ROMAMIUNUT

1 Paulusimit, Kristusip Jiisusip inussiaataanit apustiliunis­samullu qaaqquneqartumit, nutaarsiassanik nuannersunik Guutimeersunik oqaluus­sisussatut toqqarneqartumit. 2 Guutip nutaarsiassat nuannersut taakku pruffiitini aqqutigalugit Allakkani Illernartuni itsarli neriorsuutigai. 3 Taakku Erneranut tunngapput. Taanna Daavip kinguaavatut tikiuppoq, 4 anersaalli illernartup pissaaneratigut toqusunit makititaagami Guutip erneratut nalunaarutigineqarpoq. Taanna tassaavoq Jiisusi Kristusi, Naalagarput. 5 Taassumuuna ajunngisaangaarfigineqarpugut. Jiisusip inuiaqatigiinnit tamaneersut uppertun­ngoqqullugit, naalaqqullugit aterminillu ataqqin­neqqullugit apustilitut toqqarpaanga. 6 Aamma ilissi inuiaqatigiin­neersuuvusi Jiisusimit Kristusimit pigineqaq­qullugit qaaqqusaasut. 7 Romamiittut Guutip asasai, illernar­tooqqullugit qaaqqusaasut, tamaasa allaffigaakka:

Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi.

8 Siullertut, tamassi uppernersi inunnit tamanit eqqartor­neqarmat Jiisusi Kristusi aqqutigalugu Guuti qutsavigisarpara. 9 Guutip ernera pillugu nutaarsiassanik nuannersunik oqaluus­sinikkut Guuti ilumoorlunga kiffartorfigaara. Guutillu uppernarsarsinnaavaa qinnutinni eqqaajuarissi. 10 Qinnutigaara ajornan­ngippat Guutillu piumasarippagu kiisami tikeraarsin­naassallusi. 11 Takorusoqaassi, nakussatseq­qullusimi anersaakkut tunissummik avitseqatigerusukkassi 12 imaluunniit allatut oqaatigalugu: Uppernitsigut tamatta qiimmas­saqatigiin­niassagatta.

13 Qatanngutit, ilisimatik­kusuppassi tikeraar­nissarsi arlaleriarlunga pilersaarutigisaraluarlugu manna tikillugu akornuteqar­tarlunga. Suliama inuiaqatigiinni allani inerititaqar­neratut ilissinni inerititaqarnissaa kissaatigaara. 14 Grækerit takornartallu,* ilisimasut ilisimaatsullu, pisussaaf­figigakkit 15 nutaarsiassat nuannersut pillugit aamma ilissi Romamiittusi oqaluus­siffigerusungaarpassi. 16 Nutaarsiassat nuannersut kanngusuutigin­ngilakka. Taakkumi iluaqutigalugit Guutip pissaalluni uppertut tamaasa, siullermik juutit taavalu grækerit, aniguisissavai. 17 Guutip naapertuil­luarnera uppertunut saqqummersin­neqarpoq, tamannalu uppernerannik nakussatsitsivoq. Soorlu allassimasoq: “Naapertuil­luartorli uppernini pissutigalugu inuussaaq.”

18 Guutiitsunut naapertuil­luanngitsunullu naapertuil­luanngitsuliorlutik ilumoortumut akerlilersuisunut tamanut Guutip kamannini qilammiit saqqummersippaa 19 uppernarsaatinik imminut tunngasunik naammattunik tunereeraluarlugit ilisiman­ngimmanni. 20 Pissusiimi takussaan­ngitsut pinngor­titaasigut paasineqarsin­naammata pissaaneqar­tuarnera guutius­susialu inuit pinngor­tinneqar­neranniilli ersaripput, taamaattumik utoqqatsis­sutissaqan­ngillat. 21 Guuti nalunngik­kaluarlugu ataqqinarsisinnagulu qutsavigin­ngilaat, sianiitsorpal­lattumilli tunngavilersuisalerput paasisimasaqar­natillu.* 22 Silatuneraraluarlutik sianiitsun­ngorput 23 Guutillu toqusuitsup alutornassusia inuup toqusussaasup, timmissat, uumasut sisamanik niullit paarmortullu assinginik taarserlugu.

24 Taamaattumik uummatimik kissaatipilui malillugit inoorusummata Guutip immineerpai, taamaalil­lutillu timiminnik nikanarsaalerput. 25 Guuti pillugu ilumoortoq sallumik taarserpaat pinngor­titarlu ataqqillugu kiffartorfigilerlugu,* uffa Pinngor­titsisoq qaqugorsuarmut unnersiutigineqar­tussaagaluartoq. Amen. 26 Tamanna pissutigalugu Guutip kanngunartumik atoqateqarusus­suseqartut immineerpai. Arnartaasa pissusis­samisoortumik atoqateqartarneq pissusis­samisuun­ngitsumik taarserpaat. 27 Taamatuttaaq angutit pissusis­samisoortumik arnanik atoqateqar­tarunnaarlutik anguteqatitik assut pileris­suseqarfigalugit kanngunar­tulioqatigisalerpaat. Eqqunngitsulior­nertilli pillugu tamakkiisumik pillarneqassapput.

28 Guutip iluarin­ngisamisut isiginnit­taaseqartut ilinniarusun­ngimmanni* naleqqutin­ngitsumik iliuuseqar­niassammata immineerpai. 29 Sutigut tamatigut naapertuil­luannginnamik, ajussuseqaramik, piumatugamik ajortuugamillu usoruttarput, inummik toqutsisarput, assortuisarput, peqquserluttarput, naalliutsitsisarput, oqaatis­suaasarput, 30 ingutsisarput, Guutimik uumissuisarput, soqqusaattarput, qaffassimaartarput, pingaakujuttarput, pilersaarutipiloqartarput, angajoq­qaaminnut naalanngittarput, 31 paasisimasaqan­ngillat, neriorsuinermissut iliorneq ajorput, ilumoorlutik asannin­ngillat naakkit­taallutillu. 32 Guutip inatsisai naapertuil­luartut naapertorlugit inuit tamakkuninnga ileqqoqartut toqumik pillarneqar­tariaqarnerat nalunngil­luinnaraluarlugu taama ileqqoqaan­narnatik aamma allat taamaaliortartut akuerisarpaat.

2 Taamaattumik illit inoqatinnik eqqartuus­sisartutit, kinaagaluaruil­luunniit utoqqatsis­sutissaqan­ngilatit. Ilittummi iliortunik eqqartuus­sigavit imminut pillagas­sanngor­tipputit. 2 Taama ileqqoqartut Guutip ilumoortumut naapertuuttumik eqqartuuttarai nalunngilarput.

3 Illilli inuk, taama ileqqoqartunik eqqartuus­sisaraluarlutit nammineq taama iliortaravit isumaqarpit Guutimit eqqartuun­neqarnaviarnak? 4 Imaluunniit Guutip ajunngisaangaarnera, kamagit­tangaarnera* naammagit­tarneralu soqutigin­nginnakkit? Nalugakku ajunngisaarluni peqqissimeq­qullutit ikiorniaraluaraatit? 5 Uteriil­lutilli peqqissimerusun­ngikkuit Guutip ullormi kamaffimmini eqqartuussutini naapertuil­luartoq nalunaarutigiguniuk pillassavaatit. 6 Kikkullu tamaasa suliaannut naapertuuttumik akilerumaarpai. 7 Ajunngitsulior­tuarnermikkut alutornas­sutsimik, ataqqinaammik toqusuis­sutsimillu pissarsiniar­tuartut naassaan­ngitsumik inuuneqalersissavai. 8 Assortuiumatuulli ilumoor­tumullu naalannatik eqqunngitsuliortut kamalluni pillassavai. 9 Ajortuliortartut kikkulluunniit, siullermik juutit taavalu grækerit, annikil­liussal­lutillu erloqissapput. 10 Ajunngitsulior­tartulli kikkulluunniit, siullermik juutit taavalu grækerit, alutornarsisin­neqarlutillu ataqqinarsisin­neqarlutillu Guutimik eqqisseqateqassapput. 11 Guutimi kinaassusersior­tuunngilaq.

12 Moorsisip inatsisai ilisimanagit ajortuliortut tamarmik inatsisinik ilisimasaqan­ngikkaluarlutik toqussapput. Inatsisinilli ilisimasaqarlutik ajortuliortut tamarmik inatsisit naapertorlugit eqqartuun­neqassapput. 13 Guutimmi inatsisinik tusartut naapertuil­luartutut isiginagit inatsisinik maleruaasut naapertuil­luartutut isigissavai. 14 Juutiun­ngitsummi Moorsisip inatsisai inatsiserin­ngikkaluarlugit piumasaqaataat malikkaangamikkit qamuuna inatsiseqarnertik ersersit­tarpaat. 15 Iliuutsimikkut ersersit­tarpaat inatsisit uummatiminni allassimasut, tamannalu nalunngeqatigin­nissutaannit uppernarsar­neqarpoq, eqqarsaatiminnillu unnerluutigineqarlutil­luunniit illersor­neqartarput. 16 Guutip inuit isertorlutik iliuusii pillugit Kristusi Jiisusi aqqutigalugu eqqartuuppagit taama pisoqassaaq. Taakku tamarmik nutaarsiassat nuannersut oqaluus­sissutigisama ilagaat.

17 Illit juutiunerartutit, inatsisinik tutsuigin­nittutit Guutimullu attaveqarninnik tulluusimaarutigin­nittutit, 18 Moorsisip inatsisaanik ilinniar­tinneqarsimanerit* pissutigalugu Guutip piumasaa nalunagulu eqqortut iluaraatit. 19 Qularinngilat tappiitsunik siulersuisuullutit, taartumiittunut qaammaq­qutaallutit, 20 silatusaan­ngitsunik naqqiisar­tuullutit, meeqqanik ilinniar­titsisuullutit Moorsisillu inatsisaani paasisimasaqarnerup ilumoortullu tunngaviannik paasisimasaqarlutit. 21 Ilinniar­titsisaraluarlutilli imminut ilinniartinneq ajorpit? Oqaluus­sisartutit: “Tillissan­ngilatit”, tillittarpit? 22 Ima oqartartutit: “Allasius­sanngilatit”, allasiortarpit? Guutiliamik maajugin­nittutit, guutisiorfiit tillinniarfigisarpigit? 23 Moorsisip inatsisaanik tulluusimaarutigin­nittutit, inatsisinik unioqqutitsinikkut Guuti nikanarsar­tarpiuk? 24 Soorlu allassimasoq: “Ilissi pissutaallusi Guutip atia allamiut akornganni mitaatigineqarpoq.”

25 Aatsaat inatsisit maleruarukkit kipineqarneq* iluaqutigissavat. Inatsisilli unioqqutit­tarukkit kipineqarnerit kipineqan­nginnertut issaaq. 26 Taamaattumik kipineqarsiman­ngitsup Moorsisip inatsisaani piumasaqaatit naapertuil­luartut maleruarpagit kipineqan­nginnera kipineqarnertut naatsorsuun­neqassan­nginnerpa? 27 Timikkullu kipineqarsiman­ngitsup Moorsisip inatsisaanik maleruaanermigut illit, inatsisinik pigisaqaraluarlutit kipineqarsimagaluarlutillu unioqqutitsisartutit, eqqartuutis­savaatit. 28 Qallikkut ittut kipineqarnerlu, tassa timimut tunngasut, juutiunermut aalajangiisuun­ngillat. 29 Kipineqarsimasuuneq anersaamit uummatikkut kipineqar­nerummat juutiunermut inatsisinik maleruaaneq aalajangiisuunani inuttut qamuuna qanoq ittuuneq aalajangiisuuvoq. Inuup taamaattup nersualaar­neqarnera inunneersuunani Guutimeersuuvoq.

3 Juutiuneq kipineqarsimanerlu iluaqutis­sartaqaramik? 2 Ilaana! Pingaarnertut, Guutip oqaasiinik illernartunik isumagin­nittussan­ngortin­neqarput. 3 Taavami ilaat uppersuseqan­ngippata Guuti tatigisas­saajunnaarsimassava? 4 Naamerluinnaq! Inuit tamarmik sallutuujugaluarpataluunniit Guuti tatigisassaavoq, soorlu allassimasoq: “Ilumoortumik oqaluttarnerit ilinnillu unnerluussisut sallunerat uppernarsassavat.” 5 Naapertuil­luanngitsuun­nerpummi Guutip ilumoor­tuuneranik erseqqis­saappat Guutip kamannera eqqunngitsulior­nerussava? (Inuit ilaasa eqqarsar­tarnerattut allappunga). 6 Naamerluinnaq! Taamaas­simagaluarpat Guutip inuit qanoq eqqartuus­sinnaas­sagamigit?

7 Uangali salluliornera Guutip ilumoor­neranik ersarin­nerulersitsillunilu Guutimik ataqqinarsisitsippat taava sooq ajortulior­tartutut eqqartuun­neqarpunga? 8 Soormi oqaannarutta: “Ajunngitsoq anguniarlugu ajortuliorta”? Soorlu ilaasa sallullutik taama oqarnerar­taraatigut. Inuit taakku pisassamissut eqqartuun­neqassapput.

9 Taava allanit pingaar­neruvugut? Naamerluinnaq! Eqqaariik­katsitut juutit grækerillu tamarmik ajortimit aqunneqarput. 10 Allassimavormi: “Inummik ataatsimil­luunniit naapertuil­luartoqanngilaq. 11 Paasinnit­toqanngilaq, Guutimik ujartuisoqanngilaq. 12 Inuit tamarmik tunussipput, tamarmik atorsin­naanngillat. Ataatsimil­luunniit ajunngitsulior­toqanngilaq.” 13 “Torluat iliviuvoq ammasoq. Oqqaminnik peqquserlupput.” “Pulateriaarsuup toqunartua qarluisa tunuanniippoq.” 14 “Qarngat perloqqusinernik narrutsan­nartunillu ulikkaarpoq.” 15 “Aammik kuisinissamut qiilasaqaat.” 16 “Aseruineq atugarliornerlu aqqutaan­niipput, 17 eqqissinerullu aqqusernga naluaat.” 18 “Guuti mianerin­ngilaat.”

19 Nalunngilarput qarngit tamarmik nipangersin­neqarnias­sammata inuillu tamarmik pisuussuteqartut Guutimit pillarneqar­niassammata Moorsisip inatsisaani allassimasut tamarmik inatsisinik maleruaasunut atuuttut. 20 Inatsisit ajortiliunermik ersarin­nerulersitsiin­nartarmata kinaluunniit inatsisinik maleruaanermigut Guutimit naapertuil­luartuutitaasin­naanngilaq.

21 Inatsisilli maleruan­ngikkaluarlugit Guutimit naapertuil­luartuutitaasinnaaneq paasinarsisin­neqarpoq, tamannalu Moorsisip inatsisaani pruffiitinillu allakkani* uppernarsar­neqarpoq. 22 Aap, qanorluunniit tunuliaqutallit tamarmik Jiisusimut Kristusimut uppernikkut Guutimit naapertuil­luartuutitaasin­naapput. 23 Tamarmimmi ajortiliul­lutillu Guutip alutornas­susianik ersersitsisin­naanngillat. 24 Guutillu akiliut utertitsissut Kristusimit Jiisusimit akilerneqartoq iluaqutigalugu iperagaasin­nerisigut naapertuil­luartuutitaaneq tunissutitut akeqanngitsutut ajunngisaangaarluni tunniuppaa. 25 Guutip Jiisusi pilliutigaa aavanut uppertut saammaak­kumallugit, naapertuil­luarninilu ersersin­niarlugu taamaaliorpoq. Guutip itsaq ajortuliortut isumakkeerfigigamigit kamagit­tarnermik* ersersitsivigiin­narnagit 26 Jiisusimut uppertut naapertuil­luartuutin­nerisigut maanna naapertuil­luarnini aamma ersersippaa.

27 Taamaattumik tulluusimaarutis­saqarpugut? Naamerluinnaq! Moorsisip inatsisaanut naalannerput tulluusimaarutigis­savarput? Naamik, uppernerup inatsisaanik maleruaanerput kisiat. 28 Nalunngilarpummi inatsisinik maleruaaneq tunngaviginagu uppernerli tunngavigalugu inuk naapertuil­luartuutitaasartoq. 29 Imaluunniit juutit kisimik Guutigaat? Inuiaqatigiit tamarmik Guutigin­nginnerpaat? Aap, inuiaqatigiit tamarmik aamma Guutigaat. 30 Guuti ataasiugami kipineqartut kipineqan­ngitsullu uppernerat pillugu naapertuil­luartuutissavai. 31 Taava uppernerput pissutigalugu inatsisit atuukkun­naarsis­savagut? Naamerluinnaq! Inatsisit atuutsippagut.

4 Taamaappat Aaperaap, siuaasatta, suna anguaa? 2 Assersuutigalugu Aaperaat iliuutsini pissutigalugit naapertuil­luartuutitaasimaguni oqarataar­nissamut pissutis­saqassagaluarpoq, Guutilli saavani oqarataarsin­naanngilaq. 3 Allassimaf­fimmimi qanoq allassimava? “Aaperaat Jehovamut* upperami naapertuil­luartuutitaavoq.” 4 Sulisup akissarsiai ajunngisaangaarluni tunniun­neqarnatik akiitsunut akiliutitut tunniun­neqartarput. 5 Guutiitsumilli iliuuseqan­ngitsumik naapertuil­luartuutitsisumut uppertoq uppernini pissutigalugu naapertuil­luartuutitaasarpoq. 6 Iliuutsini pissutiginagit Guutimit naapertuil­luartuutitaasup pilluarnera Daavip ima eqqartorpaa: 7 “Pilluarput inatsisaatsutut iliuuseqarnertik pillugu isumakkeerfigineqarlutillu ajortuliaminnik matoorif­figineqartut.* 8 Pilluarpoq ajortuliani pillugit Jehovamit naatsorsuusiorfigineqan­ngitsoq.”

9 Taamaappat kipineqartut kisimik imaluunniit aamma kipineqan­ngitsut pilluarneq tamanna misigisarpaat? Imami oqartarpugut: “Aaperaat upperami naapertuil­luartuutitaavoq.” 10 Taavami qanga naapertuil­luartuutitaava? Kipineqareerluni imaluunniit suli kipineqarnani? Suli kipineqarnani. 11 Guutimit kipineqar­nissamik peqquneqarpoq. Suli kipineqan­ngikkallarami uppernini pissutigalugu naapertuil­luartuutitaaneranut tamanna naqissutitut ilisarnaataavoq.* Taamaalilluni uppertunut kipineqan­ngitsunut tamanut ataatan­ngorpoq, taakkuttaarlu Guutimit naapertuil­luartuutin­neqarput. 12 Aaperaat aamma kipineqartunut ataataavoq. Kipineqar­tunulli ataataagin­narnani aamma immisut uppertunut ataataavoq. Ataatarput Aaperaat suli kipineqarnani upperpoq.

13 Nunarsuarmimmi kingornus­sinissamik Aaperaamut kinguaavinullu neriorsuut inatsisinik tunngaveqarnani uppernikkulli naapertuil­luarnermik tunngaveqarpoq. 14 Inatsisinimmi maleruaasut kingornus­sisussaappata upperneq iluaqutaas­sanngilaq neriorsuullu atuukkun­naassalluni. 15 Tassa Moorsisip inatsisaanik unioqqutitsineq Guutip kamanneranik kinguneqartarpoq, inatsiseqan­ngippalli unioqqutitsisoqarsin­naanngilaq.

16 Neriorsuut ajunngisaangaarnermut naapertuun­niassammat upperneq tunngavigalugu neriorsuutigineqarpoq. Neriorsuutip eqquunnera Aaperaap kinguaavisa tamarmik – Moorsisip inatsisaanik maleruaasut kisimik pinnatik aammali Aaperaatut, tamatsinnut ataataasutut, uppertut – misigissavaat. 17 (Soorlu allassimasoq: “Inuiaqatigiip­passuarnut ataatan­ngortippakkit”). Guutip, toqusunik uummartitsisup sulilu pisiman­ngitsunik pereersimasutut* eqqartuisartup, saavani Aaperaat upperpoq. 18 Ima oqartoqarmat: “Kinguaatit taama amerlatigilissapput”, neriorsuut suli piviusun­ngunngik­kaluartoq neriuut tunngavigalugu inuiaqatigiip­passuarnut ataatan­ngornissani upperaa. 19 Uppernikkullu sanngiil­linngik­kaluarluni (100-t missiliorlugit ukioqarami) timini toqoreersutut isigalugulu nalunngilaa Saara meerartaarsin­naanngitsoq.* 20 Guutip neriorsuutaa pissutigalugu qulalin­ngisaan­narlunilu upperun­naanngisaannarpoq. Upperninili pissatsis­sutigigamiuk Guuti ataqqinarsisippaa. 21 Qularin­ngilluinnarpaa Guuti neriorsuinermisut iliorsinnaasoq. 22 Taamaattumik “naapertuil­luartuutitaavoq”.

23 Oqaaserli “naapertuil­luartuutitaavoq” Aaperaat kisiat pillugu allanneqarnani 24 aamma uagut pilluta allanneqarpoq, uaguttaarmi Jiisusimik Naalakkatsinnik toqusunit makititsisoq upperigatsigu naapertuil­luartuutitaas­sagatta. 25 Jiisusi unioqqutitsinigut pillugit toqunneqarpoq naapertuil­luartuutitaanis­sarpullu pillugu makitin­neqarluni.

5 Upperneq pissutigalugu naapertuil­luartuutitaagatta Naalagarput Jiisusi Kristusi aqqutigalugu Guuti eqqisseqatigisigu.* 2 Jiisusimut uppernikkut Guuti qanillisin­naallugulu taassumannga ajunngisaangaarfigineqarsin­naavugut. Guutimit alutornarsisin­neqarnis­satsinnik neriuuterput tunngavigalugu nuannaarta.* 3 Tamanna nuannaarutigiin­narnagu annikil­liornitsinni nuannaarta,* nalunngin­natsigumi annikil­liorneq pinertusaar­nissamut iluaqutaasartoq. 4 Pinertusaarneq Guutimit akuerisaanissamut iluaqutaasarpoq, tamannalu neriuuteqalersitsisarpoq. 5 Neriuullu pakatsisitsineq ajorpoq, Guutimmi anersaaq illernartoq uagutsinnut tunniussani atorlugu asanninnini uummatitsinnut kuivaa.

6 Sulimi sanngiitsilluta Kristusi guutiitsut pillugit piffissan­ngormat toquvoq. 7 Inuk naapertuil­luartoq pillugu kinaluunniit toqujumanaviarunanngilaq, inulli ajunngitsoq pillugu immaqa ilaat toqujumassapput. 8 Guutilli ajortiliugaluartugut Kristusip uagut pilluta toquneratigut asannit­tuliorfigaatigut. 9 Kristusip aavatigut naapertuil­luartuutitaagatta Guutip kamanneranit aniguisitaanissarput qularin­nginnerusin­naavarput. 10 Guutimummi akeraagaluarluta Ernerata toquneratigut saammaan­neqaratta inuuneratigut aniguisitaanissarput qularin­nginnerusin­naavarput. 11 Tamatumali saniatigut Naalagarput Jiisusi Kristusi, saammaan­neqarnis­satsinnik qulakkeerinnittoq, aqqutigalugu Guutip iliuusii nuannaarutigaagut.

12 Taamaattumik: Inuk ataaseq aqqutigalugu ajorti inunnut annguppoq, ajortillu toqu nassataraa. Inuillu tamarmik ajortulior­tarmata toqu tamanut siaruaappoq. 13 Moorsisimmi inatsisai atuutilin­ngikkal­larmatali inuit ajortiliupput, inatsiseqan­ngippalli kinaluunniit ajortuliortutut unnerluutigineqarsin­naassanngilaq. 14 Toquli Adamip – tikiuttussamut assingusup – nalaaniit Moorsisip nalaanut, allaat Adamitut ajortuliun­ngitsunut, kunngisut naalakkersuivoq.

15 Tunissulli ajortuliornermut assingunngilaq. Inuummi ataatsip ajortuliornera amerlasuut toqunerannik kinguneqarmat Guutip ajunngisaangaarnera inullu ataaseq, Jiisusi Kristusi, aqqutigalugu ajunngisaangaarluni akeqanngitsumik tunissutaa inuppassuit iluaqutigimmassuk annerungaarpoq! 16 Aamma tunissutip akeqanngitsup iluaqutissartai inuup ataatsip ajortuliaata kingunerinit allaanerupput. Ajortuliornermi ataaseq inuit pillagas­sanngor­tinneqar­nerannik kinguneqarpoq, ajortulioqat­taareer­nerulli kingorna tunissutisiaq inuit naapertuil­luartuutitaanerannik kinguneqarpoq. 17 Inuup ataatsip ajortuliornera pissutigalugu toqu kunngisut naalakkersuimmat sinnilis­suarmik ajunngisaangaarfigineqartut naapertuil­luartuutitaanermillu akeqanngitsumik tunineqartut inuk ataaseq, Jiisusi Kristusi, pissutigalugu inuullutillu kunngisut naalakkersuiler­nissaat qularnan­nginnerungaarpoq.

18 Soorlu ajortuliorneq ataaseq inuit tamalaat pillagas­sanngor­tinneqar­nerannik kinguneqartoq, taamatuttaaq eqqortuliorneq ataaseq inuit tamalaat naapertuil­luartuutitaanerannik inuuneqaler­nerannillu kinguneqassaaq. 19 Soorlu inuup ataatsip naalannginnera pissutigalugu inuppassuit ajortilin­ngortut, taamatuttaaq inuup ataatsip naalannera pissutigalugu inuppassuit naapertuil­luartun­ngussapput. 20 Ajortuliorneq annertusiar­torniassammat* Moorsisip inatsisai tunniun­neqarput. Ajortili annertusiar­tortillugu ajunngisaangaarneq suli annertusiar­tornerusarpoq. 21 Soorlu ajorti kunngisut naalakkersuisoq, taamatuttaaq naapertuil­luarneq pissutigalugu ajunngisaangaarneq Naalagarput Jiisusi Kristusi aqqutigalugu naassaan­ngitsumik inuuneqalersitsisumik kunngisut naalakkersuissaaq.

6 Taavami qanoq oqassaagut? Ajunngisaangaarneq annertusiar­torniassammat ajortulior­tuassaagut? 2 Naamerluinnaq! Ajortimut tunngatillugu toqugatta qanoq ililluta ajortimi inuuinnarsin­naagatta? 3 Imaluunniit nalugassiuk Kristusimut Jiisusimut morsutsitaasugut tamatta aamma toquanut morsutsitaasugut? 4 Toquanut morsutsitaanikkut ilisaaqatigaarput Ataatap pissaanera alutornartoq atorlugu Kristusip toqusunit makititaaneratut nutaamik inooriaaseqaleq­qulluta. 5 Taassumatut toqunikkut ataasioqatigilerutsigu aamma taassumatut makititaanikkut ataasioqatigilis­savarput. 6 Nalunngilarpummi timerput ajortiliusoq pissaaneerun­niassammat ajortimullu inussiaajun­naarnias­sagatta kinaassusitoqarput Kristusi ilagalugu qisummut naalliutsitsiviliamut* kikiattuun­neqartoq. 7 Toqusormi ajortuliani pillugit pinngitsuutitaavoq.*

8 Aamma Kristusi toqoqatigigutsigu inooqatigis­sallugu upperaarput. 9 Nalunngilarpummi Kristusi toqusunit makititaagami toqoqqin­ngisaan­nassasoq. Toqu taassumunnga naalagaajun­naarpoq. 10 Ajorti atuukkun­naarsin­niarlugu ataasiaammik toquvoq, maannali Guutip piumasaatut iliorumalluni inuuvoq. 11 Taamatuttaaq ilissi ajortimut tunngatillugu toqusutut Guutilli piumasaatut iliorumallusi Kristusi Jiisusi malillugu inuusutut imminut isigissaasi.

12 Taamaattumik timissi pileris­susiinut naalatsigiteqqunasi ajorti timissinni toqusus­saasumi kunngisut naalakkersuitik­kunnaarsiuk. 13 Aamma timersi* eqqunngitsuliornermut sakkussatut ajortimut sassaat­tarunnaarsiuk. Toqusimasutulli ikkaluarlusi inuuleq­qikkassi timersi* eqqortuliornermut sakkussatut Guutimut sassaat­tarsiuk. 14 Moorsisimmi inatsisai maleruarnagit Guutip ajunngisaangaarnera iluaqutigigassiuk ajorti ilissinnut naalagaas­sanngilaq.

15 Taava imaappa Moorsisip inatsisai maleruarnagit Guutip ajunngisaangaarnera iluaqutigigatsigu ajortuliorsin­naatitaasugut? Naamerluinnaq! 16 Nalugassiuk inussiatut naalattutut kimulluunniit imminut sassaak­kaangassi naalatassinnut, ajortimut toqumik kinguneqar­tussamut imaluunniit naalannermut naapertuil­luarnermik kinguneqar­tussamut, inussiaataasarlusi? 17 Guutili qujanarsili ajortimut inussiaataagaluartusi ilinniar­titsissutigineqartunut qamannga pisumik naalattun­ngortimmasi. 18 Aap, ajortimut inussiaajun­naarsin­neqarassi naapertuil­luassutsimut inussiaatin­ngorpusi. 19 Ajortulioq­qajaasarnersi pissutigalugu inuit paasisin­naasaattut allappunga. Siusinnerusukkut timersi* ajortulior­niarlusi minguttuus­sutsimut ajussutsimullu inussiaataatipparsi, maannali timersi* illernartumik iliorumallusi naapertuil­luassutsimut inussiaataatis­savarsi. 20 Ajortimummi inussiaagal­larassi naapertuil­luassuseq naalagarin­ngilarsi.

21 Taamani sunik inerititaqar­tarpisi? Maanna kanngusuutigisassinnik. Taakkumi toqumik kinguneqartarput. 22 Maannali ajortimut inussiaajun­naarsin­neqarlusi Guutimut inussiaatin­ngorassi illernas­sutsimik inerititaqarpusi, tamannalu naassaan­ngitsumik inuuneqalersitsisarpoq. 23 Ajortimmi toqu akissarsiatut tunniuttarpaa, Guutilli Kristusi Jiisusi Naalagarput aqqutigalugu inuuneq naassaan­ngitsoq tunissutitut tunniuttarpaa.

7 Qatanngutit, nalugassiuk Moorsisip inatsisai inummut ulluni inuuffigisaaniinnaq naalagaasut? (Inatsisinimmi ilisiman­nittunut allappunga). 2 Assersuutigalugu arnap katissimasup uini inuutillugu inatsisitigut pituttorsimaffigaa, uinili toquppat inatsisaanut* pituttorsimajun­naassaaq. 3 Taamaattumik uini inuutillugu angummit allamit pigineqaleruni allasiortumik taaneqassaaq. Uiali toquppat inatsisaanut pituttorsimajun­naassaaq angummillu allamit pigineqaleraluaruni allasiortumik taaneqassanani.

4 Taamatuttaaq ilissi, qatanngutikka, Moorsisip inatsisaanut tunngatillugu Kristusip timaagut toquvusi. Taamaattumik allamit, toqusunit makititaasumit, pigineqarsin­naanngorpusi. Taamaalillutalu Guutimut ataqqinaataasumik inerititaqarsin­naalerpugut. 5 Pileris­susipiluit malillugit inuugal­laratta Moorsisip inatsisaanit erseqqis­sarneqarpoq ajortulioq­qajaasarnerput pissutigalugu timerput toqussutaasussanik inerititaqartartoq.* 6 Moorsisilli inatsisaanut tunngatillugu toqugatta pituttugaajun­naarpugut. Taamaalilluta qanga pisarnitsitut inatsisinut inussiaataajun­naarluta maanna anersaamut inussian­ngorsin­naanngorpugut.

7 Taava qanoq oqassaagut? Moorsisip inatsisai ajorpat? Naamerluinnaq! Inatsiseqarsiman­ngikkaluarpat ajorti suunersoq nalussagaluarpara. Assersuutigalugu pileris­suseqarneq suunersoq nalussagaluarpara Moorsisip inatsisaani ima allassimasoqarsiman­ngikkaluarpat: “Allap pigisai pilerigis­sanngilatit.” 8 Inassulli taanna pissutigalugu ajortip periarfis­sinneqartup sutigut tamatigut pileris­suseqalersippaanga, inatsiseqar­tinnagumi ajorti toqungavoq. 9 Inatsiseqan­ngikkallarmat inuuvunga. Inassulli atuutilermat ajorti uummaqqippoq, uangali toquvunga. 10 Inassullu inuunermik kinguneqar­tussaagaluartoq toqumik kinguneqartoq paasivara. 11 Inassut pissutigalugu ajortip periarfis­sinneqartup salloqit­tarlungalu toquppaanga. 12 Tassa Moorsisip inatsisai immini illernar­tuupput, aamma inassut illernarlunilu naapertuil­luarlunilu ajunngitsuuvoq.

13 Taava ajunngitsoq pissutigalugu toquvunga? Naamerluinnaq! Ajortili pissutaavoq. Inassutilli ajunngitsuugaluartup ajorti pissutigalugu toqusunga taamaalillunilu ajorti qanoq ajortigisoq erseqqissarpaa. 14 Nalunngilarput Moorsisip inatsisai Guutimeersuusut, inuinnaagamali ajortilik ajortip inussiaatigaanga. 15 Iliuusererusutattut iliornanga uumigisattut iliortarama naluara sunerlunga. 16 Iliuusererusun­ngisattulli ilioraangama Moorsisip inatsisai ajunngitsuusut isumaqatigisarpakka. 17 Ajortuliortorli uangaajun­naarpoq, ajortili uanniittoq taamaaliorpoq. 18 Nalunngilara uanni, tassa timinni, ajunngitsoqan­ngitsoq, ajunngitsummi iliuusererusutakka iliuuserisin­naannginnakkit. 19 Kissaatigisattummi ajunngitsuliornanga kissaatigin­ngisattut ajortulior­tarpunga. 20 Iliuusererusun­ngisattut ilioraangama iliuuseqartoq uangaajun­naarluni ajorti uanniittoq iliuuseqartarpoq.

21 Tassa inatsisip matuma aquttarpaanga: Eqqortuliorusuk­kaluarlunga ajortulioq­qajaasarpunga. 22 Guutip inatsisai qamuuna nuannareqaakka, 23 inatsisilli allat timinniittut* inatsisinut isumanniittunut akiuuttarlutillu ajortip inatsisaanut timinniittunut* tiguagaatit­tarpaannga. 24 Kia inukuluusunga timinnit toqusus­saasumit aniguisis­sinnaavaanga? 25 Guuti, Jiisusi Kristusi Naalagarput aqqutigalugu annaassisoq, qujanarsili! Isumakkut Guutip inatsisaanut inussiaataavunga timikkulli ajortip inatsisaanut inussiaataallunga.

8 Taamaattumik Kristusimik Jiisusimik ataasioqateqartut pillagas­saatinneqas­sanngillat. 2 Anersaammi inatsisaasa Kristusimik Jiisusimik ataasioqateqartunik inuuneqalersitsisut ajortip toqullu inatsisaannut inussiaajun­naarsippaasi. 3 Inuit sanngiil­lutillu ajortiliummata Moorsisip inatsisaasa inussiaajun­naarsis­sinnaan­ngilaasi. Guutilli ernini ajortimik atuukkun­naarsitseq­qullugu inummut ajortilimmut assingutillugu aallartikkamiuk inussiaajun­naarsippaasi. Taamaalillunilu ajorti inunniittoq pillagas­saatippaa 4 Moorsisip inatsisaani piumasaqaatit naapertuil­luartut eqqortin­niassagatsigit. Taamaattumik pileris­susipiluit malinnagit anersaarli illernartoq malillugu inuuvugut. 5 Pileris­susipiluimmi malillugit inuusut pileris­susipilunnut tunngasunik eqqarsaateqar­tuarput, anersaarli illernartoq malillugu inuusut anersaamut tunngasunik eqqarsaateqar­tuarput. 6 Pileris­susipilunnut tunngasunik eqqarsaateqar­tuarneq toqumik kinguneqartarpoq, anersaamulli tunngasunik eqqarsaateqar­tuarneq inuunermik eqqissinermillu kinguneqartarpoq. 7 Pileris­susipilunnut tunngasunik eqqarsaateqar­tuartut Guutip inatsisaanut kajumillutik naalanneq ajoramik naalassin­naanngin­namillu Guutimut akeranngortarput. 8 Taamaattumik pileris­susipiluit malillugit inuusut Guutimik nuannaar­titsisin­naanngillat.

9 Guutilli anersaava ilissin­niippat pileris­susipiluit malinnagit anersaarli malillugu inuussaasi. Kristusilli immisut isiginnit­taaseqan­ngitsoq* piginngilaa. 10 Kristusimilli ataasioqateqarussi ajorti pissutigalugu timi toqungassaaq, naapertuil­luassuserli pissutigalugu anersaaq inuussutaassaaq. 11 Guutip Jiisusimik toqusunit makititsisup anersaava ilissin­niippat Kristusimik Jiisusimik toqusunit makititsisup anersaani ilissin­niittoq atorlugu timisi toqusussat aamma uummartissavai.

12 Taamaattumik, qatanngutit, pileris­susipiluit malillugit inuusus­saanngilagut. 13 Pileris­susipiluimmi malillugit inuugussi toqussaasi, anersaalli ikiuineratigut ajortulior­tarnisi toqutik­kussigit inuussaasi. 14 Guutimmi anersaaminit siulersor­neqartut tamaasa qitornarai. 15 Anersaarmi inussian­ngortitsisoq qunulersitseq­qittorlu pinngilarsi, anersaarli qitornavis­sianngor­titsisoq pivarsi, taannalu kajumis­sissutigalugu suaarpugut: “Abba,* Ataata!” 16 Guutimut qitornaanerput anersaap illernartup isiginnit­taatsittalu* uppernarsarpaat. 17 Qitornaagutta aamma tassaassaagut kingornus­sisussat, Guutip kingornus­sisussaatitai Kristusillu kingornus­seqatissai. Alutornarsisitaajumallutali Kristusitut naallioq­qaartariaqarpugut.

18 Massakkut naalliuutigisakka alutornas­sutsimut uagutsinni saqqummersitaasussamut sanilliullugit suunngitsutut isigaakka. 19 Guutimmi qitornaasa saqqummersitaanissaat pinngortitat* qilanaarlutik utaqqivaat. 20 Pinngortitat kissaatigin­ngisamittut neriuutaarutitin­neqarput, taamalu pisoqarnissaa Guutip akueraa, imali neriuuteqalersilluta: 21 Pinngortitat aamma mikiarnermut* inussiaajun­naarsin­neqassasut Guutillu qitornaasut alutornarsisin­neqassasut. 22 Nalunngilarpummi pinngortitat tamarmik manna tikillugu anersaarulul­lutillu naalliuttut. 23 Uaguttaarli inerittunik siullernik, tassa anersaamik illernartumik, peqartugut qitornavis­sianngor­nissatta, akiliut utertitsissut tunngavigalugu timitsinnut pituttorsimajun­naarnissatta, qilanaarluta utaqqinerani anersaarulut­tarpugut. 24 Neriuutip tamatuma annaappaatigut. Neriuulli takuneqarsinnaasoq neriuutaanngilaq, inuummi takusani neriuutigisin­naanerpaa? 25 Takusin­naanngisarpulli neriuutigaarput, taamaattumik pinertusaarluta qilanaarlutalu piviusun­ngornissaa utaqqivarput.

26 Taamatuttaaq sanngiik­kaangatta anersaap ikiortarpaatigut. Pisariaqar­titsigaangattami nalusarparput suut pillugit qinussanerluta, oqaaseqarnatali anersaaruluk­kaangatta anersaap nammineq qinnuttarpaatigut. 27 Guutilli uummatinik misissuisartup nalunngilaa anersaap, piumasaminut naapertuuttumik illernartunik qinnussisartup, suna pineraa.

28 Nalunngilarpummi Guuti asasami, siunertaminut naapertuuttumik qaaqqusami, iluaqutigisaannik tamatigut aaqqissuul­luagaasumik iliuuseqartartoq. 29 Ernini qatanngutigiip­passuit akornganni angajul­liliaaniassammat aallaqqaammut asasani toqqarpai siumullu aalajangerlugu Ernermisut ilissasut. 30 Toqqakkani qaaqquai. Qaaqqusanilu naapertuil­luartutut isigai. Kingullertullu: Naapertuil­luartutut isigisani alutornarsisippai.

31 Taava tamakku pillugit qanoq oqassaagut? Guuti iligigutsigu kia ajugaaf­figissavaatigut? 32 Allaat Ernini asattuunnagu uagut pilluta toqusus­sanngor­tikkamiuk aamma allanik tamanik ajunngisaarluni tunissan­nginnerpaatigut? 33 Guutip toqqagai kia unnerluutigisin­naagamigit? Guutimmi naapertuil­luartuutippai. 34 Kia pillagas­saatissavai? Kristusi Jiisusi toqugami makititaallunilu Guutip talerpiatungaaniippoq qinnuttarlutalu.

35 Kristusip asannin­neranit suup avissaar­tissinnaavaatigut? Annikil­liornerup, erloqinerup, malersugaanerup, kaannerup, tamaqan­nginnerup, ulorianartup panalluunniit? 36 Soorlu allassimasoq: “Illit pillutit toqu ajapersimajuarparput. Savatut toqorar­neqartussatut isigineqarpugut.” 37 Uagutsinnilli asannittoq pissutigalugu tamakku tamaasa ajugaaf­figilluin­nassavagut. 38 Qularin­ngilarami toqup, inuunerup, inngilit, naalakkersuisut, maanna pisut, pisussat, pissaanerit, 39 qutsissut, atsissut pinngor­titalluunniit allat Guutip asannin­neranit, Kristusi Jiisusi Naalagarput aqqutigalugu ersersin­neqartumit, avissaar­tissinnaan­ngikkaatigut.

9 Kristusimik malinnittutut ilumoorlunga oqarpunga. Sallunngilanga, nalunngeqatigin­nissutigalu anersaamit illernartumit siulersor­neqartoq una pillugu uppernarsaavoq: 2 Uummatikkut aliasungaarlungalu anniartuarpunga. 3 Kissaatigigaluarparami qatanngutikka, tassa nunaqqatikka, pillugit perloqqusaasutut Kristusimit avissaar­titaanissara. 4 Taakku Israalik­kuupput Guutimit qitornavis­siaasut, alutornarsisitaasut, isumaqatigiis­suteqarfigineqartut,* Moorsisip inatsisaanik tunineqartut, Guutimut kiffartorsin­naatitaasut neriorsor­neqartullu. 5 Siuaasatta kinguaaraat, Kristusilu siuaasatsinnit kingoqqisuuvoq. Guuti, tamanit qutsinnerusoq, qaqugorsuarmut unnersiutigineqarli. Amen.

6 Imaanngilarli Guutip oqaasia piviusun­ngunngitsoq. Israalimimmi kingoqqisuusut tamakkeratik Israalik­kuupput. 7 Aamma imaanngilaq Aaperaamit kingoqqisuunertik pissutigiin­narlugu tamarmik qitornaasut. Allassimavorli: “Kinguaannik taaneqartussat Iisaamit kingoqqisuussapput.”* 8 Tassa Aaperaamit naggueqartut Guutip qitornarinngilai, neriorsuulli tunngavigalugu qitornaasut kinguaatut isigineqarput. 9 Guuti ima neriorsuivoq: “Aappaagu taamaalinerani takkuteq­qikkuma Saara ernertaarsimassaaq.” 10 Taamatuttaaq Rebekka siuaasatsinnit Iisaamit marlulissanik naartulersin­neqarmat taama pisoqarpoq. 11 Sulimi inunngun­ngitsut sulilu ajunngitsumik ajortumil­luunniit iliuuseqan­ngitsut Guutip ersersippaa siunertani iliuutsinik tunngaveqarnani toqqaanerminik qaaqqusinerminillu tunngaveqartoq. 12 Rebekka oqarfigaa: “Angajulleq nukkaminut inussiaataassaaq.” 13 Soorlu allassimasoq: “Jaaku asavara Esauili uumigalugu.”

14 Taava qanoq oqassaagut? Guuti naapertuil­luartuunngila? Naamerluinnaq! 15 Moorsisimummi oqarpoq: “Kinaluunniit nallittorusutara nallittussavara, kinaluunniillu misigin­neqatigerusutara misigin­neqatigissavara.” 16 Taamaattumik Guutip toqqaanera inuup kissaataanik iliuusiinil­luunniit* tunngaveqarnani nallittuineranik tunngaveqarpoq. 17 Faaruu pillugu allassimaffimmi ima allassimavoq: “Unarpiaq pissutigalugu inuutiin­narpakkit: Illit atorlutit pissaanera takutik­kusullugulu atera nunarsuaq tamakkerlugu oqaluus­sissutigineqaq­qugakku.” 18 Taamaattumik nallittorusutani nallittortarpaa uteriik­kusuttorlu imminiigin­nartarlugu.

19 Taamaattumik aperissavarma: “Sooq Guuti pisuutitsisarpa? Piumasaa kia akiorsin­naagamiuk?” 20 Inungaa, sussallutit Guuti akiorpiuk? Ilusilersor­neqartoq ilusilersor­timinut ima oqarsin­naagami: “Sooq taama sanavinga?” 21 Marriortoq piginnaatitaan­nginnerpa marriugassaq ataaseq atorlugu immersakkamik nalliut­torsiornermi atugassamik allamillu ulluinnarni atugassamik sananis­saminut? 22 Taavami Guutip immersakkat suujunnaarsin­neqartussat kamaatani pissaanerminillu takutitsivigerusutani kamagit­tangaarluni naammagit­tarfigippagit? 23 Taavami taamaaliorsimappat alutornangaas­sutsini ilisimaneqalersin­niarlugu immersakkanut nallittor­neqartussanut, alutornarsisin­neqaqqullugit piareersak­kaminut, 24 tassa uagutsinnut juutit juutiun­ngitsullu akorngannit qaaqqusanut? 25 Hosseamit allakkani aamma ima oqarpoq: “Innuttarin­ngisakka ‘innuttannik’ arnarlu asanngisara ‘asasannik’ taassavakka. 26 Sumiiffimmilu ima oqarfigineqarfimminni: ‘Innuttarin­ngilassi’, ima taaneqassapput: ‘Guutip uumassuseqartup qitornai.’ ”

27 Tamatuma saniatigut Israali pillugu Iisaaja ima suaarpoq: “Israalip qitornai immap sioraasut amerlatigigaluartut ikittuinnaat annaanneqassapput. 28 Jehovami nunarsuarmi peqqissaartumik pilertor­tumillu eqqartuus­sissaaq.” 29 Aamma soorlu Iisaaja siulittuisoq: “Sakkutoorpas­suarnut naalakkap Jehovap kinguaatta ilaat inuuinnar­tissiman­ngitsuuppagit Soodomatut Gomooratullu ilersimas­sagaluarpugut.”

30 Taavami qanoq oqassaagut? Juutiun­ngitsut naapertuil­luarneq angunian­ngikkaluarlugu uppernertik pissutigalugu naapertuil­luartuutitaapput. 31 Israalikkulli inatsisit naapertuil­luartut maleruar­niaraluarlugit tamakkiisumik maleruarsin­naanngilaat. 32 Sooq? Upperneq tunngaviginagu iliuutsilli tunngavigalugit naapertuil­luarneq anguniaramikku. “Ujarak naakkiuffissaq” naakkiuffigaat. 33 Soorlu allassimasoq: “Ujarak naakkiuffissaq qaarsorlu mamiatsaffissaq Ziionnimut ilivara, taassumunngalu uppertoq pakatsis­sanngilaq.”

10 Qatanngutit, Israalikkut aniguisitaanissaat kissaatigingaarlugulu Guutimut qamannga pisumik qinnutigisarpara. 2 Uppernarsarsin­naavarami Guuti pillugu ilungersoraluarlutik eqqoqqis­saartumik paasisimasaqan­ngitsut. 3 Guutip naapertuil­luarnera nalugamikku namminnerlu piumasamittut naapertuil­luarniaramik Guutip naapertuil­luarnera kajumillutik naalanngilaat. 4 Kinaluunniimmi uppertoq naapertuil­luartooq­qullugu Kristusi Moorsisip inatsisaasa naggatigaat.

5 Moorsisimmi naapertuil­luassuseq qanoq anguneqarsin­naanersoq inatsisimini allaatigaa: “Taakkuninnga maleruaasoq inuussaaq.” 6 Uppernerli naapertuil­luassutsimik aallaavilik oqarpoq: “Qamuuna eqqarsas­sanngilatit: ‘Kina qilaliassava?’ Tassa Kristusi aqqartin­niarlugu, 7 imaluunniit: ‘Kina itinersuarmut aqqassava?’ Tassa Kristusi toqusunit makitin­niarlugu.” 8 Qanorli allassimasoqarpa? “Oqaaseq ilinnut qanippoq, qaninniillunilu uummatin­niippoq”, tassa uppernerup “oqaasia” oqaluus­sissutigisarput. 9 Jiisusimi Naalagaasoq qaninnik tamanut oqaluus­sissutigigukku Guutillu toqusunit makitikkaa uummatikkut upperigukku annaanneqassaatit. 10 Naapertuil­luartuujumal­lutimmi uummatikkut uppertariaqarputit, annaanneqarumal­lutilli qaninnik tamanut oqaluus­sisariaqarputit.

11 Allassimaf­fimmimi allassimavoq: “Kinaluunniit taassumunnga uppertoq pakatsis­sanngilaq.” 12 Juutimmi grækerillu assigiipput. Tamarmimmi assigiimmik Naalagaqarput tatigin­nitsiminut* tamanut pisuujusumik.* 13 Aap, “kinaluunniit Jehovap aqqanik tatiginnittoq* annaanneqassaaq”. 14 Upperin­ngisartilli qanoq ilillutik tatigisin­naagamikku? Tusarsiman­ngisartillu qanoq ilillutik upperisin­naagamikku? Oqaluus­sisoqan­ngippallu qanoq tusarsin­naagamik? 15 Aallartin­neqarsiman­ngikkunillu qanoq ilillutik oqaluus­sisinnaagamik? Soorlu allassimasoq: “Ajunngitsut pillugit nutaarsiassanik nuannersunik pisullutik oqaluus­siartortut takullugit nuannissusia!”

16 Ilaasali nutaarsiassat nuannersut naalanngilaat. Iisaajami allappoq: “Jehova, kikkut tusarliussarput* upperaat?” 17 Tassa upperneq tusakkanit aallaaveqarpoq. Kristusilu pillugu oqaluus­sisoqaraangat tusarliussaq tusarneqartarpoq. 18 Aperivungali: Tusagaqan­nginnamik? Tusagaqaraluarput. “Nipaat nunarsuarmut tamarmut tusarliussaallu nunarsuup isuinut tutsiupput.” 19 Aperivungali: Israalikkut paasisaqan­nginnamik? Moorsisi allappoq: “Inuiaqatigiiun­ngitsut atorlugit sinngalersis­savassi. Inuiaqatigiit sianiigineqartut atorlugit kamatsis­savassi.” 20 Iisaajali sapiiserluni oqarpoq: “Uannik ujaasin­ngitsunit nanineqarpunga. Uannik apersuutigin­ninngitsunit ilisimaneqalerpunga.” 21 Israalikkulli pillugit oqarpoq: “Ulloq naallugu inuiaqatigiinnut naalanngitsunut uteriitsunullu assakka isaassimatippakka.”

11 Taava ima aperivunga: Guutip innuttani ajattorsimanerpai? Naamerluinnaq! Uangattaarmi Israalik­kuuvunga, Aaperaap kinguaaraanga naggueqatigiinnit Biiniak­kunneersoq. 2 Guutip innuttani siulliullugit toqqakkani ajattunngilai. Nalugassiuk Eliap Israalikkut pillugit Guutimut naammagit­taalliornera qanoq allaatigineqartoq? 3 “Jehova, pruffiititit toqullugillu pilliivitit sequtserpaat. Kiserngoruppunga, maannalu toqunniarpaannga.” 4 Guutilli qanoq akivaa? “Baalimut seeqqum­mersiman­ngitsunik suli 7.000-nik innuttaqarpunga.” 5 Ullumik­kuttaaq taamaappoq, ajunngisaangaarfigineqarlutik toqqarneqartut amerlan­ngitsut kingulerupput. 6 Ajunngisaangaarfigineqarnerat iliuusiinik tunngaveqanngilaq. Taamaas­simagaluarpammi ajunngisaangaarneq ajunngisaangaar­nerusimas­sanngilaq.

7 Taava qanoq oqassaagut? Israalikkut ujagartik pissarsiarin­ngilaat, toqqakkalli pissarsiaraat. Sinnerilu malugisaataarupput, 8 soorlu allassimasoq: “Ulloq manna tikivillugu Guutip itisuumik siniler­tillugillu takunnis­sinnaan­ngitsunik isilerlugillu tusaasin­naanngitsunik siutilerpai.” 9 Daavi aamma allappoq: “Pillarneqar­niassammata nerriviat niganngorli,* pullatinngorli, aamma ujaranngorli naakkiuffissaq. 10 Takusaqan­nginnias­sammata isaat taarsisitaalik, qatigaallu peqingatit­tuakkit.”

11 Taamaattumik aperivunga: Naakkiullutik orlulluinnarpat? Naamerluinnaq! Israalikkulli ajortulior­tarmata sinngalersin­niarlugit juutiun­ngitsut annaanneqarput. 12 Israalikkut ajortulior­tarnerat juutiun­ngitsunik pisuunngor­titsippat ikiliar­tornerallu allamiunik pisuunngor­titsippat taava amerlas­susissamittut amerlatigilerunik pisuunerungaalissapput!

13 Maanna allamiuususi allaffigaassi. Allamiunut apustiliugama kiffartornera ataqqinaatigaara,* 14 nunaqqatikkami arlaatigut sinngalersik­kusukkakkit ilaallu annaakkusullugit. 15 Juutimmi ajattugaanerat juutiun­ngitsut saammaan­neqarnerannik kinguneqarpat juutit ilaasa akuerisaaleq­qinnerat toqusunik makititsinertut issannginnerpa? 16 Naqittakkap ilaa inerittuni siullertut pilliutigineqartoq illernar­tuuppat sinnera aamma illernar­tuussaaq. Sorlak illernar­tuuppat avalequtit aamma illernar­tuussapput.

17 Avalequtilli ilaat peerneqarpata ilissilu, oliivenequtaagaluarlusi asimi naasoq, naatsiivimmi oliivenequtip avalequtaasa akorngannut ikkunneqarussi pisuussutaanillu pissarseqataalerussi 18 avalequtit allat pingaakujuf­figissan­ngilasi.* Taamaalis­sagaluarussili eqqaamas­savarsi sorlammik atatitsisuunasi sorlaap atatimmasi. 19 Taava oqassaasi: “Ikkunneqar­niassagatta avalequtit peerneqarput.” 20 Tamanna ilumoorpoq! Uppersuseqan­nginnamimmi peerneqarput, ilissili upperassi atavusi. Makitanasi mianersoritsi. 21 Guutimmi naatsiivimmi oliivenequtip avalequtai asattuutin­ngikkunigit aamma ilissi asattuutis­sanngilaasi. 22 Taamaattumik Guutip ajunngitsuunera sukannis­susialu maluginiarsigit. Katattut pillartarpai, ilissili piumasaqaatiminik eqqortitsisarussi ajunngisaarfigis­savaasi, taamaaliun­ngikkussili aamma ilissi kipineqarlusi peerneqassaasi. 23 Juutilli uppersuseqalerunik ikkunneqassapput, Guutimmi ikkuteq­qissinnaavai. 24 Oliiveneqummit asimiittumit kipineqariarlusi naatsiivimmi oliiveneqummut pissusis­samisuun­ngitsumik ikkunneqarsin­naagussi taava soorunami avalequtit naatsiivimmi naajartortut orpimmut nagguigisaminnut ikkunneqarsin­naassapput!

25 Qatanngutit, Guutip isertugaataa pillugu ilisimatik­kusuppassi nammineq isumassinni silatuusoreqqunasi: Allamiut amerlas­susissamittut amerlas­suseqaler­nissaasa tungaanut Israalikkut ilaat malugisaataarupput, 26 Israalikkullu tamarmik taamaalillutik annaanneqassapput. Soorlu allassimasoq: “Aniguisitsisussaq Ziionnimeersuussaaq Jaakullu kinguaavisa eqqunngitsulior­tarnerannik unitsitsis­salluni. 27 Ajortuliaallu peerukkit isumaqatigiis­suteqarfigis­savakka.”* 28 Nutaarsiassanut nuannersunut tunngatillugu akeraanerat iluaqutigaarsi. Siuaasatilli pillugit Guutimit asaneqarnerat pissutigalugu ilaat toqqarneqarput. 29 Guutimmi tunissuteqarnini qaaqqusininilu peqqissimis­sutigineq ajorpai. 30 Guutimut naalanngitsuusimagaluarpusi, maannali juutit naalannginnerat pissutigalugu nallittor­neqarpusi. 31 Naalanngimmata nallittor­neqarpusi. Taakkuli ilissitulli nallittor­neqarsin­naapput. 32 Guutimmi inuit tamaasa nallittorsin­naajumallugit naalanngis­sutsimut parnaaruppai.

33 Guutip pisuussusiisa, ilisimas­susiata paasisimasaqas­susiatalu itissusii! Eqqartuussineri iliuusiilu tamakkiisumik paasineqarsin­naanngillat! 34 Aap, “kia Jehovap eqqarsaatai ilisimasinnaavai? Kina siunnersor­tigisinnaavaa?” 35 Imaluunniit: “Kia akilerneqarumalluni siulliulluni tunivaa?” 36 Suummi tamarmik taassumannga pinngor­tinneqarlutillu atatinneqarlutillu pigineqarput. Qaqugorsuarmut ataqqinarsisin­neqarli. Amen.

12 Qatanngutit, Guutip nallittormasi kimigiiserfigaassi timisi uumasutut illernartutut Guutimillu akuerisaasutut pilliutissatut sassaateq­qullugit. Silatusaarlusi Guuti kiffartorfigisiuk. 2 Nalitsinni pissutsinut* naleqqus­sassaaritsi, Guutilli piumasaa akuerisaalu ajunngitsoq naammal­luinnartorlu qulariun­naarnias­sagassiuk isumarsi allanngor­tissiuk.

3 Ajunngisaangaarfigineqarnera tunngavigalugu tamassi kajumis­saarusuppassi pisariaqartumit annerusumik imminut pingaar­teqqunasi. Guutilli upperneq tunniussaa* tunngavigalugu silatusaassaasi. 4 Soorlu timimi ataatsimi assigiin­ngitsunik atuuffilinnik amerlasuunik avateqartugut, taamatuttaaq amerlagaluarluta 5 Kristusi ataasioqatigalugu timiuvugut ataaseq. Tamattali avatiuvugut imminnut pisariaqartittut. 6 Ajunngisaangaarfigineqar­nitsinnut naapertuuttumik tunissutinik* tamatta tunineqarpugut. Siulittuisin­naanermik tunineqarsimagutta uppernitsinnut naapertuuttumik siulittuisa. 7 Kiffartornermik tunineqarsimagutta kiffartortuarta. Ilinniar­titsisoq ilinniar­titsiuarli. 8 Qiimmassaasoq qiimmassaali.* Tunissuteqartoq* tukkorli. Siulersuisoq* kajumis­suseqarli.* Nallittuisoq nuannaarluni nallittuili.

9 Ilumoor­tuusaarasi asannigitsi. Ajussuseq maajugisiuk. Ajunngitsoq aalajangiusimasiuk. 10 Qatanngutigiittut asaqatigiillusilu qamannga pisumik misigis­suseqarfigigitsi. Siulliullusi ataqqin­nittulior­taritsi. 11 Eqiasunnasi* sulilluar­taritsi.* Anersaamit illernartumit sunnerneqangaaritsi.* Jehovap inussiaataatut kiffartoritsi. 12 Neriuut nuannaarutigisiuk. Annikil­liornermi pinertusaaritsi. Qinujuaritsi. 13 Illernartut pisariaqar­titaannik tunisigit. Inoroorsaarneq ileqquliussiuk. 14 Malersortisi ajunngisaarfigisigit. Perloqqusinasi ajunngitsumik kissaas­sigitsi. 15 Nuannaartut nuannaaqatigisigit. Qiasut qiaqatigisigit. 16 Imminut isumassor­tarnissitut allat isumassorsigit. Pingaakujunnasi* maniguugitsi. Nammineq isumassinni silatusoreqinasi.

17 Ajortoq ajortumik akissan­ngilarsi. Inuit tamarmik ajunngitsuuneragaat iliuuserisigit. 18 Sapinngisassinnik inuit tamaasa eqqisseqatiginiar­tarsigit. 19 Asasakka, akiniaas­sanngilasi, kamannissarli Guutimut isumagitissiuk, allassimavormi: “ ‘Akiniut pigaara, uanga pillaajumaarpunga,’ taama Jehova oqarpoq.” 20 Kisianni ilinnut akeraasoq kaappat nerisassaanik tuniuk. Imerusuppat imigassaanik tuniuk. Taamaalior­nikkummi aamarsuit aamaartut niaquanut kuerassagakkit.* 21 Ajortumit ajugaaf­figiteqinak, ajunngitsorli atorlugu ajortoq ajugaaf­figiuaruk.

13 Guutip oqartus­saassuseq tamaat pigimmagu oqartus­saassusillillu pissaaneqaral­lartussatut akuerimmagit inuit tamarmik oqartus­saasunut kajumillutik naalassapput. 2 Taamaattumik oqartus­saasunik akerlilersuisut Guutip aaqqissuussaanik akerlilersuipput. Taamaaliortullu eqqartuun­neqassapput. 3 Ajunngitsuliortummi pinnatik ajortuliortulli naalakkersuisut siooragisarpaat. Oqartussaasut siooragerusun­ngikkukkit ajunngitsuliortuarit, taamaalioruillu nersualaas­savaatsit. 4 Taakkumi illit iluaqutissannik Guutimut kiffaapput. Pissutis­saqarluarlutimmi panalisar­tarmata ajortulioruit sioorassaatit. Guutimut kiffaapput ajortulior­tartunik pillaasartut.

5 Taamaattumik pillarneqarnissaq pissutigiin­narnagu aammali nalunngeqatigin­nissutersi pissutigalugu kajumillusi naalattariaqarpusi. 6 Taamaattumik aamma akileraar­tarpusi, oqartus­saasummi inuiaqatigiit iluaqutis­saannik Guutimut kiffartor­tuarput. 7 Pisassaannik tamaasa tunisigit: Akileraaq­qusisoq akileraarutinik, akitsuutinik akileeq­qusisoq akitsuutinik, sioorageqqusoq siooragisiuk, ataqqeq­qusorlu ataqqisiuk.

8 Asaqatigiin­nissamik taamaallaat immissinnut akiitsoqarfigisin­naavusi. Kinaluunniit inoqatiminik asannittoq inatsisinik eqqortitsivoq. 9 Inassutit uku: “Allasius­sanngilatit, inummik toqutsis­sanngilatit, tillissan­ngilatit, allap pigisai pilerigis­sanngilatit”, inassutillu allat tamarmik inassummi uani eqikkar­neqarput: “Inoqatit imminut asanittut asassavat.” 10 Asannittoq inoqamminik ajortumik pinninneq ajorpoq. Taamaattumik asannittoq inatsisinik eqqortitsivoq.

11 Nalunngin­nassiullu iternissamut piffissan­ngortoq taamaalior­tariaqarpusi, uppertun­ngoqqaar­nitsinniimmi annaanneqar­nissarput qaninneruvoq. 12 Unnuaq naalerpoq, ullunngungajalerpoq. Taamaattumik iliuutsit taarnermut tunngasut peerlugit qaamanerup sakkui atisigit. 13 Ullukkut ileqquusutut ileqqorilluta inuusa, ingasattumik* festernata, aalakoornata,* atoqatigiinnikkut eqqunngitsuliornata, kanngut­taatsuliornata,* assortuinata sinnganatalu. 14 Naalagarli Jiisusi Kristusi ilaarsiuk, pileris­susipiluillu malillugit iliuuseqar­nissarsi pilersaarusius­sanngilarsi.

14 Uppernikkut sanngiitsoq akuerisiuk, ilissinnilli allaanerusumik isumaqartoq* isornar­torsiornasiuk. 2 Uppertoq sunilluunniit nerisinnaavoq, sanngiitsorli naatitar­tuinnartarpoq. 3 Nerisup nerinngitsoq nikagis­sanngilaa nerinngitsullu nerisoq Guutimit akuerineqartoq isornar­torsiussanagu. 4 Kinaagavit allap kiffaa isornar­torsiorpiuk? Naalagaata nammineq aalajangissavaa eqqortuliornersoq eqqunngitsulior­nersorluunniit, Jehovammi ikiuineratigut eqqortuliorsinnaavoq.

5 Inuit ilaasa ulloq ullunit allanit pingaar­nerutit­tarpaat, allalli tamaasa assigiittutut isigisarpaat. Inuup aalajangiussani qularin­ngilluin­narliuk. 6 Ullormik aalajangersimasumik pingaar­nerutitsisoq Jehova pillugu ullorsiortarpoq. Sunilluunniit nerisartup Guuti qutsavigisaramiuk Jehova pillugu nerisarpoq, nerinngitsorlu Jehova pillugu nerineq ajorpoq taamaattorli Guutimut qujasarluni. 7 Arlaannarpul­luunniit imminuinnaq pilluni inuuneq ajorpoq kinaluunniillu imminuinnaq pilluni toquneq ajorluni. 8 Inuuguttami Jehova pillugu inuuvugut, toquguttalu Jehova pillugu toquvugut. Inuugaluaruttami toqugaluarut­taluunniit Jehovap pigaatigut. 9 Kristusimi toqusunut inuusunullu naalagan­ngorniassagami toqullunilu uummaqqippoq.

10 Kisianni sooq qatanngutit isornar­torsiorpiuk? Sooq qatanngutit nikagaajuk? Tamattami Guutip eqqartuus­sivianut sassartin­neqartus­saavugut. 11 Allassimavormi: “ ‘Ilumut uumagama qularin­ngissin­naavarsi,’ oqarpoq Jehova, ‘kikkut tamarmik seeqqum­merfigis­sagaannga sumiutul­luunniillu oqaasillit isertuaratik nassuerutigissagaat Guutiusunga.’ ” 12 Tassa tamatta iliuutsigut naapertorlugit Guutimit eqqartuun­neqassaagut.

13 Taamaattumik immitsinnut isornar­torsius­saarluta aalajangiusimatigu qatanngutitsinnut naakkius­sutaanatalu akornutaan­nginnissarput. 14 Naalakkamik Jiisusimik malinnit­tuugama qularin­ngilluin­narpara sunaluunniit immini minguttuun­ngitsoq, inulli minguttuusorisaminik nerisoq eqqunngitsuliortoq. 15 Nerisatimmi pillugit qatanngutit mamiatsappat asannit­tuliorun­naassaatit. Kristusip toqussutigisaa nerisannik sequmeqinagu.* 16 Taamaattumik ajunngitsuusorisat inuit ajortumik eqqartortagaat iliuusereqinagu. 17 Nerisassammi imigassallu Guutip kunngeqarfianut isernissamut apeqqutaan­ngillat, tassungali iserniartut naapertuil­luartuusariaqarlutillu eqqisseqateqar­tariaqarlutillu anersaamit illernartumit pisumik nuannaar­tariaqarput. 18 Kinaluunniimmi taamatut Kristusimut inussiatut kiffartortoq Guutimit akuerisaallunilu inunnit iluarisaavoq.

19 Taamaattumik sapinngisatsinnik eqqisseqatigiillutalu ineriar­torteqatigiitta. 20 Nerisassat piinnarlugit Guutip suliaa ingutserun­naarniarsiuk. Suut tamarmik minguitsuupput, naakkius­sutaasunilli nerisoq eqqunngitsuliorpoq.* 21 Qatanngutit naakkiuteqqunagu neqitun­ngikkuit, viinnisun­ngikkuit naakkius­sutigisin­naasaanil­luunniit iliuuseqan­ngikkuit ajunngin­neruvoq. 22 Tamakkununnga tunngatillugu isummat Guutip kisimi ilisimaliuk. Pilluarpoq aalajangiussani pillugu imminut pillagas­saatinngitsoq. 23 Nerisassalli pillugit nalornigaluarluni nerisoq eqqortuliorsorin­nginnami imminut pillagas­saatereerpoq, eqqortuusorinngisat suulluunniit ajortulior­nerupput.

15 Uagut nukittuujusugut iluarisatsitut iliuinnarnata pisussaavugut sanngiitsut ikiussallugit. 2 Inoqaterput ineriar­toqqullugu iluarisaatut ajunngitsuliorfigisariaqarparput. 3 Allaammi Kristusi iluarisamisut iliunngilaq, allassimavormi: “Ilinnut mitalliutaasunik mitallerpaannga.” 4 Siornatigummi allanneqarsimasut ilinniarfiginias­sagatsigit allanneqarsimapput. Allakkat Illernartut iluaqutigalugit pinertusaarlutalu tuppallersar­neqartaratta neriuuteqarpugut. 5 Qanortoq Guutip pinertusaar­nissamik ikiuisarlunilu tuppallersaasartup Kristusitut Jiisusitut isiginnit­taaseqaq­qullusi ikiorilisi 6 ataasioqatigiillusi Guuti Naalakkattalu Jiisusip Kristusip Ataataa unnersiutiginias­sagassiuk.

7 Taamaattumik Guuti unnersiutigineqaq­qullugu Kristusip ilissinnik akuerin­ninneratut* immissinnut akuerigitsi. 8 Nalussan­ngilarsi Kristusi kipineqarsimasunut kiffartor­tunngortoq Guutip ilumoortumik oqalunnera ersersin­niarlugu siuaasaannullu neriorsuutaasa ilumoornerat uppernarsar­niarlugu 9 juutiun­ngitsullu Guutip nallittuinera unnersiutiginias­sammassuk. Allassimavormi: “Taamaattumik allamiut akornganni unnersiutigis­savakkit, ativillu ataqqinaatissaanik erinarsussaanga.” 10 Aamma oqarpoq: “Allamiuususi, innuttai nuannaaqatigisigit.” 11 Aammalu: “Inuiaqatigiit tamassi, Jehova unnersiutigisiuk, inuillu tamarmik unnersiutigilissuk.” 12 Aamma Iisaaja allappoq: “Iisaajip sorlaa inuiaqatigiinni naalakkersuisussaq saqqummerumaarpoq, inuiaqatigiillu taanna neriuffigissavaat.” 13 Qanortoq Guutip neriuuteqalersitsisup tatigigassinni nuannaarnermik eqqissinermillu ulikkaarilisi. Aap, qanortoq anersaap illernartup pissaanerata ikiuineratigut neriuuteqangaaritsi.

14 Qatanngutit, aamma qularin­ngilara ajunngis­sutsimik ulikkaarlusilu paasisimasaqas­sutsimik ulikkaarlusilu ilitsersoqatigiis­sinnaasusi.* 15 Guutilli ajunngisaangaarfigimmanga aalajangersimasunut tunngatillugu eqqaasin­niarlusi toqqaan­narnerusumik allaffigaassi. 16 Allamiut tassaaler­niassammata pilliutit Guutimit iluarisaasut, pilliutit anersaamit illernartumit ikiorneqarlutik illernar­tunngortut, Guuti pillugu nutaarsiassat nuannersut Jiisusip Kristusip kiffaatut tamaviaarlunga oqaluus­sissutigivakka. Tamannalu suliaavoq illernartoq.

17 Kristusimit Jiisusimit ilinniar­titaanera Guutillu suliaanik suliaqarnera qiimmat­taatigaakka. 18 Namminermi naammas­sisakka eqqartornagit Kristusip inuiaqatigiinnit allaneersut imminut naalattun­ngoqqullugit uakkut naammassisai oqaaserisaalu kisiisa eqqartor­niarpakka. 19 Taakku Guutip anersaavata tupinnartuliai* pissutigalugit naalapput. Taamaalillunga Kristusi pillugu nutaarsiassat nuannersut Jerusalemmimiit Ilyria tikivillugu peqqissaarlunga oqaluus­sissutigaakka. 20 Allap tunngaviligaani sanarusun­nginnama anguniagarisimavara Kristusip aqqanik ilisiman­niffiusuni nutaarsiassat nuannersut oqaluus­sissutigin­nginnissaat. 21 Soorlu allassimasoq: “Taanna pillugu tusagaqan­ngitsut takussavaat, tusarsiman­ngitsullu paasisaqassapput.”

22 Tamanna pissutigalugu tikeraar­nissassinnut arlaleriarlunga akornuser­neqarpunga. 23 Maannali nunap immikkoortui tamakkereersimavakka, ukiorpas­suarnilu* tikeraarusus­simavassi. 24 Taamaattumik Spaaniamut angalaninni neriuppunga takussallusi nuannaarutigisannillu ilagereerussi qaniussagissinga. 25 Illernartulli kiffartuuk­kumallugit maanna Jerusalemmimut aallalerpunga. 26 Makedoniamiut Akaarjamiullu Jerusalemmimi illernartut piitsor­taannut pigisaminnik tunissuteqarsimanertik nuannaarutigaat. 27 Anersaakkut ittunik avitseqateqartut pigisatigut ikiornis­saannut allamiut pisussaagamik akiitsoqarfimminnut tunissuteqarnertik nuannaarutigaat. 28 Tunissutit* isumannaatsumik anngutereerukkit aqqusaarlusi Spaanialiassaanga. 29 Nalunngilara tikikkussi ajunngitsut Kristusimeersut tamaasa ilissinnut tunniutis­sallugit.

30 Qatanngutit, Naalagarput Jiisusi upperfigigatsigu Guutillu anersaavata asaqatigiiler­timmatigut kimigiiserfigaassi pisarnittut qamannga pisumik Guutimut qinnuteq­qullunga. 31 Judiiami uppinngitsunit annaanneqar­nissara tunissutillu Jerusalem­miliaassama illernartunit akuerineqar­nissaat qinnutigisarsiuk. 32 Guutip piumasarippagu nakussatseqatiginias­sagassi nuannaarlunga ornissavassi. 33 Qanortoq Guutip eqqissinermik tunisisartup tamassi najorilisi. Amen.

16 Qatannguterput arnaq Kenkriiami ilagiinni kiffartortoq Fiibi ilissinnut ilisaritik­kusuppara. 2 Amerlasuunik, aamma uannik, illersuisuummat qinnuigaassi Naalakkap aqqani illernartunik tikilluaq­qusisar­nissitut tikilluaq­qoqqullugu pisariaqar­titaanillu sunilluunniit tuneqqullugu.

3 Inuulluaq­qutikkisigit Priska Akviilalu Kristusimut Jiisusimut kiffartornermi suleqatikka 4 uanga pillunga inuunerminnik navianar­torsior­titsisimasut. Uanga juutiun­ngitsullu ilagiivi tamatta taakkununnga qujamasuppugut. 5 Aamma ilagiit illuanni ataatsimiittartut inuulluaq­qutikkisigit. Asasara Epanaatusi, Aasiami Kristusimik malinnit­tunngortut siulliit ilaat, inuulluaq­qutikkisiuk. 6 Mariia, ilissi pillusi tamaviaarluni sulisoq, inuulluaq­qutikkisiuk. 7 Inuulluaq­qutikkisigit eqqarlikka parnaarus­saaqatikkalu Andruunikusi Juuniasilu apustilinit ilisimaneqarluartut uanniillu sivisunerusumik Kristusimik ataasioqateqarsimasut.

8 Asasara Ampiliaatusi, Naalakkamik malinnittoq, inuulluaq­qutikkisiuk. 9 Inuulluaq­qutikkisigit Kristusimut kiffartoqaterput Urbaanusi asasaralu Starkusi. 10 Inuulluaq­qutikkisiuk Apiilisi Kristusip akuerisaa. Aristobulusip illuaniittut inuulluaq­qutikkisigit. 11 Eqqarlera Heruudiuni inuulluaq­qutikkisiuk. Naarkisorsip illuaniittut Naalakkamik malinnittut inuulluaq­qutikkisigit. 12 Tryfiina Tryfuusalu, arnat Naalakkamut kiffartornermi tamaviaartut, inuulluaq­qutikkisigit. Asasarput Persisi, Naalakkamut kiffartornermi tamaviaartoq, inuulluaq­qutikkisiuk. 13 Inuulluaq­qutikkisigit Ruufusi, Naalakkap toqqagaa, anaanaalu anaanattut isigisara. 14 Asynkritusi, Fliikorni, Hermesi, Patrobasi Hermasilu qatanngutillu taakkunaniittut inuulluaq­qutikkisigit. 15 Inuulluaq­qutikkisigit Filuluukusi, Juulia, Neeriusi najaalu* aamma Olympasi illernartullu tamaasa taakkunaniittut. 16 Illernartumik kunillusi ilasseqatigiigitsi. Kristusip ilagiivisa tamarmik inuulluaqquaasi.

17 Qatanngutit, maanna kimigiiserfigaassi ilinniar­titsissutigineqartunut akerliusumik avissaar­tuutsitsisut naakkiutsitsisullu mianersorfigeq­qullugit. Taamaattut ilagisaqinasigit. 18 Taamaattummi Naalagarput Kristusi inussiaataaf­figinagu pileris­susipilutik* inussiaataaffigaat. Tusaruminartunik iluareq­qusaarutinillu oqalullutik pisuussuteqan­ngitsunik tammartitsisarput. 19 Naalannersi tamanit maluginiar­neqarpoq, uangalu tulluusimaarutigaassi. Kissaatigaarali ajunngitsumut tunngatillugu silatuujunissarsi, ajortumulli tunngatillugu pinngitsuunissarsi. 20 Guutip eqqissinermik tunisisartup qanittukkut Saatani isikkassi ataanni sequmisissavaa. Qanortoq Naalakkatta Jiisusip Kristusip ajunngisaangaarnerata najorilisi.

21 Suleqatima Timuutiusip eqqarlimalu Luukiusip, Jaasornip Sosipatrossillu inuulluaqquaasi.

22 Uanga Tertiusi, allakkanik ukuninnga allattuusunga, Naalakkap aqqani inuulluaqquassi.

23 Gaajusip, uanga ilagiillu inisimaf­figisatta, inuulluaqquaasi. Erastusip illoqarfiup aningaaserisuata qatanngutaatalu Kuartusip inuulluaqquaasi. 24*  ——

25 Nutaarsiassat nuannersut nalunaarutigisakka Jiisusilu Kristusi pillugu oqaluus­sissutigineqartut iluaqutigalugit Guutip nakussatsis­sinnaavaasi. Tusarliussaq tamanna Guutip ukiorpassuarni isertugaataanit saqqummersin­neqarsimavoq. 26 Tamannalu Allakkani Illernartuni siulittuutinit ilisimalersin­neqarlunilu* paasinarsisin­neqarpoq. Allamiut uppernikkut naalattooq­qullugit naassaan­ngitsumik Guutiusoq peqqusivoq tamanna ilisimaneqalissasoq. 27 Guuti kisimi silatuujusoq Jiisusi Kristusi aqqutigalugu qaqugorsuarmut ataqqinarsisin­neqarli. Amen.