Pesoas na mundu interu sta preokupadu ku modi ki redi sosial sta ta afeta jóvens

Duránti anu di 2025, governantis na mundu interu mostra ma es staba preokupadu ku modi ki redi sosial sta ta afeta jóvens. Un país proíbi kes jóven ku ménus di 16 anu di uza redi sosial i otus país sta ta pensa na faze mésmu kuza.

É interesanti ma ti mésmu alguns jóven dja odja modi ki redi sosial pode prujudika-s. Un piskizaa ki fazedu na Mérka i ki publikadu na abril di 2025, ta fla ma “kuazi metadi di kes jóven di 13 ti 17 anu (48%) fla ma kes pájina na internet [di redi sosial] sta ta prujudika más é jóvens di ses idadi.”

Spesialistas na ária di saúdi sta ta txoma atenson pa modi ki redi sosial sta ta afeta saúdi mental di jóvens. Na anu pasadu, kel dotorb ki éra diretor jeral di saúdi públiku na Mérka, fla: “Saúdi mental di jóvens sta ta piora txeu i kel-li é un prubléma gravi. Redi sosial é un di kes motivu prinsipal.”

Modi ki pai ku mai pode proteje ses fidju di kes prigu di redi sosial? Bíblia ta da bons konsedju.

Kuzê ki pai ku mai pode faze

Odja alguns konsedju ki Bíblia ta da.

‘Ken ki é prudenti ta pensa antis di el da kada pasu.’ — Provérbios 14:15.

Uza redi sosial ten txeu prigu, pur isu ka bu xinti obrigadu na dexa bu fidju uza redi sosial. Antis di bu dexa bu fidju uza redi sosial, djobe dretu si el ta ba konsigi kontrola ténpu ki el ta gasta na el, mante bons amizadi i ivita odja kuzas mariadu.

• Pa bu sabe más, lé kes artigu li: “N debe dexa nha fidju uza redi sosial?” i “Inxina bu fidju uza redi sosial ku suguransa.”

“[Nhos] uza nhos ténpu di midjór manera”. — Efézius 5:16.

Si bu disidi dexa bu fidju uza redi sosial, poi régras i splika-l modi ki kes régra ta proteje-l. Presta atenson na kalker mudansa na konportamentu di bu fidju ki pode mostra ma bu meste kontrola modi ki el ta uza redi sosial.

• Uza vídiu di dizenhus na kuadru branku Toma kuidadu óras ki bu ta uza redi sosial pa djuda bu fidju intende pamodi ki nu meste kontrola modi ki nu ta uza redi sosial.

Pa sabe otus konsedju ki Bíblia ta da pai ku mai, odja artigu “Un autoridadi na ária di saúdi aviza ma redi sosial sta ta prujudika jóvens — Kuzê ki Bíblia ta fla?”.

Sabe más

Bíblia ta fla ma nu sta ta vive na un ténpu “konplikadu i difísil di aguenta.” (2 Timótiu 3:1-5) Má tanbê, el ta da-nu bons konsedju ki pode djuda-nu lida ku kel situason. Na kel artigu ku téma “Txeu jóven sta ku prublémas di saúdi mental — Kuzê ki Bíblia ta fla?”, bu pode atxa un lista ku más di 20 artigu ku bazi na Bíblia ki pode djuda pai ku mai i ses fidju.