Redis di péska ki es ta uzaba na ténpu ki Bíblia skrebedu

Alguns disiplu di Jizus éra piskador. (Mar. 1:16-20) Es ta uzaba redi óras ki es ta piskaba na mar di Galilea.

Pa faze un redi di péska, un algen tinha ki pegaba kes fiu ki normalmenti éra di linhu i el ta maraba es pa forma un kuza ki ta parse ku teia di aranha, ki tinha txeu braku. Si un piskador krê pegaba pexi pikinoti, el ta uzaba un redi ki tinha braku pikinoti. Si el krê pegaba pexi más grandi, el ta uzaba un redi ki tinha braku más grandi. Kes redi pikinoti normalmenti tinha txunbu ô pédra pa fazeba pézu, asi pa kel redi kanbaba déntu di agu. Má kes redi grandi ki es ta rastaba tinha pézu na párti di baxu i tanbê madera ô kurtisa na párti di riba pa el pode boiaba.

Kes redi di péska éra karu i konpoba es ta daba txeu trabadju. Es pode stragaba óras ki es ta trankaba na rótxa na fundu di mar ô óras ki es pegaba txeu pexi. (Luk. 5:6) Bíblia ta fla ma Tiagu i Juan staba ta “konpo redi.” Talvês es staba ta uza un gudja i linha di linhu. (Mat. 4:21) Kes piskador talvês ta konpoba ses redi tudu bês ki es uzaba es. Lukas tanbê pâpia di kes piskador ki staba ta “laba ses redi” pa tra kes sujéza ki staba na es. (Luk. 5:2) Dipôs kes piskador ta prindaba kes redi pa seka, asi pa es ka fikaba podri. — Eze. 47:10.

Jizus konvida kes ómi ki staba kustumadu na uza redi pa bira “piskador di ómi.” — Mar. 1:17.