatigis­sanngilarput. Naggataatigulli suliatik naapertorlugit pineqassapput.

16 Oqaqqippunga: Sianiil­liortutut isigineqas­sanngilanga. Taamali isigigussinga sianiil­liortutut akuerisinga usorsisimaalaarsin­naaniassagama. 17 Maannali Naalakkap maligas­siuineranik ilaarsisutut oqalunnanga sianiil­liorluni imminut tatigisutut usorsisimaassaanga. 18 Amerlasuut inuttut atukkatik pillugit oqarataarmata uangattaaq usorsisimaassaanga. 19 “Silatoqigassi” sianiil­liortut nuannaarlusi akuerisarpasi. 20 Aap, kikkulluunniit ilissinnik inussian­ngortitsisut, pigisassinnik arsaarinnittut, pigisassinnik tigusisut, qaffassimaarlutik ilissinnik nikassaasut isassisullu akueriin­nartarpasi.

21 Taama allannera pissutigalugu sanngiitsutut iliuuseqarpasis­simasin­naagatta uagutsinnut kanngunarsaataavoq.

Allalli sapiisersimappata – silatusaarnanga allappunga – uangattaaq sapiiser­niarpunga. 22 Hebræeriuppat? Uangattaaq hebræeriuvunga. Israalik­kuuppat? Uangattaaq Israalik­kuuvunga. Aaperaap kinguaarai? Uangattaaq kinguaaraanga. 23 Kristusimut kiffaappat? Silaaruttutut akissaanga: Uanga kiffaal­luarneruvunga! Suliaqar­neruvunga, akulikin­nerusumik parnaarus­saasarpunga, arlalip­passuariarlunga unatarneqarpunga arlaleriarlungalu toqungajallunga. 24 Tallimariarlunga juutinit 39-riarlunga anaatippunga, 25 pingasoriarlunga anaaler­neqarpunga, ataasiarlunga ujaqqanik milloor­neqarpunga, pingasoriarlunga umiuvunga aamma ulloq unnuarlu imaannarsuarmi tissukarlunga. 26 Angalakulasarninni ulorianar­torsior­tarpunga kuussuarni, piiaasut akornganni, nunaqqatima akornganni, allamiut akornganni, illoqarfimmi, inoqajuitsumi, imaani qatanngutillu ilumuun­ngitsut akornganni. 27 Tamaviaarlunga sulisarpunga, unnuakkut sinissaarut­tarpunga, kaattarpunga imerusut­tarlungalu, nerisas­saaruttarpunga, qiiasarpunga atisanillu amigaateqar­tarlunga.*

28 Tamakkua saniatigut allamik ullut tamaasa nanertuuteqar­tarpunga: Ilagiit tamaasa isumakuluutigisarpakka. 29 Alla sanngiik­kaangat nikallor­tarpunga allalu naakkiutsin­neqaraangat kamattarlunga.

30 Usorsisimaassaguma sanngiis­sutsinnik ersersitsisut pillugit usorsisimaassaanga. 31 Guutip Naalakkatta Jiisusip Ataataata, qaqugorsuarmut unnersiutigineqartussap, nalunngilaa sallunngitsunga. 32 Kunngip Aretasip Damaskusimi sinniisuata tigusariniarlunga illoqarfik paarsisulerpaa. 33 Koorimulli ikeriarlunga illoqarfiup qarmarsuata igalaavatigut ninginneqarama qimaavunga.

12 Naalakkamit tupinnar­tuliornikkut takorluuisitaanera saqqummerfigineqarneralu iluaqutaan­ngikkaluartumik usorsisimaarutigisariaqarpakka. 2 Kristusimik ataasioqateqartoq nalunngisara ukiut 14-it matuma siorna qilaat pingajuannut pisinneqarpoq – naluara timimiinnersoq timimiin­nginnersorluunniit, tamanna Guutip kisimi ilisimavaa. 3 Aap, nalunngisama – naluara timimiinnersoq timimiin­nginnersorluunniit, tamanna Guutip kisimi ilisimavaa – 4 paratiisimut pisinneqarami oqaatsit oqaatigineqarsin­naanngitsut inummillu oqaatigineqaq­qusaanngitsut tusaavai. 5 Inuk taanna usorsisimaarutigissavara, uannulli tunngatillugu sanngiis­sutikka kisiisa usorsisimaarutigis­savakka. 6 Ilumoortoq oqaatigisarakku usorsisimaas­sagaluaruma sianiil­liornavian­ngilanga. Kialuunniilli uannit takusani tusakkanilu kisiisa pillugit pingaar­tinnias­sammanga taamaalior­nianngilanga. 7 Saqqummersitat immikkuul­larissut pissutigalugit kialuunniit pingaar­nerutis­sanngilaanga.

Imminut pingaar­tippallaan­nginniassagama anniaateqarpunga, imminut pingaar­tippallaan­nginniassagama Saatanip inngiliata isattar­tuarpaanga.* 8 Tamanna peeqqullugu Naalagaq pingasoriarlunga kimigiiserfigaara. 9 Oqarfigaangali: “Ajunngisaangaarnera ilinnut naammappoq, pissaanerami sanngiik­kaangavit sakkortunerpaasarpoq.” Taamaattumik Kristusip pissaanerata tupertut qulangersimajuar­niassammanga sanngiis­sutikka nuannaangaarlunga usorsisimaarutigis­savakka. 10 Taamaattumik sanngiissutit, ajuallatsin­neqarnerit, pissaaleqinerit, malersor­neqarnerit artorsar­nerillu Kristusi pillugu naammagalugit atukkakka nuannaarutigisarpakka. Sanngiik­kaangamami nukittusarpunga.

11 Ilissi sianiil­liulersip­passinga, nersualaar­tussaagaluaras­singami. Allaammi suunngik­kaluarlunga “apustilis­saarsuassinnit” arlaannaatigul­luunniit piginnaanikin­nerunngilanga. 12 Aap, apustiliuninnut ilisarnaatit pinertusaangaarlunga tupinnar­tuliortarnikkut* ilissinnut takutippakka. 13 Ilissinnut nanertuutaan­ngilanga, tamatumani ilagiinnit allanit allaaneruvusi. Eqqunngitsuliorpunga? Taamaappat isumakkeerfigisinga.

14 Pingajussaanik ilissin­nukarnissannut piareersimavunga, ilissinnullu nanertuutaas­sanngilanga. Pigisas­sinnimmi tunineqarusun­ngilanga, kisianni takorusuppassi. Qitornaasummi angajoqqaatik pillugit sipaarneq ajorput, angajoqqaalli qitornatik pillugit sipaartarput. 15 Ilissi pillusi suut tamaasa allaallu inuunera nuannaangaarlunga atorusuppakka. Ilissinnik asanningaarnittut asaneqar­tussaan­nginnama? 16 Ajunngilaq taamaanniarli, ilissinnut nanertuutaan­ngilanga. Taamaattoq oqarpusi peqqusersusaarlunga salloqit­tarissi. 17 Ilissinnut aallartitakka aqqutigalugit iluanaar­niarfigin­ngilassi! 18 Tittusi qatanngut angut aallartitara ilagalugu ilissin­nukaqquara. Tittusip iluanaar­niarfigin­ngilluin­narpaasi! Assigiimmik isiginnit­taaseqarlutalu iliuuseqar­tanngin­nerpugut?

19 Immaqa eqqarsarpusi immitsinnut illersortugut, taamaat­toqanngilarli. Kristusi ataasioqatigalugu Guutip saavani oqaluppugut. Asasakka, ineriar­tuutissassinnik iliuuseqar­tuaannarpugut. 20 Ernumas­sutigaarami tikikkuma iluarin­ngisattut pissuseqassasusi iluarin­ngisassitullu isiginnit­taaseqas­sasunga. Aarleqqutigaara akerleriit­toqassasoq, sinngasoqassasoq, kamarujus­suartoqassasoq, isumaqatigiin­ngilluin­nartoqassasoq, ingutsisoqassasoq, oqaatis­suaassisoqassasoq, pingaakujunnermik makitaler­toqassasoq paatsiveerut­toqassasorlu. 21 Takkuteq­qikkuma immaqa Guutima saassinni nikanarsas­savaanga, immaqalu aliasuutigis­savakka ajortuliorsimasorpassuit mingunnar­tuliaminnik, atoqatigiinnikkut eqqunngitsulior­nerminnik* kanngut­taatsulior­nerminnillu* peqqissimis­sutigin­ninngitsut.

13 Pingajussaanik ilissin­nukarnissannut piareersimavunga. ‘Oqaatigineqartut tamarmik ilisiman­nittunit marlunnit pingasunil­luunniit uppernarsar­neqassapput.’ 2 Maanna najunngik­kaluarlusi aappassaanik najortutut ippassi, aamma siusinnerusukkut ajortuliortut allallu tamaasa tikiuteq­qissagaluaruma asattuus­sinavian­nginninnik siumut mianersoqquakka. 3 Kristusimmi aqqutigalunga oqalunneranut uppernarsaatis­sarsiorpusi. Kristusilu akorngassinni sanngiitsuunngilaq, pissaaneqangaar­nerminilli takutitsivoq. 4 Inuttut sanngiitsutut qisummi naalliutsitsiviliami* toqunneqaraluarluni Guutip pissaanera pissutigalugu uumavoq. Uaguttaaq taassumatut sanngiik­kaluarluta Guutip pissaanera ilissinni sunniuteqarmat uumaqatigis­savarput.

5 Uppernermiin­nersusi paasiumallugu imminut misilit­tuaritsi. Inuttut qanoq ittuunerlusi misissor­tuarsiuk. Paasinngin­nassiuk Jiisusip Kristusip ataasioqatigigaasi? Imaluunniit narrugisaagassi? 6 Neriuutigil­luinnarpara narrugisaan­nginnerput paasissagissi.

7 Eqqunngitsuliun­nginnissarsi Guutimut qinnutigaarput, imaanngitsoq allanit akuerisaanias­sagatta, kisianni allaat allanit akuerisaan­ngikkaluartugut ajunngitsulior­niassagassi. 8 Ilumoortormi akerlilersorsin­naanngilarput, ilumoortorli taamaallaat tapersersorsin­naavarput. 9 Sanngiik­kaangatta ilissili nukittugaangassi nuannaar­tarpugut. Pisariaqar­tumillu allannguinissarsi qinnutigisarparput. 10 Taamaattumik ornikkussi sukannersumik pinngin­niassagassi najuutin­nginninni tamakku allaatigaakka. Naalakkamimmi ilissinnik ineriar­tortitsinissamut nungutitsin­nginnis­samullu piginnaatin­neqarpunga.

11 Kingullertut, qatanngutit: Nuannaar­tuaritsi, pisariaqartumik allannguiuaritsi, tuppallersar­neqartuaritsi, isumaqatigiit­tuaritsi eqqisseqatigiit­tuarlusilu. Taava Guutip asannittup eqqissisitsisullu najussavaasi. 12 Illernartumik kunillusi ilasseqatigiigitsi. 13 Illernartut tamarmik inuulluaq­qusipput.

14 Qanortoq Naalakkap Jiisusip Kristusip ajunngisaangaarnerata Guutillu asanninnerata anersaallu illernartup tamatta iluaqutigisatta tamassi najorilisi.