KORINTIMIUNUT ALLAKKAT SIULLIIT

1 Paulusimit, Guutip piumasaagut Kristusimit Jiisusimit apustiliunissamut* qaaqquneqartumit, aamma qatanngutitsinnit Sostiinisimit 2 Korintimi Guutip ilagiivinut, ilissinnut Kristusi Jiisusi ataasioqatigalugu illernarsisin­neqartunut, illernar­tuunissamut qaaqqusaasunut tamattalu Naalakkatta Jiisusip Kristusip atianik tatigin­nittunut* tamanut:

3 Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi.

4 Guutiga qutsavigiuar­tarpara Kristusi Jiisusi aqqutigalugu ajunngisaangaarfigisarmasi. 5 Kristusimi pissutigalugu sunik tamanik, soorlu oqaluus­sillaqqinnermik paasisimasaqarluar­nermillu, tunineqarpusi. 6 Kristusi pillugu ilisiman­nittutut nassuiaat upperil­luinnarassiuk 7 Naalakkatta Jiisusip Kristusip saqqummersitaanissaata qilanaarlusi utaqqinerani tunissutinik* sunilluunniit amigaateqan­ngilasi. 8 Aamma Naalakkatta Jiisusip Kristusip ulluani kinaluunniit unnerluutiginis­sassinnut tunngavis­saqanngin­niassammat Guutip naggatissamut aalajaat­tuaqqullusi nakussatsis­savaasi. 9 Guuti, ernerminik Jiisusimik Kristusimik Naalakkatsinnik ataasioqateqaq­qullusi qaaqqusisoq, aalajaappoq.

10 Maanna qatanngutit, Naalakkatta Jiisusip Kristusip aqqani kimigiiserfigaassi oqaatsissigut isumaqatigeeq­qullusi avissaar­tuuteqqunasilu. Isumassigulli eqqarsar­taatsis­sigullu ataasioqatigiil­luinnaritsi. 11 Kluuimmi illuaneersut ilaasa paasitip­paannga, qatanngutikka, akorngassinni akerleriit­toqartoq. 12 Taama allappunga oqartarassi: “Uanga Paulusip ilinniar­titaraanga”, “uanga Apulusip”, “uanga Keefassip”,* “uanga Kristusip”. 13 Kristusi avinneqarami? Paulusi ilissi pillusi qisummi naalliutsitsiviliami* toqunneqarami? Imaluunniit Paulusip aqqani imermut morsutsitaagassi? 14 Guuti qutsavigisarpara, Krispusi Gaajusilu eqqaassan­ngikkaanni, arlassinnik imermut morsutsitaqan­nginnama. 15 Arlarsi taamaalilluni oqarsin­naanngilaq uanga atinni imermut morsutsitaalluni. 16 Usi, Steffaanasip illuaniittut aamma imermut morsutsippakka. Allalli imermut morsutsis­simanerlugit eqqaaman­ngilara. 17 Kristusimmi imermut morsutsitsisarneq pillugu aallartinnanga nutaarsias­sanilli nuannersunik oqaluus­seqqullunga aallartippaanga. Aamma “ilisimas­suseqarlunga”* oqaluus­seqqunngilaanga, taamaalioraluarumami Kristusip qisummi naalliutsitsiviliami* toqunera naleerutissammat.

18 Suujunnaarsitaasussat qisummik naalliutsitsiviliaq pillugu tusarliussaq suutinngilaat, uagulli annaanneqartugut Guutip pissaaneranut takussutissatut isigaarput. 19 Allassimavormi: “Silatuut ilisimassusiat suujunnaarsissavara, silassorissullu silatussusiat ajattussavara.” 20 Naak silatooq? Naak allakkanik ilisimasoq?* Naak nalitsinni oqalliseqataasartoq? Guutip ersersis­simannginnerpaa inuit ilisimassusiat suunngitsoq? 21 Guutimmi ilisimas­sutsini ima ersersippaa: Inuit ilisimas­sutsimikkut Guuti ilinnian­ngilaat, Guutili aalajangerpoq tusarliussaq “suunngitsutut” isigineqartoq atorlugu uppertut annaanniarlugit.

22 Juutimmi tupinnar­tulianik takorusupput grækerillu ilisimas­sutsimik ujartuillutik. 23 Uagulli Kristusip qisummik naalliutsitsiviliami toqunneqarsimanera, juutit naakkius­sutigisaat juutiun­ngitsullu suutinngisaat, oqaluus­sissutigaarput. 24 Qaaqquneqar­tunulli, juutinut grækerinullu, Kristusi tassaavoq Guutip pissaanera Guutillu ilisimassusia. 25 “Suunngitsummi” Guutimeersut inunnit silatunerupput “sanngiitsullu” Guutimeersut inunnit nukittunerullutik.

26 Qatanngutit, qaaqquneqarassi inuit isaanni silatuut, pissaanillit akimasuullu* amerlan­ngillat. 27 Guutilli silatuut kanngusutsin­niarlugit inuppassuit suutinngisaat toqqarpai. Guutillu nukittuut kanngusutsin­niarlugit inuppassuit sanngiitsutut isigisaat toqqarpai. 28 Aap, Guutip pingaar­tinneqartut suujunnaarsin­niarlugit inuppassuit pingaaruteqan­ngitsutut nikanar­tutullu isigisaat toqqarpai. 29 Taamaaliorpoq kinaluunniit Guutip saavani oqarataaqqunagu. 30 Guuti pissutigalugu Kristusi Jiisusi ataasioqatigaarsi. Taanna uagutsinnut tassaalersimavoq ilisimassuseq Guutimeersoq, naapertuil­luarneq, illernarsisitsineq akiliullu utertitsissut 31 allassimasutut pisoqaq­qullugu: “Usorsisimaartoq Jehova* taamaallaat pillugu usorsisimaassaaq.”

2 Qatanngutit, Guutip isertugaataa oqaluus­sissutiginiarlugu ilissinnut tikikkama paasiuminaatsumik oqalunnangalu ilisimas­suseqarnera takoqqusaarutigin­ngilara. 2 Aalajangersimagamami Jiisusi Kristusi qisummilu naalliutsitsiviliami* toqunneqarnera kisiisa pillugit oqaluun­niarlusi. 3 Aamma sanngiillunga, aarleralunga sajungaarlungalu ornippassi. 4 Ilisimas­suseqarlunga akuersitin­niarlusi oqaluunnasilu oqaluus­siffigin­ngilassi, oqaatsikkali anersaap pissaaneranik ersersitsipput 5 uppernersi inuit ilisimas­susiannik tunngaveqarnani Guutip pissaaneranik tunngaveqar­niassammat.

6 Ilisimassuseq inersimal­luartunut eqqartor­tarparput, nalitsinnili inuusut naalakkersuisullu piujunnaartussat ilisimassusiat eqqartorneq ajorparput. 7 Guutilli isertugaa, tassa ilisimassusia isertugaasoq, inuit atugaat ajorsin­ngikkal­larmatali alutornarsisitaaq­qulluta siumut aalajangigaa eqqartor­tarparput. 8 Ilisimassuseq taanna naalakkersuisut nalitsinni inuusut paasinngilaat, paasisimagaluarunikkumi Naalagarput ataqqinartoq toqussimanavian­ngikkaluarpaat. 9 Soorlu allassimasoq: “Isit takusiman­ngisaat, siutit tusarsiman­ngisaat inuillu eqqarsaatigisiman­ngisaat Guutip asasiminut piareersarsimavai.” 10 Guutimmi anersaamigut taakku uagutsinnut saqqummersippai. Anersaammi suut tamaasa, allaat itisuut Guutimut tunngasut, misissortarpai.

11 Kia inoqammi eqqarsaatai ilisimasinnaavai? Inuup nammineq anersaavata kisimi ilisimavai. Taamatuttaaq Guutimut tunngasut* Guutip anersaavata kisimi ilisimalersinnaavai. 12 Guutip ajunngisaarluni uagutsinnut tunnius­simasai paasinias­sagatsigit inuit ajortut isiginnit­taasiat* pinagu anersaaq Guutimeersoq pivarput. 13 Taakkua aamma eqqartor­tarpagut inuit ilisimassusiat atornagu kisianni anersaap ilinniar­titsissutai atorlugit. Aap, anersaakkut ittut anersaakkut oqaatsit atorlugit nassuiar­tarpagut.*

14 Pileris­susipilunili malillugit inuusup Guutip anersaavaneersut suutinngin­namigit akuerineq* ajorpai. Taakku anersaakkut nalilersugas­saammata paasineq ajorpai. 15 Anersaakkulli ittunik pingaar­titsisoq eqqortumik nalilersuisinnaavoq, inoqatiminilli eqqortumik nalilersor­neqarneq ajorpoq. 16 Aap, “kia Jehova ilinniar­tissinnaajumallugu isumaa ilisimavaa?” Uagulli Kristusitut eqqarsar­taaseqarpugut.

3 Qatanngutit, anersaakkut ittunik pingaar­titsisutut isigalusi oqaluus­sinnaasiman­ngilassi. Pileris­susipiluit malillugit inuusutut, Kristusimut tunngatillugu meeqqatut, isigalusi oqaluut­tariaqarsimavassi. 2 Anersaakkut inersimal­luannginnassi nerisassanik tamuasarissanik tuninasi immummik tunivassi. Allaammi suli inersimal­luartun­ngorsiman­ngilasi, 3 pileris­susipiluimmi malillugit inuugassi. Sinngallusilu akerleriit­tarassi inuttut allatulli pileris­susipiluit malillugit inuunngin­nerpisi? 4 Ataasermi oqarpat: “Paulusip ilinniar­titaraanga”, allali oqarluni: “Uanga Apulusip”, taava inuttut allatulli inuunngin­nerpisi?

5 Taava Apulusi kinaagami? Aap, Paulusi kinaagami? Kiffaan­naavugut Naalakkamit suliassin­neqarnitsitut uppertun­ngoqqullusi ilissinnik ikiuisut. 6 Uanga ikkussuivunga, Apulusi imerterivoq, Guutili naajartor­titsiuarpoq. 7 Taamaattumik ikkussuisoq imerterisorlu pingaaruteqarnatik Guuti naajartor­titsisoq pingaaruteqarpoq. 8 Ikkussuisoq imerterisorlu suleqatigiipput,* tamarmilli immikkut sulinertik naapertorlugu akissarsisin­neqassapput. 9 Uagummi tassaavugut Guutip suleqatai. Ilissi tassaavusi Guutip narsaataa naggoris­sarneqartoq, Guutip illuliaa.

10 Guutip ajunngisaangaarfigimmanga aqutsisutut sannarissutut toqqaviliivunga, allali toqqavimmi tassani sanaartorpoq. Kialuunniit tassani qanoq sanaartor­nerluni eqqumaf­figissavaa. 11 Kinaluunniimmi toqqavimmit, tassa Jiisusimit Kristusimit, allaanerusumik toqqaviliisin­naanngilaq. 12 Kuulti, sølvi, ujaqqat erlinnartut, qisuit, ivikkat kanaartal­luunniit atorlugit toqqavimmi sanaartor­toqarsinnaavoq. 13 Ullormili misilin­neqarfimmi kikkut tamarmik suliaasa qanoq ittuunerat takutin­neqassaaq, ullormi tassani kikkut tamarmik suliaat innerup qulaassavai. 14 Toqqavimmi sanaartugaq ataannarpat sanasua akissarsisin­neqassaaq. 15 Sanaartugarli innermit nungutin­neqarpat sanasua annaasaqassaaq, namminerli annaanneqarluni. Innermilli aniguisutut issaaq.

16 Nalugassiuk tassaallusi guutisiorfik Guutimut pigititaq Guutillu anersaava ilissinni najugaqartoq? 17 Guutisiorfimmik Guutimut pigititamik aseruisoq Guutimit suujunnaarsin­neqassaaq. Guutisiorfimmi Guutimut pigititaq illernartuuvoq, ilissilu tassaavusi guutisiorfik taanna.

18 Imminut salloqit­taqinasi: Nalitsinni silatuujusorisoq ilisimas­suseqalerumalluni sianiitsunngorli. 19 Guutimmi inuit ilisimassusiat suutinngilaa, imami allassimavoq: “Silatuut imminut aaginnar­nissaat akuerisarpaa.” 20 Aamma: “Jehovap nalunngilaa silatuut tunngavilersuutaat isumaqan­ngitsut.” 21 Taamaattumik kinaluunniit inuit pillugit oqarataan­ngikkili. Suummi tamaasa pigaasi. 22 Paulusi, Apulusi, Keefassi,* inuiaqatigiit aaqqissuus­saanerat, inuuneq, toqu, maanna maaniittut takkuttussallu tamaasa pigaasi. 23 Ilissili Kristusip pigaasi, Guutillu Kristusi pigaa.

4 Kialuunniit Kristusimut kiffaasutut Guutillu isertugaataanik nakkutil­liisuutitatut isigissavaatigut. 2 Naatsorsuutigineqar­tarporlu nakkutil­liisuutitat aalajaatsuussasut. 3 Uannut pingaaruteqarpal­laanngilaq ilissinnit inuilluunniit eqqartuus­siviannit nalilersor­neqarnissaq. Imminul­luunniit nalilersor­nianngilanga. 4 Eqqunngitsuliorsimaninnik eqqaasaqarsin­naanngilanga, tamannali naapertuil­luartuuninnut uppernarsaataanngilaq. Jehova uannik nalilersuisuuvoq. 5 Taamaattumik piffissarititaasoq, Naalakkap tikiuffissaa, sioqqullugu eqqartuus­sissanngilasi. Taartumi isertugarineqartut qaamanermut pisikkumaarpai inuillu uummammiui qulaarlugit, taava kinaluunniit pisassamisut Guutimit nersualaar­neqassaaq.

6 Qatanngutit, tamakkununnga tunngatillugu Apulusilu iluaqutis­sassinnik maligas­siuivugut maleruagassiaq una ilinniar­niassagassiuk: “Allassimasut kisiisa maleruarsigit.” Taamaalillusi pingaakujunnermik makitalernasilu nakerisarsior­tunngus­sanngilasi. 7 Sooq allanit pingaar­nerusorivit? Suut tamaasa Guutimit pisiman­nginnerpigit? Suut tamaasa taassumannga pisimagukkit sooq taava nammineq nukitit atorlugit pissarsisimasutut oqarataarpit?

8 Naammatseriikatakkassi? Pisuunngoriikatakkassi? Uagut ilaginata kunngisut naalakkersuilereerpisi? Uaguttaaq ilagalusi kunngisut naalakkersuinias­sagatta assut kissaatigigaluarpara kunngisut naalakkersuilereersimassasusi. 9 Allaanngilaq Guutip uagut apustiliusugut toqumik pillagaasussatut unammisarfis­suarmut kingullersaatilluta inissis­simagaatigut. Inunnummi inngilinullu isiginnaagas­sianngorsimavugut. 10 Kristusi pissutigalugu sianiitsuusorineqar­tarpugut, ilissili Kristusi pissutigalugu silatuujusorivusi. Uagut sanngiitsuuvugut, ilissili nukittuujuvusi. Ilissi ataqqisaavusi, uagulli suutinneqan­ngilagut. 11 Ulloq manna tikillugu kaattarpugut, imerusut­tarpugut, atisarlut­tarpugut,* unatarneqar­tarpugut,* angerlarsimaf­feeruttarpugut 12 tamaviaarlutalu sulisarluta. Asissor­neqaraangatta inussiar­nersumik akisarpugut. Malersor­neqaraangatta naammagit­tarluta pinertusaar­tarpugut. 13 Nikassar­neqarluta salluliuutigineqaraangatta saamasumik akisarpugut. Manna tikillugu inuit eqqakkatut,* innuttaasuni suunngitsutut, isigisarpaatigut.

14 Kanngusuleqqunasi, qitornattulli asasattut siunnersorumallusi, taama allappunga. 15 Kristusimik malinnin­nissamik 10.000-nik ilinniar­titsisoqaraluarus­siluunniit* amerlasuunik ataataqan­ngilasi. Nutaarsias­sanimmi nuannersunik Kristusimillu Jiisusimik malinnin­nissamik ilinniar­tikkassi ilissinnut ataatan­ngorpunga. 16 Taamaattumik kimigiiserfigaassi uannik ilaarsisun­ngoqqullusi. 17 Taamaat­tuminguna Timuutiusi ilissinnut aallartikkiga, taannami Naalakkamut kiffartornermi qitornarivara asasara aalajaatsoq. Timuutiusip Kristusimut Jiisusimut qanoq kiffartor­tarninnik periutsinnillu ilagiinni tamani ilinniar­titsissutigisar­takkannik eqqaasis­savaasi.

18 Ilaat ilissinnut ornigutis­sanngis­soralunga pingaakujunnermik makitalersimapput. 19 Jehovalli piumasarippagu qanittukkut ilissinnut orniguk­kumaarpunga. Tikiukkumalu pingaakujunnermik makitalersimasut oqaasii pinnagit pissaaneralli sumit aallaaveqartoq paasiniarumaarpara. 20 Guutimmi kunngeqarfia oqaatsinut tunnganani pissaanermut tunngavoq. 21 Sorleq orniginar­tinneruisiuk: Suugartalimmik ajaappialisarlunga* imaluunniit asannillunga saamallungalu ilissinnut ornigun­nissara?

5 Paasitin­neqarpunga allaat Guutimik ilisiman­ninngitsunit ileqqorineqan­ngitsumik akorngassinni atoqatigiinnikkut eqqunngitsulior­toqartoq,* tassa angutip ataatami nulia inooqatigigaa.* 2 Tamanna tulluusimaarutigaasiuk? Aliasuutigisariaqaraluarparsi angutillu taamaaliortup ilissinnit peersin­neqarnissaa isumagalugu. 3 Timikkut najunngik­kaluarlusi eqqarsaatikkut* najorpassi, ilissinnilu najuuttutut illunga angut taamaaliortoq eqqartuutereerpara. 4 Naalakkatta Jiisusip aqqani katersuukkussi ilisimallugulu eqqarsaatikkut* Naalakkattalu Jiisusip pissaaneragut najorissi 5 inuk taamaattoq Saatanimut pisissavarsi ilagiinnut ajortumik sunniuteqar­tarunnaaq­qullugu ilagiillu anersaavat* Naalakkap ulluani annaanneqaq­qullugu.

6 Tulluusimaarutis­saqanngilasi. Nalugassiuk seernarsaatimininnguup naqittagaq tamaat pullatsittaraa? 7 Seernarsaatitoqaq piiarsiuk naqittagaaq­qullusi nutaaq, tassami seernarsaateqan­nginnassi. Savaaraaterpummi, Kristusi, qaangiiffimmi* pilliutigineqareerpoq. 8 Taamaattumik seernarsaatitoqaq, ajortimut ajussutsimullu assersuutaasoq, atornagu iffiarli-qaqortoq* seernarsaateqan­ngitsoq, minguitsumut ilumoor­nermullu assersuutaasoq, atorlugu nallius­siniarta.

9 Allakkanni allaffigaassi atoqatigiinnikkut eqqunngitsuliortartut* ilagisarun­naaqqullugit. 10 Imaanngilaq atoqatigiinnikkut eqqunngitsuliortartut,* piumatuut, ujajaasut guutipilus­siortul­luunniit ilaginngil­luinnassagisi. Taamaak­kaluarpammi kikkut tamaasa qimattariaqas­sagaluarassigit. 11 Maannakkulli allaffigaassi kinaluunniit qatanngummik taaneqartoq atoqatigiinnikkut eqqunngitsuliortoq,* piumatooq, guutipilus­siortoq, asissuisoq,* imerajuttoq ujajaasorluunniit ilagisarun­naaqqullugu, aap, nereqatigis­sanngilarsiluunniit. 12 Ilagiit avataan­niittut eqqartuun­nissaat suliassarin­ngilara. Ilissi ilagiin­niittut eqqartuut­tanngin­nerpisigit? 13 Guutillu avataan­niittut eqqartuut­tannginnerpai? “Ajortoq ilagiinnit peersissiuk.”

6 Sooruna arlassinnik isumaqatigiin­ngissuteqaraangassi illernar­tunukarnasi eqqartuus­sivimmi inunnut naapertuil­luanngitsunut suliassan­ngortitsisartusi? 2 Nalugassiuk illernartut inunnik tamanik eqqartuus­siumaartut? Inuillu ilissinnit eqqartuun­neqartus­saappata suliassani soqutaarpian­ngitsuni eqqartuus­sinissamut piukkun­naateqan­nginnerpisi? 3 Nalugassiuk inngilit eqqartuuk­kumaarigut? Soorunami inuunermut matumunnga tunngas­suteqartuni aamma eqqartuus­sisinnaavugut. 4 Taamaattumik inuunermut matumunnga tunngas­suteqartuni aalajangiisoqar­tariaqalerpat taava angutinik ilagiinnit piukkun­nartutut isigineqan­ngitsunik eqqartuus­sisoqassavisi? 5 Kanngusuleq­qullusi taama allappunga. Ilumut arlarsiluunniit qatanngutimi akornganni eqqartuus­sinissamut ilisimas­suseqanngila? 6 Qatanngutilli qatanngunni eqqartuus­sivimmi unnerluutigaa, allaallu uppinngitsunut eqqartuutitillugu!

7 Qatanngutersi pillugu eqqartuus­sisunut suliassan­ngortitsigaangassi ajorsareer­tarpusi. Soormi naapertuil­luanngitsumik pineqaan­nartarussi? Soormi peqquserluf­figineqaan­nartarussi? 8 Taamaaliornasili naapertuil­luanngitsuliorlusilu peqquserlut­tarpusi – allaat qatanngutissinnut!

9 Nalugassiuk inuit naapertuil­luanngitsut Guutip kunngeqarfia* kingornutis­sanngikkaat? Tammarniaqinasi.* Atoqatigiinnikkut eqqunngitsuliortartut,* guutipilus­siortut, allasiortut, arnaqatiminnik anguteqatimin­nilluunniit atoqateqartartut,* 10 tillittut, piumatuut, imerajuttut, asissuisut* ujajaasullu Guutip kunngeqarfia kingornutis­sanngilaat. 11 Ilasi taamaas­simagaluarput. Guutilli minguiarlusi uffarpaasi, illernar­tippaasi Naalakkattalu Jiisusip Kristusip aqqani anersaaminillu naapertuil­luartuutillusi.

12 Uannut suut tamarmik inerteq­qutaanngillat, imaanngilarli suut tamarmik iluaqutaasut. Uannut suut tamarmik inerteq­qutaanngillat, sumilluunniilli aqunneqar­nissara* akueriuman­ngilara. 13 Nerisassat aqajaqqumoorput aqajarorlu nerisas­sanoorluni, Guutilli taakku tamaasa suujunnaarsissavai. Timi atoqatigiinnikkut eqqunngitsuliornermut* atugassaanani Naalakkamut kiffartornermut atugassaavoq, Naalakkallu timi isumassussavaa. 14 Guutilli pissaanini atorlugu Naalagaq toqusunit makitikkamiuk uaguttaaq toqusunit makitis­savaatigut.

15 Nalugassiuk timisi Kristusip avatigigai? Isumaqarpisi Kristusip avatigisai peeriarlugit atortit­tartumut atalersis­sagikka? Qanoq-aamma! 16 Nalugassiuk atortit­tartumik atoqateqartup taanna ataasioqatigileraa? Guutimi oqarpoq ‘taakku marluk ataasiulissasut’.* 17 Naalakkamilli ataasioqateqartup taanna anersaakkut ataasioqatigaa. 18 Atoqatigiinnikkut eqqunngitsuliorneq* qimarratigisiuk! Inuup ajortuliarisai allat tamarmik timaata avataaniipput, atoqatigiin­nikkulli eqqunngitsuliortoq timiminut ajortuliorpoq. 19 Nalugassiuk timersi guutisiorfittut ittoq anersaap illernartup ilissin­niittup, Guutimit pisassi, najugarigaa? Immissinnik piginngilasi 20 akisuumik pisiarineqarassi. Taamaattumik timersi Guutimut ataqqinaataasumik atorsiuk.

7 Maanna allaatigisassinnut tunngatillugu: Arnamik attuinnginnissaq* angummut pitsaaneruvoq. 2 Atoqatigiin­nikkulli eqqunngitsuliorneq* nalingin­naaqimmat angut kinaluunniit nuliaqassaaq arnarlu kinaluunniit ueqarluni. 3 Uiusup nuliami pisariaqartitai* matussusissavai, nuliaasorlu taamatuttaaq uiminut iliussaaq. 4 Nuliaasup timini oqartus­saassuseqarfiginngilaa, uiatali oqartus­saassuseqarfigaa. Taamatuttaaq uiusup timini oqartus­saassuseqarfiginngilaa, nuliatali oqartus­saassuseqarfigaa. 5 Aappavit atoqatigerusuppatit itigartis­sanngilat. Piffissamili aalajangersimasumi, soorlu qinuniarlusi, atoqatigiin­niarnasi isumaqatigiinnersi ajunngitsuuvoq. Tamatuma kingorna atoqatigiit­taleqqis­sinnaavusi imminut aqussin­naannginnersi pillugu Saatanimit usserneqar­tuaqqunasi. 6 Taama allannera peqqussutaanani periarfissaavoq. 7 Kissaatigigaluarparali kikkut tamarmik uattut issasut. Kikkulli tamarmik immikkut Guutimit tunissutisisimapput, ilaat aappaqan­ngillat ilaallu aappaqarlutik.

8 Maanna katissiman­ngitsut uillarnerillu allaffigaakka ajunngin­nerussasoq uattut ittuarunik. 9 Imminulli aqussin­naanngikkunik katillik, katinnermi aqussin­naanngisamik pileris­suseqarnermit ajunngin­neruvoq.

10 Katissimasut ima ilitsersorpakka – tassa uannit pinngitsumik Naalakkamilli pisumik: Nuliaasup uini qimassanngilaa. 11 Qimakkuniulli kisimiit­tuarusun­ngikkuni uini saammaallugu uterfigissavaa. Uiusullu nuliani qimassanngilaa.

12 Naalakkamilli pisuunngitsumik allanut allappunga: Qatanngutip angutip nuliami uppertuun­ngitsup najuinnarumappani nuliani qimassanngilaa. 13 Arnallu uimi uppertuun­ngitsup najuinnarumappani uini qimassanngilaa. 14 Angummi uppertuun­ngitsoq nuliani pissutigalugu illernar­titaavoq, nuliaasorlu uppertuun­ngitsoq uini pissutigalugu illernar­titaavoq. Taamaan­ngippat meeqqasi minguttuus­sagaluarput, maannali illernar­tuupput. 15 Uppertuun­ngitsulli aappani qimanniarlugu aalajangiukkuniuk taava qimalliuk. Pissutsini taamaattuni qatanngut angut arnarluunniit pituttorsimanngilaq, Guutilli eqqissillusi inooqqullusi qaaqquaasi. 16 Nuliaasutit, uiit najuinnarukku immaqa annaassinnaavat. Illillu uiusutit, nuliat najuinnarukku immaqa annaassinnaavat.

17 Kinaluunniilli Guutimit qaaqquneqarami Jehovamit atugaqar­titaanermisut inuussaaq. Taama ilagiinni tamani ilitsersuisarpunga. 18 Kipineqarsimalluni qaaqquneqartup kipineqarsimanini allanngor­tissanngilaa. Kipineqarsimananilu qaaqquneqartoq kipineqar­tissanngilaq. 19 Kipineqarsimaneq kipineqarsiman­nginnerluunniit pingaaruteqanngilaq. Guutip inassutaanik maleruaaneq pingaaruteqarpoq. 20 Kialuunniit qaaqquneqar­nermini pissutsit atukkani attatiin­narligit. 21 Inussiaallutit qaaqquneqarnerit isumakuluutigis­sanngilat. Inussiaajun­naarsin­naaguilli periarfissaq atorluaruk. 22 Kinaluunniit inussiaalluni Naalakkamit qaaqquneqartoq Naalakkap inussiaajun­naarsitaraa. Taamatuttaaq inussiaanani qaaqquneqartoq Kristusip inussiaatigaa. 23 Akisuumik pisiarineqarassi inunnut inussiaajun­naaritsi. 24 Qatanngutit, kialuunniit qaaqquneqar­nermini pissutsit atukkani Guutimullu attaveqarnini attatiin­narligit.

25 Atoqateqarsiman­ngisaan­nartunut* tunngatillugu Naalakkamit pisumik peqqussuteqan­ngilanga, Naalakkamilli nallittor­neqarnera pissutigalugu tatiginarama isumaga annippara. 26 Piffissami erloqinar­torsiorfiusumi inuugatta isumaqarpunga inuup pissutsit atukkani attatiin­narpagit pitsaanerusoq. 27 Nuliaqarpit? Qimannissaa eqqarsaatigeqinagu. Nuliaqan­ngikkuit nuliassarsiorunnaarit. 28 Katikkaluaruilli ajortulius­sanngilatit. Atoqateqarsiman­ngisaan­nartorlu katikkuni ajortulius­sanngilaq. Katittulli ajornar­torsiuteqar­tassapput, tamakkununngalu asattuuk­kusukkaluarpassi.

29 Tamatuma saniatigut, qatanngutit, allaffigaassi: Piffissakippugut. Maannamiit nuliaqartut nuliaqan­ngitsutut issapput, 30 qiasut qianngitsutut, nuannaartut nuannaan­ngitsutut, pisisut pigisaqan­ngitsutut 31 nunarsuarmilu pissutsinik atuisut tamakkiisumik atuinngitsutut. Nunarsuarmimi matumani pissutsit allanngortarput.* 32 Isumakuluuteqan­nginnissarsi kissaatigingaarpara. Angut katissiman­ngitsoq Naalakkamit iluarisaarusukkami Naalakkamut tunngasunik ulapputeqartarpoq. 33 Angulli katissimasoq nuliaminit iluarisaarusukkami ulluinnarni inuit amerlanerit ulapputigisar­tagaannik ulapputeqartarpoq 34 allamullu saasarneqar­tarluni. Arnaq katissiman­ngitsoq arnarlu atoqateqarsiman­ngisaannartoq timikkut isumakkullu* illernar­toorusukkamik Naalakkamut tunngasunik ulapputeqartarput. Arnarli katissimasoq uiminit iluarisaarusukkami ulluinnarni inuit amerlanerit ulapputigisar­tagaannik ulapputeqartarpoq. 35 Taama allappunga killilersor­nissarsi* pinnagu namminerli iluaqutissarsi eqqarsaatigalugu, allamut saasarneqarnasi eqqortuliorlusi qamanngalu pisumik Naalakkamut kiffartor­tuarnis­sassinnik kajumis­saarniarlusi.

36 Katissiman­ngitsorli atoqateqarusus­sutsiminik aqutsisin­naasorin­ngitsoq inuusup­pallaarun­naareersimasorlu katikkusukkuni katissaaq. Taamaalior­nermigut ajortuliunngilaq. 37 Katinnis­saminilli pisariaqar­titsinngitsup pileris­sutsiminillu aqutsisinnaasup kisimiit­tuarnis­saminik* qularnani aalajangiusimal­luinnarnera pitsaasuuvoq. 38 Aamma kinaluunniit katittoq pitsaasumik aalajangerpoq, katinngitsorli suli pitsaanerusumik aalajangerpoq.

39 Nuliaasup uini inuutillugu pituttorsimaffigaa. Uinili toquppat katikkusutani kinaluunniit, taamaallaalli Naalakkamut kiffartortoq, katissinnaavaa. 40 Isumaqarpungali kateqqin­ngikkuni pilluar­nerussasoq, qularin­ngilluin­narparalu uangattaaq Guutip anersaava pigalugu.

8 Maanna nerisassanut guutilianut pilliutigineqartunut tunngatillugu: Nalunngilarput tamatta paasisimasaqarluta. Paasisimasaqarneq pingaakujulersitsisarpoq asanninnerli ineriar­tortitsisarluni. 2 Arlaat pillugu paasisimasaqarsorisoq paasisariaqak­kaminik suli paasisas­saqarpoq. 3 Kinaluunniilli Guutimik asannittoq Guutimit ilisimaneqarpoq.

4 Maanna guutilianut pilliutinik nerinermut tunngatillugu: Nalunngilarput guutiliaq suunngil­luinnartoq ataasiin­narmillu Guuteqartoq. 5 Inuit oqartarput qilammi nunarsuarmilu assigiin­ngitsorpas­suarnik guuteqartoq. Taamaattumik “guutit” aamma “naalakkat” amerlapput. 6 Nalunngilarpulli ataatsimik Guuteqartoq, tassa Ataataq sunik tamanik pinngor­titsisoq uagutsinnillu piginnittoq. Aamma ataatsimik Naalagaqarpoq, tassa Jiisusi Kristusi. Taassumuuna allat tamarmik pinngor­tinneqarput, taassumuunalu inuuvugut.

7 Ilaalli tamanna pillugu paasisimasaqan­ngillat. Guutilianik pallorfigin­nittarsimanertik pissutigalugu nerisassat guutiliamut pilliutaasutut isigalugit nerisarpaat. Taamaat­tumillu nalunngeqatigin­nissutaat, sanngiitsoq, mingutsittarpoq. 8 Nerisassalli Guutimut qanillisin­navianngilaatigut. Nerinngikkutta annaasaqar­navianngilagut neriguttalu pissarsissanata. 9 Toqqaasin­naatitaanersili sanngiitsunut arlaatigut naakkius­sutaaleqqunagu mianersoritsi. 10 Sanngiitsummi illit paasisimasaqartutit guutipilus­siortarfimmi nerisutit takuguniuk nalunngeqatigin­nissutaa guutilianut pilliutinik nerinissamut sapiisilis­sannginnerpa? 11 Taamaalilluni sanngiitsoq, qatanngutit Kristusip toqussutigisaa, paasisimasaqas­sutsinnit sequmin­neqassaaq. 12 Qatanngutisi taama ajortuliorfigigussigit nalunngeqatigin­nissutaallu sanngiitsut innarlerussigit Kristusimut ajortuliussaasi. 13 Taamaattumik nerisassat qatanngutima naakkius­sutigippagit qatanngutiga naakkiutsik­kumanagu neqitoq­qinngisaan­nassaanga.

9 Qanorluunniit iliorsin­naatitaan­nginnerpunga? Apustiliun­nginnerpunga? Jiisusi Naalagarput takusiman­nginnerpara? Ilissi tassaan­nginnerpisi Naalakkamut kiffartornermi angusakka? 2 Allaat allanut apustiliun­ngikkaluaruma ilumut ilissinnut apustiliuvunga! Naalakkamummi tunngatillugu apustiliuninnut ilissi naqissutitut uppernarsaataavusi.

3 Isornar­torsiuisinnut ima imminut illersussaanga: 4 Nerinissarput imernis­sarpullu pisinnaatitaaf­figinngin­nerparput? 5 Apustileqatitsitut Naalakkallu qatanngutaasut Keefassitullu* nuliamik uppertumik angalaqateqar­nissarput pisinnaatitaaf­figinngin­nerparput? 6 Imaluunniit Barnabalu marluulluta kisitta immitsinnut pilersor­niarluta sulisariaqarpugut? 7 Kina aningaasartuutit nammineq akilerlugit sakkutuujusarpa? Kina viinnequteqarfiliortarpa inerititaanillu nerissanani? Imaluunniit kina savanik paarsisarpa immuannillu imissanani?

8 Inuttut isiginnit­taaseqarlunga taama allappunga? Moorsisip inatsisaani tamakku aamma eqqaaneqan­nginnerpat? 9 Moorsisimmi inatsisaani allassimavoq: “Nersussuaq angutiviaq karrertaajaasoq nerinaveeq­qusissanngilat.” Guutip matumani nersussuit eqqarsaatigai? 10 Imaluunniit uagut pilluta taama allassimava? Aap, uagut pilluta taama allassimavoq, assallatserisormi karrertaajaasorlu pissarseqataanissartik neriuutigalugu sulisarput.

11 Ilissinni anersaakkut ittunik siaruar­terisimagutta pisariaqar­titatsinnik ilissinnit katersuinissarput ingasap­pallaassava? 12 Inuit allat ilissinnit tunineqar­nissamik pisinnaatitaaf­feqarpata uagut suli pisinnaatitaaf­feqarnerus­sanngin­nerpugut? Taamaattoq pisinnaatitaaffipput tamanna atunngilarput, Kristusili pillugu nutaarsiassat nuannersut siammar­terneqar­neranni arlaatigut akornutaarusun­nginnatta suut tamaasa naammagalugit atortarpagut. 13 Nalugassiuk illernartunik suliallit guutisiorfim­meersunik nerisartut pilliivimmilu kiffartortartut pilliutigineqartut ilaannik pissarsisartut? 14 Taamatuttaaq Naalakkap peqqussutigaa nutaarsiassat nuannersut pillugit oqaluus­sisartut nutaarsiassanik nuannersunik inuussuteqassasut.

15 Pisinnaatitaaffiilli taakkua arlaannaal­luunniit atorsiman­ngilara. Taama pineqaq­qullunga allanngilanga, tassami toqorusun­neruvunga ... Tulluusimaar­nissamut pissutigisannik kimilluunniit arsaarneqas­sanngilanga! 16 Nutaarsiassat nuannersut pillugit oqaluussinera tulluusimaar­nissamut pissutis­saanngilaq, tamannami pisussaaf­figigakku. Nutaarsiassammi nuannersut pillugit oqaluus­sinngikkuma ajorluin­nartumik pineqassaanga! 17 Kajumillunga taamaalioruma akissarsissaanga. Kajumin­nangali taamaalioraluaruma suli nakkutil­liisuutitatut akisussaaf­feqarpunga. 18 Taavami suna akissarsiarissavara? Nutaarsiassat nuannersut pillugit akeqanngitsumik oqaluus­sisinnaaneq. Taamaalillunga nutaarsiassanut nuannersunut tunngatillugu piginnaatitaanera* atornerlus­sanngilara.

19 Kimulluunniit inussiaataan­ngikkaluarlunga sapinngisamik amerlanerpaat ikiorsin­naajumallugit tamanut inussiaatin­ngorpunga. 20 Juutit ikiorumallugit juutinut juutisut ilerpunga. Moorsisip inatsisaanik maleruaasut ikiorumallugit taakkuninnga maleruaan­ngikkaluarlunga Moorsisip inatsisaanik maleruaasunut taakkuninnga maleruaasutut ilerpunga. 21 Guutip inatsisai Kristusillu inatsisai maleruaraluarlugit Moorsisip inatsisaanik maleruaan­ngitsut ikiorumallugit taakkununnga Moorsisip inatsisaanik maleruaan­ngitsutut ilerpunga. 22 Sanngiitsut ikiorumallugit sanngiitsunut sanngiitsun­ngorpunga. Inuit ilaannaan­nilluunniit annaassaqarumallunga qanorluunniit ittut ikiorumallugit sapinngisannik iliuuseqar­tarpunga. 23 Nutaarsiassat nuannersut allanut oqaluus­sissutigiumallugit qanorluunniit iliuuseqar­tarpunga.

24 Nalugassiuk arpaliut­tarfimmi arpattut tamarmik arpattartut, ataasiinnarli ajugaasutut akissarsisin­neqartartoq? Ajugaajumallusi arpagitsi. 25 Unammisitsinermi peqataasut* tamarmik sutigut tamatigut imminut aquttarput. Soorunami taamaaliortarput niaqorut toquliortussaq pissarsiariumallugu, uagulli taamaalior­tarpugut toqulior­tussaan­ngitsoq pissarsiariumallugu. 26 Taamaattumik anguniagaqan­ngitsutut arpanngilanga. Tillueriaraangama silaannarmut tillueriartutut inneq ajorpunga. 27 Allanut oqaluus­sereeruma arlaannik pissuteqartumik iluarisaajun­naaqinagama* timiga tilluarlugulu* inussiatut pisarpara.

10 Maanna, qatanngutit, kissaatigaara eqqaamassagisi siuaasagut tamarmik nuissap ataanniittut tamarmillu immakkut ingerlasut 2 tamarmillu Moorsisip malinneratigut nuissamut immamullu morsutsitaasut. 3 Tamarmik anersaakkut nerisassanik assigiinnik neripput 4 tamarmillu anersaakkut imermik assigiimmik imerlutik. Anersaakkummi qaarsumit malinnaasumit imertarput, qaarsorlu taanna Kristusimut assersuutaavoq. 5 Taamaattorli Guutip taakkua amerlanerpaartaat iluarinngilai, inoqajuitsumimi toqunneqarput.

6 Pisimanerattut ajoqutaasunik pilerigisaqan­nginnias­sagatta pisut tamakku tamarmik uagutsinnut ilinniutis­sanngorput. 7 Aamma taakkua ilaasa pisimanerattut guutipilus­siussan­ngilasi. Soorlu allassimasoq: “Israalikkut ingeriarlutik nerillutillu imerput. Taava nuannisar­niarlutik nikuipput.” 8 Aamma taakkua ilaasa pisimanerattut atoqatigiinnikkut eqqunngitsulius­sanngilagut,* taakkuami ilaat 23.000-t atoqatigiinnikkut eqqunngitsuliorneq* pissutigalugu ullormi ataatsimi toqunneqarput. 9 Aamma taakkua ilaasa pisimanerattut Jehova misilis­sanngilarput, taakkumi pulateriaarsunnit toqunneqarput. 10 Aamma taakkua ilaasa pisimanerattut naammagit­taallius­sanngilagut, taakkumi suujunnaarsitsisumit toqunneqarput. 11 Taakkununnga pisut uagutsinnut naggatissap nalaani inuusunut mianersoq­qussutitut ilinniutis­satullu allanneqarput.

12 Taamaattumik kinaluunniit nikorfasorisoq orloqqunani mianersorli. 13 Inuit tamarmik usserneqar­tarnerattut usserneqar­tarpusi. Guutili aalajaappoq, artukkas­sinnillu usserneqar­nissarsi akuerinavianngilaa, usserneqar­nissinnili pinertusaarsin­naaqqullusi ikiussavaasi.

14 Taamaattumik, asasakka, guutipilus­siorneq qimarratigisiuk. 15 Naliliisin­naassuseqarassi eqqortumik oqalunnersunga nammineq aalajangis­savarsi. 16 Imerfik qujassut qujassutigisar­tagarput imerfigigaangatsigu Kristusip aavanik pissarsiaqar­tanngin­nerpugut? Iffiaq-qaqortoq* aggortagarput nerigaangatsigu Kristusip timaanik pissarsiaqar­tanngin­nerpugut? 17 Iffiaq-qaqortoq ataasiin­naammat amerlagaluarluta timiuvugut ataaseq, tamattami iffiaq-qaqortoq ataaseq taanna nerisaratsigu.

18 Israalikkut eqqarsaatigisigit: Pilliivimmi pilliutigineqartunik nerinerat Guutimik nereqateqarnertut innginnerpa? 19 Sunaana pigiga? Guutiliamut pilliutigineqartup imaluunniit guutiliap pingaaruteqarnera? 20 Naamik, guutipilus­siortulli pilliuteqaraangamik Guutimut pinnatik anersaapilunnut pilliuteqar­tarnerat pivara. Anersaapilunnillu ataasioqateqar­nissarsi kissaatigin­ngilara. 21 Jehovap imerfia anersaapiluillu imerfiat ataatsikkut imerfigisin­naanngilasi. “Jehovap nerrivia” anersaapiluillu nerriviat ataatsikkut neriffigisin­naanngilasi. 22 Imaluunniit ‘Jehova kamassaarparput’? Taassumannga nukittunerugatta?

23 Suut tamarmik inerteq­qutaanngillat, imaanngilarli suut tamarmik iluaqutaasut. Suut tamarmik inerteq­qutaanngillat, imaanngilarli suut tamarmik ineriar­tornartuusut. 24 Tamassi immikkut iluaqutissarsi pinnagu allap iluaqutissaa salliussiuk.

25 Neqaarniarfimmi tunisat suulluunniit nalunngeqatigin­nissutersi pissutigalugu apereqqaarnasi nerisin­naavasi 26 nalunngin­natsigu “Jehovap nunarsuaq tassaniittullu tamaasa pigigai”. 27 Uppertuun­ngitsumit qaaqqusaasimagussi sassaal­liutigineqartut suulluunniit nalunngeqatigin­nissutersi pissutigalugu apereqqaarnasi nerissavasi. 28 Imali oqarfigineqarussi: “Una guutipilunnut pilliutaavoq”, taama oqartoq nalunngeqatigin­nissullu pillugit nerissan­ngilarsi. 29 Illit nalunngeqatigin­nissutit pinnagu allap nalunngeqatigin­nissutaa pivara. Namminermi aalajangiisin­naatitaanera allap nalunngeqatigin­nissutaanit assuarineqar­nissamut atorusun­ngilara. 30 Neriguma Guutilu qutsavigalugu taava sooq qujassutigisara pillugu isornar­torsior­neqassaanga?

31 Taamaattumik nerinermi, imernermi qanorluunniillu iliornermi Guuti sutigut tamatigut ataqqinarsisit­tassavarsi. 32 Juutinut, grækerinut Guutillu ilagiivinut naakkius­sutaanaveersaar­taritsi. 33 Uanga inuit tamarmik iluaqutis­saannik tamatigut iliorniar­tarpunga. Nammineq iluaqutissara tunulliullugu amerlasuut annaanneqaq­qullugit iluaqutissaat salliut­tarpara.

11 Kristusimik ilaarsinittut uannik ilaarsisun­ngoritsi.

2 Eqqaamajuarassinga ilissinnullu ilinniar­titsissutigisakka aalajangiusimagassigit nersualaarusuppassi. 3 Kissaatigaarali ilisimas­sagissi angutip kialuunniit Kristusi niaqorimmagu, arnap angut niaqorimmagu Kristusillu Guuti niaqorimmagu. 4 Angut kinaluunniit niaqqumigut uleqarluni qinusoq siulittuisorluunniit* niaqquminik kanngunarsaavoq. 5 Arnarli kinaluunniit niaqqumigut uleqarnani qinusoq siulittuisorluunniit* niaqquminik kanngunarsaavoq, assigiin­nassagaluaramiummi qapersimaguni. 6 Arnarmi niaqqumigut uleqanngikkuni nujaajar­tariaqarpoq. Nujaajarnerli qapernerluunniit arnamut kanngunar­tuummat niaqqumigut uleqartariaqarpoq.

7 Angutip Guutimut assingunini ataqqinaataaninilu pissutigalugit niaqquni ulissanngilaa, arnarli angummut ataqqinaataavoq. 8 Angummi arnamit pinngilaq, arnarli angummit pivoq. 9 Tamatuma saniatigut angut arnaq pillugu pinngor­titaanngilaq, arnarli angut pillugu pinngor­titaavoq. 10 Tamanna inngilillu pissutigalugit arnaq kajumilluni naalannerminut takussutis­saasumik niaqqumigut uleqassaaq.

11 Naalakkamik malinnittuni angutip arnaq pisariaqartippaa arnallu angut pisariaqar­tillugu. 12 Soorlumi arnaq angummit pisoq, taamatuttaaq angut arnamit erniuvoq. Suulli tamarmik Guutimit pipput. 13 Nammineq nalilersiuk: Arnap niaqqumigut uleqarnani Guutimut qinunera naleqquppa? 14 Angutip takisuunik nujaqarnera pissusis­samisoornanilu kanngunarsaataan­nginnerpa, 15 arnalli takisuunik nujaqarnini ataqqinaatigin­nginnerpaa? Arnarmi uligisas­saminik nujaqar­tinneqarpoq. 16 Immaqa ilaasa tamanna akerlilissavaat, uagulli Guutillu ilagiivi allamik ileqqoqan­ngilagut.

17 Ataatsimiit­tarnisili iluaqutaanatik ajoqutaammata tamakku pillugit ilitsersuininni nersualaan­ngilassi. 18 Tusarparami ilagiittut ataatsimiik­kaangassi avissaar­tuuttartusi, tamannalu ilumoor­tortaqarsoraara. 19 Aamma ilissinni immikkoor­niartoqalerumaarpoq, taamaalillunili ilasi kikkut Guutimit iluarisaanersut ersaris­sissaaq.

20 Naalakkap unnukkorsior­titsinerani ataatsimoor­tarnersi eqqortumik ingerlanneq ajorparsi. 21 Nerereersimallusimi unnukkorsioriar­tarpusi. Ataaseq kaattarpoq allalu aalakoor­tarluni.* 22 Neriffigisin­naasassinnik imerfigisin­naasassinnillu illoqan­nginnassi? Imaluunniit Guutip ilagiivi nikagalugillu suuteqan­ngitsut kanngusutsit­tarpisigit? Qanoq oqarfigis­savassi? Nersualaas­savassi? Naamerluinnaq!

23 Unami Naalakkap ilinniar­titsissutaa ilissinnut ingerlateq­qippara: Naalagaq Jiisusi unnummi akeqqanut pisitaaf­fissamini iffiaq-qaqortoq* tiguaa, 24 Guutimullu qujariarluni aggoramiuk oqarpoq: “Taanna timinnut, ilissi pillusi pilliutigineqar­tussamut, assersuutaavoq. Taamaalior­tuaritsi eqqaaniarlunga.” 25 Unnukkorsioreeramik imerfik tigoriarlugu aamma taamaaliorpoq oqarlunilu: “Imerfik taanna uanga aannut, isumaqatigiissummik* nutaamik atuutsitsilersussamut, assersuutaavoq. Imeraangassiullu tamatigut taamaalior­tassaasi eqqaaniarlunga.” 26 Iffiaq-qaqortoq una nerigaangassiuk imerfimmiillu uannga imeraangassi Naalakkap toqunera tikiunnissaata tungaanut oqaluus­sissutigisarparsi.

27 Kinaluunniit pisassarin­ngisamisut iffiamik-qaqortumik nerisoq imaluunniit imerfimmiit imertoq Naalakkap timaanut aavanullu ataqqin­ninngitsuliorpoq. 28 Inuk imminut misissoq­qaarluni akuerissaaq, aatsaallu taamaalioreeruni iffiamik-qaqortumik nerisin­naallunilu imerfimmiit imersinnaavoq. 29 Timimmi qanoq pingaaruteqar­tigineranik paasinninnani nerillunilu imertoq eqqartuun­neqaatis­saminik nerillunilu imerpoq. 30 Taamaattumik ilarpassuasi sanngiil­lutillu napparsimapput amerlasuullu sinippaarlutik.* 31 Immitsinnulli eqqortumik nalilersorutta eqqartuun­neqassan­ngilagut. 32 Eqqartuun­neqaraangattali inuit ajortut ilagalugit pillarneqan­nginnias­sagatta Jehovamit perorsaatis­sinneqar­tarpugut. 33 Taamaattumik, qatanngutikka, Naalakkap unnukkorsior­titsinerani katersuuk­kaangassi ilasi utaqqeq­qaartassavasi. 34 Eqqartuun­neqaatis­sassinnik katersuutin­nginnias­sagassi kaattoq angerlarsimaf­fimmini nerissaaq. Sinnerili takkukkuma aaqqikkumaarpakka.

12 Maanna, qatanngutit, anersaakkut tunissutinut tunngatillugu ilisimasaqarluar­nissarsi kissaatigaara. 2 Nalunngilarsi uppertuun­ngikkal­larassi* sunnerneqarnersi tammartin­neqarnersilu pissutigalugit guutiliat oqajuitsut sumulluunniit malittarlugit. 3 Kissaatigaara paasissagissi kinaluunniit Guutip anersaavanit siulersortittoq oqarneq ajortoq: “Jiisusi perloqqusaavoq!” Aatsaallu anersaamit illernartumit siulersor­tilluni ima oqartoqarsinnaavoq: “Jiisusi Naalagaavoq!”

4 Tunissutit assigiin­ngitsuupput, ataasiin­narmilli anersaaqarpoq. 5 Kiffartoriaatsit assigiin­ngitsuupput, ataasiin­narmilli Naalagaqarpoq. 6 Guutip inuit assigiin­ngitsunik iliuuseqar­tittarpai, ataasiin­narmilli Guuteqarpoq. 7 Anersaalli illernartup ikiuinera inunni ataasiakkaani ersarittarpoq, Guutillu tamanut iluaqutissatut tunniuttarpaa. 8 Anersaaq taanna aqqutigalugu inuk ilisimas­suseqarluni oqalussin­naanermik* tunineqartarpoq, allalu anersaamit tassannga paasisimasaqarluni oqalussin­naanermik tunineqartarpoq. 9 Alla anersaamit tassannga uppernermik tunineqartarpoq allalu anersaamit ataatsimit tassannga ajorunnaarsitsisin­naanermik tunineqar­tarluni 10 allalu tupinnar­tuliorsin­naanermik, alla siulittuisin­naanermik, alla isumassarsisitaalluni oqaatigineqartunik nalilersuisin­naanermik, alla allamiutut oqalussin­naanermik allalu oqaatigineqartunik nutserisin­naanermik. 11 Anersaarli taanna ataaseq tamakkuninnga tamanik iliuuseqar­titsisarpoq. Anersaap piginnaasat taakku piumasamisut inunnut ataasiakkaanut agguaattarpai.

12 Soorlu timi ataasiugaluarluni amerlasuunik avateqartoq avatillu tamarmik timimiittut amerlagaluarlutik timi ataasiusoq, taamatuttaaq Kristusi ippoq. 13 Tamattami – juutiunerput grækeriunerpul­luunniit, inussiaanerput inussiaan­nginnerpul­luunniit apeqqutaatinnagit – anersaamit ataatsimit timimut ataatsimut morsutsin­neqarpugut tamattalu anersaamik ataatsimik imigassin­neqarluta.

14 Timimi ataasiinnarmik avateqarnani amerlasuunik avateqarpoq. 15 Isigak oqassagaluaruni: “Assaannginnama timimut ilaanngilanga”, suli timimut ilaavoq. 16 Siullu oqassagaluaruni: “Isiunnginnama timimut ilaanngilanga”, suli timimut ilaavoq. 17 Timi tamarmi isiugaluaruni qanoq tusaasin­naassagami? Tamarmi siutaagaluaruni qanoq naamasin­naassagami? 18 Guutilli timip avatai tamaasa immikkut iluarisamisut inissippai.

19 Avat ataaseq timiugaluaruni qanoq timiusin­naagami? 20 Avatilli amerlapput timili ataasiulluni. 21 Isi assammut oqarsin­naanngilaq: “Pisariaqar­tinngilakkit.” Niaqorlu isikkanut oqarsin­naanngilaq: “Pisariaqar­tinngilassi.” 22 Timilli avatai sanngiip­pasissut pisariaqarput, 23 timillu pisatai ataqqinan­nginnerusorisagut ataqqinar­nerusutut pisarpagut tulluusimaarutigin­ngisagullu isumagil­luarnerusarlugit 24 kusanar­nerusulli isumagisariaqarnagit. Guutilli timi katiteramiuk ataqqinan­nginnerusut ataqqinar­nerusutut pineqar­tussanngortippai. 25 Taamaattumik timip avatai avissaar­tuunnatik isumassoqatigiit­tariaqarput. 26 Avat ataaseq naalliuk­kaangat avatit allat tamarmik naallioqatigisarpaat. Avallu ataaseq ataqqinarsisin­neqaraangat avatit allat tamarmik nuannaaqatigisarpaat.

27 Ilissi Kristusip timigaasi, tamassilu immikkut avatiuvusi. 28 Guutillu ilagiin­niittut tamaasa immikkut suliassippai: Siullermik apustilit, aappaannik pruffiitit, pingajuannik ilinniar­titsisut, taava tupinnar­tuliortartut, taava ajorunnaarsitsisinnaasut, ikiortit, siulersuisinnaasut allamiutullu oqalussinnaasut. 29 Tamarmik apustiliugamik? Tamarmik pruffiitiugamik? Tamarmik ilinniar­titsisuugamik? Tamarmik tupinnar­tuliortaramik? 30 Tamarmik ajorunnaarsitsisin­naagamik? Tamarmik allamiutut oqalussin­naagamik? Tamarmik nutserisuugamik?* 31 Tunissutilli annerusut pissarsiariniar­tuarsigit. Taakkunanngali pitsaanerungaartumik ilinniar­tissavassi.

13 Inuttut inngilitul­luunniit oqalussin­naaguma asannin­neqarnangali saviminertut anaaler­neqartutut nipeqassaanga. 2 Siulittuisin­naagumalu Guutillu isertugaatai tamaasa paasisin­naagukkit suullu tamaasa pillugit paasisimasaqas­suseqaruma allaallu qaqqanik nuussisin­naasumik uppersuseqaruma asannin­neqarnangali, taava suunngilanga.* 3 Allallu nerisin­niarlugit pigisakka tamaasa tunniukkukkit oqarataarumal­lungalu timiga pilliutigigukku asannin­neqarnangali, taava iliuutsikka iluaqutiginavian­ngilluin­narpakka.

4 Asanninneq naammagit­tartuuvoq inussiar­nersuullunilu. Asanninneq sinnganeq ajorpoq. Oqarataarneq ajorpoq, pingaakujunneq ajorpoq, 5 naleqqutin­ngitsumik* pissuseqarneq ajorpoq, namminis­sarsiorneq ajorpoq qinngaritsaas­sinerlu ajorluni. Ajuallatsin­neqarnernik* naatsorsuusiorneq ajorpoq. 6 Asanninnerup naapertuil­luannginneq nuannaarutigineq ajorpaa, ilumoortorli nuannaarutigisarlugu. 7 Suut tamaasa naammagalugit atortarpai, upperisarpai, neriuutigisarpai pinertusaar­tuarlunilu.

8 Asanninneq atuuttuassaaq.* Kisianni siulittuisinnaaneq, tupinnar­tuliornikkut allamiutut oqalussinnaaneq paasisimasaqas­suserlu atuukkun­naarsin­neqassapput. 9 Ilaannakuusumimmi paasisimasaqas­suseqarlutalu siulittuisarpugut, 10 tamakkiisumilli taamaaliorsin­naalerutta ilaannakuusut atuukkun­naarsin­neqassapput. 11 Meeraagallarama meeqqatut oqaluttarlungalu eqqarsar­tarlungalu inerniliisarpunga. Inersimasun­ngoramali meeqqatut pissuseqarun­naarpunga. 12 Maannami tarrarsuut saviminiusoq atorlugu takusagut ersarlupput, taamanik­kussamulli suut tamarmik ersaris­sissapput. Maanna paasisimasaqassusera ilaannakuuvoq, taamanik­kussamulli Guutimit ilisimaneqarluarnittut tamakkiisuussaaq.* 13 Ukuli pingasut atuutissapput: Upperneq, neriunneq asanninnerlu. Asanninnerli taakkunani pingaar­nerpaavoq.

14 Asannit­tuliortuaritsi. Aammali anersaakkut tunissutinik, pingaartumik siulittuisin­naanermik,* pissarsiniar­tuaritsi. 2 Allamiutummi oqaluttoq inunnut pinnani Guutimut oqaluppoq. Oqaasii kimilluunniit paasineqarneq ajorput, anersaallu ikiuineratigut Guutip isertugaataanik eqqartuisarpoq. 3 Siulittuisorli* oqaatsimigut ineriar­tortitsillunilu qiimmas­saallunilu tuppallersaasarpoq. 4 Allamiutut oqaluttoq imminut ineriar­tortittarpoq, siulittuisorli* ilagiinnik ineriar­tortitsisarpoq. 5 Tamassi allamiutut oqalussin­naanissarsi kissaatigigaluarlugu siulittuisin­naanersi* iluarinerussavara. Tassami ilagiit ineriar­torteqqullugit allamiutut oqaluttup oqaasii nutserneqan­ngippata siulittuisartoq* taassumannga annerussaaq. 6 Qatanngutit, allamiutut oqalullunga ilissinnut tikikkaluaruma qanoq iluaqutigis­sagassiuk? Ikiussagussi Guutimit saqqummersitaq, paasisimasaqassuseq, siulittuut ilinniar­titsissul­luunniit atortariaqarpara.

7 Nipilersuutinut, soorlu qarlortaammut* kukkilat­tarissamul­luunniit, tunngatillugu aamma taamaappoq. Nipaat ersarluppat qarlortaat kukkilat­tariarluunniit atorlugu suna nipilersor­neqartoq qanoq paasineqarsin­naagami? 8 Qarlortaatimmi* kalerrisaarutaa ersarluppat kina sorsugiar­nissamut piareersassagami? 9 Taamatuttaaq oqarsi atorlugu paasiuminaatsumik oqalukkussi kia oqaatigineqartut paasisin­naassagamigit? Taamaappat silaannarmut oqalussaasi. 10 Nunarsuarmi oqaatsit amerlapput tamarmillu paasineqarsin­naallutik. 11 Oqaatsit isumaat paasinngikkukkit oqaluttumut takornartatut issaanga, oqaluttorlu uannut takornartatut issaaq. 12 Ilissinnut tunngatillugu aamma taamaappoq. Anersaap tunissutai ilungersorlusi pissarsiariniar­tarassigit ilagiinnut ineriar­tuutaasunik amerlasuunik pissarsinissarsi sulissutigisiuk.

13 Taamaattumik allamiutut oqaluttup oqalutseqar­nissani* qinnutigiliuk. 14 Allamiutummi oqalullunga qinuguma anersaap tunissutaa uanniittoq oqalussaaq, namminerli oqaatsikka paasinavian­ngilakka. 15 Taava qanoq iliussaanga? Anersaap tunissutaa atorlugu qinussaanga, aammali silaqassusera atorlugu qinussaanga. Anersaap tunissutaa atorlugu erinalimmik unnersiutigin­nissaanga, aammali silaqassusera atorlugu erinalimmik unnersiutigin­nissaanga. 16 Anersaap tunissutaa atorlugu Guuti unnersiutigalugu qujaguit inuinnaq ilagisat oqaatsinnik paasisaqan­ngitsoq qanoq ililluni oqarsin­naassava “amen”? 17 Qujasarnerit ajunngilaq, allali ineriar­tortinneqarneq ajorpoq. 18 Guuti qutsavigisarpara ilissinnit tamanit allamiutut oqaatsinik amerlanerusunik oqaluttarama. 19 Ilagiin­niittulli ilitsersorumallugit allamiutut oqaatsit 10.000-t atornagit oqaatsit tallimat silaqassusera atorlugu oqaatigerusun­neruakka.

20 Qatanngutit, silaqas­sutsimut tunngatillugu meeqqatut issanngilasi, ajussutsimulli tunngatillugu meeqqatut issaasi. Silaqas­sutsimullu tunngatillugu inersimal­luartun­ngussaasi. 21 Inatsisini allassimavoq: “ ‘Allamiut takornartallu oqaasii atorlugit inuiaqatigiit taakku oqaluutis­savakka, taamaattorli tusaajumas­sanngilaannga,’ taama Jehova oqarpoq.” 22 Taamaattumik allamiutut oqalussinnaaneq uppertunut pinnani uppertuun­ngitsunut uppernarsaataavoq siulittuisin­naanerli uppertuun­ngitsunut pinnani uppertunut uppernarsaataalluni. 23 Ilagiit tamarmiullutik katersuun­nerminni tamarmik allamiutut oqalutsillugit inuinnaat uppertuun­ngitsul­luunniit iserunik oqassan­nginnerpat silaarus­simasusi? 24 Tamassili siulittuitillusi* uppertuun­ngitsoq inuinnarluunniit iseruni oqaatigineqartunit tamanit oqaaqqis­saarneqartutut naliler­neqartutullu misigissaaq. 25 Uummatimini isertukkat paasilerunigit Guuti ima oqarluni pallorfigissavaa: “Ilumut Guuti akornas­sinniippoq.”

26 Qatanngutit, katersuuk­kaangassi ima pisoqartarpoq: Ataaseq tussiartarpoq, alla ilinniar­titsisarpoq, alla Guutimit saqqummersitanik eqqartuisarpoq, alla allamiutut oqaluttarpoq allalu oqaluttaasarluni. Suut tamarmik ineriar­tuutaasumik ingerlan­neqassapput. 27 Allamiutut oqaluttoqaruni amerlanerpaamik marluk pingasul­luunniit ataasiak­kaarlutik oqaluttassapput, oqalutseqar­tariaqarpullu.* 28 Oqalutseqan­ngippalli* ilagiinni nipangersimasariaqarput uummatimikkullu Guutimut oqalullutik. 29 Pruffiitit marluk pingasul­luunniit oqalussapput, allallu isumaannik paasiniaassapput. 30 Allali issiatilluni Guutimit saqqummersitsivigineqarpat oqaluttoq siulleq nipangissaaq. 31 Kikkut tamarmik ilikkagaqar­niassammata qiimmas­sarneqar­niassammatalu tamassi ataasiak­kaarlusi siulittuisin­naavusi.* 32 Pruffiitillu anersaamit tunissutisiaminnik aqutsissapput. 33 Guutimmi suut tamarmik paatsiveqan­ngitsumik pinnatik eqqissisimasumik pinissaat kissaatigaa.

Illernartut ilagiivini tamani pisoqar­tarneratut 34 arnat ilagiinni oqaaseqaq­qusaannginnamik nipangersimassapput. Kajumillutik naalassapput, soorlu Guutip inatsisaani aamma taama allassimasoq. 35 Arnat ilagiinni oqaaseqarnerat ataqqin­nittulior­nerunngimmat arlaannik paasisaqan­ngikkunik uitik angerlarsimaf­fimminni aperissavaat.

36 Guutip oqaasia ilissinnit aallaaveqarpa, imaluunniit ilissin­nuinnaq annguppa?

37 Kialuunniit pruffiitiusorisup anersaamil­luunniit tunineqarsimasorisup akuerisariaqarpaa ilissinnut allaatigisakka tassaasut Naalakkap inassutai. 38 Tamatuminngali akuersin­ngitsoq akuerineqas­sanngilaq.* 39 Taamaattumik, qatanngutikka, siulittuisin­naanissarsi sulissutigiuarsiuk allamiutulli oqaluttoqar­tarnissaa inerteq­qutiginagu. 40 Suulli tamarmik eqqortumik aaqqissuus­saasumillu* ingerlan­neqartassapput.

15 Maanna, qatanngutit, nutaarsiassat nuannersut ilissinnut oqaluus­sissutigisakka upperalugillu aalajangiusimasasi pillugit eqqaasin­niarpassi. 2 Nutaarsiassat nuannersut ilissinnut oqaluus­sissutigisakka aalajangiusimajuarussigit annaanneqassaasi. Taamaan­ngippat asulersuaq uppertun­ngorsimassaasi.

3 Ilissinnut ilinniar­titsissutigisakka ilikkakkama siulliit ilagaat: Allakkat Illernartut naapertorlugit ajortuliagut pillugit Kristusi toqusoq, 4 ilisaasoq, aap, Allakkat Illernartut naapertorlugit ullut pingajuanni toqusunit makititaasoq, 5 Keefassimut* taavalu aqqaneq-marlunnut takutittoq. 6 Tamatuma kingorna qatanngutit 500-nit amerlanerusut ataatsikkut takuaat. Amerlanersaat suli inuupput, ilaalli toqoreerput. 7 Tamatuma kingorna Jaakumut taavalu apustilinut tamanut takutippoq. 8 Naggataatigulli uannut, siusinaarluni inunngorsimasutut ittumut, takutippoq.

9 Apustilinimi minnersaavunga, Guutillu ilagiivi malersorakkit apustilisut taaneqar­nissamut ajukkuppunga. 10 Guutilli ajunngisaangaarfigimmanga apustiliuvunga. Asulersuarlu ajunngisaangaarfigin­ngilaanga, taakkunanngami tamanit tamaviaar­neruvunga – imaanngitsoq nukittugama, Guutilli ajunngisaangaarfigimmanga. 11 Uanga apustileqatikkalu tamanna oqaluus­sissutigaarput, taamaalillusilu uppertun­ngorpusi.

12 Kristusip toqusunit makititaanera oqaluus­sissutigineqarmat sooq taava ilasi oqartarpat toqusunik makititsisoqas­sanngitsoq? 13 Toqusunimmi makititsisoqas­sanngippat taava Kristusi toqusunit makititaasimas­sanngilaq. 14 Kristusili toqusunit makititaasiman­ngippat oqaluus­sinerput asuliin­naassaaq uppernersilu aamma asuliin­naassalluni. 15 Tamatumalu saniatigut oqartaratta Guutip Kristusi toqusunit makitis­simagaa sallulluta Guuti pillugu ilisiman­nittutut nassuiaasuusimassaagut, toqusummi makititaas­sanngippata Kristusi makitis­simanavian­ngimmagu. 16 Toqusummi makititaas­sanngippata Kristusi makititaasimas­sanngilaq. 17 Aamma Kristusi makititaasiman­ngitsuuppat uppernersi iluaqutaasimas­sanngik­kaluarpoq, ajortuliassinnit suli iperagaasimas­sanngik­kaluarpusi. 18 Taamaappat aamma Kristusi ataasioqatigalugu toqusut annaaneqarsimassapput. 19 Inuunermi matumaniinnaq Kristusi neriuffigigutsigu allanit tamanit naakkinar­nerpaassaagut.

20 Kristusili, toqusuni inerittutut siullersaalluni, makititaasimavoq. 21 Angut ataaseq aqqutigalugu toqusoqar­talerneratut angut ataaseq aqqutigalugu toqusut makitin­neqassapput. 22 Soorlu Adami pissutigalugu inuit tamarmik toqusartut, taamatuttaaq Kristusi pissutigalugu tamarmik uummaqqissapput. 23 Tamarmilli tulleriiaassapput: Kristusi inerittuni siullersaalluni tamatumalu kingorna Kristusip najuunnermini pigisai. 24 Taava naggatissami naalakkersuisut tamaasa oqartus­saasullu pissaanillillu tamaasa suujunnaarsereerunigit Kunngeqarfik Guutiminut Ataataminullu tunniutissavaa. 25 Akeqqammi isikkami ataannut Guutimit inissin­neqarnissaasa tungaanut kunngisut naalakkersuissaaq. 26 Akerarlu kingulleq, toqu, suujunnaarsin­neqassaaq. 27 Guutimmi “suut tamaasa isigaasa ataannut inissippai”. Oqarmallu ‘suut tamarmik taassuma ataanut inissin­neqartut’ soorunami Guuti sunik tamanik taassuma ataanut inissiisoq pineqanngilaq. 28 Guutilli suut tamaasa Ernermi ataanut inissereerpagit Erneq Guutip, sunut tamanut oqartus­saasunngor­titsisumi, ataanut imminut inississaaq Guuti kikkunnut tamanut Naalakkersuisutuaaleq­qullugu.

29 Taamaan­ngippat toqunissaq siunertaralugu morsutsitaasut qanoq pissappat? Toqusut makititaas­sanngippata taava sooq toqunissaq siunertaralugu morsutsitaappat? 30 Sooq ulorianar­torsior­tuarpugut? 31 Ullut tamaasa toqu ajapertarpara. Qatanngutit, Kristusimik Jiisusimik Naalakkatsinnik malinnittusi, ilissinnik tulluusimaarutigin­ninnittut tamanna qularnan­ngitsigaaq. 32 Inuttut allatulli* Efesossimi uumasunik nujuartanik akiuisimanera qanoq iluaqutigis­sagakku? Toqusut makititaas­sanngippata taava “nerillutalu imerniarta, aqagumi toqussagatta”. 33 Tammarniaqinasi. Ileqqorluttunik* ilagisaqartarneq ileqqorinnermut aserorsaataasarpoq. 34 Silattor­niaritsi eqqortuliorlusilu. Ajortulior­tuassan­ngilasi, ilasimi Guutimik ilisarisiman­ninngillat. Kanngusulersin­niarlusi taama allappunga.

35 Ilaalli aperissapput: “Toqusut qanoq makititaas­sagamik? Aap, makititaagunik qanoq ittumik timeqas­sagamik?” 36 Sianiitsutit! Naajartortussaq siaruartikkat aatsaat toqoqqaarluni uummartarpoq. 37 Aamma kanaartaq* siaruar­ternagu taamaallaat karrertaq, qajuusiassap naajartor­tussalluunniit allap karrertaa, siaruar­tertarpat. 38 Guutilli iluarisamisut ilusilersortarpaa,* naajartor­tussallu tamaasa immikkut iluseqar­tittarpai.* 39 Timit tamarmik assigiin­ngitsuupput. Inuit timeqarput allaasumik, nersutaatit allaasumik, timmissat allaasumik aalisakkallu allaasumik. 40 Aamma qilammiusunik timeqarpoq nunamiusunillu timeqarluni. Qilammiusulli timaasa alutornassusiat allaavoq nunamiusullu timaasa alutornassusiat allaalluni. 41 Seqerngup qaammatillu alutornassusii assigiin­ngillat, ullorissallu alutornassusiat allaalluni. Aap, ullorissat tamarmik immikkut alutornas­suseqarput.

42 Taamatuttaaq toqusut makititaasussat issapput. Siaruar­terneqartoq mikiartarpoq,* makitin­neqartorli mikiarsin­naanngilaq.* 43 Siaruar­terneqartoq nikanartuuvoq, makitin­neqartorli alutornarpoq. Siaruar­terneqartoq sanngiippoq, makitin­neqartorli pissaaneqarpoq. 44 Siaruar­terneqartoq inuttut timeqarpoq, makitin­neqartorli anersaatut timeqarpoq. Inuttut timeqar­toqarpat taava aamma anersaakkut timeqar­toqassaaq. 45 Soorlu allassimasoq: “Inuk siulleq Adami inunngorpoq uumassusilik.” Adami kingulleq anersaan­ngorpoq inuussutaasoq. 46 Anersaakkulli timi siulliunngilaq. Inuttut timi siulliuvoq tamatumalu kingorna anersaakkut timi pinngorluni. 47 Inuk siulleq nunarsuarmeerpoq pujoralammillu pinngor­tinneqarluni. Inuup aappaa qilammeerpoq. 48 Pujoralammik pinngor­tinneqartut pujoralammik pinngor­tinneqartoq assigaat. Qilammiusullu qilammiusoq assigaat. 49 Soorlu pujoralammik pinngor­tinneqartumut assingusugut, taamatuttaaq qilammiusumut assingulissaagut.

50 Kisianni qatanngutit, allaffigaassi: Inuttut timillit Guutip kunngeqarfianik kingornus­sisinnaan­ngillat mikiarsimasullu mikiarsiman­ngitsunik* kingornus­sisinnaanatik. 51 Guutip isertugaataanik oqaluttuutis­savassi: Ilagut sinippaas­sanngillat, tamattali allanngussaagut 52 imaalial­laannaq, uisorer­nerinnaq, naggammik qarlortar­toqarnerani.* Qarlortar­toqarpammi toqusut makitin­neqassapput mikiarsin­naanngitsunillu* timeqalis­sallutik, uagullu allanngussaagut. 53 Mikiarsin­naasormi mikiarsin­naanngitsumik atisisariaqarpoq toqusus­saasorlu toqujuis­sutsimik atisisariaqarluni. 54 Mikiarsin­naasorli mikiarsin­naanngitsumik atisippat toqusus­saasorlu toqujuis­sutsimik atisippat oqaatsit uku allassimasut eqquutissapput: “Toqu qaqugorsuarmut nungutin­neqarpoq.” 55 “Toqu, naak ajugaanerit? Toqu, naak kapuutit?” 56 Ajorti kapuutaavoq toqussutaasoq, ajortillu pissaanini Moorsisip inatsisaanit pisarpaa.* 57 Guutili qujanarsili, Naalagarpummi Jiisusi Kristusi aqqutigalugu ajugaatim­matigut!

58 Taamaattumik, qatanngutikka asasakka, aalajaal­luinnarlusilu Naalakkamut kiffartornermi ulapputeqar­tuaritsi, nalunngin­nassiummi Naalagaq pillugu tamaviaarnersi asuliin­naanngitsoq.

16 Maanna illernartut pillugit katersuiniarnermut tunngatillugu: Galaatiami ilagiinnut ilitsersuutikka maleruassavasi. 2 Aatsaat tikikkuma katersuiniar­toqanngin­niassammat sapaatip-akunnerata ulluisa siullianni akissaqarnersi naapertorlugu tamassi immikkut immikkoor­titsisassaasi. 3 Tikikkumali allakkassinni angutit akuerisasi kajumillusi tunnius­sassinnik nassartillugit Jerusalemmimut aallartis­savakka. 4 Taqqavun­ngarnissara naleqqus­sorinarpat aallaqatigis­savakka.

5 Makedoniak­kuussagama Makedoniak­kooreeruma ornikkumaarpassi. 6 Imaassinnaavoq sivisuumik najorissi allaalluunniit ilissinni ukiisunga, taamaalillusi sumulluunniit aallaraluaruma qaniornias­sagassinga. 7 Jehovammi akueris­sappagu sivisuumik ilaginissarsi neriuutigigakku sivikitsuinnarmik tikeraarusun­ngilassi. 8 Ullulli piinsip nallius­sineqar­nissaata tungaanut Efesossimiigin­nassaanga 9 oqaluus­sinissamut matorujussuaq uannut ammarneqarsimammat, akerlilersuisulli amerlapput.

10 Timuutiusi tikissappat toqqissisimanissaa isumagis­savarsi, uattummi Jehovap suliassiis­sutaanik suliaqarmat. 11 Taamaattumik nikagineqas­sanngilaq. Qatanngutillu utaqqigatsigu isumannaatsumik uannukar­niassammat qaniussavarsi.

12 Maanna qatanngutitsinnut Apulusimut tunngatillugu: Qatanngutit ilagalugit ilissin­nukaqqullugu kimigiiserfigaara. Massakkut takkunnissani siunertarinngilaa, periarfis­saqalerunili takkukkumaarpoq.

13 Eqqumagitsi, uppernikkut aalajaagitsi, sapiigitsi, pissatsigitsi. 14 Tamatigut asannittumik iliuuseqar­tassaasi.

15 Qatanngutit, ima kimigiiserfigaassi: Nalunngilarsi Steffaanasip illuaniittut Akaarjami siulliullutik uppertun­ngortut* illernar­tunillu kiffartuus­sinissamut tunniul­luinnartut. 16 Aamma ilissi inuit taamaattut suleqataasullu tamaviaarlutillu sulisut kajumillusi naalassavasi. 17 Steffaanasilli Fortunatusillu Akaikusillu najuunnerat nuannaarutigaara, maaniin­nginnis­sinnimi ikiorluarmannga. 18 Uannimmi ilissinnillu nakussatsitsipput. Taamaattumik inuit taamaattut pingaar­tissavasi.

19 Aasiami ilagiit inuulluaq­qusipput. Akviila Priskalu ilagiillu angerlarsimaffianni katersuuttartut Naalakkamik malinnittutut qamannga pisumik inuulluaq­qusipput. 20 Qatanngutit tamarmik inuulluaqquaasi. Illernartumik kunillusi ilasseqatigiigitsi.

21 Uanga, Paulusi, nammineq assannik allallunga inuulluaq­qusivunga.

22 Naalakkamik asannin­ngitsoq perloqqusaali. Naalagarput, qinnuigaatsigit tikiuteq­qullutit! 23 Qanortoq Naalakkap Jiisusip ajunngisaangaarnerata najorilisi. 24 Kristusimik Jiisusimik ataasioqateqartusi tamassi asannittumik inuulluaqquassi.