Intruduson di párti 6

Kantu israelitas txiga kel téra ki Deus prometeba es, tabernákulu bira lugar prinsipal di adorason verdaderu. Saserdótis ta inxinaba Lei i juizis ta giaba povu. Kel párti li ta ben mostra modi ki disizons ku konportamentu di un algen ta afeta otus. Kada israelita tinha ki sérba lial pa Jeová i pa kes algen ki ta tomaba kónta di es. Distaka modi ki izénplus di Débura, Nuemi, Juzué, Ana, fidju-fémia di Jefté i Samuel djuda kes algen ki staba pértu di es. Mostra ma ti alguns algen ki ka éra israelitas, sima Raabi, Ruti, Jael i gentis di téra di Jibion toma ladu di israelitas pamodi es sabeba ma Deus staba ku es.