Abraon éra un ómi korajozu

Abraon djobe pa se família i pa ses sérvu timenti el staba ta pripara pa bai pa Kanan. (Jénezis 12:1-5) Tudu kes algen li ta dipendeba di el pa tinha sustentu. Kantu Abraon djobe pa es, el xinti ma kel-li éra un responsabilidadi grandi. Modi ki el ta daba es kes kuza ki es ta mesteba na un téra ki el ka konxeba? Ka éra más fásil fikaba na Ur ki éra un lugar riku, ku padja pa animal avontádi, txon ki ta daba kumida i agu avontádi? I si el fikaba duenti ô si el moreba na kel téra, kenha ki ta kuidaba di se família? Mésmu ki kes kuza li preokupa Abraon, el ka dexa medu toma kónta di el. El staba disididu na aji i na obi ku Deus, ka ta inporta kuzê ki kontiseba. Kel-li ta mostra ma el éra un ómi korajozu.

KUZÊ KI É KORAJI? Un algen ki ten koraji é fórti i balenti, ki é kontráriu di ser kobardu. Kel-li ka krê fla ma nunka el ka ta xinti medu. Un algen ki ten kel koraji ki Deus ta da pode ti xinti medu, má el ta aji simé.

MODI KI ABRAON MOSTRA KORAJI? Abraon staba dispostu na ser diferenti di otus algen. El kria na un lugar ki pesoas ta adoraba kes deus falsu i imajen. Má simé el ka dexa medu di kuzê ki otus algen ta pensaba inpidi-l di faze kel ki el sabia ma é dretu. Envês di kel-li, ku koraji Abraon skodje vive di un manera diferenti. El disidi sirbi sô Jeová, ki é “kel Deus Más Grandi”. — Jénezis 14:21, 22.

Pa Abraon, adora Deus verdaderu éra más inportanti di ki kuzas material. El dexa un vida sábi na Ur i el muda pa dizértu. El kunfia di korason ma Jeová ta daba el kes kuza ki el mesteba. É klaru ki sima ténpu ba ta pasa talvês Abraon pensa na alguns di kes kuza ki el tinha na Ur. Má el tinha serteza ma Jeová sénpri ta daba el ku se família kel ki es mesteba. Jeová éra kel algen más inportanti na vida di Abraon, pur isu el tevi koraji di obi ku El.

KUZÊ KI NU PODE PRENDE? Sima Abraon nu pode dizenvolve koraji pa obi ku Jeová sikrê otus algen na nos vólta ka ta faze kel-li. Pur izénplu, Bíblia ta mostra ma kes ki ta difende ses fé na Jeová pode pasa pa opozison, talvês di amigu ô di família ki ten bon intenson. (Juan 15:20) Má óras ki nu ten serteza di kes kuza ki nu prende sobri Jeová, nu ta difende kuzê ki nu ta kridita na el ku ruspetu. — 1 Pedru 3:15.

Tanbê nu pode kunfia na promésa di Deus ma el ta da kes algen ki ten fé kel ki es meste. Kel kunfiansa li ta da-nu kel koraji ki nu meste pa nu poi Jeová na primeru lugar na nos vida envês di kuzas material. (Mateus 6:33) Odja modi ki un família faze kel-li.

Sikrê ku dôs fidju pikinoti, Doug i Becky krê mudaba pa un país ki mesteba más algen pa prega notísias sábi. Dipôs di faze bon piskiza i txeu orason es disidi muda. Doug fla: “Nu mesteba koraji pa panhaba nos kuzas i bai djuntu ku nos fidjus sen sabe si tudu kuza ta koreba dretu. Má désdi ki nu kumesa ta pensa na muda, nu pâpia sobri izénplu di Abraon ku Sara. Midita na modi ki es kunfia na Jeová i na modi ki nunka el ka diziludi-s, djuda-nu txeu.”

Doug fla kel-li sobri modi ki é ses vida na stranjeru: “Kes benson ki nu resebe é txeu dimás. Dja ki nos vida é mutu más sinplis, nos família ta konsigi pasa maior párti di dia djuntu. Nu ta prega, nu ta pâpia ku kunpanheru i nu ta brinka ku nos fidjus. Kel alegria ki nu ta xinti é difísil di splika.”

É klaru ki é ka tudu algen ki ta konsigi faze un mudansa grandi sima kel-li. Má simé, nos tudu nu pode imita izénplu di Abraon óras ki nu ta poi nos adorason pa Deus na primeru lugar na nos vida i nu ta kunfia ma sénpri el ta sta la pa djuda-nu. Óras ki nu ta faze kel-li, nu sta sigi konsedju di Bíblia di “fika xeiu di koraji i... fla: ‘Jeová é kel ki ta djuda-m. N ka ta xinti medu.’” — Ebreus 13:5, 6.

[Lejenda]

Un algen ki ten kel koraji ki Deus ta da pode ti xinti medu, má el ta aji simé.

[Kuadru/Fotu]

Un mudjer ki ta adoraba Deus i ki tinha txeu valor pa se família

Sara staba kazadu ku un ómi ki tinha un fé fórti. Má es mudjer ki ta adoraba Deus éra un grandi izénplu di fé tanbê. Na verdadi, Bíblia ta fla se nómi três bês i el ta mostra ma el é un bon izénplu pa kes mudjer ki ta adora Deus. (Izaías 51:1, 2; Ebreus 11:11; 1 Pedru 3:3-6) Enbóra Bíblia ka ta pâpia txeu sobri el, nu pode odja ma el tinha kualidadis bunitu.

Pur izénplu, pensa na modi ki Sara reaji kantu Abraon fla ma Deus kreba pa es sai di Ur. El fika ta pensa pa undi ki es ta baba i pamodi? El fika preokupadu pamodi es ka ta tinha kes kuza ki es mesteba? El fika tristi kantu el pensa ma el sta ben dexaba ses amigu i família i ma talvês el ka ta odjaba es más? Di serteza el pensa na tudu kes kuza li. Má simé, el staba dispostu na bai i el kunfia ma Jeová ta abensuaba el pamodi el obi ku El. — Atus 7:2, 3.

Alén di Sara obi ku Deus, el éra un bon mudjer pa se maridu. Envês di fika ta konpiti ku se maridu pa toma disizons na família, Sara sforsa pa ruspeta-l di korason i ku amor el djuda-l kuida di ses família. Nton, éra kes kualidadi ki el tinha di pa déntu ki ta poba el ta ser bunita. — 1 Pedru 3:1-6.

Kuzê ki kes mudjer ki é kazadu pode prende ku el? Un mudjer ki txoma Jill, ki dja ten más di 30 anu ki el ten un kazamentu filís, fla: “Izénplu di Sara inxina-m ma N debe xinti avontádi di fla nha maridu kuzê ki N ta pensa. Má omésmu ténpu N debe lenbra ma nha maridu é xéfi di família i ma é el ki ten responsabilidadi di toma disizon final. I dipôs ki el toma un disizon N debe faze nha midjór pa kel disizon da sértu.”

Talvês kel lison ki nu ta prende ku Sara, ki más ta mexe ku nos, é ma enbóra Sara éra bunita, el ka dexa se bunitéza pô-l ta ser orgulhoza. (Jénezis 12:10-13) Envês di kel-li, ku umildadi el apoia Abraon na kes momentu sábi i kasábi di ses vida djuntu. Di serteza, Abraon ku Sara éra un kazal fiel, umildi i ki ta mostraba amor. Na verdadi, es éra un benson pa kunpanheru.