Иов тхылъым чэнджэщ зэрытт хъуным дыхуегъасэ

1, 2. Іэиуб и ныбжьэгъуищымрэ Елиуйрэ сытыт ящІэн хуейр икІи сытыт ар щІэмытыншыр?

КЪУЭКІЫПІЭ лъэныкъуэмкІэ щыпсэу цІыхухэм Іэиуб къыщыщІар занщІэу зэхахащ. Абы мылъкуу бгъэдэлъар псори зэуэ фІэкІуэдат. Іэиуб къыщыщІар щызэхахам, и ныбжьэгъу Элифаз, Билдад, Цофар сымэ Уц щІыналъэм кІуащ, абы гупсэхугъуэ иратын щхьэкІэ. Абыхэм ялъэгъуам ахэр къигъэуІэбжьащ.

² Іэиуб мэлхэри, гуухэри, махъшэхэри, шыдхэри куэду иІэт, ауэ ахэр псори фІэкІуэдащ. Абы и унэІутхэм и нэхъыбэр яукІащ, и бынхэри унэр къауэри, щІипІытІащ. Ауэ гугъуехьхэр абдеж щиухакъым. Зэман гуэр дэкІауэ, абы узыфэ хьэлъэ къеуалІэри, и щІыфэр зэрыщыту шыным зэщІищтащ. Уц щІыналъэм къыщыкІуам и ныбжьэгъуищым къалъэгъуащ Іэиуб сахуэм зэрыхэсыр икІи хуабжьу и лъэр зэрыщІэхуар. Дапхуэдэу ар абыхэм къазэрыщыхъуар? Абыхэм зы псалъэ жамыІэу, Іэиуб гугъу зэрехьым тхьэмахуэкІэ еплъу щысащ (Иов 2:12, 13). Зы зэман гуэрым Елиуй зи цІэ щІалэр къакІуэри, я гъусэу тІысащ. ИкІэм-икІэжым Іэиуб къэпсалъэри, къыщалъхуа махуэм ебгыу щІидзащ (Иов 3:1—3, 11). Іэиуб дэІэпыкъуэгъу зэрыхуэныкъуэр гурыІуэгъуэт. Элифаз, Билдад, Цофар, Елиуй сымэ Іэмал яІэт Іэиуб щІэгъэкъуэн хуэхъуну икІи ифІ къызэралъыхъуэр къагъэлъэгъуэну. Сыт-тІэ абыхэм ящІар?

3. Мы статьям сыт щызэпкърытхынур?

³ Иеговэ Мусэ унафэ хуищІащ Іэиуб и ныбжьэгъуищымрэ Елиуйрэ жаІам икІи ящІам теухуауэ итхыжыну. Элифаз жиІа языныкъуэ псалъэхэр къызыбгъэдэкІар жин бзаджэрауэ къыщІэкІынущ. Ауэ Елиуй жиІар къызыбгъэдэкІар Иеговэщ (Иов 4:12—16; 33:24, 25). Аращи, гъэщІэгъуэнкъым Иов тхылъым чэнджэщыфІхэри чэнджэщ Іейхэри щІитыр. АдэкІэ зэпкърытхынщ ди ныбжьэгъум и щыуагъэр едгъэлъэгъужын щыхуейм деж, Иов тхылъыр дапхуэдэу къыддэІэпыкъуфынуми. ЯпэщІыкІэ Іэиуб и ныбжьэгъуищым я щапхъэ Іейм гу лъыттэнщ, иужькІэ Елиуй и щапхъэфІым дыхэплъэнщ. Абы нэмыщІ дэ къэтщІэнущ Иов тхылъыр пасэм псэуа Алыхьым и лэжьакІуэхэм сыткІэ къадэІэпыкъуами икІи дэри дапхуэдэу сэбэп къытхуэхъунуми.

ІЭИУБ И НЫБЖЬЭГЪУИЩЫМ Я ЩАПХЪЭ ІЕЙР

4. Іэиуб гупсэхугъуэ иратыну и ныбжьэгъуищым щІахузэфІэмыкІар сыт? (Сурэтми феплъ.)

⁴ Элифаз, Билдад, Цофар сымэ Іэиуб къыщыщІар щызэхахам, и гузэвэгъуэр даІыгъыну кІуащ (Иов 2:11). Ауэ ар абыхэм яхузэфІэкІакъым. Сыт щхьэкІэ? Абы щхьэусыгъуищ нэхъ мыхъуми иІэщ. Япэрауэ, Іуэхур зытетыр зэхамыгъэкІыу, ахэр гупсысэ пхэнжхэм къыхуэкІуащ. Псалъэм папщІэ, абыхэм я гугъащ Іэиуб зыпэщІэхуа гугъуехьхэр и гуэныхьхэм щхьэкІэ къытехуа тезыру (Иов 4:7; 11:14)a. ЕтІуанэрауэ, ахэр дахэу псалъэми, абыхэм жаІэм мыхьэнэ лъэпкъ иІэтэкъым (Иов 13:12). Абы нэмыщІ абыхэм гум еуэ псалъэ Іейхэри жаІэт. Псалъэм папщІэ, Билдад тІэунейрэ Іэиуб ехъурджэуащ, куэдыІуэ къипсэлъу жиІэу (Иов 8:2; 18:2). Цофари Іэиуб акъылыншэу щыту къриІуэкІт (Иов 11:12). Ещанэрауэ, абыхэм я макъыр драмышеями, езыхэм нэхъыфІу зыкъалъытэжу, ауан хэлъу Іэиуб епсалъэт. А псом къегъэлъагъуэ, абыхэм Іэиуб фІыуэ ямылъагъуу, пщІэи хуамыщІу зэрыщытар (Иов 15:7—11). ИкІэм-икІэжым ахэр нэхъыбэу зыхущІэкъуар Іэиуб зэрагъэгушхуэныратэкъым, атІэ зэрагъэкъуэншэнырат.

5. Элифаз, Билдад, Цофар сымэ жаІам сыт кърикІуар?

⁵ Элифаз, Билдад, Цофар сымэ Іэиуб дэІэпыкъун дэнэ къэна, и Іуэхур нэхъ Іей хуащІащ (Иов 19:2). ДауикІ, гурыІуэгъуэщ Іэиуб и щхьэм къыщІыщхьэщыжар. Ауэ зэрызахуэр и ныбжьэгъухэм къагуригъэІуэну щыхэтам абы иригъэлейри, жимыІыпхъэ жиІащ (Иов 6:3, 26). Іэиуб и ныбжьэгъухэм жаІар Иеговэ и еплъыкІэм техуэтэкъым икІи абыхэм я псалъэхэм гущІэгъу лъэпкъи къыхэщтэкъым. Езыхэм къагурымыІуэжу, ахэр ШейтІаным и Іэмэпсымэ хъуащ (Иов 2:4, 6). Мы хъыбарыр пасэм псэуа Алыхьым и лэжьакІуэхэм сыткІэ къадэІэпыкъуа икІи дэ нобэ абы сытым дыхуигъасэрэ?

6. Іэиуб и ныбжьэгъуищым я щапхъэ Іейм Израилым и нэхъыжьхэм сыт хуэдэ дерс хахыфынут?

⁶ Іэиуб и хъыбарым пасэм псэуа Иеговэ и лэжьакІуэхэр сытым хуигъэсэфынут? Иеговэ израил лъэпкъым хабзэ щритам, а хабзэм тету хьэкум зыщІын хуей цІыхухъухэр къыхихащ (Втор. 1:15—18; 27:1). А цІыхухъухэм хьэкум ящІын е чэнджэщ ятын ипэ, цІыхум жиІэм фІыуэ едэІуэн хуейт (2 Лет. 19:6). Иеговэ абыхэм яхуигъэувт Іуэхур зытетыр икІэм нэсу зэхагъэкІыну. Псалъэм папщІэ, псори къагурыІуауэ ямыгугъэу, абыхэм упщІэхэр ятын хуейт (Втор. 19:18). ДэІэпыкъуэгъу хуэныкъуэу зыкъыхуэзыгъазэхэм ахэр пхъашэу яхущыт хъунутэкъым. Сыт щхьэкІэ жыпІэмэ нэхъыжьхэр цІыхум апхуэдэу хущытмэ, абы и Іуэхум теухуауэ жиІэну къегугъуэкІынут (Исх. 22:22—24). Пэж дыдэу, Израилым и нэхъыжьхэм Іэиуб и хъыбарым дерс куэд хахыфынут.

7. Іэиуб и хъыбарым израил цІыхухэр сытым хуигъэсэфынут? (Притчи 27:9).

⁷ Израилым и нэхъыжьхэм я закъуэтэкъым чэнджэщ зытыфынур. Лъэпкъым щыщ дэтхэнэ зыри и ныбжьэгъум дэІэпыкъуфынут Алыхьым нэхъ гъунэгъу хуэхъуну е и щытыкІэм зэхъуэкІыныгъэ хилъхьэну (Пс. 141:5). ДауикІ, гум къыбгъэдэкІыу чэнджэщыфІ зытыфынур ныбжьэгъу пэжыращ. (Къеджэ Притчи 27:9, Гъэсэпэтхыдэхэр.) Іэиуб и ныбжьэгъуищым я щапхъэ Іейм щегупсыскІэ израил цІыхухэм къагурыІуэфынут нэгъуэщІхэм дэІэпыкъуну щыхэтым деж, сыт жаІэн икІи ящІэн хуэмейми.

8. Гугъуехь пэщІэхуа къуэш, шыпхъухэм дащыдэІэпыкъум деж сыт зыщыдгъэгъупщэн хуэмейр? (Сурэтхэми феплъ.)

⁸ Іэиуб теухуа хъыбарыр дэ нобэ дапхуэдэу къызэрыддэІэпыкъур? Гугъуехь пэщІэхуэ къуэш, шыпхъухэм дадэІэпыкъуну дэ дыхущІокъу. Ауэ Іэиуб и ныбжьэгъуищым ящІа щыуагъэхэм хуэдэ тщІэну дыхуейкъым. Япэрауэ, гупсысэ гуэрым дыкъыхуэкІуэн щхьэкІэ, Іуэхур нэгъэсауэ зэхэдгъэкІын хуейщ. ЕтІуанэрауэ, Элифаз ещхьу ди чэнджэщыр зытегъэщІауэ щытын хуейр ди щІэныгъэракъым, атІэ Алыхьым и Псалъэращ (Иов 4:8; 5:3, 27). Ещанэрауэ, цІыхум пхъашэу икІи дгъэкъуаншэу депсэлъэн хуейкъым. ДауикІ, Элифази адрей Іэиуб и ныбжьэгъухэми жаІам пэж гуэр хэлът, уеблэмэ, апостол Паули Элифаз жиІа псалъэхэр къигъэсэбэпауэ щытащ. (Иов 5:13 итыр 1 Коринф 3:19 итым евгъапщэ.) Ауэ, дапхуэдэу мыхъуами, Іэиуб и ныбжьэгъуищым Алыхьым теухуауэ жаІам и нэхъыбэр пэжтэкъым икІи абы Іэиуб и гур хигъэщІт. Иегови жиІащ абыхэм пцІы зэраупсар (Иов 42:7, 8). Аращи, зыгуэрым чэнджэщ щеттым деж ди псалъэхэмкІэ ар едгъэгупсысын хуейкъым Иеговэ Алыхь гущІэгъуншэу икІи абы и лъагъуныгъэр къыпхуэмылэжьыну. АдэкІэ Елиуй и щапхъэфІым сытым дыхуигъасэми дыхэплъэнщ.

ЕЛИУЙ ИГЪЭЛЪЭГЪУА ЩАПХЪЭФІЫР

9. Іэиуб и ныбжьэгъуищым псэлъэн яуха иужьи, ар дэІэпыкъуэгъу щІыхуэныкъуэр сытыт икІи Иеговэ дапхуэдэу абы зэрыдэІэпыкъуар?

⁹ Іэиубрэ и ныбжьэгъуищымрэ апхуэдизкІэ куэдрэ зэдэуати, Библием ит псалъащхьэу 28 къапсэлъащ. И нэхъыбэм ахэр Іэиуб зэрыхуэмыарэзыр икІи зэрыхуэгубжьыр къагъэлъэгъуауэ аращ. ГъэщІэгъуэнкъым, Іэиуб и Іуэхур зыкІи нэхъыфІ зэрымыхъуар. Ар иджыри гупсэхугъуэрэ чэнджэщыфІрэ хуэныкъуэт. Арати, Иеговэ Елиуй къигъэсэбэпри, абы дэІэпыкъуащ. Ауэ Елиуй нэхъ пасэу сыт а Іуэхум щІыхэмыІэбар? Абы жеІэ: «Сэ сыщІалэщ, фэ ныбжь фиІэщ. Абы къыхэкІкІэ, пщІэ фхуэсщІти, сэ зыри жысІакъым» (Иов 32:6, 7). Елиуй къыгурыІуэт и нэхъыбэм ныбжь зиІэхэм илъэс куэд къызэрагъэщІам икІи щІэныгъэ нэхъыбэ зэраІэм къыхэкІкІэ, ахэр нэхъ Іущу зэрыщытыр. Аращ абы шыІэныгъэ хэлъу Іэиубрэ абы и ныбжьэгъухэмрэ жаІэм щІедэІуар. Ауэ абыхэм псэлъэн щаухам, Елиуй хуэмышэчыжу жиІащ: «Ныбжьым езыр-езыру Іущ уищІкъым, икІи жьы хъуахэм я закъуэкъым сытыр пэжми къызыгурыІуэр» (Иов 32:9). АдэкІэ Елиуй сыт жиІар икІи дапхуэдэу ар зэрыжиІар?

10. Елиуй сыт ищІар Іэиуб зэрымызахуэр жриІэн ипэ? (Иов 33:6, 7).

¹⁰ Елиуй Іэиуб зэрымызахуэр жриІэн ипэ, абы ифІ зэрызрихуэр икІи дэІэпыкъуну зэрыхуейр къыгуригъэІуащ. Дапхуэдэу? ЯпэщІыкІэ ар губжьами, и губжьыр ирикъухри, Іэиуб гуапэу епсэлъащ (Иов 32:2—5). Псалъэм папщІэ, Елиуй жиІащ: «Алыхь пэжым и пащхьэ уэри сэри дызэхуэдэщ». (Къеджэ Иов 33:6, 7.) Абы нэмыщІ Елиуй Іэиуб жиІам фІыуэ зэредэІуар къигъэлъэгъуащ, абы жиІа гупсысэ нэхъыщхьэхэр зэрыжиІэжамкІэ (Иов 32:11; 33:8—11). Елиуй Іэиуб жиІа псалъэхэр къигъэсэбэпри, зэрымызахуэр къыгуригъэІуэжащ (Иов 34:5, 6, 9; 35:1—4).

11. Елиуй Іэиуб дапхуэдэу чэнджэщ зэрыритар? (Иов 33:1).

¹¹ Елиуй Алыхьым хуэпэж Іэиуб чэнджэщ щритым, абы и пщІэр ириудыхакъым. Псалъэм папщІэ, абы Іэиуб и цІэмкІэ зыхуигъазэт. Ауэ Элифаз, Билдад, Цофар сымэ апхуэдэу ящІауэ къыщІэкІынукъым. (Къеджэ Иов 33:1.) Елиуй ищІэжу къыщІэкІынт Іэиубрэ и ныбжьэгъуищымрэ щызэдауэм щыгъуэ яхэпсэлъыхьыну зэрыхуеяр. Абы къыхэкІкІэ, Іэиуб и щхьэм ирилъытри, и гум илъыр жиІэну Іэмал иритащ (Иов 32:4; 33:32). Абы нэмыщІ Елиуй Іэиуб къыгуригъэІуащ абы жиІа языныкъуэ псалъэхэр зэрымытэмэмыр. Иджыри абы щабэу игу къигъэкІыжащ Иеговэ Іущу, къарууфІэу, захуащІэу зэрыщытыр икІи и лэжьакІуэ пэжхэр фІыуэ зэрилъагъур (Иов 36:18, 21—26; 37:13, 23, 24). Елиуй жиІа псалъэхэр Іэиуб къыдэІэпыкъуащ иужькІэ Иеговэ къыжриІэнум и гур хуигъэхьэзырыну (Иов 38:1—3). Елиуй и щапхъэр пасэм псэуа Алыхьым и лэжьакІуэхэм сыткІэ къадэІэпыкъуа икІи дэ нобэ абы сытым дыхуигъасэрэ?

12. 1) Иеговэ бегъымбархэр къигъэсэбэпурэ и лъэпкъым дапхуэдэу зэрыдэІэпыкъуу щытар? 2) Елиуй и щапхъэм Алыхьым и лэжьакІуэхэр сытым хуигъэсэфынут?

¹² Пасэм псэуа Алыхьым и лэжьакІуэхэр Елиуй и щапхъэм сытым хуигъэсэфынут? Алыхьым щІэх-щІэхыурэ бегъымбархэр къигъэсэбэпт и лэжьакІуэхэм чэнджэщ яритын икІи игъэсэн щхьэкІэ. Псалъэм папщІэ, хеящІэхэр щытета зэманым Иеговэ бегъымбар цІыхубз Девори, ныбжьыщІэу щыт Самуели къигъэсэбэпащ и лъэпкъыр иунэтІын икІи чэнджэщхэр иритын щхьэкІэ (Суд. 4:4—7; 5:7; 1 Сам. 3:19, 20). Пащтыхьхэр щытета зэманми Иеговэ бегъымбархэр къигъэсэбэпт и лъэпкъыр пэжу къыхуэлэжьэну, гъуэгу пэжым текІахэми къагъэзэжыну дэІэпыкъун щхьэкІэ (2 Сам. 12:1—4; Апост. 3:24). Елиуй и щапхъэр Алыхьым и лэжьакІуэ пэжхэм къадэІэпыкъуфынут, абыхэм чэнджэщ щаткІэ сыт жаІэнуми икІи дапхуэдэу жаІэнуми къагурыІуэн щхьэкІэ.

13. Елиуй и щапхъэр дапхуэдэу дэ къызэрыддэІэпыкъур?

¹³ Елиуй и щапхъэр дапхуэдэу нобэ къызэрыддэІэпыкъур? Елиуй и щапхъэр пасэ зэманым псэуа бегъымбархэм я закъуэкъым сэбэп зыхуэхъур, атІэ нобэ дэри къытхуохъу. Бегъымбархэм хуэдэу дэри Алыхьым и мурадыр цІыхухэм яжыдоІэ икІи Библием итымкІэ дадогуашэ. Абы нэмыщІ ди къуэш, ди шыпхъухэми я фІэщхъуныгъэр догъэбыдэ икІи догъэгушхуэ (1 Кор. 14:3). Псом хуэмыдэу, зэхуэсым и нэхъыжьхэм Елиуй щапхъэ трахын хуейщ. Ахэр щабэу, гуапэу щытын хуейщ, цІыхум и лъэр зэрыщІэхуам къыхэкІкІэ, зэмыгупсыса псалъэхэр щыжиІэм дежи (Иов 6:3; 1 Фес. 5:14).

14, 15. Зэхуэсым и нэхъыжьхэм Елиуй дапхуэдэу щапхъэ трах зэрыхъунур?

¹⁴ Зы Іуэхугъуэ ди нэгу къыщІэдгъэхьэнщ. Зэхуэсым и нэхъыжьым гу лъетэ ди шыпхъур зыгуэрым зэригъэнэщхъейм. Абы зы къуэш къыздещтэри, шыпхъур ягъэгушхуэн щхьэкІэ и деж макІуэ. А шыпхъум жеІэ хъыбарыфІыр зэригъэІур, зэІущІэхэми зэрыкІуэр, ауэ япэм гуфІэгъуэ иІам хуэдэ зэримыІэжыр. Сыт адэкІэ къуэшхэм ящІэнур?

¹⁵ ЯпэщІыкІэ шыпхъум гуфІэгъуэр щІыфІэкІуэдам и щхьэусыгъуэр абыхэм зыхагъэкІыну къыщІэкІынщ. Абы щхьэкІэ къуэшхэм шыІэныгъэ яхэлъу шыпхъум жиІэм фІыуэ едэІуэн хуейщ. Шыпхъум и гугъэу пІэрэ Алыхьым фІыуэ къилъэгъуну хуэмыфащэу? Е и щхьэр зыхуей зэрыхуигъэзэжыным иримыгузавэІуэу пІэрэ? (Лк 21:34). Къуэшхэр а шыпхъум щытхъунущ и гугъуехьхэм емылъытауэ, ар зэІущІэхэм зэрыкІуэм икІи хъыбарыфІри зэригъэІум щхьэкІэ. Ауэ къуэшхэм Іуэхур зытетыр зэхагъэкІа иужь, абыхэм Библиер къагъэсэбэпу, Иеговэ фІыуэ зэрилъагъум шэч къытримыхьэну шыпхъум дэІэпыкъунущ (Гал. 2:20).

ИОВ ТХЫЛЪЫР АДЭКІИ СЭБЭП КЪЫФХУРЕХЪУ

16. АдэкІи Иов тхылъым сэбэпынагъ къытхуихьын щхьэкІэ сыт тщІэ хъунур?

¹⁶ Иов тхылъым сыту гупсысэфІ куэд ит! Мыбы ипэ дджа статьям дэ къыщытщІащ Алыхьым гугъуехьхэр щІыщигъэІэм и щхьэусыгъуэмрэ теубыдагъэ тхэлъу ахэр зэрытшэчынымрэ. Мы статьями дыщытепсэлъыхьащ Іэиуб и ныбжьэгъуищым щапхъэ тедмыхыу, Елиуй ещхьу нэгъуэщІхэр дапхуэдэу дгъэгушхуэ икІи чэнджэщ етт хъунуми. Аращи, зыгуэр бгъэгушхуэн е чэнджэщ ептын хуеймэ, Иов тхылъым ит щапхъэхэр къэгъэсэбэп. А тхылъым уэ куэд щІауэ уемыджамэ, мурад зыхуэбгъэувыж хъунущ абы иджыри къытебгъэзэжу уеджэну. Шэч хэмылъу сэбэпынагъ къыпхуэзыхьын гупсысэ куэд уэ абы иджыри къыщыбгъуэтыфынущ.