Ser korajozu i lial sima Benaia

Benaia éra un trópa balenti ki sirbi na izérsitu di rei Davidi i más tardi na izérsitu di rei Salumon. Benaia éra fidju di un saserdóti. Normalmenti saserdóti i levita ka ta baba pa géra i nen es ka ta uzaba arma. Má Benaia luta na kes géra di Jeová i el mostra txeu koraji. Pur izénplu, el mata un lion na un sistérna i el mata un trópa jiganti. Davidi ta kunfiaba na Benaia di tal manera ki el skodje-l pa el ser xéfi di ses guarda-kósta. — 2 Sam. 23:20-23.

Un bês, Absalon rabela kóntra Davidi i dipôs Adonias faze mésmu kuza, má Benaia kontinua lial. (2 Sam. 8:18; 15:18; 1 Reis 1:8) Alén di kel-li, kantu Davidi fika bédju, Benaia apoia-l asi pa Salumon pode biraba rei. (1 Reis 1:32-40) Benaia foi lial pa Jeová i pa kes algen ki El skodje mésmu kantu otus ka foi lial.

Nos tanbê, nu meste koraji pa nu luta kóntra nos piór inimigu ki é Satanás i kes algen ki ta apoia-l. I nu debe sta disididu na kontinua ta vive di akordu ku leis di Jeová. (Efé. 6:11; 1 Ped. 5:8, 9) Mésmu ki otus algen skodje bandona Jeová, nu ta kontinua lial pa el, i nu sabe ma el ta ben rekonpensa-nu. — 2 Sam. 22:26.